Si Jesus—Kun Paano Sia Namuhay
“An sakong kakanon iyo an paggibo ko kan kabotan nia na nagsugo sa sako asin pagtapos kan saiyang gibohon.”—JUAN 4:34.
AN KAMUGTAKAN kaidto kan sabihon iyan ni Jesus dakol an ihinahayag dapit sa kun sa ano nakasentro an buhay nia. Si Jesus asin an saiyang mga disipulo bilog na agang nagbaklay sa mabulod na rehion nin Samaria. (Juan 4:6, nota sa ibaba) Huling iniisip kan mga disipulo ni Jesus na sia seguradong gutom na, sia inalok ninda nin kakanon. (Juan 4:31-33) Sa simbag ni Jesus, sinumaryo nia an saiyang katuyohan sa buhay. Para sa saiya, an pag-otob kan gibohon nin Dios mas mahalaga kisa sa pagkakan. Sa tataramon man o sa gibo, namuhay si Jesus na ginigibo an kabotan nin Dios para sa saiya. Ano an kalabot digdi?
Si Jesus dai sana naghulit, o nagbalangibog, sa iba dapit sa Kahadean nin Dios. Sia nagtokdo man sa mga tawo—an boot sabihon, sia nagtao nin instruksion, nagpaliwanag, asin nangombensir paagi sa tamang pangangatanosan. An Kahadean an tema kan mensahe ni Jesus.
Sa bilog na ministeryo ni Jesus, itinokdo nia sa mga nagdadangog sa saiya kun ano an Kahadean nin Dios asin kun ano an gigibohon kaiyan. Tawan nin atension an minasunod na mga katotoohan dapit sa Kahadean, pati an mga teksto sa Kasuratan manongod sa sinabi ni Jesus sa temang iyan.
An Kahadean nin Dios sarong langitnon na gobyerno, asin si Jesus an ninombrahan ni Jehova bilang Hade.—MATEO 4:17; JUAN 18:36.
Papakangbanalon kan Kahadean an ngaran nin Dios asin gigibohon kaiyan an kabotan nia sa daga nin siring sa langit.—MATEO 6:9, 10.
Sa pamamahala kan Kahadean nin Dios, an bilog na daga gigibohon na paraiso.—LUCAS 23:42, 43.
Dai mahahaloy, maabot na an Kahadean nin Dios asin ootobon kaiyan an saiyang kabotan para sa daga. *—MATEO 24:3, 7-12.
Minsan siring, durante kan saiyang tolo may kabangang taon na ministeryo, naggibo man sia nin dakol na makapangyarihan na gibo. Kisiera duwang katuyohan an naotob kan mga gibong ini. Enot, nakatabang iyan na patunayan na sia talagang isinugo nin Dios. (Mateo 11:2-6) Ikaduwa, nagtao iyan nin halipot na patanaw dapit sa mas dakula pa nganing gigibohon nia sa maabot na panahon bilang Hade kan Kahadean nin Dios. Mangnoha an nagkapira sa mga milagrong ginibo nia.
Pinakalma nia an dagat na darakula an alon asin pinatoninong nia an makosogon na doros.—MARCOS 4:39-41.
Pinaomayan nia an mga may helang, pati an mga buta, bungog, asin pilay.—LUCAS 7:21, 22.
Pinadakol nia an kakanon, kaya napakakan nia an nagugutom na kadaklan.—MATEO 14:17-21; 15:34-38.
Sa kisiera tolong pagkakataon, sia nagbuhay nin gadan.—LUCAS 7:11-15; 8:41-55; JUAN 11:38-44.
Imahinara an magigin buhay sa daga sa pamamahala kan siring na makapangyarihan na Hade!
Bilang “an panganay sa gabos na linalang,” si Jesus nakaibanan ni Jehova sa langit na mas haloy kisa sa iba pang espiritung linalang. (Colosas 1:15) Isip-isipa an mga oportunidad nia kaidto na masabotan an kaisipan kan saiyang Ama asin manodan an Saiyang kabotan, mga pamantayan, saka mga dalan.
Si Jesus tama sanang makapagsabi: “Kun siisay an Aki mayo nin siisay man na nakakaaram kundi an Ama; asin kun siisay an Ama, mayo nin siisay man na nakakaaram kundi an Aki, saka an saro na sa saiya gusto kan Aki na ihayag sia.” (Lucas 10:22) Kan si Jesus nasa daga bilang tawo, sia andam—iyo, gustong-gusto nia—na ihayag an personalidad kan saiyang Ama. Si Jesus nagtaram asin nagtokdo base sa daing kaagid na punto de vista; ginamit nia an mga nagigirumdoman nia mismo sa rona nin mga espiritu asin sa mamuraway na presensia kan Kaharohalangkaweng Dios.—Juan 8:28.
An ginibo ni Jesus sa paghayag sa saiyang Ama puedeng iilustrar paagi sa nagigibo nin sarong transpormer nin elektrisidad. Pinapababa kan siring na aparato an halangkaw na boltahe nin elektrisidad na minaagi dian tanganing magamit nin ordinaryong konsumidor. Kan si Jesus nasa daga pa, ginamit nia an nanodan nia sa langit manongod sa saiyang Ama asin itinokdo nia iyan sa paagi na pasil masabotan asin iaplikar kan hamak na mga tawo sa daga.
Isip-isipa an duwang mahalagang paagi na ihinayag ni Jesus an saiyang Ama.
Sa pagtotokdo ni Jesus, ipinahayag nia an katotoohan manongod ki Jehova—an Saiyang ngaran, katuyohan, asin mga dalan.—JUAN 3:16; 17:6, 26.
Paagi sa paggawe ni Jesus, ihinayag nia an dakol asin magayon na aspekto kan personalidad ni Jehova. Perpekto nanggad na ipinaheling ni Jesus an personalidad kan saiyang Ama, kaya garo man sana masasabi nia: ‘Kun gusto mong maaraman kun ano an personalidad kan sakong Ama, helinga sana ako.’—JUAN 5:19; 14:9.
Napapahanga nanggad kita sa nagin pamumuhay ni Jesus. Dakulaon an magigin pakinabang niato kun sisiyasaton niato kun taano ta sia nagadan asin kun mahiro kita kaoyon kan nanodan niato.
^ par. 9 Tanganing makanood nin orog pa manongod sa Kahadean nin Dios asin kun paano niato naaaraman na sa dai mahahaloy maabot na iyan, helingon an kapitulo 8, “Ano an Kahadean nin Dios?,” asin an kapitulo 9, “Nabubuhay Na daw Kita sa ‘Huring mga Aldaw’?,” kan librong Ano Man Nanggad an Itinotokdo kan Biblia? na ipinublikar kan Mga Saksi ni Jehova.
