Yā ponda to̱ ininga weno̱ o yengea moto, nde o botedi be̱ne̱ penda oteten. Mo̱ bińo̱ langame̱n walane̱ mu mulatako oboso to̱ jembe̱ mo̱ e? Nin tema ńe ná ńongwane̱ wa o no̱ngo̱ bedomsedi.

O nin tema

•  Ne̱ni je̱ne̱ penda ńe wa oteten

•  No̱ngo̱ la bedomsedi

•  Yete̱na o domse̱ o jembe̱ mulatako

 Ne̱ni je̱ne̱ penda ńe wa oteten

 Ombusa mome na muto yengane̱le̱ ońola pambo a ponda po̱ te̱nge̱, be ná ba so̱ ná ba si mala bwam ka nje te̱ ba tano̱ bo̱nge̱le̱. K’eyembilan:

•   Mō̱ a to̱ndi wala o saw’a munja, nde nune̱ a to̱ndi nde wala o miyenga o mundi.

•   Mō̱ a kenji jita, nde nune̱ e pī jita.

•   Mō̱ a titi mbale̱ ponda iwo̱, nde nune̱ e mbale̱ ponda ye̱se̱.

 Maka ná ben bete̱medi belale̱ be diwengisan jita. Baboso be malee̱ nde ná ba to̱ndi mambo me diwengisan; be londe̱ beba, ná ba be̱n ebe̱yedi ye diwengisan; be londe̱ belalo pe̱, ná ba be̱n bedangwedi be diwengisan.

 Myuedi ońola dutea: Wombwedi te̱ be bete̱medi belale̱, njika lambo di me̱nde̱ be̱ wa ndutu jita o we̱lisane̱ yete̱na lo bane̱ e? Mo̱ mambo me, bińo̱ babane̱ leno̱ ná lo keka po̱ngulane̱ e?

 Mome na muto be ná ba to̱ndo̱ mambo me diwengisan to̱ be̱ne̱ ebe̱yedi ye diwengisan, nde ba be̱ te̱ nde bonam o diba labu. Di si dimbea ná wala bwam mwemba, nik’e si mapula kwala be̱ ńai po̱. Ponda iwo̱, mome na muto be ná bokwa o to̱ndo̱ nje nune̱ a to̱ndino̱, to̱ mo̱me̱ne̱ busane̱ tombwane̱ o di be̱ne̱ labu la ebe̱yedi ye diwengisan. a

 O mune̱ mudi, ye mweńa ná moto o mabano̱ a be̱ne̱ bedangwedi be bowan na bo̱ngo̱; nik’e mapula nde kwala be̱ne̱ mulemlem ma dube̱, bupe̱ milemlem ma bete̱sedi na be̱ne̱ jo̱nge̱le̱ diwo̱ jombwea nje ye bwam na nje ye bobe. E titi te̱ nika, wangame̱n nde je̱ne̱ nika ka njo̱m a bwam o jembe̱ mulatako mańu.

 Di no̱nge te̱ k’eyembilan si be̱ne̱ la mulemlem ma dube̱. Kalati ni be̱n tema na Inglisi ná Fighting for Your Marriage e makwala ná: “Ponda te̱ muwaso mu po̱ngo̱be̱no̱, e so̱be̱ ná kwed’a diba e me̱ne̱ne̱ nde o jita la ngedi o maba mena babaedi ba si be̱nno̱ mulemlem ma dube̱.”

 Bete̱sedi ba Bibe̱l: “Lo si lata mulemlem m’eko̱ko̱so̱ na ba ba si dube̱.”—2 Korinto 6:14.

 No̱ngo̱ la bedomsedi

 Bibe̱l e makwala ná babaedi “ba me̱nde̱ kusa ndutu o eyobo.” (1 Korinto 7:28) O si ńaka so̱ yete̱na lo be̱n ndutu iwo̱ niponda bińo̱ leno̱ o yengane̱le̱.

 Lo be̱n te̱ myambo misadi, nik’e si mapula kwala ná mulatako mańu mu titi ná mu tongwe̱le̱. Baise̱ nde wame̱ne̱ nga lo mawe̱le̱ domse̱ mo̱ na musango na pī. Bińo̱ loko te̱ o bola nika, nik’e me̱nde̱ jongwane̱ bińo̱ ke̱ lo bane̱.

 Bete̱sedi ba Bibe̱l: “Bińo̱ leane̱ muyao mō̱ na nune̱, lo be̱ ndedi, lo lakisane̱ mawuse̱ mō̱ na nune̱.”—Efeso 4:32.

 O mune̱ mudi, lo be̱n te̱ myambo ońola mambo ma mweńa ponda ye̱se̱, nika ńe ná e lee̱ ná bińo̱ babane̱ lo titi ná lo be̱ mwemba. Ye pe̱ te̱ nika, ye bwam o so̱ṅtane̱ nika tatan buka ombusa ponda ke̱ lo mábane̱!

 To̱ti la mweńa: Yete̱na penda ńe wa oteten jita jombwea moto weno̱ o yengea to̱ ná o mo̱nge̱le̱ ná o titi be̱be̱ ońola diba, o si bola biana to̱ lambo di titi!

 Bete̱sedi ba Bibe̱l: “Ńajangwa a mapomane̱ je̱ne̱ mbeu a ńolo, na mo̱ a se̱mbe̱ mo̱, nde belemā ba mala, na babo̱ ba kusa bobe.”—Minia 22:3.

 Yete̱na o domse̱ o jembe̱ mulatako

 Su la mulatako le ná di bwesane̱ ndutu jita. Nde, yete̱na mō̱ ńanu to̱ bińo̱ babane̱ lo be̱n penda oteten na mbale̱ jombwea mulatako mańu, ye ná e be̱ bwam ná bińo̱ lembe̱ o yengane̱le̱.

 Ne̱ni so̱ no̱ngea mambo e? O sumo te̱ ke̱ o si be̱n nde ńai nipe̱pe̱, ye bwam ná o si bolane̱ mwe̱ndi o telefon to̱ o ordinate̱r o bīse̱ moto ná o mawe̱le̱ su o mulatako mańu. Wasa nde pond’a bwam na epolo yangame̱n ná o bīse̱ mo̱ bedomsedi bo̱ngo̱.

 Bete̱sedi ba Bibe̱l: “To̱po̱ne̱ mō̱ na nune̱ mbale̱.”—Sakaria 8:16.

 Wembe̱ te̱ o yengea moto, mo̱ nik’e mapula nde kwala ná wa nde o si tongwe̱le̱ e? Tomtom! O si dimbea ná janda la pond’a yengane̱le̱ le nde ná ńongwane̱ wa o no̱ngo̱ bedomsedi: ba babe̱ na nu moto to̱ ke̱m. To̱ e be̱ nde ná mu mulatako mwembe̱, we ná te̱ nde o busane̱ belēdi ba mweńa oten.

 Baise̱ wame̱ne̱ ná: ‘Nje nokono̱ jombwea mbame̱ne̱ o mun mulatako e? Mo̱ mu mulatako mu lee̱ mba matongo ma longe̱ mō̱ nangame̱nno̱ pe̱te̱ ńaka e? Yete̱na ombusa ponda na domse̱ pe̱te̱ o yengea moto, nje neno̱ ná na bola diwengisan e?’