Si Jesus—Kun Taano ta Sia Nagadan
“An Aki nin tawo nagdigdi . . . tanganing maglingkod asin itao an saiyang kalag [o, buhay] bilang pantubos na karibay nin dakol.”—MARCOS 10:45.
ARAM ni Jesus kun ano an dapat niang asahan. Nasasabotan nia na dai magigin matoninong an buhay nia. Sa kabaliktaran, aram nia na papahalipoton an saiyang buhay sa makaturotristeng paagi mantang sia labi pa sanang 30 anyos, asin sia biyong andam na atubangon an kagadanan.
Sa Biblia, may dakulang importansia an kagadanan ni Jesus. An sarong reperensia nagsasabi na an kagadanan ni Jesus mga 175 beses na direktang nasasambitan sa Kristianong Griegong Kasuratan, o Bagong Tipan. Pero, taano ta kaipuhan ni Jesus na magsakit asin magadan? Kaipuhan tang maaraman iyan huling an kagadanan ni Jesus puedeng magkaigwa nin dakulang epekto sa satong buhay.
Mantang paduman sa Jerusalem tanganing iselebrar an saiyang ultimong Paskua, sinabihan nia an 12 apostol: “An Aki nin tawo itatao sa mga poon na saserdote asin sa mga eskriba, asin kokondenaron ninda sia na magadan patin itatao sia sa mga tawo kan mga nasyon, asin sia pagkakalwagan ninda asin lulutaban asin hahampakon patin gagadanon.” * (Marcos 10:33, 34) Taano ta sia nakakasiertong marhay sa mangyayari sa saiya?
Si Jesus pamilyar sa dakol na hula sa Hebreong Kasuratan dapit sa kun paano sia magagadan. (Lucas 18:31-33) Estudyare an nagkapira sa mga hula kaiba an mga reperensia sa Kasuratan na nagpapaliwanag kun paano iyan naotob.
An Mesiyas . . .
-
Papasaloiban sa kantidad na 30 pidasong pirak.—ZACARIAS 11:12; MATEO 26:14-16.
-
Hahampakon asin lulutaban.—ISAIAS 50:6; MATEO 26:67; 27:26, 30.
-
Ipapako sa harigi.—SALMO 22:16, nota sa ibaba; MARCOS 15:24, 25.
-
Lalaiton mantang nasa harigi.—SALMO 22:7, 8; MATEO 27:39-43.
-
Gagadanon na mayo ni saro sa mga tolang an mababari.—SALMO 34:20; JUAN 19:33, 36.
Ini asin an dakol na iba pang hula inotob ni Jesus. Imposibleng naotob ini ni Jesus kun kagustohan sana nia. An pagkaotob kan gabos na hulang ini ki Jesus nagpapatunay na sia isinugo talaga nin Dios. *
Pero, taano ta kaipuhan ni Jesus na magsakit asin magadan?
Huli sa impluwensia nin sarong rebelde na espiritung linalang, ginusto ni Adan asin Eva na sumuway sa Dios. Huli sa pagrebelde kan mag-agom na iyan, kinuestion an pagigin matanos kan soberaniya, o pamamahala nin Dios. An kasalan ninda nagresulta man sa pagkuestion kun baga may siisay man na tawo na magdadanay na maimbod sa Dios kun binabalo.—Genesis 3:1-6; Job 2:1-5.
Itinao ni Jesus an pinakadai mapagdududahan na simbag na posible sa duwang isyung iyan—an soberaniya ni Jehova asin integridad nin tawo. Paagi sa saiyang perpektong pagkuyog “sagkod sa kagadanan . . . sa hariging pasakitan,” sinuportaran ni Jesus an soberaniya nin Dios. (Filipos 2:8) Pinatunayan man ni Jesus na kaya nin perpektong tawo na papagdanayon an perpektong integridad ki Jehova sa ibong kan pinakagrabeng mga pagbalo.
Ini malinaw na nasabotan ni Jesus, asin gikan sa boot niang itinao an “saiyang kalag bilang pantubos na karibay nin dakol.” (Mateo 20:28) An kagadanan nia bilang atang an nagbukas kan dalan tanganing an bakong perpektong mga tawo magkaigwa nin marahay na relasyon ki Jehova asin makalda sa kasalan asin kagadanan. An kagadanan ni Jesus nagtatao sa sato nin oportunidad na makamtan giraray an nawara ni Adan asin Eva—an paglaom na mabuhay sagkod lamang sa perpektong kamugtakan sa daga. *—Kapahayagan 21:3, 4.
An pakaaram sa mga katotoohan na iyan manongod ki Jesus orog pa an magigibo kisa sa paglinaw sana sa mga salang pagsabot dapit sa saiya. An paghiro kaoyon dian puedeng magresulta sa mga bendisyon—sarong mas marahay na buhay ngonyan asin buhay na daing katapusan sa maabot na panahon. Sinasabi sa sato kan Biblia kun ano an kaipuhan tang gibohon tanganing makamtan an siring na mga pakinabang.
-
Orog pang pag-adalan an dapit ki Jesu-Cristo asin an papel nia sa katuyohan ni Jehova.—JUAN 17:3.
-
Magtubod ki Jesus, na ipinapaheling sa saimong pamumuhay na inaako mo sia bilang saimong Paraligtas.—JUAN 3:36; GIBO 5:31.
Maoogma an mga Saksi ni Jehova na tabangan kang orog pang makanood dapit ki Jesu-Cristo, an “Aking bugtong” nin Dios, na paagi sa saiya puede kitang magkamit kan regalong “buhay na daing katapusan.”—Juan 3:16.
^ par. 5 Parateng inaapod ni Jesus an saiyang sadiri bilang “an Aki nin tawo.” (Mateo 8:20) An pananaram na ini dai sana nagpapaheling na sia talagang tawo kaidto kundi na sia man an “aki nin tawo” na sinambit sa hula sa Biblia.—Daniel 7:13, 14.
^ par. 13 Para sa dugang pang impormasyon manongod sa mga hula na naotob ki Jesus, helingon an apendise na may temang “Si Jesu-Cristo—An Ipinanugang Mesiyas” sa librong Ano Man Nanggad an Itinotokdo kan Biblia? na ipinublikar kan Mga Saksi ni Jehova.
^ par. 17 Para sa dugang pang impormasyon manongod sa halaga kan kagadanan ni Jesus bilang atang, helingon an kapitulo 5, “An Pantubos—Regalo nin Dios na Nakakalabi sa Gabos,” sa librong Ano Man Nanggad an Itinotokdo kan Biblia?
