Rumani sa Paradangog nin Pamibi

AN DAKOL na naghihingakong nagtutubod sa Dios dai makatao nin marigon na basehan kan saindang pagtubod. Dai man ninda ikapaliwanag kun taano ta sa parate bakong marahay an impluwensia nin relihion o kun taano ta tinotogotan nin Dios an pagsakit. An magigibo sana ninda iyo an mamibi sa sarong Dios na dai ninda nasasabotan.

Minsan siring, puede kang rumani sa Dios nin labi pa dian. Mapapatalubo mo an saimong pagtubod paagi sa pakasabot manongod sa Dios, asin mapahiro iyan sa saimo na kamotan asin pahalagahan sia. An tunay na pagtubod nakabasar sa ebidensia. (Hebreo 11:1) Kun pag-aadalan mo an katotoohan manongod sa Dios, puede mo siang mamidbid asin kaolayon siring sa sarong katood. Isip-isipa an eksperyensia kan nagkapira na nagin ugale kaidto na mamibi dawa ngani may mga pagduda manongod sa pag-eksister nin Dios.

▪ Si Patricia, na nasambitan sa enot na artikulo. “Sarong aldaw, kaibanan ko an mga sampulong amigo kan magpoon sindang mag-orolay manongod sa relihion. Sinabi ko sa sainda na nagluwas ako sa harong tanganing dai madangog an pag-oolay kan sakong ama, na sarong ateista, asin kan sarong Saksi ni Jehova, na nagduman sa samo. ‘Seguro tama an mga Saksi ni Jehova,’ an sabi kan saro kong amigo.

“‘Taano ta dai kita magduman sa saro sa mga pagtiripon ninda tanganing maaraman ta?’ an sabi man kan saro. Asin iyan mismo an ginibo mi. Maski ngani may pagduda, an iba sa samo padagos na nag-atender huling makikatood na marhay an mga Saksi.

“Pero, sarong Domingo may nadangog ako na nagpabago kan saboot ko. Ipinaliwanag kan ispiker kun taano ta nagsasakit an mga tawo. Kaidto ko sana nasabotan na perpekto an pagkagibo sa tawo sa kapoonpooni asin na an kasalan saka kagadanan nagpoon sa sarong tawo dangan luminakop sa bilog na katawohan. Ipinaliwanag man kan ispiker kun taano ta kaipuhan an kagadanan ni Jesus tanganing ikabalik an katawohan sa nawara kan enot na tawo. * (Roma 5:12, 18, 19) Biglang nagin malinaw sa sako an gabos. ‘Igwa nanggad nin Dios na nagmamakolog sa sato,’ an naisip ko. Padagos akong nag-adal sa Biblia asin dai nahaloy, sa kaenot-enote sa buhay ko, naaraman ko na puede palan akong mamibi sa saro na totoo.”

▪ Si Allan, na nasambitan man sa enot na artikulo. “Sarong aldaw, nagduman sa harong an mga  Saksi ni Jehova, asin pinadagos sinda kan agom ko huling interesado sia sa sinabi ninda manongod sa buhay na daing katapusan digdi sa daga. Nasuya ako. Kaya, mantang nasa sala an mga bisita, binutong ko an sakong agom pasiring sa kusina asin sinabihan ko sia, ‘Gamiton mo an isip mo. Dai mo puedeng paniwalaan an mga bagay na arog kaiyan!’

“‘E di, atubangon mo sinda asin patunayan mong sala sinda,’ an simbag nia.

“Siempre, dai ko kayang patunayan an ano man. Pero mabooton sinda asin winalatan ako nin libro manongod sa kun baga an buhay nagpoon paagi sa paglalang o sa ebolusyon. An lohika kaiyan klarong marhay asin suportado nanggad, kaya nagdesisyon ako na kaipuhan kong orog pang makanood manongod sa Dios. Pinonan kong pag-adalan an Biblia sa tabang kan mga Saksi, asin dai nahaloy narealisar ko na an sinasabi kaiyan laen na marhay sa gabos na iniisip ko kaidto manongod sa relihion. Mantang nakakanood ako manongod ki Jehova, nagpoon akong mamibi sa saiya nin mas espesipiko. May mga ugale ako na bako nanggad magayon, kaya namibi ako para sa tabang. Segurado akong sinimbag ni Jehova an mga pamibi ko.”

▪ Si Andrew, na nakaistar sa Inglatera. “Dawa ngani mapag-insistir ako sa sakong opinyon asin  interesadong marhay sa siensia, nagtutubod ako sa teoriya nin ebolusyon huling sinasabi nin iba na napatunayan na iyan. Habo kong magtubod sa Dios huli sa gabos na nangyayaring karatan.

“Pero, kun beses nag-iisip-isip ako: ‘Kun igwa nin Dios dian sa kaitaasan, gusto kong maaraman an kahulogan kan gabos na ini. Taano ta grabe an krimen asin giera? Kun nasa kadepisilan, namimibi ako kun minsan para sa tabang, pero dai ko aram kun kiisay ako nakikiolay.

“Dangan may nagtao sa sakong agom nin tract na ipinublikar kan Mga Saksi ni Jehova na may titulong An Kinaban daw na Ini Magdadanay? Iyan mismo an hapot na parate kong pinag-iisipan. Huli sa tract na iyan, nag-isip-isip ako manongod sa Biblia, ‘Kapakipakinabang daw na pag-isipan an mga simbag kaiyan?’ Pagkatapos, kan nagbabakasyon ako, may nagtao sa sako kan librong The Bible—God’s Word or Man’s? * Kan marealisar ko na an Biblia kaoyon kan tunay na siensia, naisip ko na kaipuhan kong makanood nin orog pa manongod sa Biblia. Kaya kan an sarong Saksi ni Jehova mag-alok nin pag-adal sa Biblia, inako ko iyan. Kan maintindihan ko an katuyohan ni Jehova, an pagmate ko midbid ko sia bilang sarong tunay na persona, saro na puede kong kaolayon na daing pag-alangan paagi sa pamibi.”

▪ Si Jan, na pinadakula bilang Protestante sa London. “Huli sa pagsaginsagin sa relihion asin lakop na pagsakit, nawaran ako nin interes sa relihion. Nagpondo man ako sa pag-eskuela sa kolehio asin pinonan an pagkanta saka pagtugtog nin gitara tanganing magkakuarta. Kaidto ko nabisto si Pat. Pinadakula siang Katoliko asin dai na man nagtutubod sa Dios arog ko.

“Nag-istar kami sa sarong abandonadong harong kaiba an nagkapirang nagpondo na man sa pag-eskuela na interesado sa mga relihion sa Sirangan. Sa kamatangaan nin banggi, dakol na oras ming pinag-oolayan nin seryoso an manongod sa kahulogan nin buhay. Dawa ngani dai kami ni Pat nagtutubod sa Dios, naisip mi na igwa nanggad nin puersang nagsusustenir sa buhay.

“Kan bumalyo kami sa norteng parte kan Inglatera tanganing maghanap nin trabaho bilang mga musikero, namundag an aki ming lalaki. Sarong banggi nagkahelang an aki mi, asin namangnohan ko na sana na namimibi na ako sa Dios na dai ko tinutubod. Dai nahaloy, nagkaproblema an pag-ibanan mi ni Pat, asin binayaan ko sia dara an samong omboy. Sa giraray, namibi ako para sa tabang, ta tibaad igwa man nanggad nin nagdadangog. Dai ako nag-aaram, iyan man palan an ginibo ni Pat.

“Dai nahaloy kan aldaw na iyan, duwang Saksi ni Jehova an nagtuktok sa pinto ni Pat asin ipinahiling sa saiya an nagkapirang praktikal na sadol kan Biblia. Inapodan ako ni Pat asin hinapot kun gusto kong mag-iba sa saiya sa pag-adal sa Biblia kaiba an mga Saksi. Dai nahaloy, nanodan mi na tanganing mapaogma an Dios, kaipuhan ming gibohon na legal an samong pag-ibanan. Garo masakit gibohon iyan huli sa bakong marigon na relasyon mi.

“Gusto ming makanood pa nin orog manongod sa kaotoban kan mga hula sa Biblia, dahelan kan pagsakit, asin kahulogan kan Kahadean nin Dios. Luway-luway ming narealisar na talagang may pagmakolog an Dios, asin gusto ming gibohon an sinasabi nia. Nagpakasal kami. An kadonongan na hale sa Tataramon nin Dios nakakatabang sa samo sa pagpadakula sa tolo ming aki. Nakakasierto kami na dinadangog ni Jehova an satong mga pamibi.”

Siyasaton Mo Mismo an mga Ebidensia

Arog kan minilyon na iba pa, nahiling kan mga nasambitan sa artikulong ini an pandadaya kan falsong relihion, asin nanodan ninda kun taano ta tinotogotan nin Dios an pagsakit. Narisa mo daw na sa kada eksperyensia, tamang pakasabot sa Biblia an nakakombensir sa sainda na talagang dinadangog ni Jehova an mga pamibi?

Boot mo daw na siyasaton an mga ebidensia na nag-eeksister an Dios? Maoogma an Mga Saksi ni Jehova na tabangan ka na manodan an katotoohan manongod ki Jehova asin kun paano ka makakarani sa “Paradangog nin pamibi.”—Salmo 65:2, NW.

[Mga Nota sa Ibaba]

[Blurb sa pahina 10]

“Kan maintindihan ko an katuyohan ni Jehova, an pagmate ko midbid ko sia bilang sarong tunay na persona, saro na puede kong kaolayon na daing pag-alangan paagi sa pamibi”

[Ritrato sa pahina 9]

An tunay na pagtubod nakabasar sa ebidensia asin sa pagmawot na maaraman an katotoohan manongod sa Dios