“An pagpapahunod marahay na kuwalidad na nagpapagin posible na magkaigwa nin katuninungan.”—UNESCO Declaration of Principles on Tolerance, 1995.

 Sa kabaliktaran, an dai pagpapahunod puwedeng magbunga nin kawaran nin respeto asin pagkaungis pa ngani. An siring na mga pagmati parating minaresulta sa makulog na pananaram, diskriminasyon, asin kadahasan.

 Alagad iba-iba an ideya kan mga tawo manungod sa kahulugan kan pagpapahunod. Naniniwala an nagkapira na an mapagpahunod na mga tawo dapat na uyunan an gabos na gibo-gibo asin paggawi kan iba. An iba man igwa kan pagmansay, na kauyon kan Bibliya, na an mapagpahunod na mga tawo irinerespeto an deretso kan lambang saro na pumili nin sadiri kaining mga pamantayan asin mga paniniwala, maski ngani sinda mismo dai uyon sa mga pamantayan asin mga paniniwala na iyan.

 Matatabangan daw kan Bibliya an mga tawo sa presenteng panahon na magin tunay na mapagpahunod?

An basehan sa Bibliya sa pagpapahunod

 An Bibliya nag-eenkaminar sato na magin mapagpahunod. Sinasabi kaiyan: “Mahayag lugod sa gabos na tawo an saindong pagigin rasonable.” (Filipos 4:5) Dinadagka kita kan Bibliya na magin makonsiderasyon, magalang, asin patas sa pagtrato sa iba. Tibaad dai uyunan o akuon kan mga nag-aaplikar kan sadol na ini an mga pamantayan kan saro, pero pinapabayaan ninda ini na gumawi sigun sa sadiri kaining desisyon.

 Pero, ipinapahiling kan Bibliya na an Diyos igwa nin mga pamantayan para sa paggawi nin tawo. Sinasabi kaiyan: “Sinabi [kan Diyos] sa saimo, O tawo, kun ano an marahay.” (Mikas 6:8) Ihinahayag kaiyan an paggiya nin Diyos, na itinao sa mga tawo tanganing tabangan sinda na magkaigwa kan pinakamarahay na buhay na posible.—Isaias 48:17, 18.

 Dai kita inawtorisaran kan Diyos na husgaran an iba. Sigun sa Bibliya, “Saro sana an Paratao nin Katugunan asin Hukom . . . Siisay ka man para manghusgar sa saimong kapwa?” (Santiago 4:12) An lambang saro sa sato tinawan nin Diyos kan libertad na gumibo nin mga desisyon, asin personal na paninimbagan niyato iyan.—Deuteronomio 30:19.

Kun ano an sinasabi kan Bibliya manungod sa paggalang

 Sinasabi kan Bibliya na dapat tang ‘igalang an gabos na tawo.’ (1 Pedro 2:17, An Marahay na Bareta Biblia) Kaya an mga namumuhay kauyon kan mga pamantayan kan Bibliya tinatratar nin may paggalang an gabos na tawo, ano man an saindang mga paniniwala o piniling paagi nin pamumuhay. (Lucas 6:31) Dai ini nangangahulugan na uuyunan kan mga nagsusunod sa Bibliya an lambang paniniwala o opinyon kan iba o na susuportaran ninda an lambang ginigibong desisyon kan iba. Imbes na gumawi nin daing galang, gigibuhon ninda an saindang pinakamakakaya na arugon an paagi ni Jesus nin pagtratar sa iba.

 Halimbawa, may nakaulay kaidto si Jesus na sarong babayi na dai niya inuuyunan an relihiyon. An babaying ini nakikisaro man sa lalaki na bako niyang agom—sarong paagi nin pamumuhay na dai inuuyunan ni Jesus. Pero, may paggalang pa man giraray siyang nakipag-ulay sa babayi.—Juan 4:9, 17-24.

 Arog ni Jesus, andam an mga Kristiyano na ipaliwanag an mga rason kan saindang mga paniniwala sa mga gustong magdangog, pero ginigibo ninda iyan na may “hararom na paggalang.” (1 Pedro 3:15) Sinasadol kan Bibliya an mga Kristiyano na dai ipirit sa iba an saindang mga opinyon. Sinasabi kaiyan na an sarong parasunod ni Cristo “dai kaipuhan na makiiwal, kundi kaipuhan na magin mabuot sa gabos,” pati na sa mga tawo na iba an mga paniniwala.—2 Timoteo 2:24.

Kun ano an sinasabi kan Bibliya manungod sa pagkaungis

 Sinasabi sa sato kan Bibliya na “pagmaigutan na magibo an pakipagkatuninungan sa gabos na tawo.” (Hebreo 12:14) An saro na nagmamaigot na magibo an pakipagkatuninungan isinisikwal an pagkaungis. Dai niya ikinokompromiso an sadiri niyang mga pamantayan, pero talagang hinihinguwa niya na magkaigwa nin matuninong na relasyon sa iba. (Mateo 5:9) Sa katunayan, dinadagka man kan Bibliya an mga Kristiyano na kamutan an saindang mga kaiwal paagi sa pagigin mabuot sa mga nagtatratar sa sainda nin bakong marahay.—Mateo 5:44.

 Totoo, sinasabi kan Bibliya na “ikinakaungis,” o “ikinakabaldi,” nin Diyos an mga paggawi na nakakaraot sa dignidad kan iba o ikakapahamak ninda. (Talinhaga 6:16-19) Pero ginamit digdi kan Bibliya an tataramon na “pagkaungis” para iladawan an matinding pakamati nin dai pag-uyon sa maraot na mga paggawi. Ipinapahiling kan Bibliya na an Diyos andam na magpatawad asin magtabang sa mga tawo na gustong magbago asin mamuhay kauyon kan saiyang mga pamantayan.—Isaias 55:7.

Mga teksto sa Bibliya na konektado sa pagpapahunod asin paggalang

 Tito 3:2: “Magin rasonable, na nagpapahiling nin lubos na kahuyuan sa gabos na tawo.”

 Mateo 7:12: “Kun siring, an gabos na gusto nindong gibuhon sa saindo kan mga tawo, iyo man an dapat nindong gibuhon sa sainda.”

 Josue 24:15: “Pumili kamo ngunyan kun siisay an saindong paglilingkudan.”

 Gibo 10:34: “An Diyos mayong pinapalain.”

 Habakuk 1:12, 13: “Dai [nin Diyos] magigibong kunsintihon an karatan.”

 Roma 12:19: “Tawan nin lugar an dakulang kaanggutan [nin Diyos]; huli ta nasusurat: ‘Sakuya an pagbalos; ako an mabalos,’ an sabi ni Jehova.” a

 Dai inaawtorisaran kan Diyos na Jehova an siisay man na magbalos. Sisiguraduhon niya na maisagibo an hustisya sa itinalaan niyang panahon. Para mas makanuod pa, basahon an artikulong “Madadangog Pa Daw an Kurahaw Para sa Hustisya?”