Taano ta Tinotogotan kan Paradangog nin Pamibi an Pagsakit?

MINSAN ngani tibaad namimibi an nagkapira, nagdududa sinda kun baga may Dios. Taano? Huli ta posibleng nahihiling ninda an grabeng pagsakit sa kinaban na ini. Napag-isip-isip na daw nindo kun taano ta tinotogotan nin Dios an pagsakit?

Arog daw talaga kaini an pagkagibo nin Dios sa mga tawo—bakong perpekto asin nagsasakit? Madedepisilan nanggad kitang igalang an sarong dios na an katuyohan iyo na magsakit an mga tawo. Alagad, isip-isipa ini: Mantang pinagmamasdan mong may paghanga an sarong bagong kotse, narisa mo na may rukmi palan iyan sa gilid. Iisipon mo daw na tinuyo iyan kan naggibo kan kotse? Siempre dai! Iisipon mo na “perpekto” an pagkagibo kaiyan asin na may sarong tawo o bagay na nagin dahelan kan danyos na iyan.

Sa kaagid na paagi, kun hinahangaan ta an makangangalas na areglo asin disenyo sa kapalibotan dangan nahihiling an kariribokan asin karatan na nagpapasakit sa mga tawo, ano an magigin kongklusyon niato? Itinotokdo kan Biblia na ginibo nin Dios na perpekto an enot na mag-agom pero kan huri sinda mismo an nagdara nin danyos sa saindang sadiri. (Deuteronomio 32:4, 5) An maogmang bareta iyo na nanuga an Dios na hahaleon nia an danyos—na ibabalik nia sa pagkaperpekto an masinunod na mga tawo. Pero, taano ta haloyon?

Taano ta Haloyon?

An dahelan igwa nin koneksion sa hapot na kun siisay an maninigong mamahala sa katawohan. Bako nanggad katuyohan ni Jehova na pamahalaan nin mga tawo an saindang sadiri. Sia an maninigong magin Tagapamahala ninda. An Biblia mismo nagsasabi: ‘An pagsusog kan saiyang mga lakad, bakong sadiri kan tawong naglalakaw.’ (Jeremias 10:23) Makamomondo, pinili kan enot  na mag-agom na magrebelde sa pamamahala nin Dios. Huli sa paglapas ninda, sinda nagin parakasala. (1 Juan 3:4) Bilang resulta, bako na sindang perpekto asin nagdara sinda nin danyos sa saindang sadiri saka sa mga aki ninda.

Sa laog nin rinibong taon, tinogotan ni Jehova an mga tawo na pamahalaan an saindang sadiri, asin pinapatunayan kan kasaysayan na dai ninda kayang gibohon iyan. Ipinapahiling kaiyan na an gabos na gobyerno nin tawo nagtatao nin kasakitan. Mayo ni saro sa mga iyan an nakahale nin giera, krimen, inhustisya, o helang.

Paano Hahaleon nin Dios an Danyos?

Nanunuga an Biblia na sa dai na mahahaloy papangyayarihon nin Dios an matanos na bagong kinaban. (2 Pedro 3:13) An solamenteng papaistaron dian iyo an mga nagdesisyon mismo na magpahiling nin pagkamoot sa lambang saro asin sa Dios.—Deuteronomio 30:15, 16, 19, 20.

Sinasabi man sa Biblia na sa ‘aldaw nin paghokom’ na marikas na nagdadangadang, hahaleon nin Dios an kasakitan asin an mga may kagigibohan kaiyan. (2 Pedro 3:7) Pagkatapos, an masinunod na mga tawo pamamahalaan kan ninombrahan nin Dios bilang Tagapamahala, si Jesu-Cristo. (Daniel 7:13, 14) Ano an gigibohon kan pamamahala ni Jesus? An Biblia nagsasabi: ‘An mga mahoyo magmamana kan daga asin magkakararanga nin labi-labi sa katoninongan.’—Salmo 37:11.

Bilang Hade sa langit, hahaleon ni Jesus an danyos—kaiba na an helang, paggurang, asin kagadanan—na resulta kan pagrebelde nin tawo ki Jehova, “an burabod nin buhay.” (Salmo 36:9) Papaomayan ni Jesus an gabos na minaako kan saiyang mamomoton na pamamahala. Sa pamamahala nia, magkakatotoo an mga panugang ini kan Biblia:

 ▪ ‘Dai magsasabi an nag-eerok: “Naghehelang ako.” An banwaan na mag-oontok sa daga papatawadon kan kasalan.’—Isaias 33:24.

▪ ‘Papahidon nin Dios an gabos na luha sa saindang mga mata, asin an kagadanan madadai na, dai na sagkod magkakaigwa nin pagmondo, ni pagtangis, ni kolog. An enot na mga bagay nakalihis na.’—Kapahayagan 21:4.

Bako daw na nakakarangang maaraman na madali nang otobon nin Dios an panuga nia na taposon an gabos na kasakitan? Totoo, tinotogotan nia ngonyan an kasakitan, pero dai iyan dapat makahale kan satong kompiansa na dinadangog nin Dios an satong mga pamibi.

Yaon an Dios. Nadadangog ka nia, dawa an mga pag-agrangay mo huli sa kolog asin kamondoan. Asin gustong-gusto niang mahiling ka na mabuhay sa panahon na an gabos mong pagduda asin pagsakit mayo na.