Mwilalenga Umupashi wa Mushilo uwa kwa Yehova Ubulanda
Mwilalenga Umupashi wa Mushilo uwa kwa Yehova Ubulanda
“Mwilalenga umupashi wa mushilo uwa kwa Lesa ubulanda, muli uyo mwashininkishishako ukuti muli bana ba kwa Lesa.”—EFES. 4:30.
1. Cinshi Yehova acitila iminshipendwa ya bantu, kabili cinshi cifwaikwa sana kuli bena?
YEHOVA alicitila abantu abengi sana icintu caibela muli cino calo ca mafya. Alenga ukuti bapalame kuli ena ukupitila mu Mwana wakwe uwafyalwa eka, Yesu Kristu. (Yoh. 6:44) Na imwe mwaba pali aba bantu nga ca kuti mwali-ipeela kuli Lesa kabili mulacita ififwaikwa ku baipeela. Apo mwalibatishiwa mwi shina lya mupashi wa mushilo, icifwaikwa sana kuli imwe kulatungululwa no yo mupashi.—Mat. 28:19.
2. Mepusho nshi twalalandapo?
2 Fwe ‘babyala ku mupashi’ tulafwala ubuntu bupya. (Gal. 6:8; Efes. 4:17-24) Lelo umutumwa Paulo alitufunda no kutusoka ukuti tatufwile ukulenga umupashi wa mushilo uwa kwa Lesa ubulanda. (Belengeni Abena Efese 4:25-32.) Nomba twalabebeta sana ukufunda kwa mutumwa Paulo. Ni mwi aloseshe ilyo alandile pa kulenga umupashi wa kwa Lesa ubulanda? Bushe umuntu uwaipeela kuli Yehova kuti acita shani icintu ca musango yo? Kabili kuti twacita shani pa kuti tatulelenga umupashi wa kwa Yehova ubulanda?
Umo Paulo Aloseshe
3. Kuti mwalondolola shani umwalola amashiwi yalembwa pa Abena Efese 4:30?
3 Ica kubalilapo, moneni amashiwi ya kwa Paulo pa Abena Efese 4:30. Alembele ukuti: “Mwilalenga umupashi wa mushilo uwa kwa Lesa ubulanda, muli uyo mwashininkishishako ukuti muli bana ba kwa Lesa abo akalubula pa bushiku bwa kulubulwa.” Paulo talefwaya Abena Kristu banankwe bacita ifingalenga bucibusa bwabo na Lesa ukonaika. Ni ku mupashi wa kwa Yehova e ko ‘bashininkishishe ukuti bakalubulwa pa bushiku bwa kulubulwa.’ Umupashi wa mushilo uwa kwa Lesa wali cifwati, na pali ino nshita ucili cifwati, nangu “icishibilo ca fikesa” pa basubwa aba cishinka. (2 Kor. 1:22) Ici cifwati cishibisha ukuti ba kwa Lesa kabili ali no kubapeela ubumi mu muulu. Abafwatikwa ici cifwati bafika ku mpendwa ya 144,000.—Ukus. 7:2-4.
4. Mulandu nshi cacindamina ukukanalenga umupashi wa kwa Lesa ubulanda?
4 Ukulenga umupashi ubulanda e ca kubalilapo icingalenga aya maka ya kwa Lesa yaleka ukutungulula Umwina Kristu. Icacitikile Davidi ilyo acitile ulubembu na Bati-sheba no kwipaya umulume wakwe cilangilila ukuti umupashi wa mushilo kuti waleka ukutungulula umuntu. Ilyo Davidi alapiile, apapeete kuli Yehova ati: “Mwimpoosa mfume pa cinso cenu; kabili umupashi wenu uwa mushilo shi mwimpoka.” (Amalu. 51:11) Abasubwa abali no kupokelela “icisote ca bufumu” ica mweo wa muyayaya mu muulu, ni balya fye abakaba aba “cishinka ukufika na ku mfwa.” (Ukus. 2:10; 1 Kor. 15:53) Abena Kristu ababa ne subilo lya kwikala pe sonde na bo bene balakabila umupashi wa mushilo pa kuti batwalilila ukuba aba cishinka kuli Lesa no kwisapokelela umweo pa mulandu wa citetekelo cabo mwi lambo Kristu apeele ilya kutulubula. (Yoh. 3:36; Rom. 5:8; 6:23) Kanshi ifwe bonse tufwile ukucenjela pa kuti tatulengele umupashi wa mushilo uwa kwa Yehova ubulanda.
Umwina Kristu Kuti Alenga Shani Umupashi Ubulanda?
5, 6. Bushe Umwina Kristu kuti alenga shani umupashi wa kwa Yehova ubulanda?
5 Fwe Bena Kristu baipeela, kuti twatalukako ku fingalenga umupashi ubulanda. Kuti twacita ifi nga ‘tuletungululwa no mupashi ne mikalile yesu ileumfwana ne fifwaya umupashi,’ pantu nga tulecita ifyo, tatwakulacita ififwaya umubili kabili tatwakabe ne mibele yabipa. (Gal. 5:16, 25, 26) Lelo ifintu kuti fya-aluka. Kuti twalenga umupashi wa kwa Lesa ubulanda nga ca kuti panono panono nalimo ukwabula no kwishiba, twalacita ifyo Lesa alesha mu Cebo cakwe icalembelwe ukupitila mu mupashi.
6 Nga lyonse tatuletungululwa no mupashi wa mushilo, kuti twaulenga ubulanda, twalenga na Yehova, Intulo ya mupashi, aba no bulanda. Ilyo twalabebeta Abena Efese 4:25-32 twalamona ifyo tufwile ukuisunga, kabili twalamona ifyo twingacita pa kuti twilalenga umupashi wa kwa Lesa ubulanda.
Ifingatwafwa Ukukanalenga Umupashi Ubulanda
7, 8. Londololeni umulandu tufwile ukulalandila icine.
7Tufwile ukulalanda icine. Ukulingana na Abena Efese 4:25, Paulo alembele ukuti: “Apo mwalipoosa ubufi, mulelanshanya icine, pantu tuli filundwa fya mubili umo.” Apo twalikatana pa mulandu wa kuti tuli “filundwa fya mubili umo,” tatufwile ukuba no bucenjeshi nangu ukulanda ku mumbo fye ifingalufya Abena Kristu banensu pantu ifyo cimo cine no kubabepa. Bonse abatwalilila ukucita ifya musango yo bucibusa bwabo na Lesa bukasuka bukapwe.—Belengeni Amapinda 3:32.
8 Imilandile ne micitile ya bucenjeshi filaleta amalekano mu cilonganino. E ico, tufwile ukuba nga kasesema Daniele uwali uwa cishinka ica kuti abantu balifililwe ukusangamo icabipa muli ena. (Dan. 6:4) Na kabili tufwile ukulaibukisha ifyo Paulo afundile Abena Kristu abali ne subilo lya kuya ku muulu ukuti, icilundwa cimo na cimo ica “mubili wa kwa Kristu” cilundwa ca bonse kabili cikabila ukwikatana na basambi ba kwa Yesu abasubwa, abalanda icine. (Efes. 4:11, 12) Na ifwe nga tulefwaya ukwisaikala muli Paradaise pe sonde, tufwile ukulanda icine, ne co cikalenga tukekatane na ba bwananyina isonde lyonse.
9. Mulandu nshi cacindamina ukukonka ifyalandwa pa Abena Efese 4:26, 27?
9Tufwile ukukaana Satana pa kuti ekwata apa konawila bucibusa bwesu na Lesa. (Yako. 4:7) Umupashi wa mushilo ulatwafwa ukukaana Satana. Ku ca kumwenako fye, kuti twacita ifyo nga tatulebubuka mu bukali. Paulo alembele ukuti: “Kalipeni, lelo mwibembuka; mwileka akasuba kawe mucili abakalipa, kabili mwipeela Satana Kaseebanya apa kwikala.” (Efes. 4:26, 27) Nga ca kuti pali umulandu wine wine uwalenga tukalipe, ukupepa ipepo mu mutalalila apo pene kuti kwalenga twaba no “mutima uwatekanya,” e kutila ukuilama mu nshita ya kucita fimo ifingalenga umupashi ubulanda. (Amapi. 17:27) E ico, te kwesha ukutwalilila abakalipa no kupeela Satana ishuko lya kulenga twacita ifyabipa. (Amalu. 37:8, 9) Inshila imo iyo twingakaaninamo Satana kulawikishanya bwangu, nga filya Yesu atufundile.—Mat. 5:23, 24; 18:15-17.
10, 11. Mulandu nshi tushifwile ukwibila nangu ukucita ifyabulamo ubufumacumi?
10Nga twatunkwa ukwiba nangu ukukanaba no bufumacumi tatufwile ukucita ifyo. Paulo alembele pa bupuupu ati: “Uwibile eiba na kabili, lelo abombeshe, abombe umulimo usuma ku minwe yakwe, pa kuti akwate ica kupeelako uushikwete.” (Efes. 4:28) Nga ca kuti Umwina Kristu uwaipeela aiba, kuti ‘aseebanya ishina lya kwa Lesa.’ (Amapi. 30:7-9) Nangu fye kwiba pa mulandu wa bupiina takwawama. Abatemwa Lesa na bantu banabo balishiba ukuti ubupuupu bonse bubi.—Marko 12:28-31.
11 Paulo talandile fye pa fyo tushifwile ukucita; alandile na pa fyo tufwile ukucita. Nga ca kuti tuletungululwa no mupashi wa mushilo e lyo ne mikalile yesu ileumfwana ne fifwaya umupashi, tukalabombesha pa kuti tukalesunga bwino ulupwa no kukwatako “[ifya] kupeelako uushikwete.” (1 Tim. 5:8) Yesu na batumwa bakwe balesungako indalama sha kwafwilamo abapiina, lelo Yuda Iskariote shikamfutu, alebuulamo indalama shimo. (Yoh. 12:4-6) Kanshi ena taletungululwa no mupashi wa mushilo. Ifwe fwe batungululwa no mupashi wa kwa Lesa ‘twaliba aba cishinka muli fyonse,’ nga filya Paulo ali. (Heb. 13:18) Kanshi tatulenga umupashi wa mushilo uwa kwa Yehova ubulanda.
Fimbi Ifingatwafwa Ukukanalenga Umupashi Ubulanda
12, 13. (a) Milandile ya musango nshi tufwile ukutalukako ukulingana na Abena Efese 4:29? (b) Bushe imilandile yesu ifwile ukuba shani?
12Tufwile ukulama akanwa. Paulo atile: “Mwileka amashiwi yabola yafume mu kanwa kenu, kano amashiwi ayasuma aya kukuula ukulingana no kukabila, pa kuti yengakuula abaleumfwa.” (Efes. 4:29) Pano na po, Paulo tatwebele fye ifyo tushifwile ukulacita, lelo atweba ne fyo tufwile ukulacita. Nga tuletungululwa no mupashi wa mushilo uwa kwa Lesa, twakulalanda ‘amashiwi ayasuma aya kukuula pa kuti yengakuula abaleumfwa.’ Kabili tatufwile ukuleka “amashiwi yabola” yalefuma mu tunwa twesu. Ishiwi lya ciGriki ilyapilibulwa ati “ayabola” e lyo babomfya pa kulondolola ifintu pamo nga icisabo, isabi, atemwa inama nga nafibola. Filya fine twapata ifintu fya musango yo ifituselausha, e fyo twapata ne milandile iyo Yehova amona ukuti yalibipa.
13 Imilandile yesu ifwile ukuba iya mucinshi, iya cikuuku, “iyalungwamo umucele.” (Kol. 3:8-10; 4:6) Abantu nga baumfwa fye imilandile yesu bafwile ukwishiba ati twalipusanako na bantu bambi. E ico natuleafwa bambi ku mashiwi yesu “ayasuma aya kukuula.” Kabili natuleumfwa filya fyaleumfwa kemba wa malumbo uwaimbile ati: “Lekeni amashiwi ya mu kanwa kandi ne fyo umutima wandi utontonkanyapo fimusekeshe, mwe Yehova, Icilibwe candi icasansuka kabili Umulubushi wandi.”—Amalu. 19:14.
14. Ukulingana na Abena Efese 4:30, 31, mibele nshi tushilingile ukukwata?
14Tatufwile ukuba ne mpatila, ubukali, umusaalula, kabili tufwile ukuleka ububi bonse. Pa numa ya kusoka Abena Kristu ukuti tabafwile ukulenga umupashi wa kwa Lesa ubulanda, Paulo alembele ukuti: “Mwilaba ne mpatila ku banenu, muleke icipyu no bukali no kootoka no musaalula pamo no bubi bonse.” (Efes. 4:30, 31) Apo tuli babembu, ifwe bonse tufwile ukulwisha na maka pa kuti tulelama amatontonkanyo yesu ne fyo tucita. Nga ca kuti tuleba “ne mpatila . . . icipyu no bukali,” kuti twalenga umupashi wa kwa Lesa ubulanda. Kabili kuti twalenga umupashi wa kwa Lesa ubulanda nga tulesungila ifilubo ifyo abantu batulufyanya, ukubafulilwa, nangu ukukaana ukuwikishanya nabo. Nga ca kuti twatampa no kusuula ukufunda kwaba mu Baibolo, kuti twakwata imibele ingalenga twasuka twabembukila umupashi, ne fingesafumamo teti fiwame nangu panono.
15. Nga ca kuti umo atulufyanya, cinshi tufwile ukucita?
15Tufwile ukuba aba cikuuku, aba mitima ya nkumbu, kabili ababelela uluse. Paulo alembele ukuti: “Mubelane icikuuku, mube aba mitima ya nkumbu, abaitemenwa ukubelelana uluse filya na Lesa aitemenwe ukumubelela uluse muli Kristu.” (Efes. 4:32) Nangu ca kuti umo atucita cimo icatukalipa sana, tufwile ukumubelela uluse, nga filya na Lesa abelela uluse. (Luka 11:4) Tutile Umwina Kristu munensu alanda ifibi pali ifwe. Pa kwesha ukuwamya ifintu, twaya mu kulanda nankwe. Aumfwa ububi pa fyo asosele kabili alomba ubwelelo, na ifwe twamweleela. Tatufwile ukupelela fye pa kumweleela. Ilembo lya Ubwina Lebi 19:18 litila: “Wilalandula kabili wilapata abana ba bantu bobe; lelo uletemwa umunobe nge fyo waitemwa we mwine. Nine Yehova.”
Tufwile Ukucenjela
16. Landeni pa ca kumwenako icilelanga ukuti tufwile ukuleka ukucita fimo pa kuti twilalenga umupashi wa kwa Yehova ubulanda.
16 Kuti twatunkwa ukucita ifishitemuna Lesa ilyo tuli fweka. Ku ca kumwenako, nalimo munyinefwe alekutika ku nyimbo isho Abena Kristu bashifwile ukumfwako. Mu kuya kwa nshita, kampingu yakwe yalamucusha pa mulandu wa kusuula ukufunda kwa mu Baibolo ukwaba mu mpapulo sha “musha wa cishinka kabili uwashilimuka.” (Mat. 24:45) Tutile apepelapo pali ubu bwafya nalimo aibukisha na mashiwi ya kwa Paulo ayaba pa Abena Efese 4:30. Lyena apingulapo ukuti talefwaya ukucita ifingalenga umupashi wa kwa Lesa ubulanda, kabili apampamina pa kukanalakutika ku nyimbo shabipa. Yehova ali no kupaala imicitile ya kwa uyu munyinefwe. E ico, shi lyonse natuleibaka pa kuti twilalenga umupashi wa kwa Lesa ubulanda.
17. Cinshi cingacitika nga tatucenjele e lyo tatulepepa no kupepa?
17 Nga tatucenjele e lyo no kupepa tatulepepa, kuti twacita ifintu fimo ifyakowela nangu ifyabipa ifingalenga umupashi ubulanda. Apo umupashi wa mushilo ulenga umuntu ukuba ne mibele nge yo Shifwe wa ku muulu akwatako, nga twaulenga ubulanda, ninshi na o twamulenga ubulanda, lelo tatwingafwaya ukucita ica musango yo. (Efes. 4:30) Bakalemba abaYuda aba mu nshiku sha kwa Yesu balicitile ulubembu ilyo baleti Yesu alecitila ifipesha amano ku maka ya kwa Satana. (Belengeni Marko 3:22-30.) Balya balwani ba kwa Kristu ‘bapontele umupashi wa mushilo,’ e ico bacitile ulubembu ulushingelelwa. Shi twikatala atucita ica musango yo!
18. Kuti twaishiba shani ukuti tatwacita ulubembu ulo teti batubelelepo uluse?
18 Apo tatufwaya nangu panono ukucita ulubembu ulo te kuti batubelelepo uluse, tufwile ukulaibukisha ifyo Paulo alandile pa lwa kulenga umupashi ubulanda. Nomba, ni shani nga ca kuti twalicita ulubembu lwabipisha? Nga ca kuti twalilapila kabili baeluda balitwafwa, kuti twalanda ukuti ninshi Lesa alitubelela uluse no kuti tatwabembukila umupashi wa mushilo. Lesa kuti atwafwa ukukanabwekeshapo ukucita icili conse icingalenga umupashi ubulanda.
19, 20. (a) Finshi fimo ifyo tushifwile ukulacita? (b) Finshi tufwile ukupampaminapo ukucita?
19 Lesa alabomfya umupashi wakwe uwa mushilo ku kulenga abantu bakwe ukuba abatemwana, abasekelela, kabili abaikatana. (Amalu. 133:1-3) E ico, tatufwile ukucita ulwambo nangu ukulanda ifilanga ukuti twalisuula bakacema abasontwa no mupashi pantu nga tulecita ifi kuti twalenga umupashi ubulanda. (Imil. 20:28; Yuda 8) Lelo, tufwile ukulacita ifingalenga twaikatana no kucindikana mu cilonganino. Tatufwaya nangu panono ukupanga utumabumba mu cilonganino ca bantu ba kwa Lesa. Paulo alembele ati: “Ndemukonkomesha, mwe bamunyinane, mwi shina lya kwa Shikulwifwe Yesu Kristu ukuti bonse mulesosa fimo fine, kabili pelaba amalekano pali imwe, lelo muleba abaikatana mu mano yamo yene na mu kutontonkanya kumo kwine.”—1 Kor. 1:10.
20 Yehova alafwaya ukutwafwa kabili te kuti afilwe ukutwafwa pa kuti twilalenga umupashi wakwe ubulanda. Natutwalilile ukupepela umupashi wa mushilo no kupampamina pa kukanaulenga ubulanda. Shi natutwalilile ‘ukulabyala ku mupashi,’ no kulafwaisha ukuti umupashi uletutungulula pali nomba na ku ciyayaya.
Kuti Mwa-asuka Shani?
• Bushe calola mwi ukulenga umupashi wa kwa Lesa ubulanda?
• Bushe umuntu uwaipeela kuli Yehova kuti alenga shani umupashi wa kwa Lesa ubulanda?
• Finshi tushifwile ukucita pa kuti twilalenga umupashi wa mushilo ubulanda?
[Amepusho]
[Icikope pe bula 30]
Muleangufyanya ukuwikishanya
[Icikope pe bula 31]
Fisabo nshi pali ifi ifileimininako imilandile yenu?