Tetekeleni Yehova Umupwilapo mu Nshita sha Mafya
Tetekeleni Yehova Umupwilapo mu Nshita sha Mafya
“Lesa aba kuli ifwe icubo kabili ubukose, mu fya kumanama asangwa ukwafwa apakalamba.”—AMALUMBO 46:1.
1, 2. (a) Ca kumwenako nshi cilanga ukuti tacakumanina ukulanda fye ukuti twalitetekela Lesa? (b) Mulandu nshi tulingile ukucitila ifyacila pa kulanda fye ukuti twalitetekela Yehova?
UKULANDA ukuti twalitetekela Lesa kwalipusana no kulange co ku micitile yesu. Ku ca kumwenako, amashiwi ya kuti “Twatetekela Lesa” pa myaka iingi yalilembwa pa ndalama sha ku United States of America. * Mu 1956, Icilye ca ku United States of America capangile ifunde lya kuti aya, yali no kuba e mashiwi ya mucincisho aya calo ca United States. Icipapusha ca kuti, abantu abengi—te muli cilya calo ceka lelo mwi sonde lyonse—batetekela sana indalama ne fyuma ukucila Lesa.—Luka 12:16-21.
2 Pamo nga Bena Kristu ba cine, tufwile ukucita ifyacila pa kulanda fye ukuti twalitetekela Yehova. Filya fine ‘icitetekelo icabula imilimo caba icafwa,’ e fyo no kulanda ukuti twalitetekela Lesa kwaba ukwa fye nga takukwete imilimo. (Yakobo 2:26) Mu cipande cafumineko, twasambilile ukuti icitetekelo cesu muli Yehova cimoneka ilyo twapepa kuli wene, ilyo twafwayafwaya ubutungulushi mu Cebo cakwe, kabili ilyo twafwayafwaya ubutungulushi bwa kuteyanya kwakwe. Natumone nomba ifyo twingakonka ishi nshila shitatu mu nshita sha mafya.
Ilyo Incito Yapwa Nelyo Ilyo Tulefola Indalama Shinono
3. Mafya nshi aya ndalama ababomfi ba kwa Yehova bakwata muli shino “nshita shaibela,” kabili twaishiba shani ukuti Lesa alafwaya ukutwafwa?
3 Muli shino “nshita shaibela,” ifwe pamo nga Bena Kristu tukwata amafya yamo yene aya ndalama nga bantu bambi. (2 Timote 3:1) E co, kuti napamo twaisanga ukwabula incito. Nelyo ukwabula ukuitemenwa kuti twalabombela indalama shinono. Nga cabe fyo, kuti catukosela ‘ukusakamana abantu besu.’ (1 Timote 5:8) Bushe Lesa Uwapulishamo alafwaya ukutwafwa mu nshita sha musango yu? Ukwabula no kutwishika! Kwena, Yehova, tatucingilila ku mafya yonse aya muli buno bwikashi. Lelo, nga twamutetekela, amashiwi ya pa Amalumbo 46:1 yakafishiwapo kuli ifwe ayatila: “Lesa aba kuli ifwe icubo kabili ubukose, mu fya kumanama asangwa ukwafwa apakalamba.” Lelo, kuti twalanga shani ukuti twalitetekela Yehova umupwilapo mu nshita sha mafya ya ndalama?
4. Ilyo twaba na mafya ya ndalama, cinshi twingapepela, kabili Yehova ankulako shani ku mapepo ya musango yu?
4 Inshila imo iya kulangilamo ukuti twalitetekela Yehova kupepa kuli wene. Lelo cinshi twingapepela? Kwena, ilyo tuli na mafya ya ndalama, tufwile ukupepela sana amano. Ukwabula no kutwishika, pepeleni amano! Icebo ca kwa Lesa citulaya ukuti: “Umo uwa muli imwe nga abulwa amano, alelomba kuli Lesa, pantu apeela fye kuli bonse ukwabula ukushobaula; kabili yakapeelwa kuli wene.” (Yakobo 1:5) Lombeni Yehova amano—e kuti amano ya kubomfya bwino ukwishiba, ukwiluka, no mucetekanya—pa kuti mupingule bwino pa fintu. Shifwe wa ku muulu uwa kutemwa atulaya ukuti akomfwa amapepo ya musango yu. Lyonse afwaya ukutambalike nshila sha bamutetekela no mutima wabo onse.—Amalumbo 65:2; Amapinda 3:5, 6.
5, 6. (a) Mulandu nshi twingafwaila ubwafwilisho mu Cebo ca kwa Lesa ku kutwafwa ukubomba na mafya ya ndalama? (b) Cinshi twingacita ku kucefyako amasakamika ilyo incito yapwa?
5 Ukufwaya ubutungulushi mu Cebo ca kwa Lesa ni nshila na imbi iya kulangilamo ukuti twalitetekela Yehova. Ifishimiko fyakwe ifya mano ifisangwa mu Baibolo “fya cishinka nga nshi.” (Amalumbo 93:5) Nangu ca kuti napapita imyaka 1,900 apo ici citabo calembelwe, ici citabo capuutwamo cakwata ukupanda amano twingacetekela ne fyebo fingatwafwa ukubomba na mafya ya ndalama. Moneni ifya kumwenako fimo pa mano ya mu Baibolo.
6 Kale sana Imfumu ya mano Solomone yatile: “Twaliwamo tulo twa mubomfi, nga alyo tunono napamo ifingi; lelo iciikushi ca mucindami tacimuleko kutusha mu tulo.” (Lukala Milandu 5:12) Cikabila inshita ne ndalama ukuwamya, ukusungilila, no kucingilila ifikwatwa fyesu. E co lintu incito yapwa, kuti twamona iyi nshita nge ya kuceeceeta cipya cipya imikalile yesu, ukwesha ukulekanya ifyo tukabila ku fyo tufwaya fye. Pa kuti tucefyeko amasakamika, kuti cawama ukwalulako fimo. Ku ca kumwenako, bushe kuti twa-angusha imikalile yesu, napamo ukukuukila mu ng’anda iinono nelyo ukushitisha ifikwatwa fishilekabilwa?—Mateo 6:22.
7, 8. (a) Yesu alangile shani ukuti alishiba ati abantunse abashapwililika balitemwa sana ukusakamikwa pa fya ku mubili? (Moneni no tulembo twa pe samba.) (b) Kufunda nshi ukwa mano Yesu afundile pa lwa kukanacishamo ukusakamikwa?
7 Mu Lyashi lya pa Lupili, Yesu afundile ati: “Mwilasakamikilwa imyeo yenu ifyo mukalya nelyo ifyo mukanwa, nelyo imibili yenu ifyo mukafwala.” * (Mateo 6:25) Yesu alishibe ukuti abantunse bashapwililika mu cifyalilwa balasakamikwa pa lwa kukwata ifilekabilwa mu bumi. Lelo, kuti ‘twaleka shani ukusakamikilwa’ ifya musango yu? Yesu atile: “Mulefwaya intanshi ubufumu.” Te mulandu na mafya twakwata, tufwile ukutwalilila ukutangisha ukupepa Yehova mu bumi bwesu. Nga twacite fyo, ninshi Shifwe wa ku muulu ‘akalundako’ fyonse ifyo tukabila cila bushiku. Mu nshila iili yonse umwine eshibe, akatupayanishisha ifyo tukabila.—Mateo 6:33.
8 Yesu afundile no kuti: “Mwisakamikilwa ubwa mailo, pantu ubwa mailo bukaba na masakamika ya buko.” (Mateo 6:34) Te cisuma ukusakamikwa pa fyo napamo cikaba mailo. Uwasoma umo atile: “Ifyo tutiina ukuti e fikacitika ilingi taficitika no kucitika.” Mu kuicefya ukukonka ukufunda kwa Baibolo ukwa kwangwa pa fyo tufwile ukutangisha mu bumi no kukanasakamikilwa ubwa mailo kuti kwatwafwa ukukanacishamo ukusakamikwa.—1 Petro 5:6, 7.
9. Ilyo tukwete amafya ya ndalama, bwafwilisho nshi twingasanga mu mpapulo sha “musha wa cishinka kabili uwashilimuka”?
9 Ilyo tuli na mafya ya ndalama, kuti twalanga ukuti twalitetekela Yehova pa kufwayafwaya ubwafwilisho mu mpapulo sha “musha wa cishinka kabili uwashilimuka.” (Mateo 24:45) Mu nshita mu nshita, magazini wa Loleni! alakwata ifipande fibamo ifishinka fingatwafwa ne mitubululo pa fya kubomba na mafya ya ndalama. Icipande ca “Ukubulwe Ncito—Cinshi Cili E Kupikulula?” icali muli Loleni! wa August 8, 1991, calandile pa nshila 8 ishaafwa abengi ukuba abashikatala lintu incito yapwa. * Kwena, imitubululo ya musango yu ilingile ukuba pamo no kushikatala mu fyo tumone ndalama. Ili lyashi lyalandilwepo mu cipande caleti “Icintu Cimo Icakatamisha Ukucila pa Ndalama,” icali muli magazini umo wine.—Lukala Milandu 7:12.
Ilyo Tulelwala
10. Bushe ica kumwenako ca Mfumu Davidi cilanga shani ukuti kuti twatetekela Yehova na lintu tulwele ubulwele ubukalamba?
10 Bushe kuti twatetekela Yehova ilyo tulwele ubulwele ubukalamba? Icine cine! Yehova alomfwila uluse abantu bakwe abalwele. Icacilapo ca kuti afwaya ukubafwa. Ku ca kumwenako, moneni icacitike ku Mfumu Davidi. Iyi Mfumu ifwile yalilwele sana ilyo yalembele pa fyo Lesa acita ku mulungami uwalwala. Yatile: “Yehova amutungilila pa busanshi bwa kutembuka: ukusendama kwakwe konse mu kulwala kwakwe musangulo bumi.” (Amalumbo 41:1, 3, 7, 8) Icitetekelo ca kwa Davidi muli Lesa catwalilile ukuba icakosa, kabili imfumu yasukile yapola. Lelo ni shani twingalanga icitetekelo muli Lesa ilyo tulelwala?
11. Ilyo twapumwa ku bulwele, finshi twingalomba Shifwe wa ku muulu?
11 Lintu twalwala, inshila imo twingalangilamo ukuti twalitetekela Yehova kumulomba mwi pepo ubwafwilisho ku kuleka tushipikishe. Kuti twamulomba ukutwafwa ukubomfya “amano” pa kuti tukwate ubutuntulu ubo ubulwele bwesu bwingasuminisha. (Amapinda 3:21) Kabili kuti twamulomba ukutwafwa ukuba abatekanya kabili abashipikisha mu kwikala no bulwele bwesu. Icacilapo ca kuti, kuti twafwaya ukulomba Yehova ukutusungilila, ukutupeela amaka ya kutulenga ukuba aba busumino no kukanabwelela inuma, te mulandu ne fingacitika. (Abena Filipi 4:13) Ukusungilila bumpomfu kuli Lesa kwalicila na pa kusungilila ubumi bwesu ubwa nomba. Nga twasungilila bumpomfu, Kalambula Mukalamba akatupeela umweo wapwililika uwa muyayaya ukwabula ukulwala.—AbaHebere 11:6.
12. Fishinte nshi ifya mu Malembo ifingatwafwa ukupingulapo bwino pa lwa kundapwa?
12 Ukutetekela Yehova kutulenga no kufwayafwaya ubutungulushi mu Cebo cakwe, Baibolo. Ifishinte fya mu Malembo kuti fyatwafwa ukupingulapo bwino pa lwa nshila twalaundapilwamo. Ku ca kumwenako, ukwishiba ukuti Baibolo yalikaanya “ukupupa imipashi,” kuti twasengauka imyundapile iilesanshamo ukupupa imipashi. (Abena Galatia 5:19-21; Amalango 18:10-12) Pano pali ica kumwenako na cimbi ica mano ya mu Baibolo aya cishinka: “Uwapelwa amano atetekele cebo conse; lelo uwacenjela amwensekeshe nyantilo shakwe.” (Amapinda 14:15) E co, ilyo tuletontonkanya pa kundapwa, kuti cawama ukufwaya ifyebo fyashintililwapo ukucila ‘ukutetekela icebo conse.’ Ukuba na “mano ayatuntulu” aya musango yu kuti kwatwafwa ukupimununa bwino ifintu no kupingulapo bwino.—Tito 2:12.
13, 14. (a) Fipande nshi pa lwa malwele ifyasabankanishiwa muli bamagazini ba Ulupungu lwa kwa Kalinda na Loleni!? (Moneni umukululo pe bula 17.) (b) Kufunda nshi pa lwa fya kwikala na malwele ya mutatakuya kwali muli Loleni! wa February 8, 2001?
13 Kabili kuti twalanga ukuti twalitetekela Yehova pa kufwayafwaya mu mpapulo sha musha wa cishinka. Bamagazini ba Ulupungu lwa kwa Kalinda na Loleni! inshita shimo balisabankanya ifipande fisuma pa lwa malwele yalekanalekana. * Limo, muli ishi mpapulo mulaba ifipande pa bantu abakwata amalwele yalekanalekana no bulema. Kabili, ifipande fimo filalanda pa mitubululo ya mu Malembo pamo no kufunda kusuma pa fya kwikala na malwele ya mutatakuya.
14 Ku ca kumwenako, Loleni! wa February 8, 2001, akwete ifipande fyaleti “Ukusansamusha Abalwele.” Ifi fipande fyalandile pa fishinte fisuma ifya mu Baibolo pamo ne fyasuko fya bantu baikala pa myaka iingi na malwele yalemanika. Icipande caleti “Bushe Kuti Mwaikala Shani no Bulwele bwa Mutatakuya”? cafundile ati: Sambilileni ifingi pa bulwele bwenu. (Amapinda 24:5) Imikeni ubuyo mwingafikapo, pamo no buyo bwa kwafwa bambi, lelo ishibeni ukuti pambi tamwingafika pa buyo ubo bambi bengafikapo. (Imilimo 20:35; Abena Galatia 6:4) Mwilaitalusha kuli bambi. (Amapinda 18:1) Lengeni abantu balesekelela mu kumupempula. (Amapinda 17:22) Pali fyonse, twalilileni ukuba abapalamisha kuli Yehova na ku cilonganino. (Nahumu 1:7; Abena Roma 1:11, 12) Bushe tatutasha pa butungulushi bwa cishinka ubwa kwa Yehova ubo apeela ukupitila mu kuteyanya kwakwe?
Ilyo Ubunake bwa Mubili Bwatwalilila
15. Bushe umutumwa Paulo acimfishe shani mu bulwi bwakwe ubwa bunake bwa mubili ushapwililika, kabili cinshi twingacetekela?
15 Umutumwa Paulo alembele ati: “Mu mubili wandi, tamwaikala icisuma nangu cimo.” (Abena Roma 7:18) Ku fyalemucitikila, Paulo alishibe ifyo cingaba icakosa ukulwisha ulunkumbwa no bunake bwa mubili uushapwililika. Lelo, Paulo alitetekele ukuti kuti acimfya. (1 Abena Korinti 9:26, 27) Mu nshila nshi? Pa kutetekela Yehova umupwilapo. E mulandu wine Paulo asosele ukuti: “Iye, ne muntu wa nkumbabulili ne! Nani akampokolola ku mubili uno uulefwa? Kube ukutootela kuli Lesa muli Yesu Kristu Shikulwifwe!” (Abena Roma 7:24, 25) Nga ifwe? Na ifwe tulalwisha ubunake bwa ku mubili. Ilyo tuleshomboka ukucimfya ubunake bwa musango yu, calyanguka ukubulwa isubilo, ukushininwa ukuti tatwingatunguluka. Lelo Yehova akatwafwa nga ca kuti ifwe, ukupala Paulo, twatetekela Wene ukucila ukutetekela amaka yesu fye.
16. Ilyo ubunake bwa ku mubili bwatwalilila, cinshi tulingile ukupepela, kabili cinshi tufwile ukucita nga twawila muli ubo bunake?
16 Nga ca kuti ubunake bwa ku mubili bwatwalilila, kuti twalanga ukuti twalitetekela Yehova pa kulomba ubwafwilisho mwi pepo. Tufwile ukulomba, no kupaapaata Yehova ukuti atupeele ubwafwilisho bwa mupashi wakwe uwa mushilo. (Luka 11:9-13) Kuti mu kulungatika twalomba ukuilama, ukwaba cisabo ca mupashi wa kwa Lesa. (Abena Galatia 5:22, 23) Cinshi tufwile ukucita nga twabwelela ku bunake bwesu pa numa ya kucimfya ubo bunake? Tatufwile ukutompoka. Twileka ukupepa mu kuicefya kuli Lesa wesu uwa nkumbu, ukulomba ukuti atwelele no kutwafwilisha. Yehova takasuule umutima “uwalopota uwafunshika” pa mulandu wa kampingu alelunguluka. (Amalumbo 51:17) Nga twamupaapaata no mutima wafumaluka uulelunguluka, Yehova akatwafwa ukulwisha amatunko.—Abena Filipi 4:6, 7.
17. (a) Mulandu nshi cabela icisuma ukutontonkanya pa fyo Yehova ayumfwa pa bunake tulelwisha? (b) Malembo nshi twingasungila ku mutwe nga tulelwisha ukuleka ukukalipa bwangu? ukulama ululimi lwesu? ukuleka ifya kusekesha fishawama?
17 Kuti twalanga no kuti twalitetekela Yehova pa kufwayafwaya ubwafwilisho mu Cebo cakwe. Ukubomfya icisontelelo ca mu Ulupungu lwa kwa Kalinda nelyo Loleni! kuti twafwayafwaya icasuko kuli ici cipusho ca kuti, ‘Bushe Yehova ayumfwa shani pa bunake ndelwisha?’ Ukutontonkanya pa fyo Yehova ayumfwa pali uyu mulandu kuti kwakosha ukufwaya kwesu ukwa kumutemuna. E co kuti twatendeka ukuyumfwa filya ayumfwa, ukupata ifyo apata. (Amalumbo 97:10) Bamo calibaafwa ukusungila ku mutwe amalembo yamo aya mu Baibolo ayalanda pa bunake balelwisha. Bushe tulelwisha ukuleka ukukalipa bwangu? Lyene kuti twasungila ku mutwe Amapinda 14:17 na Abena Efese 4:31. Bushe ciletukosela ukulama ululimi lwesu? Kuti twasungila ku mutwe amalembo pamo nga Amapinda 12:18 na Abena Efese 4:29. Bushe twalitemwa ifya kusekesha fishawama? Kuti twesha ukwibukisha ifikomo pamo nga Abena Efese 5:3 na Abena Kolose 3:5.
18. Mulandu nshi tushilingile ukuleka insoni ukutulesha ukulomba ubwafwilisho kuli baeluda ku kucimfya ubunake bwesu?
18 Ukulomba ubwafwilisho kuli baeluda ba mu cilonganino abasontwa no mupashi wa mushilo ni nshila imbi iya kulanga ukuti twalitetekela Yehova. (Imilimo 20:28) Na kuba, aba, ababa “fya bupe mu bantu” kupayanya kwa kwa Yehova ukupitila muli Kristu ku kucingilila no kusakamana impaanga shakwe. (Abena Efese 4:7, 8, 11-14) Ca cine, tacinganguka ukulomba ubwafwilisho pa kucimfya ubunake. Kuti twaumfwa insoni, ukutontokanya ukuti baeluda tabatumone bwino. Lelo ukwabula no kutwishika aba baume bakosoka lwa ku mupashi bakatupeela umucinshi pa kushipa ukulomba ubwafwilisho. Kabili, baeluda bafwaya ukulanga imibele ya kwa Yehova ku mukuni. Ukufunda kwabo ukwa kusansamusha kabili ukubomba ukwa mu Cebo ca kwa Lesa kuti kwakosha ukupingulapo kwesu ukwa kucimfya ubo bunake.—Yakobo 5:14-16.
19. (a) Satana afwaya ifwe ukumona shani ubumi muli buno bwikashi? (b) Bushe icitetekelo cisanshamo nshi, kabili cinshi tulingile ukupampaminapo?
19 Mwilalaba ukuti Satana alishiba ukuti inshita yakwe inono. (Ukusokolola 12:12) Afwaya ifwe ukumona ukuti ubumi bwa fye pa kuti atufuupule no kutulenga ukutompoka. Shi tutetekele umupwilapo mu fyalembwa pa Abena Roma 8:35-39 apatila: “Nani akatupaatulako ku kutemwa kwa kwa Kristu? Bushe bucushi napamo bulanda napamo kupakaswa napamo ni nsala napamo kusapula napamo busanso napamo lupanga? . . . Lelo, muli ifi fyonse tulecimfya umupwilapo mu watutemenwe. Pantu ninshininkisha ukuti nangu ni mfwa nangu bumi nangu ni bamalaika nangu mabuteko nangu fintu ifyabapo nangu fintu ifikesabako nangu fya maka nangu kusansama nangu kushika nangu ububumbo bumbi tafyakabe na maka ya kutupaatulako ku kutemwa kwa kwa Lesa ukwaba muli Kristu Yesu Shikulwifwe.” Mwandini uku kutetekela Yehova icine cine! Lelo icitetekelo ca musango yu te kuyumfwa fye ukuti twalikwata icitetekelo. Cisanshamo ukupingulapo bwino mu mikalile yesu. E co natupampamine pa kutetekela Yehova umupwilapo mu nshita sha mafya.
[Futunoti]
^ para. 1 Muli kalata alembele ku kampani kapanga indalama sha ku United States of America iya pa November 20, 1861, Kalemba wa Cipao ca ndalama Salmon P. Chase alembele ati: “Takwaba uluko ulwingaba ulwakosa kano ku maka ya kwa Lesa, nelyo ulwingaba ulwacingililwa ukwabula ubucingo bwakwe. Tulingile ukulemba pa ndalama sha calo cesu ukuti abantu besu balitetekela muli Lesa.” Pa mulandu wa ici, umucincisho wa kuti “Twatetekela Lesa” wamoneke umuku wa kubalilapo pe kobili lya ku United States of America mu 1864.
^ para. 7 Ukusakamikwa kwalondololwa pano kwaba “mwenso, uulenga twaleka ukusekelela mu bumi.” Ukusosa ukuti ‘mwisakamikwa’ cipilibula ukuti tatufwile ukutendeka ukusakamikwa. Lelo ulupapulo lumo lutila: “Ili shiwi lya ciGriki lipilibula ukuleka ukucita icintu ico tutendeke kale ukucita.”
^ para. 9 Ifishinka 8 ni fi:(1) Mwitulumushiwa; (2) tontonkanyeni pa fisuma; (3) tontonkanyeni pa kubombako incito shimbi; (4) ikalileni umubelele indalama mukwete—te kukonkelesha bambi; (5) mwilasenda sana ifintu pa nkongole; (6) sungeni ulupwa ulwaikatana; (7) sungeni umucinshi wa pa lwenu; kabili (8) tendekeni ukutantika ifya kushita.
^ para. 13 Ishi mpapulo sha Baibolo tashimusalilako umusango wa kundapa mulingile ukukonka, ukwishiba ukuti umuntu e ufwile ukuisalila ukundapa alefwaya. Lelo, ifipande filanda pa malwele mu kulungatika fyabelako ku kwishibisha bakabelenga ifishinka pali ayo malwele nga fintu fyaishibikwa ndakai.
Bushe Muleibukisha?
• Ilyo twakwata amafya ya ndalama, ni mu nshila nshi twingalanga ukuti twalitetekela Yehova?
• Kuti twalanga shani icitetekelo muli Lesa ilyo tulelwala?
• Ilyo ubunake bwa mubili bwatwalilila, kuti twalanga shani ukuti tulecetekela Yehova icine cine?
[Amepusho]
[Akabokoshi pe bula 17]
Bushe Mulebukisha ifi Fipande?
Ilyo tuli no bulanda pa mulandu wa kulwala, kuti twakoseleshiwa ukubelenga pa fyo bambi babomba no kulwala kwabo. Pano pali ifipande fimo ifyasabankanishiwa muli bamagazini ba Ulupungu lwa kwa Kalinda na Loleni!
Icipande caleti “Ukubomba na Mabunake Yandi” calandile sana pa fya kucimfya ukupopomenwa.—Ulupungu lwa kwa Kalinda ulwa May 1, 1990.
“Nangu Nalwele Ifibashi—Nasangile Ukusekelela na Mapaalo ya ku Mupashi.”—Ulupungu lwa kwa Kalinda ulwa April 1, 1998.
Icipande caleti “Icipoolopoolo Cayalwile Ubumi Bwandi” calandile sana pa bulebe.—Loleni! wa November 8, 1995.
Icipande caleti “Tamwaishiba Ifyo Umweo Wenu Ukaba Mailo” calandile pa fya kwikala no bulwele bwa bipolar disorder.—Ulupungu lwa kwa Kalinda ulwa December 1, 2000.
Icipande caleti “Ifyo Loida Acimfishe Bucibulu” calandile sana pa fya kwikala no bulwele bwa cerebral palsy, (ubulwele bulengwa no konaika kwa bongobongo pa kufyalwa).—Loleni! wa May 8, 2000.
“Ukushomboka no Bulwele Bunasha.”—Loleni! wa March 8, 2001.
“Ukuba uwa Nsansa Te Mulandu na Malwele.”—Loleni! wa December 8, 2000.
“Ukucimfya Ubulwi bwa Kupopomenwa.”—Ulupungu lwa kwa Kalinda ulwa March 1, 1990.
[Icikope pe bula 15]
Ilyo incito yapwa, kuti cawama ukuceeceeta cipya cipya imikalile yesu
[Icikope pe bula 16]
Ilyashi lya kwa Loida lilanga ifyo ukutetekela Yehova kwafwa umo ukushipikisha. (Moneni umukululo pe bula 17)
[Icikope pe bula 18]
Tatufwile ukumfwa insoni ukulomba Yehova ubwafwilisho ku kucimfya ubunake bwesu