Kun Saen an Linderos Bakong Mahalaga

An Mga Saksi ni Jehova nagmamaigot na haleon an mga olang sa pag-oltanan nin mga tawo. Isinasapuso ninda an prinsipyo sa sinabi ni Jesus sa mga disipulo nia: “Kamo gabos magturugang.” (Mateo 23:8) Malinaw na maheheling ini sa duwa sa mga lugar nin pagsamba kan mga Saksi—an saro sa Portugal asin an saro pa sa España.

AN Valença do Minho, na sarong siudad na napapalibotan nin lanob sa norteng parte kan Portugal, itinogdok sa mga panahon na peligroso. Matatanaw sa mga tore kaiyan an Salog nin Minho, an linderos kan España asin Portugal. Nasa balyo kan salog an sarong siudad sa España na inaapod Tui, na may katedral na garo baga sarong kuta. An mayor na mga kuta kan Tui asin Valença yaon na kaidto pang ika-17 siglo, kan nakikigiera an España sa Portugal.

Kan 1995, hinale na sa linderos kan duwang nasyon na ini na miembro kan European Union an mga bantay asin adwana (customs controls). Pero, labi pa dian an kaipuhan tanganing mapagsararo an mga tawo. Kalabot man dian an isip asin puso. Sa Valença, may sadit asin magayon na edipisyo na nagpapaheling kun paano puedeng mahale an mga olang sa pag-oltanan nin mga tawo. Iyan lugar nin pagsamba—an Kingdom Hall of Jehovah’s Witnesses—na parehong ginagamit kan mga kongregasyon na Kastila asin Portuges.

Nagpoon an estoryang ini kan 2001, kan an mga Saksi sa Tui mangaipo nin bagong Kingdom Hall. Kaipuhan nindang maghale sa inaarkilang lugar, pero kulang an pondo ninda tanganing magtogdok nin bagong hall. Pati an pag-arkila nin ibang lugar dai ninda kaya, huling bako man dakula an kongregasyon. Kaya, an mga Saksing Kastila nakiolay sa mga Saksing Portuges sa Valença kun puede sindang makigamit kan hall, na mga tolong kilometro sana hale sa sentro nin Tui.

“Pinag-olayan mi iyan sa sarong miting kan Disyembre 2001,” an nagigirumdoman ni Eduardo Vila, sarong miembro kan Kongregasyon nin Tui sa España. “Paghale ko pagkatapos kan miting na iyan, narealisar ko na pinahiro ni Jehova an puso kan mga kapagtubod ming Portuges. Dakula an ginibo nindang sakripisyo tanganing  makatogdok nin magayon na Kingdom Hall, asin nakakapakosog sa pagtubod na maheling na andam sindang ihiras kun ano an igwa sinda.”

“Maogma ming inako sa Kingdom Hall mi an mga kapagtubod na Kastila,” an sabi ni Americo Almeida, sarong Saksing Portuges na presente man sa miting na iyan. “Nagtitiwala kami na bebendisyonan ni Jehova an areglong ini, asin gabos kami nagkasararo sa desisyon.” Marahay an pag-iribanan kan mga Saksi sa mag-ibong na lado kan linderos. “Garo baga pambihira iyan, pero dai mi ngani naririsa na magkalaen an nasyon mi. Magturugang talaga kami sa espirituwal,” an sabi ni Paolo na taga Valença.

An saro sa enot na naririparo nin mga bisita sa laog kan Kingdom Hall iyo an duwang magkaparehong relo—na nasa lanob sa likod—pero magkalaen an oras. An España enot nin sarong oras sa Portugal, pero an pagkakalaen na iyan sa oras iyo sana an bakong magkaoyon sa laog kan Kingdom Hall. Kan kaipuhan na pakarhayon an hall, an Regional Building Committee na nasa España an nagmanehar sa maigot na boluntaryong mga trabahador sa duwang kongregasyon. “Dakol na ekspertong kapagtubod an nag-abot hale sa España tanganing tumabang samo, na an nagkapira hale pa sa mga lugar na labing 160 kilometros an rayo,” an nagigirumdoman ni Paolo. “Huli sa proyektong iyan, nagin mas dayupot an duwang kongregasyon.”

Helingon niato an ikaduwang halimbawa kun paano napangganahan an kadepisilan huli sa linderos.

 Pagkasararo sa Kababan na Pinagbanga nin Duwang Nasyon

An Puigcerda sarong siudad sa España na nasa linderos nin Pransia. Yaon iyan sa tahaw nin kababan na may matabang daga asin napapalibotan nin halangkawon na kabukidan nin Pyrenees. An enterong kababan, na inaapod na Cerdaña, dating teritoryo kan España. Pero kan 1659, sa kasundoan para sa katoninongan na inaapod na Tratado kan Pyrenees, isinuko kan España sa Pransia an kabanga kan kababan.

Ngonyan, an mga Pranses nagsa-shopping sa Puigcerda, an mayor na siudad sa kababan. Asin poon kan 1997, binuksan man kan mga Saksi ni Jehova sa Puigcerda an Kingdom Hall ninda para sa mga kapagtubod na Pranses. Kan taon na iyan, kaipuhan na maghale an mga Saksing Pranses sa inaarkila nindang lugar. Sarong oras an biahe pasiring sa pinakaharaning Kingdom Hall sa Pransia, asin an tinampo sa halangkaw na bukid na pasiring duman parateng pano nin niebe kun mga bulan nin tiglipot.

Kan ipaliwanag kan mga Saksing Pranses na kaipuhan nindang marhay nin hall, inalok tolos kan mga Saksing Kastila an Kingdom Hall ninda. “An gabos na kapagtubod na Kastila maogmahon sa pagpagamit ninda kan hall,” an nagigirumdoman ni Prem, sarong Saksi duman. “Siempre, an atitud na ini huli sa pagsasanay na sono sa Biblia na inako mi sa nag-aging mga taon. Pakalihis nin duwang semana, duwang kongregasyon na an naggagamit kan samong Kingdom Hall, asin 13 taon na kaming magkairibanan.”

“Para samo, an Puigcerda an pinakamarahay na lugar nin Kingdom Hall,” an paliwanag ni Eric, sarong namamayong ministro sa kongregasyon na Pranses. “Asin nagigirumdoman ko pa an maogmang pag-ako sa samo kan kongregasyon na Kastila. Dinekorasyonan ninda an hall nin dakulang bouquet nin mga burak asin naglaag nin sign na nagsasabing ‘Dagos po kamo, namomotan ming mga tugang.’”

“Paghona kan mga tawo duman, kan magsera an Kingdom Hall mi sa Pransia, mayo na an kongregasyon,” an sabi pa ni Eric. “Pero, huli sa regular ming paghuhulit duman—kaiba an pagdistribwir nin imprentadong imbitasyon para sa mga pagtiripon mi sa España—naaraman ninda na yaon pa palan kami. An mga interesado sa Biblia naoogmang magduman sa Kingdom Hall mi sa España. Apuera dian, huling saro sanang Kingdom Hall an ginagamit mi asin kan mga kapagtubod na Kastila, nagin mas dayupot kami sa lambang saro. Bago kaini, aram ming may kongregasyon na Kastila sa balyo kan linderos, pero haros mayo kaming komunikasyon sa sainda. Ngonyan na regular na kaming nagkakaherelingan, dai mi na namamatean na napapasuway kaming gayo sa harayoon na kababan na ini sa kabukidan.”

Nagin problema daw an pagkakalaen sa kultura? “Kan maaraman ko na an pagtiripon mi gigibohon  sa España sa ibong kan linderos, dawa paano nahadit ako,” an pag-admitir nin sarong Pranses na babaeng Saksi na labi nang 80 anyos. “Pero, huli sa pag-ako asin pagigin makiamigo kan mga kapagtubod sa Puigcerda, mayo nin ano man na nagin problema sa pagbabagong iyan. Sa kabaliktaran, oportunidad iyan na patunayan an internasyonal na pagkasararo kan mga lingkod ni Jehova.”

An Pundasyon nin Mas Dayupot na Pagkasararo

An mga kagpundar kan unyon sa Europa nagsabi na an mga nasyon na miembro kaiyan “determinadong ibugtak an pundasyon para sa mas dayupot pang pagkasararo kan mga taga Europa.” An paghale sa mga bantay sa linderos, kan mga dekada nin 1980 asin 1990, may katuyohan na parikason an prosesong ini. Pero, may mga olang na kaipuhan man haleon sa isip.

Nagmamaigot an Mga Saksi ni Jehova na haleon an pagpalaenlaen asin kawaran nin tiwala. Nasasabotan ninda na kapakipakinabang an iba-ibang pinaghalean ninda asin na “an Dios dai nagpapalaen nin magña tauo.” (Guibo 10:34) Sa saindang mga internasyonal na kombension asin Kingdom Hall, naheling ninda na ‘kanigoan karahay asin kanigoan kaogma na mag-ontok an gabos na magturugang na sararo sana!’ (Salmo 133:1) Buhay na patotoo kaiyan an pagkasararo kan mga Saksi sa Valença saka Puigcerda asin kan mga kapagtubod ninda sa kataraed na nasyon.

[Blurb sa pahina 13]

“Garo baga pambihira iyan, pero dai mi ngani naririsa na magkalaen an nasyon mi. Magturugang talaga kami sa espirituwal”

[Blurb sa pahina 14]

“Huli sa proyektong iyan, nagin mas dayupot an duwang kongregasyon”

[Blurb sa pahina 15]

‘Kanigoan karahay asin kanigoan kaogma na mag-ontok an gabos na magturugang na sararo sana!’ SALMO 133:1

[Ritrato sa pahina 12, 13]

An Tui asin an Salog nin Minho kun tatanawon hale sa napapalibotan nin lanob na siudad nin Valença do Minho

[Ritrato sa pahina 14]

Pagpakarhay kan Kingdom Hall

[Ritrato sa pahina 15]

An Pyrenees asin kababan nin Cerdaña

[Ritrato sa pahina 15]

Duwang elder hale sa duwang kongregasyon—an saro Kastila asin an saro Pranses—na parehong nag-aatender sa Kingdom Hall sa Puigcerda