Arogon an Saindang Pagtubod

Linabanan Nia an Pagkatakot Asin Pagduda

SI Pedro puersadong nagsasagwan asin may inaaninaw sa kadikloman nin banggi. An naheheling daw nia tingraw nin liwanag sa may sirangan, na sarong tanda na mag-aagahon na? Makologon na an saiyang likod asin mga abaga huli sa dakolon na oras na pagsagwan. Huli sa doros, na ipinapalidpalid an saiyang buhok, nagin makosogon an mga alon sa Dagat nin Galilea. Sunod-sunod na alon an minahampak sa proa kan barotong ginagamit sa paninira, asin basa-basa na sia huli sa tapuyas. Nagpadagos sia sa pagsagwan.

Duman sa may baybayon, si Pedro asin an kairiba nia binayaan si Jesus na nagsosolo. Kan aldaw na iyan, naheling ninda na pinakakan ni Jesus an rinibong nagugutom paagi sa pira sanang tinapay asin sira. An nagin reaksion kan mga tawo iyo na gibohon si Jesus na hade, alagad habo niang makikabtang sa politika. Determinado man siang tabangan an saiyang mga parasunod na dai magkaigwa nin siring na mga ambisyon. Huling gusto niang makarayo sa mga tawo, kinombensir nia an saiyang mga disipulo na magsakay sa baroto asin maenot na sa ibong na baybayon mantang sia solong matukad sa bukid tanganing mamibi.—Marcos 6:35-45; Juan 6:14, 15.

Kan magsakay an mga disipulo, an bulan haros nasa kabilogan asin nasa kaitaasan na; ngonyan luway-luway na iyan na minasolnop. Pero, pira pa sanang kilometro an biniahe ninda. Depisil na magkadinarangogan huli sa puersa asin padagos na hagubuhob kan doros saka alon. Posibleng marhay na si Pedro toninong na naghohorophorop nin hararom.

Dakolon nanggad an puedeng horophoropon! Sia nagsusunod ki Jesus na taga Nazaret sa laog nin labi nang duwang taon na pano nin mga pangyayari. Dakolon na siang nanodan, alagad dakolon pa siang dapat manodan. Huli sa pagigin andam nia na gibohon iyan—na labanan an mga olang na siring baga kan pagduda asin pagkatakot—sia nagin sarong marahayon na halimbawa na dapat niatong arogon. Helingon niato kun paano.

“Nanompongan na Niamo an Mesiyas”!

Nungkang malilingawan ni Pedro an aldaw na namidbid nia si Jesus na taga Nazaret. An tugang niang si Andres an enot na nagsabi sa saiya kan nakakasorpresang bareta: “Nanompongan na niamo an Mesiyas.” Paagi sa mga tataramon na iyan, nagpoon nang magbago an buhay ni Pedro. Iyan dai na noarin man magigin arog kan dati.—Juan 1:41.

Si Pedro nag-iistar sa Capernaum, sarong siudad sa may baybayon nin tubig-tabang na danaw na inaapod na Dagat nin Galilea. Si Santiago asin Juan, na mga aki ni Zebedeo, kaiba nia asin ni Andres sa negosyong paninira. Kaiba ni Pedro sa harong bako sanang an agom nia kundi an panugangan man niang babae asin an tugang niang si Andres. Siertong kaipuhan na magin mahigos, makosog, asin mapamaagi tanganing sustentohan an siring na pamilya paagi sa paninira. Maiimahinar niato an dakolon na oras nin pagtrabaho sa banggi—itinataktak kan mga lalaki an mga hikot sa pag-oltanan kan duwang baroto asin ihinahawas tanganing isakay an ano man na dakop na sira sa danaw. Maiimahinar man niato an mapagal na mga oras kun aga mantang an mga sira pinaglalaenlaen segun sa klase kaiyan asin ipinapabakal, saka an mga hikot sinusursi asin linilinigan.

Sinasabi sa sato kan Biblia na si Andres disipulo ni Juan Bautista. Si Pedro siertong may makosog na interes na naghinanyog sa ibinareta kan saiyang tugang manongod sa mensahe ni Juan. Sarong aldaw, naheling ni Andres si Juan na itinotokdo si Jesus na taga Nazaret asin nagsabi: “Uya, an Kordero nin Dios!” Si Andres tolos-tolos na nagin  parasunod ni Jesus asin ogmahon na sinabi ki Pedro an nakakapukaw sa boot na baretang ini: Nag-abot na an Mesiyas! (Juan 1:35-40) Pagkatapos kan rebelyon sa Eden mga 4,000 na taon bago kaini, si Jehova Dios nanuga na may sarong espesyal na indibiduwal na maabot tanganing magtao nin tunay na paglaom sa katawohan. (Genesis 3:15) Namidbid ni Andres an iyo man sanang Parasalbar, an Mesiyas mismo! Naghidali si Pedro tanganing mamidbid man si Jesus.

Sagkod kan panahon na iyan, midbid si Pedro bilang Simon, o Simeon. Alagad si Jesus nagheling sa saiya asin nagsabi: “‘Ika si Simon na aki ni Juan; ika aapodon na Cefas’ (na trinadusir na Pedro).” (Juan 1:42) An “Cefas” sarong common noun na nangangahulogan na “gapo,” o “dakulang gapo.” Minalataw na may makahulang kahulogan an mga tataramon ni Jesus. Naheling nia antes pa na si Pedro magigin siring sa sarong dakulang gapo—marigon, makosog, asin masasarigan na impluwensia sa mga parasunod ni Cristo. Arog daw kaiyan an pagmansay ni Pedro sa saiyang sadiri? Garo bako. Dawa an nagkapirang nagbabasa ngonyan kan mga pagkasaysay sa Ebanghelyo mayong gayong naheheling na arog-gapong kualidad ki Pedro. Isinuherir nin nagkapira na sia garo baga bakong marigon, pabarobago, asin mapagduda.

May mga kaluyahan talaga si Pedro. Aram iyan ni Jesus. Alagad an pirmeng hinahanap ni Jesus, arog kan saiyang Ama na si Jehova, iyo an marahay na mga kualidad nin mga tawo. Naheling ni Jesus an dakulang potensial ni Pedro, asin hiningoa Niang tabangan sia na pataluboon an marahay na mga kualidad. Ngonyan, an hinahanap man ni Jehova asin kan saiyang Aki iyo an marahay na mga kualidad niato. Tibaad nasasakitan kitang maniwala na may maheheling sinda sa sato na dakol na marahay na kualidad. Minsan siring, kaipuhan na kita magtiwala sa pagmansay ninda asin patunayan niato na andam kitang sanayon asin moldehon arog ni Pedro.—1 Juan 3:19, 20.

“Dai Ka Na Matakot”

Posibleng marhay na inibanan ni Pedro si Jesus sa suminunod na kabtang kan biahe sa paghuhulit. Sa siring, posibleng naheling nia an kaenot-enoteng milagro ni Jesus, an paggibo nia sa tubig na magin arak sa punsion sa kasal sa Cana. An orog na mahalaga iyo na nadangog nia an makangangalas asin pano nin paglaom na mensahe ni Jesus manongod sa Kahadean nin Dios. Pero, sia naghale asin nagbalik sa saiyang negosyong paninira. Minsan siring, pakalihis nin nagkapirang bulan, si Jesus nakaolay giraray ni Pedro—asin sa panahon na ini si Pedro inagda ni Jesus na sumunod sa saiya nin bilog na panahon bilang paagi nin pamumuhay.

Nakaagwanta pa sana si Pedro sa nakakadesganar na trabaho sa banggi. Paorootrong itinaktak kan mga parasira an saindang mga hikot, alagad iyan mayo nin laog kan ihawas ninda. Siertong ginamit ni Pedro an gabos niang eksperyensia asin kakayahan tanganing makadakop nin sira, na nagpoprobar sa manlaenlaen na lugar sa danaw tanganing madiskobre kun saen nagkakakan an mga sira. Mayong duda na may mga panahon na minawot nia, arog nin dakol na parasira, na makaaninaw sia sa malibog na katubigan tanganing madiskobre an darakulang grupo nin mga sira o minsan paano mapalaog nia iyan sa saiyang mga hikot. Siempre, an siring na mga kaisipan orog sanang makakapadesganar sa saiya. Bako ining sarong apisyon para ki Pedro; may mga nagdedepende sa saiyang paninira. Sa katapustapusi, nagbalik sia sa may baybayon na mayong dakop na sira. Pero, kaipuhan na linigon an mga hikot. Sa siring, sia sibot na naglilinig kan si Jesus magdolok sa saiya.

Sarong kadaklan an nagtiripon sa palibot ni Jesus, na gustong-gustong hinanyogon an gabos na sinasabi nia. Huling napapalibotan ninda, suminakay si Jesus sa baroto ni Pedro asin sinabihan sia na tumahaw nin kadikit hale sa gilid nin baybayon. Huling malinaw nang madadangog an saiyang tingog,  tinokdoan ni Jesus an kadaklan. Si Pedro wilingwili sa paghinanyog, arog kan mga nasa may baybayon. Nungka siang nagsawa sa paghinanyog ki Jesus mantang tinotokar an pangenot na tema kan saiyang paghuhulit—an Kahadean nin Dios. Sarong pribilehio nanggad na tabangan an Cristo sa pagpalakop sa bilog na daga kan mensaheng ini nin paglaom! Alagad magigin praktikal daw iyan? Paano ninda masusustentohan an saindang sadiri? Tibaad nagirumdoman giraray ni Pedro an dakol na oras nin paninira sa banggi na mayong dakop na sira.—Lucas 5:1-3.

Kan matapos si Jesus sa pagtaram, sinabihan nia si Pedro: “Magduman ka sa hararom, asin itaktak nindo an saindong mga hikot tanganing makadakop kamo.” Pano nin pagduda si Pedro. Sia nagsabi: “Paratokdo, bilog na banggi kaming nagpagal asin mayong nakuang ano man, alagad huling sinabi mo itataktak ko an mga hikot.” Posibleng marhay na habo na kutana ni Pedro na itaktak giraray an mga hikot—nangorogna ngonyan huling tapos na nganing magkakan an mga sira! Pero, nagsunod sia, na posibleng marhay na nagsenyas sa saiyang kairiba na nasa saro pang baroto tanganing sumunod sa sainda.—Lucas 5:4, 5.

Kan binubutong na ni Pedro an mga hikot, nasorpresa sia sa gabat kaiyan. Huling dai makatubod, orog pa niang binutong iyan, asin dai nahaloy, naheling nin an dakolon nanggad na sira na nagpipirisikpisik sa laog kan hikot! Huling nataranta, pinaypay nia an mga lalaki sa saro pang baroto na magrani tanganing tumabang. Kan sinda nagtatabang na, naaraman ninda na dai kaya nin sarong baroto an gabos na sirang ini. Napano ninda an duwang baroto, asin dakolon pa man giraray nin sira—an mga baroto nagpoon nang lumubog huli sa gabat. Labi-labi an pagngalas ni Pedro. Aktuwal na nia kaidtong naheling an kapangyarihan ni Cristo, alagad nagkaigwa nanggad nin personal na epekto sa saiya an pangyayaring ini! Uya an sarong lalaki na kaya nganing palaogon an mga sira sa mga hikot! Natakot na si Pedro. Napaluhod sia asin nagsabi: “Rumayo ka sa sako, huli ta ako tawong makasalan, Kagurangnan.” Sia daw angay pang makaibaiba kan Saro na may autoridad na gamiton an mismong kapangyarihan nin Dios sa siring na mga paagi?—Lucas 5:6-9.

Si Jesus maboot na nagsabi: “Dai ka na matakot. Poon ngonyan an dadakopon mo mga tawong buhay.” (Lucas 5:10, 11) Bako ining panahon na magduda o matakot. Mayong basehan an mga pagduda ni Pedro manongod sa praktikal na mga bagay na siring baga sa paninira; mayo man nin basehan an mga pagkatakot nia manongod sa saiya mismong mga kaluyahan asin pagkukulang. Dakol pa an gigibohon ni Jesus, sarong ministeryo na mabago kan kasaysayan. Sia naglilingkod sa Dios na “bulaos na magpapatawad.” (Isaias 55:7) Aasikasohon ni Jehova an saindang mga pangangaipo, sa pisikal sagkod sa espirituwal.—Mateo 6:33.

 Tolos na naghimate si Pedro, arog ni Santiago asin Juan. “Idinuong ninda an mga baroto, saka binayaan an gabos na bagay asin nagsunod sa saiya.” (Lucas 5:11) Si Pedro nagtubod ki Jesus asin sa Saro na nagsugo sa saiya. Iyan an pinakamarahay na desisyon na nagibo nia. An mga Kristiano ngonyan na pinaglalabanan an saindang pagduda asin pagkatakot tanganing makapaglingkod sa Dios nagpapaheling man nin siring na pagtubod. Nungka kamong mapapasala sa siring na pagtiwala ki Jehova.—Salmo 22:4, 5.

“Taano ta Nagduwaduwa Ka?”

Mga duwang taon pagkatapos mamidbid si Jesus, si Pedro nagsagwan sa madoros na banggi sa Dagat nin Galilea na nasambit sa enotan. Siempre, dai ta aram kun ano an mga suminabong sa isip nia. Dakolon nanggad nin pagpipilian! Pinaomayan ni Jesus an panugangan na babae ni Pedro. Ipinahayag nia an Sermon sa Bukid. Paagi sa saiyang pagtotokdo asin makapangyarihan na mga gibo, paorootro niang ipinaheling na sia an Pinili ni Jehova, an Mesiyas. Sa paglihis nin dakol na bulan, siertong nainaan na minsan paano an mga kaluyahan ni Pedro, arog kan saiyang tendensia na magpadaog sa pagigin pabiglabigla huli sa pagkatakot asin pagduda. Pinili pa ngani ni Jesus si Pedro na magin saro sa 12 apostol! Pero, dai pa nahahale ni Pedro an pagkatakot asin pagduda, arog kan manonodan na nia.

Durante kan ikaapat na peryodo nin pagbantay kan bangging iyan, o mga poon alas 3 nin aga sagkod sa pagsirang kan saldang, si Pedro biglang puminondo sa pagsagwan asin tuminanos sa pagkatukaw. Duman—sa mga alon—may naghihiro! Iyan daw liwanag kan bulan na nababanaag sa mga alon? Bako, iyan pusog asin tanos na marhay. Iyan sarong tawo! Iyo, sarong tawo, asin sia naglalakaw sa ibabaw kan dagat! Mantang mas nagrarani an tawong iyan, sia garo baga pasiring sa sainda. Huli sa pagkatakot, an paghona kan mga disipulo iyan sarong klase nin aparisyon. An tawong iyan nagtaram: “Kosogan nindo an saindong boot, ako ini; dai kamo matakot.” Si Jesus idto!—Mateo 14:25-28.

Si Pedro nagsimbag: “Kagurangnan, kun ika iyan, pagbotan mo akong magdian sa saimo sa ibabaw kan katubigan.” Kan primero, ipinaheling nia na makosog an boot nia. Huling ogmahon sa daing kaagid na milagrong ini, hiningoa ni Pedro na orog pang patunayan an saiyang pagtubod. Gusto niang magin kabtang kan pangyayaring iyan. May kabootan na inapod sia ni Jesus. Buminaba sia sa may gilid kan baroto pasiring sa maalon na ibabaw kan dagat. Imahinara an namatean ni Pedro kan sia makatungtong asin makatindog sa ibabaw kan katubigan. Sia sierto nanggad na nagngalas na marhay mantang sia paparani ki Jesus. Minsan siring, dai nahaloy iba naman an reaksion nia.—Mateo 14:29.

Kinaipuhan ni Pedro na magdanay na nakaheling ki Jesus. Paagi sa paggamit ni Jesus kan kapangyarihan ni Jehova, napagdanay nia si Pedro sa  ibabaw kan mga alon. Asin ginibo iyan ni Jesus huli sa pagtubod ni Pedro sa saiya. Alagad nadisturbo si Pedro. Mababasa niato: “Kan maheling an bagyo nin doros, natakot sia.” Minasdan na marhay ni Pedro an mga alon na minahampak sa baroto, na nagtatapuyas asin nagsasabosabo huli sa doros, asin nataranta sia. Naimahinar nia gayod na naglulubog na sia sa danaw na iyan, na nalalamos na. Mantang nag-oorog an pagkatakot nia, nagluluya man an pagtubod nia. An lalaking iyan na inapod na Dakulang Gapo huli sa saiyang potensial na magin marigon nagpoon nang lumubog siring sa sarong gapo huli sa saiyang may pagdudang pagtubod. Si Pedro matibay na paralangoy, alagad ngonyan dai sia nagsarig sa kakayahan na iyan. Sia nagkurahaw: “Kagurangnan, ligtasan ako!” Kinapotan sia ni Jesus sa kamot asin binutong. Dangan, mantang nasa ibabaw pa kan tubig, idinoon nia an importanteng leksion na ini ki Pedro: “Ika na kakadikit an pagtubod, taano ta nagduduwaduwa ka?”—Mateo 14:30, 31.

‘Nagduduwaduwa’—angay nanggad na tataramon! An pagduda puedeng magin makosog asin nakakapahamak na puersa. Kun kita mapadaog dian, puede kaiyan na raoton an satong pagtubod asin magin dahelan na kita lumubog sa espirituwal. Kaipuhan nanggad niatong lumaban! Paano? Paagi sa pagpapadanay nin tamang pagkonsentrar. Kun an pigpaparaisip na sana niato iyo an mga kinakatakotan niato, nakakadesganar sa sato, nagpaparayo kan satong atension ki Jehova asin sa saiyang Aki, maorog an satong mga pagduda. Kun ikokonsentrar niato an satong atension ki Jehova asin sa saiyang Aki, sa saindang mga ginibo, ginigibo, asin gigibohon para sa mga namomoot sa sainda, dai kita magkakaigwa nin mga pagduda.

Mantang nagsusunod si Pedro ki Jesus pabalik sa baroto, naheling nia na nagkulpa na an bagyo. Nagtoninong an Dagat nin Galilea. Uminayon si Pedro sa mga kapwa nia disipulo na ipinapahayag, “Tunay nanggad na ika an Aki nin Dios.” (Mateo 14:33) Mantang mag-aagahon na sa danaw, siertong nagpasalamat na marhay si Pedro. Mayo na sia nin pagduda asin pagkatakot. Totoo, dakol pang pagbabago an kaipuhan niang gibohon bago sia magin arog-gapong Kristiano na patienot nang naheling sa saiya ni Jesus. Alagad determinado siang padagos na magmaigot asin mag-oswag. Igwa daw kamo nin siring na determinasyon? Sierto nanggad na magigin kapakipakinabang para sa saindo na arogon an pagtubod ni Pedro.

[Ritrato sa pahina 22, 23]

Naheling ni Jesus an dakulang potensial sa mapakumbabang parasirang ini

[Ritrato sa pahina 23]

“Ako makasalan na tawo, Kagurangnan”

[Ritrato sa pahina 24, 25]

“Kan maheling an bagyo nin doros, natakot sia”