Ang World Health Organization nag-ingon nga ang pag-abuso sa kababayen-an komon kaayo sa tibuok kalibotan, ug kaylap kaayo ni samag epidemya, mao nga importante kaayo nga duna tay himoon aron mahunong ni. Gibanabana sa WHO nga halos 30 porsiyento “sa kababayen-an nga dunay karelasyon ang nakasinatig pisikal ug/o seksuwal nga pag-abuso” gikan sa ilang karelasyon. Ug ang usa ka report sa UN nagbanabana nga sa di pa dugay nga tuig, 137 ka babaye sa tibuok kalibotan ang mamatay kada adlaw sa kamot sa ilang karelasyon o sa laing membro sa pamilya. a

 Gipadayag tingali sa statistics ang kadako sa problema sa pag-abuso diha sa panimalay, pero wala ipakita niini ang emosyonal ug pisikal nga kasakit nga giantos sa matag biktima.

 Biktima ka ba sa pag-abuso diha sa panimalay? O naa ba kay kaila nga biktima niana? Kon mao, tagda ang mosunod nga mga punto gikan sa Bibliya nga makatabang.

  Dili nimo sala nga giabusohan ka

  Dunay tabang

  Wala ka mag-inusara

  Matapos ra ang pag-abuso diha sa panimalay

  Kon unsaon nimo pagtabang ang giabuso

 Ang giingon sa Bibliya: “Ang matag usa nato manubag sa Diyos.”​—Roma 14:12.

 Hinumdomi kini: Ang nag-abuso nimo maoy manubag sa iyang gibuhat.

 Kon ikaw ang basolon sa imong karelasyon sa iyang pag-abuso nimo, nasayop siya. Ang mga asawa angayng mahalon, dili abusohan.​—Colosas 3:19.

 Usahay, ang usa mangabuso tungod sa sakit sa pangutok, dili maayong eksperyensiya sa iyang gidak-an nga pamilya, o kahubog. Bisan pa niana, manubag siya sa Diyos sa iyang pagtratar nimo. Ug responsibilidad niya ang pagpaningkamot sa paghimog kausaban.

 Ang giingon sa Bibliya: “Naay kalamposan kon daghan ang magtatambag.”​—Proverbio 15:22.

 Hinumdomi kini: Kon gibati nimo nga nameligro ka o wala ka mahibalo kon unsay buhaton, makatabang ang uban.

 Nganong gikinahanglan nimo ang tabang sa uban? Ang pag-abuso diha sa panimalay maoy komplikado nga kahimtang. Malisdan tingali ka sa pagdesisyon kon unsay maayong buhaton kay daghan kag angayng konsiderahon, sama sa:

•   Imong kaugalingong proteksiyon o safety

•   Kaayohan sa imong mga anak

•   Imong pinansiyal nga kahimtang

•   Imong gugma sa imong karelasyon

•   Tinguha nga masalbar ang inyong relasyon kon magbag-o ang imong karelasyon

 Natural lang nga maglibog ka o mabug-atan sa imong situwasyon. Kang kinsa ka makapangayog tabang?

 Ang kasaligang higala o membro sa pamilya makahatag tingalig praktikal ug emosyonal nga tabang. Bisan ang pagpakig-estorya lang sa usa nga nagmahal nimo dako na kaayong tabang.

 Ang mga hotline para sa mga biktima sa pagpangabuso makahatag tingali dayon ug tabang. Kadtong tigtubag niini nga mga hotline makatabang nimo sa pagplano kon unsay buhaton aron maproteksiyonan ang imong kaugalingon. Kon moadmitir ang imong karelasyon nga nagkinahanglan siyag tabang ug gusto gyod niyang magbag-o, dunay hotline nga makahatag niyag sugyot kon unsay angayng himoon.

 Ang ubang grupo nga moresponde panahon sa emerhensiya makatabang nimo kon mameligro ka. Mahimong mag-apil ni sa mga doktor, nars, ug uban pa nga nabansay sa pagresponde panahon sa emerhensiya.

 Ang giingon sa Bibliya: “Si Jehova b duol niadtong mga dugmok ug kasingkasing; iyang luwason kadtong mga naluya ang buot.”​—Salmo 34:18.

 Hinumdomi kini: Ang Diyos nagsaad nga tabangan ka niya.

 Gimahal ka pag-ayo ni Jehova. (1 Pedro 5:7) Nasabtan niya kon unsa gyoy imong gihunahuna ug gibati. Makahupay siya nimo pinaagi sa Iyang Pulong, ang Bibliya. Ug gusto niya nga moampo ka kaniya. Dihang moampo ka, makapangayo ka niyag kaalam ug kusog nga imong gikinahanglan aron maatubang ang imong kahimtang.​—Isaias 41:10.

 Ang giingon sa Bibliya: “Sila magpuyo, ang tagsatagsa ilalom sa iyang punoan sa ubas ug sa iyang kahoyng igos, ug walay usa nga makapahadlok kanila.”​—Miqueas 4:4, footnote.

 Hinumdomi kini: Ang Bibliya nagsaad nga hapit nang moabot ang panahon dihang ang tanan makasinatig kalinaw sa ilang panimalay.

 Si Jehova nga Diyos lang ang dunay bug-os ug permanenteng solusyon sa tanan natong problema. Ang Bibliya nagsaad: “Iyang pahiran ang matag luha sa ilang mga mata, ug ang kamatayon mawala na, ug wala na unyay pagbangotan, pagtiyabaw, ug kasakit.” (Pinadayag 21:4) Nianang panahona, bisan ang dili maayong mga kasinatian makalimtan na kay mapulihan na kinig maayong mga eksperyensiya. (Isaias 65:17) Kini ang malinawong kaugmaon nga gitanyag sa Bibliya kanimo.