•   “Haros kabanga kan mga adulto sa Estados Unidos sinasabi na nakakamati na nagsosolo sinda, asin totoo ini lalo na sa mga hoben na adulto.”​—Our Epidemic of Loneliness and Isolation: The U.S. Surgeon General’s Advisory on the Healing Effects of Social Connection and Community, 2023.

•   “Binilog [kan World Health Organization] an bagong Commission on Social Connection, na an katuyuhan iyo na asikasuhon an naglalang problema sa salud manungod sa pakamati na nagsosolo, dagkahon an mga tawo na magpokus sa pakikiasosyar sa iba, asin humanap nin mas magayon na solusyon na puwedeng gamiton dawa sa mga pobreng nasyon.”​—World Health Organization, Nobyembre 15, 2023.

 An Bibliya igwa nin praktikal na sadol kun paano magkakaigwa nin marahay na relasyon sa iba na makakatabang sa sato na dai makamati na nagsosolo.

 Bawasan an mga aktibidad na makakapasuway saimo sa iba. Kaiba diyan an sobrang paggamit nin social media. An magayon na gibuhon, maghanap nin mga pagkakataon na makakaibanan mo an mga tawo asin paagi kaiyan puwede kang magkaigwa nin tunay na mga amigo.

•   Prinsipyo sa Bibliya: “An tunay na amigo nagpapahiling nin pagkamuot sa gabos na panahon asin sarong tugang na namumundag sa mga panahon nin kasakitan.”​—Talinhaga 17:17.

 Maghanap nin mga oportunidad na tumabang sa iba. An paggibo nin kabuutan sa iba dai lang nakakapakusog kan relasyon ta sa sainda kundi nakakapaugma man iyan sa sato.

•   Prinsipyo sa Bibliya: “Igwang urog na kaugmahan sa pagtao kisa sa pag-ako.”​—Gibo 20:35.

 Hilingon an samong website para sa dakul pang makakatabang na impormasyon hali sa Bibliya manungod sa kun paano ka magkakaigwa nin marahay na pakikiamigo sa iba.