Pag-isipan an minasunod na mga ginibo kan prominenteng mga lider nin relihiyon may koneksiyon sa giyera sa Ukraine:

•   “An pamayo kan Russian Orthodox Church, na si Patriarch Kirill, mayong sinabing ano man laban sa ginigibong pagsakop kan Russia . . . . An mga propaganda kan saiyang Simbahan laban sa Ukraine ginagamit ni Putin para sabihon na makatanusan an giyera.”—EUobserver, Marso 7, 2022.

•   “Marigon na pinapaluwas ni Patriarch Kirill . . . na makatanusan an pagsakop kan saiyang nasyon sa Ukraine—na sinasabing an nangyayaring ralaban parte kan paghihinguwang labanan an kasalan.”—AP News, Marso 8, 2022.

•   “Kan Lunes, itinao kan lider kan Ukrainian Orthodox Church na si Metropolitan Epiphanius I kan Kyiv an saiyang bendisyon sa saiyang mga kahimanwa para ‘makipaglaban sa nananakop na mga suldados kan Russia . . . [Siya] nagsabi man na an paggadan sa mga suldados kan Russia bakong kasalan.”—Jerusalem Post, Marso 16, 2022.

•   “Kami [an Ukrainian Council of Churches and Religious Organizations (UCCRO)] nagsusuportar sa Armed Forces kan Ukraine saka sa gabos na nagdedepensa sa samo, yaon sa sainda an bendisyon mi sa pagdepensa ninda sa Ukraine laban sa mga nag-aatake, asin ipinapangadyi niyamo sinda.”—UCCRO a Statement, Pebrero 24, 2022.

 Ano sa hiling mo? Dapat daw dagkahon kan mga relihiyon na naghihingakong nagsusunod ki Jesu-Cristo an mga miyembro ninda na makigiyera? Ano an sinasabi kan Bibliya?

An kasaysayan kan relihiyon sa mga giyera

 Ipinapahiling kan kasaysayan na parating pigkukunsinti, ipinapangatanusan, o sinuportaran pa ngani kan mga relihiyon an mga giyera mantang nagsasagin-sagin na naghihinguwang makatao nin katuninungan. Sa laog nin dakul na taon, ibinuyagyag kan mga Saksi ni Jehova an arog kaiyan na pagsagin-sagin kan mga relihiyon. Mangnuhon an nagkapirang halimbawa na binanggit sa samong mga publikasyon.

•   Ipinahiling sa artikulong “Ang mga Krusada—Isang ‘Kalunos-lunos na Ilusyon’” kun paanong an Simbahang Katoliko Romano an may paninimbagan sa nangyaring mga paggadan na ginibo sa ngaran nin Diyos asin ni Cristo.

•   Sinabi sa artikulong “Ang Iglesya Katolika sa Aprika” an sarong halimbawa kun paanong dai pinugulan kan relihiyon an mga ralaban nin mga tribo, pati na an mga pag-ubos nin lahi, o genocide.

•   Ipinaliwanag kan mga artikulong “Masisisi ba ang Relihiyon?,” “Ang Bahagi ng Relihiyon sa mga Digmaan ng Tao,” asin “Ang Relihiyon ay Pumapanig” kun paanong an mga klerigo kan Katoliko, Ortodokso, asin Protestante sinuportaran an mag-inibong na lado kan dakul na giyera.

Dapat daw na magsuportar sa mga giyera an mga relihiyon nin Kristiyano?

 An itinukdo ni Jesus: “Kamutan mo an saimong kapwa nin siring sa saimong sadiri.” (Mateo 22:39) “Padagos na kamutan an saindong mga kaiwal.”—Mateo 5:44-47.

 An sinabi ni Jesus: “An sakuyang Kahadian bakong kabtang kan kinaban na ini. Kun an sakuyang Kahadian kabtang kan kinaban na ini, nakipaglaban kutana an mga lingkod ko tanganing dai ako maitao.” (Juan 18:36) “An gabos na naggagamit nin espada magagadan sa espada.”—Mateo 26:47-52.

 Pag-isipan: Kun an mga Kristiyano dai nakipaglaban maski para protektaran si Jesus, dapat daw sindang gumamit nin armas para sa ibang dahilan? Basahon an artikulong “An Guerra daw Kaoyon kan Kristianismo?” para mahiling kun paano maingat na sinunod kan inot na mga Kristiyano an halimbawa saka mga itinukdo ni Jesus.

Ano an kaaabtan kan mga relihiyon na nagsusuportar sa giyera?

 Itinutukdo kan Bibliya na isinisikwal nin Diyos an mga relihiyon na naghihingakong parasunod ni Jesus pero dai man sinusunod an mga katukduan niya.—Mateo 7:21-23; Tito 1:16.

•   Ipinapahiling sa libro nin Kapahayagan na ibinibilang nin Diyos an siring na mga relihiyon na iyo an responsable sa “gabos na ginadan sa daga.” (Kapahayagan 18:21, 24) Para maaraman kun taano, basahon an artikulong “Ano ang Babilonyang Dakila?”

•   Sinabi ni Jesus na an gabos na relihiyon na isinikwal nin Diyos tatapuson huli kan saindang maraot na mga gibo, arog kan raot na kahoy na namumunga nin raot na bunga na ‘pinalod saka iinapon sa kalayo.’ (Mateo 7:15-20) Basahon an artikulong “Harani Na an Katapusan kan Falsong Relihion!” para maaraman kun paano iyan mangyayari.

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images