Nagadan si Jesus tanganing mapatawad an mga kasalan kan mga tawo asin magkaigwa sinda nin buhay na daing katapusan. (Roma 6:23; Efeso 1:7) Pinatunayan man kan kagadanan ni Jesus na kaya kan mga tawo na magdanay na maimbod sa Diyos dawa mapaatubang sa pinakagrabeng pagbalo.—Hebreo 4:15.

 Pag-isipan kun paano an kagadanan nin sarong tawo puwedeng magtao nin dakulon na pakinabang.

1.   Si Jesus nagadan para sa “kapatawadan kan satuyang mga kasalan.”​—Colosas 1:​14.

    An inot na tawong si Adan linalang na perpekto, o daing kasalan. Pero, pinili niyang sumuway sa Diyos. An pagsuway o pagkakasala ni Adan, nagkaigwa nin dakulaon na epekto sa gabos na gikan niya. “Paagi sa pagsuway kan sarong tawo,” an paliwanag kan Bibliya, “dakul an nagin parakasala.”—Roma 5:19.

    Si Jesus perpekto man, pero dai lamang siya nagkasala. Kaya, puwede siyang magin “atang na pambayad sa satong mga kasalan.” (1 Juan 2:2; nota sa ibaba) Kun paanong an kasalan luminakop sa pamilya nin tawo huli sa pagsuway ni Adan, an kagadanan man ni Jesus an mahali kan digta nin kasalan kan gabos na nagtutubod sa saiya.

    Garo baga an ginibo ni Adan, ipinabakal niya an katawuhan sa kasalan, pero tinubos iyan ni Jesus paagi sa pagtao kan saiyang buhay alang-alang sa sato. Bilang resulta, “kun makagibo man nin kasalan an siisay man, igwa kita nin paratabang na kaibanan kan Ama, si Jesu-Cristo, na sarong matanos.”—1 Juan 2:1.

2.   Si Jesus nagadan “tanganing an siisay man na nagtutubod sa saiya dai malaglag kundi magkaigwa nin buhay na daing katapusan.”—Juan 3:16.

    Baga man linalang si Adan para mabuhay sagkod lamang, pinadusahan siya nin kagadanan huli sa pagkakasala niya. Paagi ki Adan, “an kasalan luminaog sa kinaban asin an kagadanan paagi sa kasalan, asin sa siring an kagadanan luminakop sa gabos na tawo huling sinda gabos nagkasala.”—Roma 5:12.

    Sa kabaliktaran, hinali kan kagadanan ni Jesus bako lang an digta nin kasalan kundi kinanselar man kaiyan an sentensiyang kagadanan para sa gabos na nagtutubod sa saiya. Arog kaini an paliwanag kan Bibliya: “Kun paanong an kasalan naghadi kaiba an kagadanan, maghadi man sa matanos na paagi an daing kapantay na kabuutan, na magiya pasiring sa buhay na daing katapusan paagi ki Jesu-Cristo na satuyang Kagurangnan.”—Roma 5:21.

    Limitado man giraray an lawig kan buhay nin tawo ngunyan. Pero, nanunuga an Diyos na tatawan niya an matanos na mga tawo nin buhay na daing katapusan asin na bubuhayon niya liwat an mga gadan tanganing sinda man makinabang sa sakripisyong kagadanan ni Jesus.—Salmo 37:29; 1 Corinto 15:22.

3.   Si Jesus “nagin masinunod sagkod sa kagadanan,” huli kaiyan pinatunayan niya na kaya kan mga tawo na magin maimbod sa Diyos dawa napapaatubang sa ano man na pagbalo o kasakitan.—Filipos 2:8.

    Sa ibong kan pagkakaigwa nin perpektong isip asin hawak, sinuway ni Adan an Diyos huling nagin makasadiri siya asin minawot niya an sarong bagay na bako man para saiya. (Genesis 2:16, 17; 3:6) Dai nahaloy, an panginot na kaiwal nin Diyos na si Satanas, nagsabi na an mga tawo nagsusunod lang sa Diyos huli sa makasadiring kapakinabangan, pero kun mameligro na an saindang buhay dai na sinda masunod sa Diyos. (Job 2:4) Pero, an perpektong tawong si Jesus nagsunod sa Diyos asin nagdanay na maimbod saiya, dawa nag-agi siya nin makasusupog saka makulugon na kagadanan. (Hebreo 7:26) Sinimbag kaini an isyu: Puwedeng magdanay na maimbod sa Diyos an sarong tawo dawa mapaatubang sa ano man na pagbalo o kasakitan.

Mga hapot dapit sa kagadanan ni Jesus

•   Taano ta kaipuhan ni Jesus na magsakit asin magadan para tubuson an katawuhan? Taano ta dai na lang kinanselar nin Diyos an sentensiyang kagadanan?

   Sinasabi sa katugunan nin Diyos na “an bayad nin kasalan iyo an kagadanan.” (Roma 6:23) Imbes na itago niya ki Adan an katugunan na ini, sinabi saiya nin Diyos na kagadanan an padusa pag nagsuway siya. (Genesis 3:3) Kan magkasala si Adan, inutob nin Diyos, ‘an saro na dai makakapagputik,’ an saiyang tataramon. (Tito 1:2) Ipinamana ni Adan sa saiyang mga gikan bako lang an kasalan kundi an kabayadan nin kasalan—an kagadanan.

   Dawa maninigo sa padusang kagadanan an makasalan na katawuhan, ipinahiling nin Diyos an saiyang “daing kapantay na kabuutan” para sa sainda. (Efeso 1:7) An probisyon niya na tubuson an katawuhan—an pagsugo ki Jesus bilang sarong perpektong atang—nagpapahiling kan saiyang pagigin makatanusan asin mahihirakon.

•   Kasuarin nagadan si Jesus?

   Si Jesus nagadan kan “ikasiyam na oras” pagkatapos na magsirang an saldang, o mga alas tres nin hapon kaidtong Paskuwa kan mga Judio. (Marcos 15:33-37, nota sa ibaba) An petsang iyan minalataw na mga Biyernes, Abril 1, 33 C. E., sigun sa modernong kalendaryo.

•   Sain nagadan si Jesus?

   Ginadan si Jesus sa “lugar na an apod Lugar nin Bungo, na sa Hebreo inaapod na Golgota.” (Juan 19:17, 18) An lugar na ini nasa “luwas kan trangkahan kan siyudad” kan Jerusalem kaidtong panahon ni Jesus. (Hebreo 13:12) Tibaad nasa sarong bulod ini, huling sinasabi sa Bibliya na kan ginagadan si Jesus may nagkapirang nagmamasid “sa huruharayo.” (Marcos 15:40) Pero dai na masigurado sa ngunyan an lokasyon kan Golgota.

•   Paano nagadan si Jesus?

   Baga man dakul an naniniwala na si Jesus ipinako sa krus sagkod na magadan, sinasabi kan Bibliya: ‘Dinara niya an satong mga kasalan sa saiyang hawak sa kahoy.’ (1 Pedro 2:24, An Banal na Biblia) Duwang Griegong tataramon an ginamit kan mga parasurat kan Bibliya para ipanungod sa instrumentong ginamit sa paggadan ki Jesus—stau·rosʹ saka xyʹlon. Dakul na iskolar an nagsasabi na an mga tataramon na ini nanunungod sa sarong pidaso nin tablon o sarong harigi na gibo sa sarong pidasong kahoy.

•   Paano dapat girumdumon an kagadanan ni Jesus?

   Kan banggi kan taunan na Paskuwa kan mga Judio, pinunan ni Jesus an simpleng seremonya kaiba an saiyang mga parasunod asin pinagbutan sinda: “Padagos nindong gibuhon ini sa pagrumdom sa sako.” (1 Corinto 11:24) Paglihis nin pirang oras, ginadan si Jesus.

   Ikinumparar kan mga parasurat kan Bibliya si Jesus sa sarong kordero na iinatang sa aldaw nin Paskuwa. (1 Corinto 5:7) Kun paanong an pagselebrar kan Paskuwa nagpagirumdom sa mga Israelita na pinatalingkas na sinda sa pagkauripon, an Memoryal kan Kagadanan ni Jesu-Cristo nagpapagirumdom sa mga Kristiyano na sinda pinatalingkas na sa kasalan asin kagadanan. An Paskuwa, na ginigibo pag Nisan 14 sigun sa kalendaryong lunar, isineselebrar kaidto taon-taon; isineselebrar man kan inot na mga Kristiyano an Memoryal sarong beses sa kada taon.

   Taon-taon, sa petsang katumbas kan Nisan 14, ginigirumdom kan minilyon na tawo sa bilog na kinaban an kagadanan ni Jesus.