Naghahanap nin mga Simbag

“Haros gabos may teoriya dapit sa kun siisay si [Jesus]. Gurano man an satong pagtubod o pagduda, gabos kita napapahirong maghapot, ‘Siisay an tawong ini?’”​—⁠AUTOR NA SI STAN GUTHRIE.

INTERESADO an mga tawo manongod ki Jesus. Mabentang marhay an mga libro dapit sa saiya. Dakulaon an ginaganar sa takilya kan mga pelikula manongod sa saiya. Pero, may mga hapot pa man giraray dapit ki Jesus. Nagkakalaenlaen an opinyon nin mga tawo manongod sa kun siisay man nanggad sia.

Pirang taon na an nakaagi, duwang peryodista an nag-imbitar sa mga tawo na simbagon paagi sa Internet an hapot na, “Siisay si Jesus?” Kaiba sa mga simbag an minasunod:

● “Malinaw na sia sarong rabi (paratokdo) na namuhay bilang halimbawa nin pagmalasakit.”

● “Sia ordinaryong tawo na namuhay nin ekstraordinaryo.”

● “Mayo nin ebidensia na nabuhay si Jesus.”

● “Si Jesus an Aki nin Dios na namundag, nagadan, asin binuhay hale sa mga gadan tanganing iligtas kita sa satong mga kasalan. Sia buhay ngonyan asin madigdi giraray sa daga.”

● “Naniniwala ako na si Jesu-Cristo iyo an solamenteng aki nin Dios, sia tawo talaga asin Dios talaga, parehong arog kaiyan.”

● “Mga aki sana an naniniwala sa mga estorya dapit ki Jesus.”

Malinaw nanggad na an siring na mga ideya na nagkakalaen na gayo dai puedeng magin tama gabos. Igwa daw nin sarong masasarigan na mapagkukuanan nin impormasyon na makakatao nin tamang simbag sa mga hapot niato dapit ki Jesus? Nagtutubod an kagpublikar kan magasin na ini na an Biblia iyo an Tataramon nin Dios asin na iyan sana an nagsasabi sa sato kan bilog na katotoohan manongod ki Jesus. *​—⁠2 Timoteo 3:⁠16.

Sa sunod na artikulo, totokaron niato an simbag kan Biblia sa nagkapirang bagay na parateng ihinahapot dapit ki Jesus. Sia mismo an nagsabi na an dalan pasiring sa kaligtasan bukas para sa “siisay man na minatubod sa saiya.” (Juan 3:16) Iniimbitaran mi ika na pag-adalan an mga simbag, dangan ika mismo an magdesisyon kun baga kaipuhan mong makanood nin orog pa dapit ki Jesus asin kun paano mo ikakapaheling an pagtubod sa saiya.

[Nota sa Ibaba]