Kaponda Mateo 17:1-27
17 Mińa mutoba ombusa nika, na Yesu a no̱ngo̱ Petro, Yakobo na munańango ao Yohane, a we̱nge̱me̱ye̱ na babo̱ omo̱ń a mudongo mwasam.
2 Nde a ta a tukwabe̱ oboso babu, boso bao bo pańa ka wei, mbo̱t’ao pe̱ i lo̱mbo̱* ka mwaye.
3 Nde ombwa! ba ta be̱ne̱ Mose na Elia ba makwala na Yesu.
4 Na Petro a kwalane̱ Yesu ná: “A Sango, nika ńe nde lambo la bwam ná di be̱ owan. Yete̱na o to̱ndi, na malonga mino̱ko̱ milalo, mō̱ ońol’ango̱, mō̱ ońola Mose, mō̱ pe̱ ońola Elia.”
5 Nde ke̱ a dia a mato̱po̱, ombwa! diwindiwindi di mapańe̱ di ta di kudumane̱ babo̱, nde ombwa! doi di ta di wa o diwindiwindi di kwala ná: “Nun nde e Mun’am ńa ndolo ńena na do̱lisanno̱, bińo̱ sengane̱ mo̱.”
6 Ba sengino̱ nika, na bokwedi ba ko̱ wase, ba bwa bo̱ngo̱ bwambi.
7 Na Yesu a sisea, a tapa babo̱, a kwala ná: “Bińo̱ te̱me̱. Lo si bwa bo̱ngo̱.”
8 Ba mamno̱ milopo, ba s’e̱n pe̱ to̱ moto, o sumo te̱ Yesu mo̱me̱ne̱.
9 Niponda ba tano̱ ba siba o mudongo, na Yesu anea babo̱ ná: “Lo si langwea to̱ moto di je̱ne̱, natē̱ Mun’a moto a pumbwabe̱le̱.”
10 Na bokwedi ba baise̱ mo̱ myuedi ná: “Ońola nje so̱ babiedi ba kalat’a Loba ba makwalano̱ ná Elia angame̱n se̱le̱ po̱ e?”
11 Na mo̱ alabe̱ babo̱ ná: “Ye mbale̱ Elia a mapo̱, a me̱nde̱ pe̱ te̱se̱ mambo me̱se̱.
12 Nde na malangwea bińo̱ ná Elia a po̱i, nde ba s’embi mo̱, ba bolane̱ pe̱ nde mo̱ kaponda mpuli mabu. Nikame̱ne̱ pe̱ nde Mun’a moto a me̱nde̱no̱ taka o mā mabu.”
13 ’Wa nde bokwedi ba so̱ṅtane̱no̱ ná a ta nde a kwalisane̱ babo̱ ońola Yohane Mudubisedi.
14 Ba po̱ino̱ be̱be̱ na dimuti, na moto mō̱ a sisea mo̱ be̱be̱, a numea mo̱ mabo̱ngo̱, a kwala ná:
15 “A Sango, bwea mun’am ńa mome ndedi, ebanja a maboa mudo̱ngi, ye pe̱ mo̱ bobe jita, a yo̱ki ko̱ o wea na o madiba.
16 Na wanedi mo̱ bokwedi bo̱ngo̱, nde ba si we̱li bo̱lise̱ mo̱.”
17 Na Yesu a kwala ná: “A ńo̱ṅo̱n ni si be̱n dube̱ na ńa bobe, na je nde na bińo̱ nate̱na su ininga e? Na we̱lisane̱ nde bińo̱ nate̱na su ininga e? Bińo̱ wanea mba mo̱ wan.”
18 Ba wanno̱ mo̱, na Yesu a domea mudī ma bobe, mu busa nu muna o ńolo, na mo̱ a bo̱lisabe̱ dibokime̱ne̱.
19 Na bokwedi bala je̱ne̱ Yesu o mbasan, ba baise̱ mo̱ ná: “Ońola nje di si we̱lino̱ busise̱ mo̱ e?”
20 Na Yesu alabe̱ babo̱ ná: “Ońolana dube̱ lańu di salo. Na mbale̱ na malangwea bińo̱ ná, dube̱ lańu di kolo te̱ ka mbolako nisadisadi,* lo me̱nde̱ langwea mun mudongo ná: ‘Asumwe̱ wan, te̱me̱ wone̱,’ nde mu me̱nde̱ jasumwe̱, to̱ lambo di si me̱nde̱ buka bińo̱.”
21 ——
22 Niponda Yesu na bokwedi bao ba tano̱ ba ko̱to̱me̱ o Galilea nde a langwedino̱ babo̱ ná: “Mun’a moto a me̱nde̱ bakabe̱ o mā ma bato,
23 ba me̱nde̱ bwa mo̱, nde o buńa bo londe̱ milalo, a me̱nde̱ pumbwabe̱le̱.” Na bokwedi bao ba bwa ndutu jita.
24 Yesu na bokwedi bao ba po̱ino̱ o Kapernaum, na bato bena ba ta ba ko̱te̱le̱ njang’a drakma iba ba sisea Petro be̱be̱, ba baise̱ mo̱ ná: “Mo̱ mulēd’ańu a si masanga njang’a drakma iba e?”
25 Na mo̱ alabe̱ ná: “A masanga.” Nde ingedino̱ o ndabo, na dibokime̱ne̱ Yesu a baise̱ mo̱ ná: “A Simon, o mo̱nge̱le̱ ná nje, ba nja kiṅ’a wase i masangise̱no̱ njangi* na tax e? Bana babu nga be̱n ba bato e?”
26 Na mo̱ alabe̱ ná: “Be̱n ba bato;” na Yesu a kwalane̱ mo̱ ná: “Bana ba si be̱n so̱ ná ba sawe tax.
27 Nde ná di si be̱ babo̱ eso̱njisan, ala o munja, o pimbe jo̱bi, o no̱nge su’a boso ńena o me̱nde̱no̱ damea, o tele̱ te̱ mo̱ mudumbu, o me̱nde̱ so̱ mo̱ni ma silba.* No̱ngo̱ mo̱, o bole babo̱ mo̱ ońola wa na mba.”
Maki
^ To̱ “i sanga.”
^ Na Grikia si’na·pi. Na Fre̱nsi Moutarde.
^ To̱ “kome̱.”
^ Na eyem’a Grikia, “State̱r,” nika ńe nde drakma ine̱i.
