1. Unsang tumong ang maayo natong kab-oton samtang magkatigulang ta?

SAMTANG magkatigulang ta, mahadlok tingali ta nga dili na kaayo ta mapuslanon kang Jehova kon itandi niadtong bata pa ta. Tinuod nga mas menos na ang atong kusog kay sa una, pero magamit nato ang atong kaalam ug eksperyensiya sa pagtabang sa mga batan-on nga mahimong mapuslanon sa organisasyon ni Jehova ug modawat ug dugang mga responsibilidad. Ang usa ka dugay nang ansiyano miingon, “Sa dihang gibati nako nga limitado na ang akong mahimo tungod sa akong edad, mapasalamaton ko nga dihay kuwalipikadong batabatang mga brader nga makahimo sa buluhaton.”

2. Unsay atong hisgotan niining artikuloha?

² Gihisgotan sa miaging artikulo kon sa unsang paagi madasig ang mga batan-on sa dihang makigsuod sila sa mga tigulang. Niining artikuloha, atong masayran kon sa unsang paagi ang mga hiyas sama sa pagkamapainubsanon, pagkamakasaranganon, pagkamapasalamaton, ug pagkamahinatagon makatabang sa mga tigulang sa pagpakigkooperar sa mga batan-on, nga moresultag panalangin sa tibuok kongregasyon.

3. Sumala sa Filipos 2:3, 4, unsa ang pagkamapainubsanon, ug sa unsang paagi makatabang ni sa usa ka Kristohanon?

³ Ang mga tigulang angayng magmapainubsanon kon gusto nilang motabang sa mga batan-on. Ang mapainubsanong tawo mag-isip sa uban nga labaw kay kaniya. (Basaha ang Filipos 2:3, 4.) Ang mga tigulang nga nagpakita niining hiyasa nahibalo nga sa paghimo sa usa ka asaynment, sagad dunay lainlaing epektibong paagi nga binase sa Kasulatan. Busa dili sila magdahom  nga sundogon sa tanan ang ilang paagi sa paghimo sa mga butang kaniadto. (Eccl. 7:10) Bisag daghan silag mapuslanong kasinatian nga makatabang sa mga batan-on, nahibalo sila nga “ang talan-awon niining kalibotana nagakausab” ug kinahanglan tingali silang mo-adjust sa bag-ong mga kahimtang.—1 Cor. 7:31.

4. Sa unsang paagi gisundog sa mga tigdumala sa sirkito ang mga Levihanon?

⁴ Ang mapainubsanong mga edaran nahibalo nga samtang magkatigulang sila, limitado na lang ang ilang mahimo kon itandi sa una. Konsideraha pananglitan ang atong mga tigdumala sa sirkito. Pag-edad nilag 70, sila hatagan ug bag-ong asaynment. Dili tingali nâ sayon. Gipabilhan nila ang ilang pribilehiyo sa pag-alagad sa mga igsoon. Gimahal nila ang ilang asaynment, ug gusto gihapon kaayo nilang magpadayon niana. Pero nahibalo sila nga mas maayo nga ang mga batan-on maoy moatiman sa buluhaton. Busa gisundog nila ang mga Levihanon sa karaang Israel kinsa, pag-edad ug 50, kinahanglan nang moretiro sa pag-alagad sa tabernakulo. Ang kalipay sa maong edaran nga mga Levihanon wala mag-agad sa usa ka partikular nga pribilehiyo. Gipahimuslan nila pag-ayo ang uban pang pribilehiyo nga puwede nilang mabatonan, ug gihimo nila ang tanan nilang maarangan sa pagtabang sa mga batan-on. (Num. 8:25, 26) Karon, bisag ang kanhing mga tigdumala sa sirkito wala na mag-alagad sa daghang kongregasyon, panalangin kaayo sila sa kongregasyon nga ilang gipasakopan.

5. Unsay imong nakat-onan sa ehemplo ni Dan ug Katie?

 ⁵ Konsideraha ang ehemplo ni Dan, kinsa nag-alagad ingong tigdumala sa sirkito sulod sa 23 ka tuig. Dihang si Dan 70 anyos na, siya ug ang iyang asawa, si Katie, giasayn ingong mga espesyal payunir. Komosta sila karon sa ilang bag-ong asaynment? Si Dan miingon nga mas busy siya karon! Iyang giatiman ang iyang mga responsibilidad sa kongregasyon, gitabangan ang mga brader nga mokuwalipikar ingong ministeryal nga mga alagad, ug gibansay ang uban sa pagpakigbahin sa metropolitan ug prison witnessing. Mga tigulang, naa man mo sa bug-os panahong pag-alagad o wala, dako mog mahimo sa pagtabang sa uban. Sa unsang paagi? Paningkamoti nga maka-adjust sa inyong bag-ong kahimtang, pagtakdag bag-ong mga tumong, ug pagpokus sa inyong mahimo imbes sa dili ninyo mahimo.

6. Nganong maayo nga magmakasaranganon ta? Iilustrar.

⁶ Ang makasaranganong tawo moila sa iyang mga limitasyon. (Prov. 11:2) Ang pagkamakasaranganon magpalihok niya nga dili magdahom ug labaw kay sa iyang mahimo. Ingong resulta, siya magpabiling malipayon ug magpadayon sa pagkugi. Ang tawong makasaranganon puwedeng ipakasama sa usa nga nagdrayb sa subidahon nga dalan. Ang drayber kinahanglan tingaling mokambiyo ug segunda o primera aron makasubida. Tinuod, mohinay tingali ang iyang dagan pero makapadayon gihapon siya. Sa susama, ang makasaranganong tawo nahibalo kon kanus-a siya “mosegunda o moprimera” aron makapadayon sa pag-alagad kang Jehova ug makatabang sa uban.—Filip. 4:5.

7. Unsay nagpakita nga si Barzilai makasaranganon?

⁷ Matikdi ang ehemplo ni Barzilai, kinsa 80 anyos sa dihang gidapit siya ni Haring David nga mouban niya sa palasyo ug mahimong usa sa iyang mga magtatambag. Gibalibaran sa makasaranganong si Barzilai ang tanyag sa hari. Kay nahibalo siya sa iyang mga limitasyon tungod sa iyang pangedaron, girekomendar ni Barzilai ang batabata nga si Kimham nga maoy moadto puli kaniya. (2 Sam. 19:35-37) Sama kang Barzilai, ang tigulang nga mga lalaki malipay nga ihatag ngadto sa batabata nga mga lalaki ang kahigayonan sa pag-atiman sa buluhaton.

8. Sa unsang paagi gipakita ni Haring David ang pagkamakasaranganon maylabot sa pagtukod sa templo?

⁸ Si Haring David maayo sab kaayong ehemplo sa pagkamakasaranganon. Gusto kaayo niyang magtukod ug balay para kang Jehova. Pero dihang giingnan siya ni Jehova nga kini nga pribilehiyo ihatag ngadto sa batan-on pa nga si Solomon, gidawat ni David ang desisyon ni Jehova ug kinasingkasing niyang gisuportahan ang maong proyekto. (1 Cron. 17:4; 22:5) Wala maghunahuna si David nga mas maayong siya ang magtukod sa templo kay si Solomon “batan-on pa ug kulag eksperyensiya.” (1 Cron. 29:1) Nahibalo si David nga ang kalamposan sa maong proyekto nagdepende sa panalangin ni Jehova, dili sa edad o eksperyensiya niadtong nanguna. Sama kang David, ang mga tigulang karon aktibo gihapon sa pag-alagad bisan dihang mausab ang ilang asaynment. Ug sila nahibalo nga panalanginan ni Jehova ang mga batan-on nga nag-atiman sa buluhaton nga ilang ginahimo kaniadto.

9. Giunsa pagpakita sa usa ka membro sa Komite sa Sangang Buhatan nga makasaranganon siya?

⁹ Ang usa ka modernong ehemplo sa pagkamakasaranganon mao ang brader nga si Shigeo. Niadtong 1976, sa edad nga 30, natudlo siya ingong membro sa usa ka Komite sa Sangang Buhatan. Pagka-2004, nahimo siyang koordinetor niana nga komite. Sa ulahi, naamgohan niya nga dili na kaya sa iyang lawas ang trabaho ug dugay na niya kining mahuman. Giampo niya  kini ug gipamalandong kon mas maayo ba nga batabatang brader ang mopuli sa iyang mga responsibilidad. Bisag dili na siya ang koordinetor, si Shigeo padayon gihapong nag-alagad uban sa mga membro sa Komite sa Sangang Buhatan. Sumala sa gipakita sa ehemplo ni Barzilai, Haring David, ug Shigeo, ang tawo nga mapainubsanon ug makasaranganon magpokus, dili sa kakulag eksperyensiya sa mga batan-on, kondili sa kaya nilang himoon. Isipon niya sila, dili ingong mga kakompetensiya, kondili ingong mga isigkamagbubuhat.—Prov. 20:29.

10. Unsay panglantaw sa mga tigulang ngadto sa mga batan-on diha sa kongregasyon?

¹⁰ Ang mga tigulang nag-isip sa mga batan-on ingong regalo gikan kang Jehova ug mapasalamaton sila sa ginahimo sa mga batan-on. Samtang magkaluya ang mga tigulang, mapasalamaton sila nga dunay baskog pang mga batan-on nga andam mohimo sa mga buluhaton ug moalagad sa kongregasyon.

11. Giunsa pagpakita sa Ruth 4:13-16 ang kaayohan kon dawaton sa mga tigulang ang tabang sa mga batabata pa?

¹¹ Ang karakter sa Bibliya nga si Noemi maoy maayo kaayong ehemplo sa usa ka tigulang nga mapasalamatong midawat ug tabang gikan niadtong batabata pa. Sa sinugdan, giawhag ni Noemi ang iyang biyuda nga umagad, si Ruth, nga mopauli sa pamilya niini. Pero sa dihang miinsistir si Ruth nga mouban kang Noemi sa pagpauli sa Betlehem, gidawat niya ang tabang ni Ruth. (Ruth 1:7, 8, 18) Ug nakahatag gyod tog kaayohan nilang duha! (Basaha ang Ruth 4:13-16.) Ang pagkamapainubsanon magpalihok sa mga tigulang sa pagsundog kang Noemi.

12. Giunsa pagpakita ni apostol Pablo ang iyang pagkamapasalamaton?

¹² Si apostol Pablo mapasalamaton sa tabang sa mga igsoon. Pananglitan, gipasalamatan  niya ang mga Kristohanon sa Filipos sa materyal nga tabang nga ilang gipadala kaniya. (Filip. 4:16) Nagpasalamat siya sa tabang ni Timoteo. (Filip. 2:19-22) Ug gipasalamatan ni Pablo ang Diyos tungod niadtong nangabot aron sa pagdasig kaniya samtang gidala siya ngadto sa Roma ingong piniriso. (Buh. 28:15) Si Pablo dasig nga tawo kinsa mibiyaheg libolibo ka milya aron mosangyaw ug magpalig-on sa mga kongregasyon. Pero mapainubsanon niyang gidawat ang tabang sa mga igsoon.

13. Sa unsang paagi ikapakita sa mga tigulang nga mapasalamaton sila sa mga batan-on?

¹³ Mga tigulang, ikapakita ninyo sa daghang paagi ang inyong pagkamapasalamaton sa mga batan-on sa inyong kongregasyon. Kon gusto nilang motabang ninyo sa pagpamalit o sa pagtaganag transportasyon ug sa ubang panginahanglan, mapasalamatong dawata ang ilang tabang. Isipa kana ingong pamatuod sa gugma ni Jehova kaninyo. Mahimong masuod pa gani mo niadtong nagtabang ninyo. Ipakita kanunay nga interesado mo sa espirituwal nga pag-uswag sa mga batan-on, ug sultihi sila nga nalipay kaayo mo nga makita nga nangab-ot silag dugang pribilehiyo sa pag-alagad diha sa kongregasyon. Ug pakig-uban nila ug iestorya kanila ang inyong mga kasinatian sa kinabuhi. Kon buhaton nâ ninyo, inyong ‘gipakita nga mapasalamaton mo’ kang Jehova tungod sa mga batan-on nga iyang gikabig sa kongregasyon.—Col. 3:15; Juan 6:44; 1 Tes. 5:18.

14. Giunsa pagpakita ni Haring David ang iyang pagkamahinatagon?

¹⁴ Makita nato sa ehemplo ni Haring David ang laing importanteng hiyas nga kinahanglang ipakita sa mga tigulang—ang pagkamahinatagon. Mihatag siyag dako kaayong donasyon gikan sa iyang kaugalingong bahandi aron suportahan ang pagtukod sa templo. (1 Cron. 22:11-16; 29:3, 4) Gihimo niya kini bisag ang mapasidunggan sa maong proyekto mao ang iyang anak nga si Solomon. Kon dili na nato kayang moapil sa mga proyekto sa pagpanukod sa organisasyon, makapadayon ta sa pagsuportar niini pinaagi sa atong mga donasyon, sumala sa atong maarangan. Ug makatabang ta sa mga batan-on nga makakat-on sa atong taas nga kasinatian.

15. Unsang bililhong mga regalo ang gihatag ni Pablo kang Timoteo?

¹⁵ Maylabot sa pagkamahinatagon, konsideraha ang ehemplo ni Pablo. Gidapit niya si Timoteo nga mouban kaniya sa misyonaryong buluhaton, ug gipakita ni Pablo ang iyang pagkamahinatagon pinaagi sa pagtudlo kang Timoteo sa iyang mga pamaagi sa pagsangyaw ug pagpanudlo. (Buh. 16:1-3) Ang pagbansay ni Pablo kang Timoteo nakatabang niini nga mahimong epektibo sa pagsangyaw sa maayong balita. (1 Cor. 4:17) Dayon, gigamit ni Timoteo ang mga pamaagi ni Pablo sa pagbansay sa uban.

16. Nganong gibansay ni Shigeo ang uban?

¹⁶ Ang mga tigulang karon dili mahadlok nga dili na sila mahimong mapuslanon kon ilang bansayon ang batabata pang mga igsoon sa paghimo sa buluhaton nga ginahimo nila kaniadto diha sa kongregasyon. Pananglitan, si Shigeo, nga gihisgotan ganina, daghang tuig nang naghatag ug praktikal nga pagbansay sa batabata pang mga membro sa Komite sa Sangang Buhatan. Gibuhat niya kini aron makatabang siya sa buluhaton sa Gingharian sa nasod nga iyang gialagaran. Tungod niana, dihang miabot ang panahon nga dili na niya kaya nga mahimong koordinetor, diha nay maayong pagkabansay nga brader nga makapuli niya. Si Shigeo kapig 45 ka tuig nang membro sa Komite sa Sangang Buhatan ug padayon niyang gigamit ang iyang eksperyensiya sa pagtabang  sa batabata pang mga brader. Panalangin gyod sa katawhan sa Diyos ang mga brader nga sama kaniya!

17. Unsay ikahatag sa mga tigulang ngadto sa uban? (Lucas 6:38)

¹⁷ Kamong tigulang nga mga igsoon maoy buhing pamatuod nga ang pag-alagad kang Jehova uban ang pagtuo ug integridad mao ang kinamaayohang paagi sa pagkinabuhi. Pinaagi sa inyong ehemplo, inyong gipakita nga maayo gyod nga makakat-on ta sa mga prinsipyo sa Bibliya ug magpadapat niana. Nahibalo mo gikan sa inyong kasinatian kon giunsa paghimo ang mga butang kaniadto. Pero nakita sab ninyo nga kinahanglan mong mo-adjust sa bag-ong mga kahimtang. Kamong mga tigulang nga bag-o lang nabawtismohan, daghan sad mog ikahatag. Puwede ninyong iestorya ang kalipay nga inyong gibati sa pagkaila kang Jehova niining panahona sa inyong kinabuhi. Malipay ang mga batan-on nga makadungog sa inyong mga eksperyensiya ug sa mga leksiyon nga inyong nakat-onan. Kon inyong ‘batasanon ang paghatag’ pinaagi sa paggamit sa inyong mga eksperyensiya sa pagtabang sa uban, panalanginan gyod mo ni Jehova.—Basaha ang Lucas 6:38.

18. Sa unsang paagi magkatinabangay ang mga tigulang ug mga batan-on?

¹⁸ Sa dihang kamong minahal nga mga tigulang mas masuod sa mga batan-on, masuportahan ninyo ang usag usa. (Roma 1:12) Ang matag usa dunay nabatonan nga wala sa lain. Ang mga tigulang dunay kaalam ug eksperyensiya nga ilang nabatonan sa paglabay sa panahon. Ang mga batan-on dunay kusog. Sa dihang ang mga batan-on ug tigulang magtinabangay ingong managhigala, sila makadayeg sa atong mahigugmaong langitnong Amahan ug mahimong panalangin sa tanan diha sa kongregasyon.