1. Unsay nakatabang sa katawhan ni Jehova nga padayon siyang simbahon bisan pa sa mga problema nga ilang giatubang?

 ANG Bibliya nag-ingon nga nagkinabuhi na ta sa “kuyaw nga mga panahong lisod sagubangon.” (2 Tim. 3:1) Gawas pa sa komon nga mga kalisdanan nga giatubang sa mga tawo niining sistemaha, ang katawhan ni Jehova nakaeksperyensiya pod ug mga pagsupak ug paglutos. Unsay nakatabang nato nga padayong simbahon si Jehova bisan pa niining tanan? Ang usa nga nakatabang mao ang pagkahibalo nga si Jehova “ang Diyos nga buhi.”—Jer. 10:10; 2 Tim. 1:12.

2. Nganong makapadasig ang pagkahibalo nga si Jehova buhi nga Diyos?

² Si Jehova tinuod nga Persona nga andam motabang ug kanunayng magpalig-on nato sa dihang makaatubang tag mga pagsulay. (2 Cron. 16:9; Sal. 23:4) Kon atong hinumdoman nga si Jehova buhi nga Diyos, makatabang ni nga malahutay nato ang bisan unsang pagsulay. Kanay naeksperyensiyahan ni Haring David.

3. Unsay gipasabot ni David sa dihang miingon siya nga “si Jehova buhi”?

³ Si David nakaila kang Jehova ug misalig kaniya. Sa dihang gigukod siya sa iyang mga kaaway, apil ni Haring Saul, si David miampo ug nangayog tabang kang Jehova. (Sal. 18:6) Human tubaga sa Diyos ang iyang pag-ampo ug giluwas siya, si David miingon: “Si Jehova buhi!” (Sal. 18:46) Sa iyang pagsulti ani, wala lang basta giila ni David nga naglungtad ang Diyos. Ang usa ka reperensiya nag-ingon nga ang gisulti ni David nagpakita sa iyang pagsalig kang Jehova “ingong buhi nga diyos nga kanunayng nagatabang sa iyang katawhan.” Oo,  base sa mga nasinatian ni David, kombinsido gyod siya nga ang iyang Diyos buhi, ug tungod ana determinado siya nga alagaron ug dayegon si Jehova.—Sal. 18:​28, 29, 49.

4. Unsay kaayohan kon atong hinumdoman nga si Jehova buhi nga Diyos?

⁴ Kon atong hinumdoman nga si Jehova buhi nga Diyos, makatabang ni nato nga mahimong dasig sa pag-alagad kaniya. Makabaton tag kusog nga malahutay ang mga pagsulay ug mapalihok ta nga padayong magkugi sa pag-alagad. Magdasig pod ni nato nga padayong makigsuod kang Jehova.

ANG BUHI NGA DIYOS MAGPALIG-ON NIMO

5. Sa dihang makaatubang tag pagsulay, sa unsa ta makasalig? (Filipos 4:13)

⁵ Malahutay nato ang bisan unsang pagsulay, dako man o gamay, kon atong hinumdoman nga si Jehova buhi ug nga kanunay siyang motabang nato. Kon buot hunahunaon, bisan unsa pa ka dako ang atong problema, gamay ra kaayo na para sa atong Diyos. Siya ang Labing Gamhanan, ug hatagan ta niyag kusog nga makalahutay. (Basaha ang Filipos 4:13.) Busa makasalig gyod ta nga makaya nato ang bisan unsang problema. Kon makita nato nga ginatabangan ta ni Jehova bisan sa ginagmay nga mga pagsulay, makombinsir ta nga tabangan pod ta niya sa dihang mag-atubang tag dagkong mga pagsulay.

6. Unsay naeksperyensiyahan ni David sa batan-on pa siya nga nakapalig-on sa iyang pagsalig kang Jehova?

⁶ Konsideraha ang duha ka hitabo nga nakapalig-on sa pagsalig ni David kang Jehova. Sa batan-on pa siya, dihay leyon nga midagit ug karnero sa iyang amahan. Sa laing higayon, diha poy oso nga midagit ug karnero. Niining duha ka hitabo, maisogong gigukod ni David ang maong mga hayop ug giluwas ang karnero. Pero wala siya maghunahuna nga nahimo to niya tungod sa iyang kaugalingong kusog. Iyang giila nga si Jehova ang nagtabang niya. (1 Sam. 17:​34-37) Wala gyod kalimti ni David ang maong mga eksperyensiya. Iya tong gipamalandong maong napalig-on ang iyang pagsalig nga ang buhi nga Diyos padayong motabang niya.

7. Sa unsa nagpokus si David, ug nganong nakatabang ni kaniya nga makig-away kang Goliat?

⁷ Wala madugay, tingali sa tin-edyer pa gihapon si David, miadto siya sa kampo sa mga sundalo sa Israel. Iyang nakita nga ang mga sundalo nahadlok pag-ayo sa higanteng Filistehanon nga si Goliat nga ‘nagtamay sa kasundalohan sa Israel.’ (1 Sam. 17:​10, 11) Nahadlok ang mga sundalo kay nagpokus sila sa higante ug sa mga pagtamay nga ilang nadungog. (1 Sam. 17:​24, 25) Pero lahi ang panglantaw ni David. Giisip niya ang pagtamay ni Goliat dili lang ingong pagtamay sa kasundalohan sa Israel kondili sa “kasundalohan sa buhi nga Diyos.” (1 Sam. 17:26) Oo, nagpokus si David kang Jehova. Misalig siya nga ang Diyos nga mitabang niya niadtong tigbantay pa siyag mga karnero motabang pod niya niining higayona. Segurado siya nga paluyohan siya sa Diyos maong iyang giatubang si Goliat, ug siyempre midaog siya!—1 Sam. 17:​45-51.

8. Unsay makatabang nato nga magpokus kanunay kang Jehova sa dihang mag-atubang ug mga pagsulay? (Tan-awa sab ang hulagway.)

⁸ Malahutay pod nato ang mga pagsulay kon atong hinumdoman nga ang buhi nga Diyos andam motabang nato. (Sal. 118:6) Mapalig-on nato ang atong pagsalig nga tabangan ta niya kon atong hinumdoman ang iyang mga gihimo kaniadto. Puwede tang magbasag mga rekord sa Bibliya bahin sa kon giunsa pagluwas ni Jehova ang iyang mga alagad. (Isa. 37:​17, 33-37) Puwede pod tang mobasa ug  motan-aw ug mga report sa jw.org kon giunsa pagtabang ni Jehova ang mga igsoon karon. Dugang pa, hinumdomi ang mga higayon nga gitabangan ka ni Jehova. Ayaw kabalaka kon wala kay talagsaong mga eksperyensiya, sama sa pagpakig-away sa oso o leyon. Ngano? Kay ang tinuod, daghan nag nahimo si Jehova para nimo. Gikabig ka niya. (Juan 6:44) Gani, tungod lang sa iyang tabang nga nakapadayon ka sa pag-alagad. Puwede nimo siyang hangyoon nga tabangan ka nga mahinumdoman ang mga higayon nga gitubag niya ang imong mga pag-ampo, gitabangan ka sa panahon nga nanginahanglan kag tabang, ug gipalig-on ka sa lisod nga situwasyon. Ang pagpamalandong sa imong mga eksperyensiya magpalig-on sa imong pagsalig nga padayon kang tabangan ni Jehova.

9. Unsay angay natong panglantaw sa mga pagsulay? (Proverbio 27:11)

⁹ Kon atong hinumdoman nga buhi si Jehova, motabang ni nato nga makabaton ug balanseng panglantaw sa atong mga pagsulay. Sa unsang paagi? Makatabang ni nga masabtan nato nga ang atong mga pagsulay konektado sa mas dako nga isyu. Si Satanas miingon nga kon makaatubang tag lisod nga mga kahimtang, biyaan nato si Jehova. (Job 1:​10, 11; basaha ang Proverbio 27:11.) Pero kon molahutay ta sa atong mga pagsulay, atong gipakita nga gimahal nato si Jehova ug gipamatud-an nga bakakon ang Yawa. Nag-atubang ba ka karon ug mga kalisdanan sama sa pagsupak sa gobyerno, kalisod sa pinansiyal, o kawalay interes sa mga tawo sa inyong teritoryo? Kon mao, hinumdomi nga ang imong situwasyon karon maghatag nimog kahigayonan nga lipayon si Jehova. Hinumdomi pod nga dili niya itugot nga sulayan ka nga labaw sa imong maantos. (1 Cor. 10:13) Hatagan ka niyag kusog nga makalahutay.

GANTIHAN KA SA BUHI NGA DIYOS

10. Unsay buhaton sa buhi nga Diyos niadtong mga nagsimba kaniya?

¹⁰ Si Jehova ang Tigganti sa iyang mga alagad. (Heb. 11:6) Hatagan ta niyag kalinaw ug  katagbawan karon ug hatagan ta niyag kinabuhing walay kataposan sa umaabot. Naa tay pagsalig kang Jehova, ug kombinsido ta nga naa siyay tinguha ug gahom nga gantihan ta. Kay kombinsido ta ana, mapalihok ta nga padayong magkugi sa atong pag-alagad sama sa matinumanong mga magsisimba sa Diyos kaniadto. Kanay gihimo ni Timoteo sa unang siglo.—Heb. 6:​10-12.

11. Unsay nagpalihok kang Timoteo nga magkugi para sa kongregasyon? (1 Timoteo 4:10)

¹¹ Basaha ang 1 Timoteo 4:10. Si Timoteo misalig sa buhi nga Diyos. Tungod ana, nagkugi siya pag-ayo para kang Jehova ug sa uban. Sa unsang paagi? Gisunod niya ang tambag ni apostol Pablo nga padayong mouswag sa pagpanudlo, diha man sa ministeryo o sa kongregasyon. Nagpakita pod siyag maayong ehemplo sa iyang mga isigkamagtutuo, batan-on man o edaran. Gihimo pod niya ang lisod nga mga asaynment, apil ang paghatag ug prangka pero mahigugmaong tambag niadtong mga nagkinahanglan niana. (1 Tim. 4:​11-16; 2 Tim. 4:​1-5) Bisag usahay wala makita o pabilhi sa uban ang iyang ginahimo, segurado si Timoteo nga gantihan siya ni Jehova.—Roma 2:​6, 7.

12. Unsay nagpalihok sa mga ansiyano nga padayong magkugi sa ilang buluhaton? (Tan-awa sab ang hulagway.)

¹² Ang mga ansiyano karon makasalig pod nga nakita ug gipabilhan ni Jehova ang ilang mga paningkamot. Gawas sa pag-shepherding, pagpanudlo, ug pagsangyaw, daghang ansiyano ang mitabang sa mga construction project ug disaster relief. Ang uban nag-alagad sa Patient Visitation Group o Hospital Liaison Committee. Ang mga ansiyano nga miboluntaryo niana nga mga buluhaton nahibalo nga ang kongregasyon iya ni Jehova, dili sa mga tawo. Tungod ana, kinasingkasing nilang gituman ang ilang mga asaynment ug bug-os nga misalig nga gantihan sila sa Diyos sa ilang mga ginahimo.—Col. 3:​23, 24.

13. Unsay gibati ni Jehova sa atong mga paningkamot sa pag-alagad kaniya?

 ¹³ Dili tanan ang makaalagad ingong mga ansiyano. Pero kitang tanan naay mahimo para kang Jehova. Giapresyar sa Diyos ang atong mga paningkamot nga himoon ang atong maarangan sa pag-alagad kaniya. Makita niya dihang mohatag ta ug donasyon para sa tibuok kalibotang buluhaton, bisag unsa pa ni ka gamay. Malipay siya dihang mopataas ta sa atong kamot aron mokomento bisag maulawon ta. Malipay pod siya kon palabyon nato ang mga sayop sa uban ug magpasaylo. Bisag dili nimo mahimo ang tanan nga gusto unta nimong himoon para kang Jehova, makasalig ka nga pabilhan niya ang bisan unsa nga imong mahimo. Gimahal ka niya tungod ana, ug iya kang gantihan.—Luc. 21:​1-4.

PABILING SUOD SA BUHI NGA DIYOS

14. Nganong ang pagpabiling suod kang Jehova motabang nato nga magmatinumanon? (Tan-awa sab ang hulagway.)

¹⁴ Kon tinuod si Jehova kanato, mahimong mas sayon ang pagpabiling matinumanon. Mao nay nahitabo kang Jose. Wala gyod siya mohimog imoral. Tinuod kaayo si Jehova kaniya ug dili niya gusto nga mapasakitan Siya. (Gen. 39:9) Aron mahimo pong tinuod si Jehova kanato, kinahanglan tang mogahin ug panahon sa pag-ampo ug pagtuon sa iyang Pulong. Pinaagi ana, mas masuod ta kaniya. Ug kon suod ta kang Jehova sama kang Jose, dili gyod ta mobuhat ug bisan unsa nga makapasakit Kaniya.—Sant. 4:8.

15. Unsay atong makat-onan sa nahitabo sa mga Israelinhon didto sa kamingawan? (Hebreohanon 3:12)

¹⁵ Kadtong mawad-ag pagsalig kang Jehova dili makapabiling maunongon kaniya. Hunahunaa ang nahitabo sa mga Israelinhon didto sa kamingawan. Bisag nahibalo sila nga buhi si Jehova, nangutana gihapon sila: “Naa ba si Jehova sa atong taliwala o wala?” Kana nagpakita nga nagsugod na sila sa pagduhaduha kon motagana ba gyod si Jehova. (Ex. 17:​2, 7) Tungod ana, mirebelde sila sa Diyos. Seguradong dili gyod nato gustong sundogon ang ilang pagkamasinupakon kay dili sila maayong panig-ingnan kanato.—Basaha ang Hebreohanon 3:12.

16. Unsay puwedeng magsulay sa atong pagtuo?

 ¹⁶ Lisod kaayo ang pagpabiling suod kang Jehova niining sistemaha. Daghan ang wala magtuo nga naglungtad ang Diyos. Daghan pod niadtong mga nagsupak sa Diyos ang morag hayahay ug kinabuhi. Sa dihang makita nato na, puwedeng masulayan ang atong pagtuo. Siyempre dili tingali ta moingon nga wala maglungtad ang Diyos, pero basin magduhaduha na ta kon tabangan ba gyod ta niya. Mao nay gibati sa magsusulat sa Salmo 73. Nakita niya nga kadtong nagsupak sa mga balaod sa Diyos padayong nag-enjoy sa ilang kinabuhi. Tungod ana, nagsugod siya sa pagduhaduha kon naa ba gyoy pulos ang iyang pag-alagad.—Sal. 73:​11-13.

17. Unsay makatabang nato nga magpabiling suod kang Jehova?

¹⁷ Unsay nakatabang sa salmista nga mausab ang iyang panghunahuna? Iyang gipamalandong kon unsay mahitabo niadtong mga malimot ug dili na mosalig kang Jehova. (Sal. 73:​18, 19, 27) Iya pong gihunahuna ang mga kaayohan sa pag-alagad sa Diyos. (Sal. 73:24) Sa samang paagi, puwede pod natong pamalandongon ang mga panalangin nga gihatag ni Jehova kanato ug kon unsa kahay atong kinabuhi kon wala ta mag-alagad kaniya. Ang paghimo ana makatabang nato nga magmatinumanon. Ug sama sa salmista, makaingon pod ta: “Bahin kanako, maayo alang kanako ang pagduol sa Diyos.”—Sal. 73:28.

18. Nganong dili ta angayng mahadlok sa mahitabo sa umaabot?

¹⁸ Malahutay nato ang bisan unsang kalisdanan niining kataposang mga adlaw kay kita ‘nagpaulipon sa buhi ug matuod nga Diyos.’ (1 Tes. 1:9) Si Jehova buhi nga Diyos nga andam motabang sa iyang mga alagad. Gitabangan niya ang iyang mga alagad kaniadto, ug iya pod nang ginahimo karon. Hapit na natong masinatian ang dakong kasakitan, ang pinakalisod nga panahon sa kasaysayan sa tawo. Pero dili ta mag-inusara nianang panahona kay kauban nato si Jehova. (Isa. 41:10) Hinaot magmaisogon ta ug moingon: “Si Jehova ang akong magtatabang; dili ko mahadlok.”—Heb. 13:​5, 6.