Ifipusho Ukufuma ku Babelenga

Bushe cisuma ukupepa kuli Lesa ukwabula ukulanda amashiwi ya kuti “mwi shina lya kwa Yesu”?

Baibolo ilanga ukutila Abena Kristu abalefwaya ukupepa kuli Yehova balingile ukupepela mwi shina lya kwa Yesu. Yesu aebele abasambi bakwe ati: “Takuli uwisa kuli Tata, kano aishila muli ine.” Kabili atile: “Conse ico mukalombela mwi shina lyandi, nkacicita ukuti Tata akacindikilwe mu Mwana. Nga mukalombela akantu mwi shina lyandi, ine nkacita.”—Yohane 14:6, 13, 14.

Ukulanda pa lwa cifulo caibela ica kwa Yesu, icitabo ca Cyclopedia of Biblical, Theological, and Ecclesiastical Literature citila: “Lesa e ufwile ukupepwa epela, ukupitila muli Yesu Kristu uwaba e Kawiikishanya. E ico, ukupepa konse, ukucitwa ku batakatifu nelyo bamalaika kwa fye, kabili kwa miponto. Ukupepa konse ukwa cibumbwa, nelyo cisumbuke shani, kupepa utulubi, kabili kwalibindwa nga nshi mwi funde lya kwa Lesa ilyashila.”

Ni shani nga ca kutila lintu umo icisuma ca mucitikila, atila, “Natasha mwe Yehova” ukwabula ukusosa ukuti “mwi shina lya kwa Yesu”? Bushe ici kuti caba icishalinga? Te sana. Ni shani nga ca kutila Umwina Kristu aponenwa no bwafya mu kupumikisha e lyo apunda ati: “Ngafweni, mwe Yehova!” Lesa teti akaane ukwaafwa pantu umubomfi wakwe tacitila “mwi shina lya kwa Yesu.”

Nalyo line, tulingile ukwishiba ukuti, ukupunda fye kuli Lesa kweka kweka takuli kupepa. Ku ca kumwenako, pa numa lintu apingwilwe kuli Yehova pa kwipaya munyina Abele, Kaini atile: “Kwakulo kukandwa kwandi, kwa ng’ansho kushipikisha, Moneni, mwantamfya buno bushiku pano pa mushili: nakulafiswa ukufuma pa cinso cenu, no kubo wapungaila kabili uwauluba pano isonde; Kabili onse uwansanga, akanjipaya.” (Ukutendeka 4:13, 14) Nangu line Kaini alandile ayo mashiwi kuli Yehova, ukusakatuka kwakwe kwali kuilishanya pa lwa cafumine mu lubembu.

Baibolo itweba ati: “Lesa acincintila aba miiya; lelo ku bapetama apeelo kusenamina.” Ukulanda ku Wapulamo nga filya tulanda ku muntu yaweyawe cumi kuti kwalanga ukukanaicefya. (Yakobo 4:6; Amalumbo 47:2; Ukusokolola 14:7) Kabili kuti kwaba kubulwa umucinshi apo twalishiba ifyo Icebo ca kwa Lesa cilanda pa lwa mulimo wa kwa Yesu e lyo ku mufulo twapepa ukwabula ukwibukisha Yesu Kristu.—Luka 1:32, 33.

Ici tacilolele mu kuti Yehova enekela abantu ukulanda fimo fine nelyo amashiwi yaishibikilwa libela ilyo balepepa. Icikalamba fye ni fintu umutima wa muntu uli. (1 Samwele 16:7) Mu mwanda wa myaka uwa kubalilapo C.E., mushika wa fita fya ciRoma uwe shina lya Korneli ‘alelomba pe kuli Lesa.’ Korneli, Umwina fyalo ushasembululwa, tali uwaipeela kuli Yehova. Nangu ca kutila nalimo amapepo yakwe tapepele mwi shina lya kwa Yesu, ‘yalenina yabe ciibukisho ku cinso ca kwa Lesa.’ Mulandu nshi? Pantu “uulabule mitima,” alimwene ukuti Korneli ali “kapepa kabili uutiina Lesa.” (Imilimo 10:2, 4; Amapinda 17:3) Pa numa ya kwishiba “Yesu wa ku Nasarete,” Korneli apokelele umupashi wa mushilo, kabili asangwike umusambi wa kwa Yesu uwabatishiwa.—Imilimo 10:30-48.

Na pa kulekelesha kuti twatila, te bantunse bakwata amaka ya kusalulula amapepo ayo Lesa omfwa. Nga ca kutila pa kashita kamo Umwina Kristu alanda kuli Lesa ukwabula ukulumbula amashiwi pamo nga “mwi shina lya kwa Yesu,” tafwile ukuipeela umulandu. Yehova alishiba nga nshi ukupelebela kwesu kabili alafwaya ukutwafwa. (Amalumbo 103:12-14) Kuti twacetekela ukutila nga twaba ne citetekelo mu ‘Mwana wa kwa Lesa . . . , nga twalomba akantu akalingene no kufwaya kwakwe akatuumfwa.’ (1 Yohane 5:13, 14) Kwena, sana sana tulelombelako bambi mwi pepo lya pa cintubwingi, Abena Kristu ba cine balebukisha icifulo ca mu Malembo ico Yesu abapo mu bufwayo bwa kwa Yehova. Kabili pa kuba ne cumfwila balesha ukucindika Yesu ilyo balepepa kuli Lesa ukupitila muli wene.