Kon sa Unsang Paagi si Jehova Nagatultol Kanato

“Tultoli ako sa alagianan sa pagkamatarong.”—SALMO 27:11.

1, 2. (a) Sa unsang paagi gitultolan ni Jehova ang iyang katawhan karon? (b) Unsay nalangkit sa pagpahimulos pag-ayo sa mga tigom?

 SI Jehova ang Tuboran sa kahayag ug kamatuoran, sumala sa atong natun-an sa nag-unang artikulo. Ang iyang Pulong naghatag ug kahayag sa atong dalan samtang nagapanaw kita sa alagianan sa pagkamatarong. Si Jehova nagatultol kanato pinaagi sa pagtudlo kanato sa iyang mga dalan. (Salmo 119:105) Sama sa salmista sa karaan, kita mapasalamatong mosanong sa mga pagtultol sa Diyos ug moampo: “Tudloi ako, Oh Jehova, sa imong dalan, ug tultoli ako sa alagianan sa pagkamatarong.”—Salmo 27:11.

² Usa ka paagi nga nagapanudlo si Jehova karon mao ang Kristohanong mga tigom. Ato bang bug-os nga gipahimuslan kining mahigugmaong tagana pinaagi sa (1) pagtambong nga regular, (2) pagpaminaw pag-ayo sa programa, ug (3) pagpakig-ambit nga maikagon sa mga bahin nga nalangkit ang mga tumatambong? Dugang pa, kita ba mapasalamatong mosanong kon kita makadawat ug mga sugyot nga makatabang kanatong makapabilin sa “alagianan sa pagkamatarong”?

Komosta ang Imong Pagtambong sa Tigom?

3. Sa unsang paagi naugmad sa usa ka bug-os-panahong alagad ang maayong batasan sa regular nga pagtambong sa tigom?

³ Ang ubang mga magmamantala sa Gingharian regular nga motambong sa mga tigom sukad pa sa pagkabata. “Sa nagdako ako ug ang akong mga igsoong babaye sa katuigan sa 1930,” nahinumdom ang usa ka bug-os-panahong ministro sa mga Saksi ni Jehova, “dili na kami mangutana pa sa among mga ginikanan kon moadto ba kami sa tigom. Kami nahibalo nga kami moadto gawas lamang kon kami dunay sakit. Ang among pamilya dili gayod mopalta  sa pagtambong sa mga tigom.” Sama sa manalagnang si Ana, kining igsoona ‘dili gayod mopalta’ sa pagtambong sa dapit sa pagsimba ni Jehova.—Lucas 2:36, 37.

4-6. (a) Nganong dili usahay makatambong sa mga tigom ang ubang mga magmamantala sa Gingharian? (b) Nganong hinungdanong motambong sa mga tigom?

⁴ Usa ba ikaw niadtong regular nga motambong sa Kristohanong mga tigom, o may panahon ba nga dili ka motambong? Ang ubang mga Kristohanon nga nagtuo nga hinambong sila mihukom sa pagtino. Sa pipila ka semana, ilang gilista ang matag tigom nga sila mitambong. Sa dihang ilang gitan-aw ang rekord sa kataposan sa gitagal nga panahon, sila nakurat sa gidaghanon sa mga tigom nga wala nila matambongi.

⁵ ‘Dili kini ikatingala,’ tingali may moingon. ‘Ang mga tawo naglisod gayod karong panahona nga dili sayon kanila nga mahimong regular sa pagtambong sa mga tigom.’ Tinuod bitaw nga kita nagkinabuhi na niining malisod nga panahon. Dugang pa, ang kalisod seguradong mosamot pa gayod. (2 Timoteo 3:13) Apan tungod sa maong katarongan dili ba labaw nang gikinahanglang motambong sa mga tigom nga regular? Kon walay regular nga pagkaon sa maayong espirituwal nga kalan-on nga makapalig-on kanato, kita dili makalaom nga makalahutay sa kalisod nga ipadangat niining sistemaha. Gani, kon walay regular nga pagpakig-uban posibleng matental kita sa pagbiya sa ‘alagianan sa matarong’ sa bug-os! (Proverbio 4:18) Tinuod, inig-abot nato sa balay sa kataposan sa mahago nga adlaw, kita tingali dili ganahang motambong sa tigom. Apan, kon kita motambong bisag gikapoy na, kita makabenepisyo ug atong madasig ang atong mga isigka-Kristohanon diha sa Kingdom Hall.

⁶ Ang Hebreohanon 10:25 nagsugyot ug laing hinungdanong katarongan kon nganong kita angayng regular nga motambong sa tigom. Didto gitambagan ni apostol Pablo ang mga isigka-Kristohanon  nga magtigom ‘labi pa gayod samtang ilang makita nga ang adlaw nagakahiduol na.’ Oo, dili nato angay kalimtan nga ang “adlaw ni Jehova” haduol na. (2 Pedro 3:12) Kon kita moingon nga halayo pa ang kataposan niini nga sistema, posible nga unahon na hinuon nato ang atong personal nga mga pangagpas inay ang hinungdanong espirituwal nga mga kalihokan, sama sa pagtambong sa tigom. Dayon, ingon sa gipasidaan ni Jesus, ‘sa kalit kanang adlawa dihadiha nga modangat kanato.’—Lucas 21:34.

Tinguhaa nga Mahimong Maayong Tigpaminaw

7. Nganong hinungdanong mamati ang mga bata sa mga tigom?

⁷ Dili igo ang pagtambong lang sa mga tigom. Kita kinahanglang maminaw pag-ayo, mamatig maayo kon unsay ipadayag didto. (Proverbio 7:24) Lakip na niini ang atong mga anak. Inigtungha sa bata, siya gidahom nga mamati sa magtutudlo, bisag wala siyay gana sa usa ka partikular nga subject o nga morag maglisod siya sa pagsabot. Ang magtutudlo nahibalo nga kon ang bata maningkamot sa pagpamati, siya labing menos makakat-on ug diyutay sa leksiyon. Nan, dili ba makataronganon alang sa mga bata nga nagtungha sa pagpamati sa pagpanudlo nga gitagana diha sa mga tigom sa kongregasyon imbes tugotan sila sa pagkatulog inigsugod sa mga tigom? Tinuod, ang pipila sa bililhong mga kamatuoran nga makita diha sa Kasulatan “lisod sabton.” (2 Pedro 3:16) Apan dili nato angay pakamenoson ang katakos sa bata sa pagkat-on. Wala pakamenosa kini sa Diyos. Sa panahon sa Bibliya, iyang gisugo ang iyang batan-ong mga alagad nga ‘maminaw ug magkat-on ug mahadlok kang Jehova ug magmatngon sa pagtuman sa tanang pulong niini nga balaod,’ nga ang pipila niini sa walay duhaduha lisod sabton sa mga bata. (Deuteronomio 31:12; itandi ang Levitico 18:1-30.) Dili ba mao usab kini ang gidahom ni Jehova sa mga bata karon?

8. Unsang mga lakang ang mahimong buhaton sa ubang mga ginikanan aron matabangan ang ilang mga anak sa pagpaminaw ug maayo sa mga tigom?

⁸ Ang Kristohanong mga ginikanan nahibalo nga ang espirituwal nga mga panginahanglan sa ilang mga anak ginapun-an usab sa ilang makat-onan sa mga tigom. Busa, pakatulgon usa sa ubang mga ginikanan ang ilang mga anak sa dili pa ang mga tigom aron moabot sila sa Kingdom Hall nga nakapahulay na ug andam sa pagkakat-on. Tingali higpit nga limitehan o maalamong dili patan-awon ug telebisyon sa ubang mga ginikanan ang ilang mga anak sa mga gabii sa tigom. (Efeso 5:15, 16) Ug napamenosan sa maong mga ginikanan ang mga pagkabalda sa pagpaminaw, nga nagdasig sa ilang mga anak sa pagpaminaw ug sa pagkat-on, sumala sa ilang edad ug katakos.—Proverbio 8:32.

9. Unsay makatabang kanato aron maugmad ang atong katakos sa pagpamati?

⁹ Mga hamtong ang gitumong ni Jesus sa dihang siya miingon: ‘Hatagi ninyo ug pagtagad ang inyong pagpamati.’ (Lucas 8:18) Karong mga panahona, mas sayon kining isulti kay sa buhaton. Sa pagkatinuod, ang aktibong pagpaminaw malisod, apan ang katakos sa pagpaminaw maugmad. Samtang maminaw ka sa usa ka pakigpulong sa Bibliya o usa ka bahin sa tigom, ilain ang pangunang mga ideya. Paabota kon unsay sunod nga isulti sa mamumulong. Pangitag mga punto nga imong magamit sa  imong ministeryo o ikapadapat sa imong kinabuhi. Sublia sa hunahuna ang mga punto samtang kini gihisgotan. Pagkuhag mugbong mga nota.

10, 11. Sa unsang paagi gitabangan sa ubang mga ginikanan ang ilang mga anak aron mahimong mas maayong mga mamiminaw, ug unsang mga paagi ang imong nakaplagang makatabang?

¹⁰ Ang maayong batasan sa pagpaminaw makat-onan ug maayo sa sayo nga edad. Bisag sa panahong dili pa sila makamaong mobasa ug mosulat, ang ubang mga bata nga wala pa magtungha gidasig sa ilang mga ginikanan sa pagkuhag “mga nota” panahon sa mga tigom. Ilang timan-an diha sa papel sa dihang gamiton ang pamilyar nga mga pulong sama sa “Jehova,” “Jesus,” o “Gingharian.” Niining paagiha, ang mga bata makakat-on sa pagsentro sa pagtagad sa ginasulti diha sa entablado.

¹¹ Bisan ang gulanggulang nga mga bata usahay kinahanglang dasigon sa pagpamati. Nakamatikod nga naglirawliraw ang hunahuna sa iyang 11-anyos nga anak nga lalaki panahon sa Kristohanong kombensiyon, gitunolan sa usa ka ulo sa pamilya ang bata ug Bibliya ug gisugo siya sa pagtan-aw sa mga teksto nga gikutlo sa mga mamumulong. Ang amahan, nga nagkuhag mga nota, nagtan-aw samtang nagkapot ang iyang anak sa Bibliya. Human niadto, maikagong namati ang bata sa programa sa kombensiyon.

Ipadungog ang Imong Tingog

12, 13. Nganong hinungdanong moduyog sa pag-awit sa kongregasyon?

¹² Si Haring David miawit: “Ako molakaw libot sa imong halaran, Oh Jehova, aron ang pagpasalamat madunggan sa makusog.” (Salmo 26:6, 7) Ang mga tigom sa mga Saksi ni Jehova maoy maayong mga higayon aron atong ikapadayag ang atong pagtuo sa makusog. Usa ka paagi nga atong mahimo kini maoy sa pagduyog sa pag-awit sa kongregasyon. Kini maoy usa ka hinungdanong bahin sa atong pagsimba, apan kini sa kasayon mahimong dili balebalehon.

¹³ Sag-ulohon sa ubang mga bata nga dili pa makabasa ang mga pulong sa mga awit sa Gingharian nga pagakantahon sa mga tigom matag semana. Sila malipay gayod nga makaduyog sa pag-awit sa mga dagko. Apan, sa magkadako na ang mga bata sila tingali dili na kaayo ganahang moduyog sa pag-awit  sa mga alawiton sa Gingharian. Ang ubang mga hamtong managana usab sa pag-awit diha sa mga tigom. Bisan pa, ang pag-awit maoy bahin sa atong pagsimba, sama nga ang pag-alagad sa kanataran maoy bahin sa atong pagsimba. (Efeso 5:19) Ginahimo nato ang atong labing maayo sa pagdayeg kang Jehova diha sa pag-alagad sa kanataran. Dili ba makahimaya usab kita kaniya pinaagi sa pagpatugbaw sa atong mga tingog—yabag man o dili—diha sa kinasingkasing nga mga alawiton sa pagdayeg?—Hebreohanon 13:15.

14. Nganong ang materyal nga atong tun-an sa mga tigom sa kongregasyon kinahanglang pangandaman ug maayo?

¹⁴ Kita usab makahimaya sa Diyos kon kita mohatag ug makapalig-ong mga komento panahon sa mga bahin sa atong mga tigom nga nagkinahanglan nga makigbahin ang tumatambong. Kini nagkinahanglan ug pangandam. Nagkinahanglan ug panahon ang pagpamalandong sa laglom nga bahin sa Pulong sa Diyos. Si apostol Pablo, nga usa ka maikagong estudyante sa Kasulatan, nahibalo niini. Siya misulat: ‘Pagkalalom sa bahandi sa Diyos ug kaalam ug kahibalo!’ (Roma 11:33) Mga ulo sa pamilya, hinungdanong tabangan ninyo ang matag membro sa inyong pamilya sa pagsusi sa kaalam sa Diyos, ingon sa gipadayag diha sa Kasulatan. Paggahin ug panahon sulod sa pagtuon sa Bibliya sa pamilya aron mapatin-aw ang malisod nga mga punto ug matabangan ang inyong pamilya sa pagpangandam alang sa mga tigom.

15. Unsang mga sugyot ang makatabang aron makakomento sa mga tigom?

¹⁵ Kon gusto kang mokomento kanunay sa mga tigom, nganong dili mangandam daan sa imong gustong isulti? Dili kinahanglang puno kini sa mga detalye. Ang tukmang teksto sa Bibliya nga basahon nga may pagtuo o pipila ka maayong pagkapiling mga pulong nga kinasingkasing nga ipahayag pabilhan. Ang ubang mga magmamantala mohangyo sa konduktor sa pagtuon sa pagreserba sa unang komento sa usa ka espesipikong parapo para nila, aron sila walay masipyatang higayon sa pagpahayag sa ilang pagtuo.

Ang Kulag-Kasinatian Mahimong Maalamon

16, 17. Unsang tambag ang gihatag sa usa ka ansiyano ngadto sa usa ka ministeryal nga alagad, ug nganong epektibo kadto?

¹⁶ Diha sa mga tigom sa mga Saksi ni Jehova, kita kanunayng pahinumdoman sa pagbasa sa Pulong sa Diyos sa adlaw-adlaw. Ang pagbasa mohatag ug hayahayng pagbati. Kini makatabang usab kanato sa paghimog maalamong mga desisyon, pagtul-id sa mga depekto sa personalidad, pagsukol sa mga tentasyon, ug pagpauli sa atong espirituwal nga pagkatimbang kon kita nakahimog sayop nga lakang.—Salmo 19:7.

¹⁷ Ang daghag kasinatiang mga ansiyano sa kongregasyon andam sa pagtaganag tambag sa Kasulatan nga gipasibo sa atong mga panginahanglan. Ang himoon lamang nato mao ang “pagtimba niini” pinaagi sa pagpangita sa ilang pinasukad-sa-Bibliya nga tambag. (Proverbio 20:5) Usa ka adlaw niana usa ka masibotong batan-ong ministeryal nga alagad nangayo sa usa ka ansiyano ug mga sugyot kon sa unsang paagi mahimong mas mapuslanon diha sa kongregasyon. Ang ansiyano, nga suheto sa batan-on, nagbukas sa iyang Bibliya sa 1 Timoteo 3:3, nga nag-ingon nga ang tinudlong mga lalaki kinahanglang “makataronganon.” Maluloton niyang gihisgotan ang mga paagi nga mapasundayag sa batan-ong lalaki ang pagkamakataronganon sa iyang pagpakiglabot sa uban. Nasilo ba ang batan-ong brader sa prangkang tambag nga iyang nadawat? Wala gayod! “Gigamit sa ansiyano ang Bibliya,” siya miingon, “busa akong gidawat nga ang tambag nagagikan kang Jehova.” Mapasalamatong gipadapat sa ministeryal nga alagad ang tambag ug miuswag.

18. (a) Unsay nakatabang sa usa ka batan-ong Kristohanon sa pagsukol sa tentasyon diha sa eskuylahan? (b) Unsang mga teksto sa Bibliya ang imong hinumdoman kon mag-atubang ug tentasyon?

¹⁸ Ang Pulong sa Diyos makatabang usab sa mga batan-on sa ‘pagkalagiw gikan sa mga tinguha nga iya sa pagkabatan-on.’ (2 Timoteo 2:22) Usa ka batan-ong Saksi ni Jehova nga bag-o pang migraduwar sa hayskul nakasukol sa tentasyon sa tibuok niyang tuig sa pagtungha pinaagi sa pagpalandong ug pagpadapat sa pipila ka teksto sa Bibliya. Gipamalandong niya kanunay ang tambag nga natala sa Proverbio 13:20: “Siya nga magalakaw uban sa mga tawong maalamon mahimong maalamon.” Busa, siya nagbantay sa pagpakighigala lamang niadtong dunay dakong pagtahod sa mga prinsipyo sa Kasulatan. Siya nangatarongan: “Dili ako sahi sa uban. Kon ako makig-uban sa mga tawong dili maayong ikauban, ang akong mga higala ang gusto nakong mapahimut-an, ug kana mahimong makapabanlod nako sa kadaot.” Ang tambag ni Pablo nga natala sa 2 Timoteo 1:8 nakatabang usab kaniya. Si  Pablo nagsulat: “Ayawg kaulaw sa pagpanaksi bahin sa atong Ginoo, . . . apan dawata ang imong bahin sa pag-antos sa daotan tungod sa maayong balita.” Nahiuyon sa maong tambag, maisogon niyang gipakig-ambit ang iyang pinasukad-sa-Bibliya nga mga pagtulon-an ngadto sa iyang mga kauban sa klase sa tanang nahiangay nga higayon. Sa matag panahong itudlo siya sa paghatag ug binaba nga report diha sa klase, mopili siya ug usa ka ulohan nga sa mapaagihon makapamatuod siya bahin sa Gingharian sa Diyos.

19. Nganong wala makasukol sa pagpit-os ang usa ka batan-ong lalaki niining kalibotana, apan unsay nakahatag kaniya ug espirituwal nga kalig-on?

¹⁹ Kon ugaling masaag kita gikan sa ‘alagianan sa matarong,’ ang Pulong sa Diyos makatabang kanato sa pagtul-id sa atong mga lakang. (Proverbio 4:18) Usa ka batan-ong lalaki nga nagpuyo sa Aprika nakakat-on niini mismo. Sa dihang giduaw siya sa usa sa mga Saksi ni Jehova, siya midawat sa pagtuon sa Bibliya. Nalipay siya sa iyang nakat-onan apan sa ngadtongadto nadala sa dili maayong panag-uban diha sa eskuylahan. Sa ulahi, napadpad siya sa imoral nga paagi sa kinabuhi. “Gitulisok ako kanunay sa akong konsensiya, ug kinahanglang mohunong ako sa pagtambong sa mga tigom,” siya miadmitir. Sa ngadtongadto, siya nagsugod sa pagtambong sa mga tigom pag-usab. Gisulti niining batan-ong lalaki kining madayganong komento: “Akong nakita nga ang dakong hinungdan niining tanan mao nga ako kulang ug espirituwal nga pagkaon. Ako walay personal nga pagtuon. Maoy hinungdan nga dili ako makabarog sa tentasyon. Dayon nagsugod ako sa pagbasa sa Ang Bantayanang Torre ug Pagmata! Anam-anam nga naulian ako sa akong espirituwal nga kalig-on ug gihinloan nako ang akong kinabuhi. Maayo kini nga pamatuod ngadto sa mga tawo nga nakamatikod sa kausaban nga akong nahimo. Ako nagpabawtismo, ug ako malipayon na karon.” Unsay nakahatag niining batan-ona ug kalig-on aron mabuntog ang iyang unodnong kahuyangan? Iyang napasig-uli ang iyang espirituwal nga kalig-on pinaagi sa regular, personal nga pagtuon sa Bibliya.

20. Sa unsang paagi ang usa ka batan-on makasukol sa mga pag-atake ni Satanas?

²⁰ Kamong Kristohanong mga batan-on, kamo ginaatake karon! Aron makasukol kamo sa mga pag-atake ni Satanas, kinahanglang mokaon kamo ug espirituwal nga pagkaon sa regular. Ang salmista, nga tingali batan-on usab, nakasabot niini. Iyang gipasalamatan si Jehova sa pagtagana sa iyang Pulong, aron ‘makahinlo ang batan-ong lalaki sa iyang alagianan.’—Salmo 119:9.

Bisag Asa Kita Dad-on sa Diyos, Kita Mosunod

21, 22. Nganong dili kita angay mohinapos nga ang dalan sa kamatuoran malisod kaayo?

²¹ Gidala ni Jehova ang nasod sa Israel sa gawas sa Ehipto ug ngadto sa Yutang Saad. Ang dalan nga iyang gipili morag sa walay kapuslanan mabudlay alang sa tawhanong panglantaw. Imbes moagi sa morag sayon, mas laktod nga dalan ubay sa Dagat sa Mediteranyo, gidala ni Jehova ang iyang katawhan sa malisod nga dalan sa desyerto. Apan, kini sa tinuod maoy usa ka kalulot sa bahin sa Diyos. Bisan pag mas duol, ang padagat nga dalan magdala unta sa mga Israelinhon ngadto sa yuta sa kontrang mga Pilistihanon. Pinaagi sa pag-agi sa laing dalan, napalingkawas ni Jehova ang iyang katawhan sa wala-sa-panahon nga pagpakiggubat batok sa mga Pilistihanon.

²² Sa susama, ang dalan nga gipaagian ni Jehova kanato karon morag malisod usahay. Matag semana, puno ang atong eskedyul sa Kristohanong mga kalihokan, lakip ang mga tigom sa kongregasyon, personal nga pagtuon, ug pagsangyaw sa kanataran. Ang ubang mga dalan morag mas sayon. Apan diha lamang kon mosunod kita sa pagtultol sa Diyos nga kita makaabot sa destinasyon nga atong gihagoan pag-ayo aron makaabot. Busa, magpadayon kita sa pagkuhag hinungdanong instruksiyon gikan kang Jehova ug magpabilin diha sa “alagianan sa pagkamatarong” sa walay kataposan!—Salmo 27:11.

Makapatin-aw Ka Ba?

• Nganong kinahanglan gayod kitang motambong sa Kristohanong mga tigom nga regular?

• Unsay mahimo sa mga ginikanan sa pagtabang sa ilang mga anak sa pagpamati sa mga tigom?

• Unsay nalangkit sa pagkahimong maayong mamiminaw?

• Unsay makatabang kanato sa pagkomento diha sa mga tigom?

[Mga pangutana]

[Hulagway sa panid 16, 17]

Ang pagtambong sa Kristohanong mga tigom makatabang kanato sa pagbutang diha sa hunahuna sa adlaw ni Jehova

[Mga hulagway sa panid 18]

Nagkalainlain ang mga paagi sa pagdayeg kang Jehova diha sa Kristohanong mga tigom