Si Abraham—Tawong Makosog an Boot

Pinagmamasdan ni Abraham an saiyang pamilya asin mga surugoon mantang sinda nag-aandam sa pagduman sa Canaan. (Genesis 12:1-5) Mantang nakamasid sa dakulang grupong ini na sa saiya nakadepende an pagbuhay, namamatean nanggad nia an responsabilidad nia sa sainda. Paano nia itatao an materyal na mga pangangaipo ninda mantang yaon sa lugar na dai nia kabisado? Bako daw na mas pasil kutana an responsabilidad na iyan kun sinda yaon sa Ur, sarong mayaman na lugar na may mahiwas na pasabsaban, matabang daga, asin bastanteng suplay nin tubig? Paano kun sia magkahelang o magadan sa lugar na iyan? Siisay an maasikaso sa pamilya nia? Kun igwa man sia nin siring na kahaditan, dai nia tinogotan an pagkatakot na makapugol sa saiya. Determinado sia na humiro, na sunodon an mga pagboot nin Dios, ano man an mangyari—sarong tanda nin tunay na kosog nin boot.

 ANO AN KOSOG NIN BOOT? Iyan an karakteristiko nin pagigin mapuersa, daing takot, asin pusoan—an kabaliktaran nin pagigin maluya an boot o matalaw. An pagigin makosog an boot dai man nangangahulogan na kita dai na noarin man natatakot. Imbes, an tawong igwa nin kosog nin boot na gikan sa Dios minahiro dawa natatakot.

PAANO SI ABRAHAM NAGPAHELING NIN KOSOG NIN BOOT? Andam sia na mapalaen sa kadaklan. Nagdakula sia sa lugar na an mga tawo nagsasamba sa kadakol na dios asin idolo. Pero, dai nia tinogotan an pagkatakot sa iisipon nin iba na makapugol sa saiya na gibohon an aram niang tama. Imbes, may pagkapusoan na pinili nia na sumamba sa saro sanang Dios—an “halangkao na Dios,” si Jehova.—Genesis 14:21, 22.

Inenot nia an pagsamba sa tunay na Dios kisa sa materyal na mga bagay. Andam siang bayaan an komportableng buhay sa Ur asin magduman sa kaawagan, na lubos na nagtitiwala na si Jehova an maasikaso kan materyal na pangangaipo nia. Siempre, sa pag-agi nin mga taon, tibaad naisip man nia an nagkapira sa mga kaginhawahan nia sa buhay duman sa Ur. Pero, nakakasierto sia na pirmeng itatao ni Jehova an pangangaipo nia asin kan saiyang pamilya. Paagi sa pagdadanay nia ki Jehova bilang an pinakaimportanteng Persona sa buhay nia, nagkaigwa sia nin kosog nin boot na sunodon an mga pagboot nin Dios.

ANO AN MGA LEKSION PARA SA SATO? Maaarog niato si Abraham paagi sa pagkaigwa kan kosog nin boot na sunodon si Jehova, dawa kun an iba sa palibot niato dai nagsusunod. Halimbawa, itinotokdo kan Biblia na puedeng may magkontra sa mga naninindogan sa saindang pagtubod ki Jehova Dios, tibaad mga amigo o paryente na may marahay man na intension. (Juan 15:20) Pero, kun kombensido kita sa satong nanodan manongod ki Jehova, kita naninindogan sa mga tinutubod niato, na ginigibo iyan sa magalang na paagi.—1 Pedro 3:15.

Makakapagtiwala man kita sa panuga nin Dios na itatao nia an pangangaipo kan mga nagtutubod sa saiya. An siring na pagtitiwala nagtatao sa sato nin kosog nin boot na isentro an satong buhay sa espirituwal imbes na sa materyal na mga bagay. (Mateo 6:33) Helingon kun paano iyan ginibo nin sarong pamilya.

Minsan ngani igwa nin duwang sadit pang aking lalaki, gusto ni Doug asin Becky na magbalyo sa sarong nasyon na mas nangangaipo nin mga parahulit kan maogmang bareta kan Biblia. Pagkatapos nin maingat na pagsiyasat asin odok na pamibi, nagdesisyon sinda na idagos an plano. “Kinaipuhan an kosog nin boot na andamon an mga aki asin magbalyo, na dai aram nin eksakto kun ano an magigin situwasyon mi,” an sabi ni Doug. “Pero, bago kami magdesisyon, pinag-olayan mi an halimbawa ni Abraham asin Sara. Talagang nakatabang samo an paghorophorop kun paano sinda nagtiwala ki Jehova—asin kun paanong sinda dai nia noarin man pinabayaan.”

Mapadapit sa buhay ninda sa ibang nasyon, si Doug nagsabi: “Dakulaon an nagin bendisyon samo.” An paliwanag nia: “Huling mas simpleng marhay an samong pamumuhay, nagagamit mi an kadaklan na oras kan aldaw sa pag-iribanan bilang pamilya—sa paghuhulit, pag-orolay-olay, asin pakikikawat sa mga aki. Nakamate ako nin katalingkasan na dai ko maipaliwanag.”

Siempre, bako gabos nasa kamugtakan na gumibo nin siring kadakulang pagliliwat. Pero, puede niato gabos na arogon an halimbawa ni Abraham paagi sa pagprioridad kan satong pagsamba sa Dios, na nagtitiwala na sia yaon tanganing suportaran kita. Kun ginigibo niato iyan, hinihimate niato an konseho kan Biblia na magin makosog an boot asin magsabi: “An Kagurangnan iyo an sakong paratabang; dai ako matatakot.”—Hebreo 13:5, 6.

[Blurb sa pahina 7]

An tawong igwa nin kosog nin boot na gikan sa Dios minahiro dawa natatakot

 [Kahon/Ritrato sa pahina 8]

Sarong Makidios na Babae Asin Mahal na Marhay na Agom

Si Sara agom nin sarong lalaki na may pambihirang pagtubod. Alagad an makidios na babaeng ini mismo nagtao man nin halimbawa na maninigong tawan nin atension. Sa katunayan, tolong beses na nasambitan sa Biblia an ngaran nia bilang halimbawa na maninigong arogon nin makidios na mga babae. (Isaias 51:1, 2; Hebreo 11:11; 1 Pedro 3:3-6) Minsan ngani medyo dikit sana an sinasabi kan Biblia mapadapit sa kahangahangang babaeng ini, makakaheling kita nin magagayon na paglaladawan dapit sa saiya.

Halimbawa, isip-isipa an enot na reaksion ni Sara kan sabihon sa saiya ni Abraham an pagboot nin Dios na humale sinda sa Ur. Inisip-isip daw nia kun saen sinda maduman asin kun taano? Nahadit daw sia manongod sa materyal na pangangaipo ninda? Namondo daw sia kan iniisip nia na babayaan na nia an mga amiga asin kapamilya nia, na dai aram kun noarin o kun baga maheheling pa nia sinda liwat? Daing duda na naglaog sa isip nia an siring na mga bagay. Dawa siring, gikan sa boot siang naghale, na nagtitiwala na bebendisyonan sia ni Jehova huli sa pagsunod nia.—Guibo 7:2, 3.

Apuera sa pagigin masinunod na lingkod nin Dios, marahayon na agom si Sara. Imbes na makipagkompetensia sa agom nia sa pagmanehar sa mga aktibidad kan pamilya, sia igwa nin odok sa pusong paggalang sa saiyang agom, na may pagkamoot na sinusuportaran ini mantang ginigiyahan kaini an saindang pamilya. Sa paggibo kaiyan, sinamnohan o pinagayon nia an saiyang sadiri paagi sa saiyang positibong panglaog na mga karakteristiko.—1 Pedro 3:1-6.

Makikinabang daw sa siring na mga ugale an mga agom na babae ngonyan? “An halimbawa ni Sara nagtokdo sako na dai ako dapat mag-alangan na sabihon asin ipahayag sa agom ko an sakong saboot,” an sabi nin sarong babae na an ngaran Jill, na labi nang 30 taon na maogma sa buhay bilang may agom. “Kadungan kaiyan,” an sabi pa nia, “bilang payo kan pamilya, an sakong agom an may responsabilidad na gumibo nin pinal na desisyon. Kun nagibo na nia iyan, trabaho ko na man na gibohon an gabos kong makakaya tanganing magin mapanggana an desisyon na iyan.”

An pinakanakakapukaw sa boot gayod na leksion na manonodan niato ki Sara iyo ini: Minsan ngani magayonon, dai sia nagin orgolyoso huli sa pisikal na kagayonan. (Genesis 12:10-13) Imbes, mapakumbaba niang sinuportaran si Abraham sa panahon nin sakit asin ginhawa sa buhay ninda. Daing duda na si Abraham asin Sara maimbod, mapakumbaba, asin mamomoton na mag-agom—mag-agom na tunay nanggad na nagin bendisyon sa lambang saro.