Dai sinasabi kan Bibliya kun kasuarin namundag si Jesus, asin dai man sinasabi kaiyan na dapat tang iselebrar an saiyang kumpleanyo o birthday. Sinasabi kan McClintock and Strong’s Cyclopedia: “An pagselebrar nin Pasko dai ipinagbuot nin Diyos, ni mababasa iyan sa BT [Bagong Tipan].”

 Imbes, kun sisiyasaton niyato an kasaysayan kan Pasko mahihiling ta na gikan iyan sa mga ritwal nin paganong relihiyon. Ipinapahiling sa Bibliya na nakukulgan ta an Diyos pag sinasamba ta siya sa paagi na dai niya inuuyunan.—Exodo 32:5-7.

1.   Pagselebrar kan kumpleanyo ni Jesus: “Dai isinelebrar kan inot na siglong mga Kristiyano an aldaw nin pagkamundag [ni Jesus] huling ibinibilang ninda na sarong paganong kaugalian an pagselebrar kan aldaw nin pagkamundag nin siisay man.”—The World Book Encyclopedia.

2.   Disyembre 25: Mayo nin patunay na sa petsang iyan namundag si Jesus. Minalataw na pinili ini kan mga lider nin simbahan tanganing isabay sa paganong mga kapiyestahan na ginigibo sa panahon nin winter solstice.

3.   Pagtao nin regalo, karakanan, asin parti: Sinasabi kan The Encyclopedia Americana: “An Saturnalia, sarong Romanong kapiyestahan na isineselebrar sa kabangaan kan Disyembre, nagserbing arugan para sa dakul na kaugalian nin kaurugmahan kun Pasko. Halimbawa, gikan sa selebrasyon na ini an magarbong karakanan, pagtao nin mga regalo, asin pagsulo nin mga kandila.” Sinasabi kan Encyclopædia Britannica na “ipinupundo an pagtrabaho asin pagnegosyo” durante kan Saturnalia.

4.   Christmas light: Sigun sa The Encyclopedia of Religion, nagbubugtak an mga taga Europa sa saindang harong nin mga dekorasyon na “mga ilaw asin manlain-lain na klase nin evergreen” para iselebrar an winter solstice asin pahalion an maraot na mga espiritu.

5.   Mistletoe, holly: “Naniniwala an mga Druid na may kapangyarihan an mistletoe. Sinasamba an evergreen na holly sa paglaom na mabalik an saldang.”—The Encyclopedia Americana.

6.   Christmas tree: “An pagsamba sa kahoy na parating ginigibo kan mga pagano sa Europa, nagpadagos dawa kan nakumbertir na sinda sa Kristiyanismo.” An saro sa mga paagi na nagpadagos an pagsamba sa kahoy iyo an kostumbre nin “pagbugtak nin kahoy na Yule sa entrada o sa laog kan harong sa mga kapiyestahan sa katahawan nin tiglipot.”​—Encyclopædia Britannica.