Kan matapos an Giyera Mundiyal II kan 1945, raraot an kadaklan sa lugar kan Germany. Garaba an mga siyudad, dai magamit an mga eskuwelahan saka ospital, saka maski sain may mahihiling na mga bomba. Kulang man an suplay nin kakanon kaya mahalon an mga barakalon. Halimbawa, sa black market, an presyo kan kabangang kilong butter katumbas nin anom na semanang suweldo!

 Kaiba sa mga apektado an ginatos na mga Saksi ni Jehova na dakul na taon nang nakakulong sa mga presuhan asin kampo de-konsentrasyon dahil sa saindang pagtubod. Kan paluwason sinda sa presuhan kan 1945, an yaon sana sainda iyo an mga badong pampreso na sulot ninda. Nawaran man nin mga pagsadiri an ibang mga Saksi. Dahil sa grabeng kakulangan sa kakanon, an iba nadismayo mantang nasa Kristiyanong mga pagtiripon.

 An mga Saksi ni Jehova sa ibang parte kan kinaban nagpadara tulos kan kinakaipuhan na kakanon asin mga bado. Pinakiulayan kan world headquarters sa United States an sangang opisina sa Bern, Switzerland na tabangan an mga tugang sa Germany. Nagbisita sa Europe si Nathan H. Knorr, sarong representante hali sa headquarters, para iorganisar asin parikason an ginigibong pag-ayuda.

 An mga Saksi sa Switzerland nagdonar nin dakul na kakanon, mga bado, saka kuwarta. Ipinapadara nguna an mga donasyon sa Bern, kun sain inaayos iyan asin pinapatos bago ipadara sa Germany. An mga Saksi sa ibang nasyon, kaiba na an Sweden, Canada, asin United States, nagpadara man nin ayuda na nakatabang sa mga lingkod ni Jehova bako lang sa Germany kundi pati man sa dakul na nasyon sa Europe asin Asia na apektado nin giyera.

 Mga pirang bulan sana, an sangang opisina sa Switzerland nakapadara nin kape, gatas, asukar, cereal, dried fruit, mga gulay, asin de-latang karne saka sira. May mga nagdonar man nin kuwarta.

 An mga Saksi sa Switzerland nagpadara man nin limang toneladang mga bado, kaiba diyan an mga overcoat, mga badong pambabayi, asin mga amerikana. An Enero 15, 1946 na isyu kan The Watchtower nagsabi: “Bako su mga hinabuan ninda an itinao kan mga tugang, kundi an gabos su pinakamarahay. Talagang nagsakripisyo sinda para matabangan an saindang mga tugang sa Germany.”

 An mga Saksi sa Switzerland nagtao man nin haros 1,000 padis nin sapatos, asin sinigurado nguna na nasa marahay na kondisyon iyan bago ipadara. An mga tugang sa Wiesbaden, Germany na nagbukas kan mga donasyon napangalas sa kalidad asin sa lain-lain na klase nin mga gamit na naresibi ninda. “Siguradong mayo nin tindahan nin bado sa Germany na igwa nin arog kaiyan kadakul na de-kalidad na mga bado saka sapatos,” an isinurat kan sarong Saksi.

 Padagos na nagpadara nin ayuda sagkod kan Agosto 1948. Gabos-gabos, an mga Saksi sa Switzerland nakapagpadara sa mga tugang ninda sa Germany nin 444 crate nin mga ayuda na may timbang na 25 tonelada. Arog kan nasambit na, bako lang an mga Saksi sa Switzerland an nagtabang sa pag-ayuda. Pero saro sinda sa mga pinakasadit na grupo na nagtabang. Kan panahon na idto, igwa sana nin 1,600 na Saksi sa Switzerland!

 Sinabi ni Jesu-Cristo: “Paagi kaini maaaraman kan gabos na kamo sakuyang mga disipulo—kun igwa kamo nin pagkamuot sa lambang saro.” (Juan 13:34, 35) Pinahiro nin pagkamuot an mga lingkod ni Jehova na itao bako sana an mga dai na ninda kaipuhan kundi an pinakamarahay ninda. (2 Corinto 8:1-4) Sarong surat hali sa Zurich an nagsabi na “dakul na mga tugang na kapos man sa mga pangangaipo pero gustong magtabang an nagtao kan saindang mga kard para sa rasyon saka kuwarta.”

 Nakabangon tulos an mga lingkod ni Jehova sa Germany hali sa mga inagihan nindang persekusyon asin sa mga danyos kan giyera. An saro sa mga dahilan iyo an organisadong marhay saka dakulang tabang na itinao sainda kan saindang mga kapagtubod na nagpahiling nin tunay na mapagsakripisyong pagkamuot.