Eric: Aram mo, bako man akong relihiyosong marhay. Kaya sa hiling ko mayo man kitang gayong pag-uulayan.

Brian: Salamat sa pagigin prangka mo. Ako palan si Brian. Ika?

Eric: Eric.

Brian: Nauugma akong mamidbid ka, Eric.

Eric: Ako man.

Brian: Hapot ko lang, nagdakula ka sa relihiyosong pamilya?

Eric: Iyo. Pero kan maghali na ako sa harong para mag-college, dai na ako aktibo sa relihiyon.

Brian: Ahh. Anong kurso an pigkua mo?

Eric: Social studies saka history. Gustuhon ko kaya an history—aram mo na, su agi-agi kan tawo sa kinaban.

Brian: Interesante talaga an kasaysayan. Aram mo, saro man na libro nin kasaysayan an Bibliya. Napurbaran mo nang iiba iyan sa pag-research mo?

Eric: Dai pa. Aram kong magayon na libro an Bibliya, pero dai ko lamang naisip na saro iyan na libro nin kasaysayan.

Brian: Narisa ko na bukas an isip mo sa mga bagay-bagay. Kun tatawan mo ako nin pirang minuto, gusto kong ipahiling saimo an pira sanang halimbawa sa Bibliya na nagpapahiling na dai iyan nin kasala-sala pag-abot sa kasaysayan.

Eric: Sige. Pero mayo akong Bibliya.

Brian: Okey lang. Puwede tang gamiton ining Bibliya ko. An inot na halimbawa iyo ining nasa 1 Cronica kapitulo 29, bersikulo 26 saka 27. Sabi digdi: ‘Siring na naghadi si David, an aking lalaki ni Isai, sa bilog na Israel. Asin an panahon na saiyang ipinaghadi sa Israel apat na pulong taon. Pitong taon na naghadi siya sa Hebron, asin tulong pulo may tulong taon na naghadi siya sa Jerusalem.’

Eric: Pa’no man nasabing dai iyan nin kasala-sala pag-abot sa kasaysayan?

Brian: Sinasabi kaya kaidto kan mga kritiko na mayo man daang nabuhay na Hading David.

Eric: Talaga? Ta’no man ta dai sinda nagtutubod na talagang nabuhay siya?

Brian: Apuwera kaya sa Bibliya, dikit sana an ebidensiya na totoo siya. Pero, kan 1993, nadiskubre kan sarong grupo nin mga arkeologo an sarong suanoy nang marhay na gapo na may nakasurat na kun itatradusir “Harong ni David.”

Eric: Ngunyan ko sana ‘yan naaraman.

Brian: An saro pang karakter sa Bibliya na pigkukuwestiyon kun baga totoo iyo si Poncio Pilato, an gobernador kaidtong panahon ni Jesus. Nasambit siya digdi sa Lucas kapitulo 3, bersikulo 1—kaiba an iba pang opisyal kaidto.

Eric: Iyo, ta sabi digdi: ‘Kan si Poncio Pilato iyo an gobernador sa Judea, asin si Herodes iyo an tetrarka sa Galilea.’

Brian: Tama. Sa laog nin dakul na taon, may mga  iskolar na nagduda kun baga nabuhay man nanggad kaidto si Poncio Pilato. Pero kaining nakalihis na mga 50 taon, may nakuang gapo sa Middle East na igwang nakaukit na pangaran niya.

Eric: Hmm. Dai ko pa lamang nadangog an mga detalyeng ‘yan.

Brian: Nauugma akong masabi man ‘yan saimo.

Eric: An totoo, iginagalang ko talaga an Bibliya bilang sarong magayunon na libro, pero dai ko nuarin man naisip na mahalaga iyan sa panahon ta ngunyan. Puwedeng dai iyan nin kasala-sala pag-abot sa kasaysayan, pero sa hiling ko dai na ‘yan praktikal.

Brian: Dakul na tawo an mauyon diyan. Pero iba man an paniniwala ko. An dahilan: Puon pa kaidto, dai man nagbago an panginot na pangangaipo kan tawo. Halimbawa, kaipuhan ta pirmi nin kakanon, bado, asin istaran. Kaipuhan ta nin makakaulay saka maugmang pamilya. Bako daw na importante sa sato gabos an mga bagay na iyan?

Eric: Siyempre iyo.

Brian: Matatabangan kita kan Bibliya sa gabos na bagay na iyan. Kaya masasabi tang an librong ‘yan luma na pero napapanahon.

Eric: Anong buot mong sabihon?

Brian: Igwa kaya an Bibliya nin mahahalagang prinsipyo na makakatabang sa panahon ta kun paanong nakatabang iyan kaidtong isurat ‘yan ginatos nang taon an nakaagi.

Eric: Okey. Sa anong mga bagay?

Brian: Arog baga sa kun paano dapat mansayon an kuwarta, paano magkaigwa nin maugmang buhay pampamilya o magin marahay na amigo, makakatabang sa sato an mga prinsipyo sa Bibliya. An librong ini garo mapa na magiya sa sato para makamtan ‘yan. Halimbawa, bako daw na sa panahon ngunyan dipisil magin marahayon na agom saka padre de pamilya?

Eric: Sabagay, tama ka diyan. Mga sarong taon na kaming kasal kan agom ko. Talagang bako pirming madali na magkauyon sa mga bagay-bagay.

Brian: Tama ka. Pero an Bibliya may simple sanang mga prinsipyo na talagang nakakatabang. An sarong halimbawa ining nasa Efeso kapitulo 5. Basahon ta an bersikulo 22, 23, asin 28. Puwedeng ika an magbasa?

Eric: Sige. Sabi digdi: ‘Mga agom na babayi, magpasakop kamo sa saindong sadiring mga agom na lalaki nin siring kan sa Kagurangnan. Huli ta an agom na lalaki iyo an payo kan agom na babayi, siring na si Cristo man iyo an payo kan simbahan, na siya man sana an paraligtas kan hawak.’ Sa bersikulo 28: ‘Siring man an mga agom na lalaki maninigong mamuot sa saindang sadiring mga agom na babayi siring sa saindang sadiring mga hawak. An namumuot sa saiyang agom na babayi namumuot sa saiya man sana.’

Brian: Salamat. Kun parehong hihinguwahon kan mag-agom na sunudon an simpleng sadol na iyan, bako daw na magigin mas maugma an saindang buhay pampamilya?

Eric: Sa hiling ko iyo. Pero mas madali ‘yan sabihon kisa gibuhon.

Brian: Totoo iyan, ta gabos kita bakong perpekto. Sa katunayan, sinasabi kan Bibliya na magin rasonable kita. * Sa mga mag-agom, talagang kaipuhan makanuod na turutimbangon an mga bagay-bagay asin magpahunod. Nahiling ming mag-agom na nakakatabang samo an Bibliya na magibo iyan.

Eric: Tama ka.

Brian: May Web site an Mga Saksi ni Jehova na igwang magagayon na impormasyon manungod sa mga mag-agom asin buhay pampamilya. Kun matatawan mo pa ako nin pirang minuto, puwede kong ipahiling saimo an sampol kaiyan.

Eric: Sige, puwede man.

Brian: Okey. Mahihiling mo iyan sa Web site na jw.org/tl. Ini an home page.

Eric: Magayon an mga ritrato.

Brian: Arog kaiyan an ginigibo ming paghuhulit sa bilog na kinaban. Ah, hilingon ta ining “Turo ng Bibliya.” May seksiyon digdi na “Mag-asawa at Magulang.” Igwa digdi nin haralipot na artikulo manungod  sa manlain-lain na sitwasyon. May nagustuhan ka diyan?

Eric: Igwa, ining “Paglutas sa mga Problema Ninyong Mag-asawa.” Sa hiling ko makakatabang ini samo.

Brian: May apat na suhestiyon diyan kun paano mareresolberan an mga problema. Hilingon mo ining parapo. Gusto mong basahon?

Eric: Sige. Sabi digdi: “Kung ang pag-uusap ang pinakadugo ng pag-aasawa, ang pag-ibig at paggalang naman ang pinakapuso at pinakabagà ng pagsasama ng mag-asawa.” Hmm, gusto ko an sinasabi digdi.

Brian: Salamat sa pagbasa. May sinambit digding bersikulo sa Bibliya. Puwede mong pinduton para mabuksan.

Eric: Ah, iyo. Efeso 5:33. Sabi digdi: “Ibigin din ng bawat isa sa inyo ang kani-kaniyang asawang babae gaya ng ginagawa niya sa kaniyang sarili; sa kabilang dako naman, ang asawang babae ay dapat na magkaroon ng matinding paggalang sa kaniyang asawang lalaki.”

Brian: Narisa mo na idinuon digdi an pagtao kan kun ano an inaasahan kan kada saro na itatao sa sainda?

Eric: Dai ko aram kun tama an pagkakaintindi ko.

Brian: Bako daw na gusto kan agom na lalaki na irespeto siya kan saiyang agom, asin gusto man kan agom na babayi na mamatian na namumutan siya kan agom niya?

Eric: Iyo. Tama ka diyan.

Brian: Saka, kun an agom na lalaki parating naghahanap nin paagi para ipahiling an pagkamuot niya sa saiyang agom, bako daw na magigin mas madali sa agom niya na magpahiling nin paggalang saiya?

Eric: Garo man nanggad maaser ‘yan.

Brian: An bersikulong ini, dawa ngani isinurat haros 2,000 na taon na an nakaagi, nagtatao nin atensiyon sa pangangaipo kan mag-agom asin makakatabang na mga sadol, na kun susunudon ninda talagang makikinabang sinda. Saka kun babalikan ta an ilustrasyon na binasa ta kasubago, an ‘puso asin bagà’ kan pag-aguman magigin makusog pirmi.

Eric: Dakul pa palan an manunudan sa Bibliya kisa sa pinaghuna ko.

Brian: Nauugma akong madangog ‘yan Eric. Gusto kong maghilingan giraray kita digdi asin aramon an masasabi mo sa subtemang “Apat na Paraan ng Paglutas sa mga Problema” na nasa artikulo man na ini kan samong Web site. *

Eric: Sige. Hihilingon mi ‘yan ni misis.