Mutaka ma jita mwe ná mu bouse̱ wa o eyobo na o mo̱nge̱le̱. Mwe na mo̱me̱ne̱ mu wanea wa mitakisan mipe̱pe̱ me ngińa buka mi mena me o bwese̱ wa ndutu.

Malea ma mongwane̱ o wutise̱ mutaka

• 

   O si lambe̱ toi jita o senga myango ma bobe. O titi eto̱m o bia mambo me̱se̱ ma mombweye̱ mitakisan mō̱ to̱ ndutu po̱ ńena ni kweledi bato. O wasi te̱ jombwa o television, langa to̱ senga mambo ma bobe me̱se̱ ma mabolane̱ nika e me̱nde̱ nde batea wa bo̱ngo̱, o bo̱lo̱ne̱ pe̱ dipita.

   Bete̱sedi ba Bibe̱l: “Mudī mu pungwedi mu manjise̱ bewese.”—Minia 17:22.

   “E bo̱bi ná moto a be̱ muto̱nde̱ so̱ṅtane̱ nje ye peńa to̱ nje ya bobe ye̱se̱ e matombe̱, nde nika e titi ede̱mo a bwam. Mutaka mam mu mawo̱ye̱ eyeka ke̱ neki mbame̱ne̱ o senga mibia ma bobe.”—John.

   To̱ti ońola dutea: Mo̱ we eto̱m ponda ye̱se̱ o wasa bia nje ye̱se̱ e matombe̱ e?

• 

   Be̱ne̱ ko̱lo̱ngo̱ne̱ la bwam. Keka o wema, o da, o bola bebolo ba mboa, na nanga pe̱ o mulemlem ma ponda buńa te̱. O te̱se̱ te̱ mudango ma mambo mo̱ngo̱ ma bola nde o tingame̱ pe̱ na mo̱, nika e me̱nde̱ jongwane̱ wa o wutise̱ mutaka mo̱ngo̱, we̱ne̱ pe̱ ná mambo me̱se̱ me bwam.

   Bete̱sedi ba Bibe̱l: “Dutea na ngiń’ebolo ba matombwane̱.”—Minia 21:5.

   “Ponda diboa la CORONA di botedino̱, na si ta pe̱ na bola nje na tano̱ na ko̱lo̱ngo̱ne̱ bola, na botea tombise̱ ponda buka dime̱ne̱ o longe̱le̱ ńolo. Nika na tano̱ na pula bolane̱ pond’am bwam, na te̱se̱ so̱ mudango ma mambo nangame̱nno̱ bola buńa te̱.”—Joseph.

   To̱ti ońola dutea: Mo̱ o te̱se̱ mambo ma bola ma mongwane̱ wa o je̱ne̱ o su la buńa te̱ ná o boli lambo la mweńa e?

• 

   Soke̱ miso̱ o mambo ma bwam. O tombise̱ te̱ pond’ango̱ o dutea ná “na bia te̱,” to̱ o jo̱nge̱le̱ mambo ma bobe mena ma me̱nde̱ bolane̱ o mińa mi maye̱, nika e me̱nde̱ nde batea wa mutaka. O diwengisan o̱nge̱le̱ nde mambo ma mabwese̱ mulema mo̱ngo̱ muńe̱nge̱.

   Bete̱sedi ba Bibe̱l: ‘Bola masoma.’—Kolose 3:15.

   “Bolanga ba Bibe̱l bo mongwane̱ mba ná na si londe̱ mo̱nge̱le̱ mam na mambo ma bobe. Nik’e mongwane̱ ná na soke̱ nde mo̱nge̱le̱ mam o mambo ma bwam mo̱ na mo̱. Nika ńe ná ńe̱ne̱ne̱ ka lambo disadi, nde nika ńe mweńa jita!”—Lisa.

   To̱ti ońola dutea: Mo̱ o ko̱lo̱ngo̱ne̱ nde soke̱ mo̱nge̱le̱ mo̱ngo̱ o mambo ma bobe ma matakise̱ longe̱ lo̱ngo̱ nde o dimbea ma bwam e?

• 

   O̱nge̱le̱ bane̱. Niponda mo̱nge̱le̱ mo̱ngo̱ ma sokame̱no̱ nde o mutaka mo̱ngo̱, jo̱nge̱le̱ laboso di mapo̱ wa o mulopo le nde ná o be̱ muso̱lo̱ki. Nde o mulopo ma bola nika, dutea nde ne̱ni weno̱ ná wongwane̱ bane̱.

   Bete̱sedi ba Bibe̱l: ‘O s’ombwea mambo mo̱ngo̱ mo̱me̱ne̱, nde mambo ma bane̱ bape̱pe̱ pe̱.’—Filipi 2:4.

   “Ne muńe̱nge̱ ke̱ na mombwea bane̱ bape̱pe̱. Na mabolea babo̱ mambo ma mabwese̱ babo̱ muńe̱nge̱, nik’e mongwane̱ mba o lo̱ko̱ mutaka mam, ebanja na si mabe̱ne̱ pe̱ ponda o jo̱nge̱le̱ mambo ma matakise̱ mba.”—Maria.

   To̱ti ońola dutea: Mo̱ o bi moto nu be̱n ńo̱ng’a jongwane̱ e? Nje weno̱ ná o bola o jongwane̱ mo̱ e?

• 

   Wasa ná o be̱ne̱ ja la bwam. Tuna ńolo eyeka, o ko̱ pe̱ iyo̱ eyeka. Da da di membe̱ wa ńolo. Wombwedi te̱ ja lo̱ngo̱ la bwam nik’e mongwane̱ wa o be̱ne̱ mo̱nge̱le̱ ma bwam, ńeka pe̱ wa mutaka.

   Bete̱sedi ba Bibe̱l: ‘Tuna la ńolo di matombwane̱.’—1 Timoteo 4:8.

   “Biso̱ na mun’am di titi ná di tuna ńolo o eboko ka nje te̱ di wusano̱ to̱ndo̱ bola, o ndabo nde di matunano̱ ńolo ponda na ponda te̱. Nik’e mongwane̱ biso̱ o be̱ muńe̱nge̱ na be̱ne̱ so̱ṅtane̱le̱ la bwam.”—Catherine.

   To̱ti ońola dutea: Mo̱ e mapula wa ná o bate da da di mabole̱ wa ngudi na bata pe̱ tuna ńolo ná o be̱ne̱ ja la bwam e?

 O sumo te̱ we̱le̱ la ma malea o ebolo, bato jita be̱n ná ba matombwane̱ eyeka ke̱ boko makaki ma Bibe̱l ma kie̱le̱ ni maye̱ ńa bwam. Ombwa mulopo m’ekwali “Nje Janea la Loba di me̱nde̱no̱ bola e?”