Kaponda Mateo 11:1-30
11 Yesu a bo̱le̱no̱ bola dom lao la bokwedi na baba bediedi, na mo̱ asumwe̱ wa wuma, ala lee̱ na te̱ dikalo o mindi mipe̱pe̱.
2 Nde Yohane a sengino̱ o beboa mambo mena Kristo a tano̱ a bola, na mo̱ a loma bokwedi bao
3 o baise̱ mo̱ ná: “Mo̱ wa nde we nu ńangame̱n po̱, nga jangame̱n jenge̱le̱ nupe̱pe̱ e?”
4 Na Yesu alabe̱ babo̱ ná: “Bińo̱ ala, lo langweye Yohane nje leno̱ senga, na nje leno̱ je̱ne̱:
5 Bandima ba ne̱ne̱, bam’boko ba nidangwa, bamulo̱ngo̱ ba nisangisabe̱, bando̱ki ba nisenga, bawedi ba nipumbwabe̱le̱, batuedi pe̱ ba nisenga myango ma bwam.
6 Bonam na moto nu si maso̱ne̱ mba njo̱m to̱ po̱ o so̱njo̱.”
7 Niponda bokwedi ba Yohane ba tano̱ bala, na Yesu a botea langwea mamuti jombwea Yohane ná: “Nje bińo̱ lalono̱ jombwa o eyaṅ e? Esosongo yena e masousabe̱ na ngo̱ e?
8 Nje so̱ bińo̱ lalono̱ jombwa e? Moto nu bo̱ti mbo̱t’a mpesa e?* Mo̱ ba bena ba mabo̱te̱ mbo̱t’a mpesa ba si maso̱be̱ nde o mandabo ma kiṅe̱ e?
9 Bińo̱ lalo so̱ nde jombwa nje e? Muto̱ped’a mudī e? Na mbale̱, na malangwea bińo̱ ná, a buki na muto̱ped’a mudī.
10 Ońol’ao nde e tilabe̱no̱ ná: ‘Ombwa! Na maloma mot’am ńa mwe̱ndi ná a se̱le̱ wa oboso,* ńena nu me̱nde̱ boṅsane̱ ngea ońol’ango̱!’
11 Na mbale̱ na malangwea bińo̱ ná, oteten a bato ba yabe̱ na bito, to̱ mō̱ a si buki Yohane Mudubisedi, nde nusadi buka be̱se̱ o Janea la mo̱ń a buki mo̱.
12 Botea o mińa ma Yohane Mudubisedi nate̱na tatan, bato ba mapo̱ngo̱ miwe̱n minde̱ne̱ o jingea o Janea la mo̱ń, ba pe̱ ba mapo̱nge̱ mi miwe̱n ba matongwe̱le̱.
13 Ebanja be̱se̱, Bato̱pedi ba mudī na Mbenda ba bīse̱ mambo mena ma ta mangame̱n bolane̱, nate̱na Yohane;
14 e be̱ ná bińo̱ lemedi nika to̱ ke̱m, mo̱ nde e ‘Elia ńangame̱n po̱.’
15 Nu nu be̱n matoi a senge.
16 “Na nja na malangisane̱no̱ nin ńo̱ṅo̱n e? Ńe nde ka bana basadi ba jai o don bena ba malangweye̱ mako̱m mabu ma loko ná:
17 ‘Di lo̱ngedi bińo̱ isese, nde lo si sai ngando; jei mbembe, nde lo si bo ndutu.’*
18 Mulemlem pe̱, Yohane a po̱i, a si mada, a si mańo̱ pe̱ to̱, nde bato ba makwala ná: ‘A be̱n mudī ma bobe.’
19 Mun’a moto a po̱i, mo̱ a mada, a mańo̱ pe̱, nde bato ba makwala ná: ‘Ombwa! E nde mot’a mudesi na mot’a muńo̱si, diko̱m la bako̱tedi na babole̱ bobe.’ Nde, dibie̱ di te̱se̱be̱ nde ná sim* tongwea na bebolo bao.”
20 Na mo̱ a botea sa mindi owe̱ni a bolino̱ dongo dinde̱ne̱ la betańsedi bao, ońolana baje̱ oten ba s’ate̱le̱:
21 “Mbeu a ńolo na wa a Korasin! Mbeu a ńolo na wa a Betsaida! Ońolana betańsedi be bolabe̱ ombo’ańu be bolabe̱ te̱ o Tiro na o Sidon, ke̱ ye pond’a bwaba baje̱ oten ba wusano̱ jate̱le̱ na bo̱to̱ mukopa ma dibato* na ja pe̱ o dibudu.
22 Nde na malangwea bińo̱ ná, o buńa ba Muka e me̱nde̱ be̱ bińo̱ ndutu buka ońola Tiro na Sidon.
23 A wa Kapernaum pe̱, o mo̱nge̱le̱ ná o me̱nde̱ jasabe̱ nate̱na o mo̱ń e? O so̱ngo̱* nde o me̱nde̱no̱ siba; ońolana betańsedi be bolabe̱ ombo’ango̱ be bolabe̱ te̱ o Sodom, ke̱ mu mundi mu dia nate̱na bon ba we̱nge̱.
24 Nde na malangwea wa ná, o buńa ba Muka e me̱nde̱ be̱ wa ndutu buka ońola mundi ma Sodom.”
25 O ni ponda me̱ne̱, na Yesu a kwala ná: “Na masesa wa o mpoma Tete̱, Sango a mo̱ń na ńa wase, ońolana o wutane̱ badibie̱ na bato bena boko man mambo nde o bīse̱ mo̱ bana basadi.
26 E, a Te, ońolana we̱n bwam o bola nika.
27 Sango am a bake̱ mba mambo me̱se̱, to̱ moto a si bi Muna bwambwam o sumo te̱ Tete̱, to̱ moto pe̱ a si bi Tete̱ bwambwam o sumo te̱ Muna na nu ńena a mapulano̱ bīse̱ nja Tete̱ eno̱.
28 Ya na mba, a bińo̱ be̱se̱ bena lo wo̱li na bena lo bambe̱ mūna mu dili, nde na malo̱ko̱ bińo̱.
29 Bińo̱ no̱ngo̱ eko̱ko̱s’am, lokwe pe̱ na mba, ebanja ne pī, na sibise̱ pe̱ ńolo, nde lo* me̱nde̱ kusa lo̱ko̱mea.
30 Ebanja eko̱ko̱s’am e wam,* mūna mam pe̱ mu titi bodilo.”
Maki
^ To̱ “mbo̱t’a le̱mbule̱mbu.”
^ Na eyem’a Grikia, “oboso bo̱ngo̱.”
^ To̱ “bińo̱ lo s’umbi dia o bwanga na ndutu.”
^ To̱ “di membabe̱ nde.”
^ Nika ńe nde mukuta to̱ dibato bato ba tano̱ ba bo̱to̱ o le̱be̱ nuwedi, o lee̱le̱ ná ba mabwa ndutu, o lee̱le̱ jate̱le̱, . . .
^ To̱ “Hade̱s,” nika ńe nde so̱ngo̱ a mbel’a moto ńe̱se̱.
^ To̱ “midī mańu.”
^ To̱ “e wam o bambe̱.”
