Si Jehova ang Akong Bahin
Si Jehova ang Akong Bahin
“Ako mao ang imong bahin ug ang imong panulondon sa taliwala sa mga anak sa Israel.”—NUM. 18:20.
1, 2. (a) Unsay kahimtang sa mga Levihanon kon bahin sa yutang panulondon? (b) Unsay gipasalig ni Jehova sa mga Levihanon?
HUMAN masakop sa mga Israelinhon ang dakong bahin sa Yutang Saad, si Josue nagbahinbahin sa yuta pinaagig ripa. Iyang gihimo kini uban sa Hataas nga Saserdoteng si Eleasar ug sa mga pangulo sa tribo. (Num. 34:13-29) Ang mga Levihanon wala hatagig yutang panulondon sama sa ubang tribo. (Jos. 14:1-5) Nganong wala man silay bahin? Gikalimtan ba sila?
2 Ang tubag anaa sa gisulti ni Jehova sa mga Levihanon. Siya mipasalig nga dili sila biyaan, nga miingon: “Ako mao ang imong bahin ug ang imong panulondon sa taliwala sa mga anak sa Israel.” (Num. 18:20) Pagkatalagsaong pasalig: “Ako mao ang imong bahin”! Unsay imong bation kon giingnan ka ni Jehova niana? Tingali ang una nimong reaksiyon, ‘Takos ba ko sa maong pasalig gikan sa Labing Gamhanan?’ Basin makapangutana ka sab, ‘Mahimo ba gayod sa di-hingpit nga Kristohanon karon si Jehova ingong ilang bahin?’ Kining mga pangutanaha naglangkit kanimo ug sa imong mga minahal. Busa atong susihon kon unsay kahulogan sa gipamulong sa Diyos. Makatabang kana nga atong masabtan kon sa unsang paagi mahimo sa mga Kristohanon karon si Jehova ingong ilang bahin. Ug sa mas espesipiko, siya mahimong imong bahin, langitnon man o yutan-on ang imong paglaom.
Si Jehova Nagtagana sa mga Levihanon
3. Isaysay kon sa unsang paagi napili sa Diyos ang mga Levihanon sa pag-alagad kaniya.
3 Sa wala pa ihatag ni Jehova ang Balaod ngadto sa Israel, ang mga ulo sa pamilya nagsilbing mga saserdote. Sa dihang gihatag sa Diyos ang Balaod, siya nagtudlog mga saserdote ug katabang gikan sa tribo ni Levi. Sa unsang paagi kini nahitabo? Sa dihang gihampak sa Diyos ang mga panganay sa Ehipto, iyang gibalaan ang mga panganay sa Israel alang sa linaing pag-alagad kaniya. Dayon ang Diyos mihimog dakong kausaban: “Akong kuhaon ang mga Levihanon . . . puli sa tanang panganay sa mga anak sa Israel.” Sanglit mas daghan ang panganayng mga anak nga lalaki sa Israel kay sa mga Levihanon, gipabayran ni Jehova sa ubang Israelinhon ang kapin. (Num. 3:11-13, 41, 46, 47) Busa ang mga Levihanon makasugod na sa ilang buluhaton sa pag-alagad sa Diyos.
4, 5. (a) Unsay gipasabot nga ang Diyos mao ang bahin sa mga Levihanon? (b) Sa unsang paagi ang Diyos nagtagana alang sa mga Levihanon?
4 Unsay kahulogan sa maong asaynment alang sa mga Levihanon? Inay hatagag yutang panulondon, si Jehova naghatag kanilag bililhong pribilehiyo sa pag-alagad. Ang “pagkasaserdote kang Jehova” mao ang ilang panulondon, o bahin. (Jos. 18:7) Ang konteksto sa Numeros 18:20 nagpakita nga sila dili makulangan sa materyal. (Basaha ang Numeros 18:19, 21, 24.) Ang mga Levihanon hatagan sa “matag ikapulong bahin sa Israel ingon nga panulondon nga baylo sa ilang pag-alagad.” Sila makadawat ug diyes porsiyento sa abot sa Israel ug sa mga liwat sa kahayopan. Sa baylo, ang mga Levihanon moamot sa ikapulong bahin sa ilang madawat, ang “kinamaayohan gayod niana,” alang sa panginahanglan sa mga saserdote. * (Num. 18:25-29) Ang mga saserdote hatagan usab sa “tanang balaan nga mga amot” nga gidala sa mga Israelinhon diha sa dapit sa pagsimba. Busa ang mga saserdote makasalig gayod nga si Jehova magtagana kanila.
5 Mopatim-aw nga ang Moisesnong Balaod naghisgot ug ikaduhang ikapulo, nga igahin ingong sustento sa pamilya panahon sa balaang panagkatigom kada tuig. (Deut. 14:22-27) Apan sa kataposan sa matag ikatulo ug ikaunom nga tuig diha sa pito-ka-tuig nga siklo sa igpapahulay, kini nga ikapulo ibutang sa ganghaan alang sa mga kabos ug mga Levihanon. Nganong giapil man ang mga Levihanon? Kay sila “walay bahin o panulondon” sa Israel.—Deut. 14:28, 29.
6. Sanglit walay yutang panulondon ang mga Levihanon, diin sila nagpuyo?
6 Lagmit makapangutana ka, ‘Kon ang mga Levihanon wala hatagig yutang panulondon, diin man sila nagpuyo?’ Ang Diyos nagtagana kanila. Iyang gihatagan silag 48 ka siyudad nga may mga sibsibanan. Lakip niini ang unom ka siyudad nga dalangpanan. (Num. 35:6-8) Busa, ang mga Levihanon may kapuy-an sa dihang sila dili mag-alagad sa sangtuwaryo. Si Jehova dagayang nagtagana niadtong nag-alagad kaniya. Dayag nga ikapakita sa mga Levihanon nga si Jehova mao ang ilang bahin pinaagi sa pagsalig sa iyang kaandam ug katakos sa pagtagana kanila.
7. Unsay gikinahanglan sa mga Levihanon aron si Jehova mahimong ilang bahin?
7 Ang Balaod wala maglakip ug silot sa Israelinhon nga wala makahatag ug ikapulo. Sa dihang ang katawhan wala maghatag ug ikapulo, naapektohan ang mga saserdote ug Levihanon. Kana nahitabo sa panahon ni Nehemias. Ingong resulta, ang mga Levihanon nagtrabaho sa ilang uma ug napasagdan ang ilang buluhaton sa tabernakulo. (Basaha ang Nehemias 13:10.) Tin-aw nga ang sustento sa mga Levihanon nagdepende sa espirituwalidad sa nasod. Dugang pa, ang mga saserdote ug Levihanon kinahanglang mosalig kang Jehova ug sa iyang paagi sa pagtagana kanila.
Mga Indibiduwal nga Naghimo Kang Jehova nga Ilang Bahin
8. Unsay gikalibgan sa Levihanong si Asap?
8 Ingong usa ka tribo, ang mga Levihanon naghimo kang Jehova nga ilang bahin. Apan may mga Levihanon nga migamit sa pamulong nga “si Jehova ang akong bahin” aron ipahayag ang ilang debosyon ug pagsalig kaniya. (Lam. 3:24) Usa kanila maoy mag-aawit ug tigkomposo. Atong tawgon siyag Asap, bisag tingali membro lang siya sa panimalay ni Asap, ang Levihanon nga nanguna sa mga mag-aawit panahon ni Haring David. (1 Cron. 6:31-43) Sa Salmo 73 atong mabasa nga si Asap (o usa sa iyang mga kaliwat) nalibog. Siya nasina sa mga daotan nga haruhayg kinabuhi ug gani miingon: “Kawang lamang gayod nga gihinloan ko ang akong kasingkasing ug gihunawan ko ang akong mga kamot sa pagkainosente.” Mopatim-aw nga nalimot siya kon unsa ka bililhon ang iyang pribilehiyo sa pag-alagad; nalimot siya nga si Jehova ang iyang bahin. Siya naluya sa espirituwal “hangtod nga misulod [siya] sa dakong sangtuwaryo sa Diyos.”—Sal. 73:2, 3, 12, 13, 17.
9, 10. Nganong si Asap nakaingon nga ang Diyos mao ang iyang “bahin hangtod sa panahong walay tino”?
9 Sa sangtuwaryo, si Asap misugod sa paglantaw sa mga butang sumala sa panglantaw sa Diyos. Lagmit nakasinati ka sab niana. Tingali may higayon nga nalimot ka kon unsa ka bililhon ang imong pribilehiyo sa pag-alagad ug naghunahuna sa materyal nga mga butang nga gusto nimong mabatonan. Apan tungod sa pagtuon sa Pulong sa Diyos ug pagtambong sa mga tigom, ang imong panglantaw nahiuyon na usab sa iya ni Jehova. Nasabtan ni Asap kon unsay dangatan sa mga daotan. Iyang napamalandong ang iyang maayong kahimtang ug nakaamgo nga si Jehova magkupot sa iyang tuong kamot ug mag-agak kaniya. Busa si Asap miingon kang Jehova: “Gawas kanimo ako wala nay laing kalipay dinhi sa yuta.” (Sal. 73:23, 25) Dayon siya miingon nga ang Diyos mao ang iyang bahin. (Basaha ang Salmo 73:26.) Bisag ‘maluya ang unod ug kasingkasing’ sa salmista, ang Diyos mao ang iyang “bahin hangtod sa panahong walay tino.” Masaligon siya nga si Jehova mahinumdom kaniya ingong higala ug dili malimot sa iyang matinumanong pag-alagad. (Eccl. 7:1) Nakapahupay gayod kadto kang Asap! Siya miawit: “Ang pagduol sa Diyos maayo alang kanako. Ang Soberanong Ginoong Jehova gihimo ko nga akong dalangpanan.”—Sal. 73:28.
10 Busa sa dihang si Asap miingon nga si Jehova ang iyang bahin, siya wala lamang magtumong sa sustento nga iyang nadawat. Siya pangunang nagtumong sa iyang pribilehiyo sa pag-alagad kang Jehova ug sa iyang suod nga relasyon sa Labing Hataas. (Sant. 2:21-23) Aron mapreserbar ang maong relasyon, kinahanglang huptan ni Asap ang iyang pagtuo ug pagsalig kang Jehova. Kinahanglang kombinsido siya nga magmagantihon ang iyang kinabuhi kon sundon niya si Jehova. Ikaw usab makasalig niana gikan sa Labing Gamhanan.
11. Unsay gipangutana ni Jeremias, ug sa unsang paagi kana natubag?
11 Si propeta Jeremias maoy laing Levihanon nga miingong si Jehova ang iyang bahin. Atong susihon kon unsay iyang gipasabot niana. Si Jeremias nagpuyo sa Anatot, usa ka Levihanong siyudad duol sa Jerusalem. (Jer. 1:1) Dihay panahon nga siya nakapangutana: Nganong ang mga daotan nagmalamposon samtang ang mga matarong nag-antos? (Jer. 12:1) Sa dihang iyang nakita ang nagakahitabo sa Jerusalem ug Juda, siya ‘mireklamo.’ Siya nahibalo nga si Jehova matarong. Natubag ang pangutana ni Jeremias human nga si Jehova nagsugo kaniya sa pagmantala sa mensahe sa kalaglagan ug nagtuman sa Iyang tagna. Kadtong misunod sa instruksiyon ni Jehova naluwas, samtang ang daotan nangalaglag.—Jer. 21:9.
12, 13. (a) Unsay nagtukmod kang Jeremias sa pag-ingon: “Si Jehova ang akong bahin,” ug unsay iyang tinamdan? (b) Nganong kinahanglang ugmaron sa tanang tribo sa Israel ang mahulatong tinamdan?
12 Sa ulahi, samtang gisud-ong ni Jeremias ang nagun-ob nga yutang natawhan, iyang gibati nga daw si Jehova nagpahiluna kaniya sa ngitngit nga mga dapit “sama sa mga tawo nga dugay nang nangamatay.” (Lam. 1:1, 16; 3:6) Giawhag ni Jeremias ang masukihong nasod nga mobalik sa ilang langitnong Amahan, apan migrabe ang ilang pagkadaotan mao nga gilaglag sa Diyos ang Jerusalem ug Juda. Kadto nakapaguol kang Jeremias, bisag iyang gihimo kon unsay matarong. Bisan pa sa iyang gibati, siya nahinumdom sa kaluoy sa Diyos. “Kita wala malaglag,” siya miingon. Gani, ang kaluoy ni Jehova bag-o sa matag buntag! Dayon si Jeremias mipahayag: “Si Jehova ang akong bahin.” Siya padayong nag-alagad kang Jehova ingong propeta.—Basaha ang Lamentaciones 3:22-24.
13 Sulod sa 70 ka tuig, maawaaw ang yutang natawhan sa mga Israelinhon. (Jer. 25:11) Apan ang gipamulong ni Jeremias nga “si Jehova ang akong bahin” nagpadayag sa iyang pagsalig sa kaluoy sa Diyos. Busa siya nagpakitag “mahulatong tinamdan.” Ang tanang tribo sa Israel nawad-an sa ilang panulondon, busa kinahanglang sundogon nila ang tinamdan sa propeta. Si Jehova lamang ang ilang paglaom. Human sa 70 ka tuig, ang katawhan sa Diyos nakabalik sa ilang yutang natawhan ug nakapribilehiyo sa pag-alagad kaniya didto.—2 Cron. 36:20-23.
Ang Uban nga Naghimo Kang Jehova nga Ilang Bahin
14, 15. Gawas sa mga Levihanon, kinsa pay naghimo kang Jehova ingong iyang bahin, ug ngano?
14 Si Asap ug Jeremias sakop sa banay ni Levi, apan ang mga Levihanon lang ba ang may pribilehiyo sa pag-alagad kang Jehova? Dili. Ang batan-ong si David, ang umaabot nga hari sa Israel, nagtawag sa Diyos ingong iyang “bahin diha sa yuta sa mga buhi.” (Basaha ang Salmo 142:1, 5.) Sa dihang gikomposo ni David kini nga salmo, siya wala sa palasyo o sa balay. Didto siya sa langob, nga nagtago gikan sa iyang mga kaaway. Labing menos duha ka beses si David nga nagtago sa mga langob—ang usa duol sa Adulam ug ang lain sa kamingawan sa En-gedi. Lagmit gikomposo niya ang Salmo 142 sa usa niini nga mga langob.
15 Kon kanay kahimtang, si Haring Saul maoy naggukod kang David, nga nagtinguha sa pagpatay kaniya. Si David mitago sa usa ka langob nga lisod adtoon. (1 Sam. 22:1, 4) Sa maong hilit nga dapit, lagmit gibati ni David nga wala siyay higala nga manalipod niya. (Sal. 142:4) Kadto ang panahon nga siya mituaw sa Diyos.
16, 17. (a) Nganong si David mibating nag-inusara? (b) Kinsay kadangpan ni David alang sa tabang?
16 Sa dihang gikomposo ni David ang Salmo 142, lagmit nahibalo na siya sa nahitabo kang Ahimelek, ang hataas nga saserdote nga mitabang niya sa pagkalagiw gikan kang Saul. Gipapatay sa masinahong si Haring Saul si Ahimelek ug ang tibuok niyang panimalay. (1 Sam. 22:11, 18, 19) Gibasol ni David ang iyang kaugalingon. Samag iyang gipatay ang saserdote nga mitabang niya. Kon ikaw si David, ingon ba usab niana ang imong bation? Ang nakapalisod pa gyod sa kahimtang ni David kay siya walay pahulay tungod sa paggukod kaniya ni Saul.
17 Wala madugay, namatay si propeta Samuel nga maoy nagdihog kang David aron mahimong hari. (1 Sam. 25:1) Kadto lagmit nakapasamot sa iyang pagbating nag-inusara. Apan si David nahibalo kon kinsay iyang kadangpan alang sa tabang, si Jehova. Ang pribilehiyo sa pag-alagad ni David dili sama sa mga Levihanon. Siya gidihogan na alang sa laing matang sa pag-alagad, ang pagkahari sa katawhan sa Diyos. (1 Sam. 16:1, 13) Busa, si David mipahayag sa iyang pagbati ngadto kang Jehova ug padayong misalig kaniya. Ikaw usab makahimo kang Jehova ingong imong bahin ug dangpanan samtang nanglimbasog sa pag-alagad kaniya.
18. Sa unsang paagi ang mga alagad nga atong gihisgotan naghimo kang Jehova nga ilang bahin?
18 Ang mga alagad nga atong gihisgotan naghimo kang Jehova ingong ilang bahin sa pagkaagi nga sila nakadawat ug pribilehiyo sa pag-alagad kaniya. Sila misalig nga ang Diyos motagana kanila samtang nag-alagad kaniya. Ang mga Levihanon ug kadtong sakop sa ubang tribo sa Israel, sama kang David, naghimo sa Diyos ingong ilang bahin. Sa unsang paagi usab nimo mahimo si Jehova ingong imong bahin? Hisgotan kana sa sunod artikulo.
[Footnote]
^ par. 4 Alang sa detalye kon giunsa pag-atiman ni Jehova ang mga saserdote, tan-awa ang Pagtugkad sa Kasulatan, Tomo 2, panid 1107.
Unsay Imong Tubag?
• Sa unsang diwa nga si Jehova ang bahin sa mga Levihanon?
• Sa unsang paagi gipakita ni Asap, Jeremias, ug David nga si Jehova ang ilang bahin?
• Unsang hiyas ang gikinahanglan aron ang Diyos mahimong imong bahin?
[Mga Pangutana sa Pagtuon]
[Blurb sa panid 8]
Ang mga Levihanon walay yutang panulondon. Hinuon, si Jehova mao ang ilang bahin kay sila may linaing pribilehiyo sa pag-alagad kaniya
[Hulagway sa panid 7]
Sa unsang paagi si Jehova mao ang bahin sa mga saserdote ug Levihanon?
[Hulagway sa panid 9]
Unsay nakatabang kang Asap nga padayong himoon si Jehova nga iyang bahin?
