Rumani sa Dios

Sarong Hokom na Pirmeng Ginigibo an Tama

Genesis 18:22-32

HUSTISYA. Pagigin makatanosan. Dai pagpaorog. Dai daw kamo naaakit sa siring na nobleng mga kualidad? May natural na pangangaipo kitang mga tawo na trataron nin may katanosan. Makamomondo, sa parate nagigin masakit na kamtan an hustisya sa kinaban ngonyan. Minsan siring, may Hokom na maninigo sa pagtitiwala niato​—si Jehova Dios. Pirme niang ginigibo an tama. Lininaw ini sa sarong pag-oolay ni Jehova asin ni Abraham, na nakasurat sa Genesis 18:22-32. *

Kan sabihon ni Jehova ki Abraham an desisyon Nia na imbestigaran an mga kamugtakan sa Sodoma asin Gomorra, natakot si Abraham para sa kaligtasan nin siisay man na matanos na nakaistar duman, kaiba na an saiyang sobrinong si Lot. Si Abraham nakimaherak ki Jehova: ‘Ano talagang paparaon mo an matanos kadamay kan maraot? Ipamugtak ta baga na igwa nin singkuentang matanos sa tahaw kan siudad. Kun siring, dai mo daw papatawadon an lugar huli sa singkuentang matanos na nasa laog kaiyan?’ (Bersikulo 23, 24) Sinabi nin Dios na dai nia lalaglagon an mga siudad kun igwa nin dawa 50 matanos na tawo duman. Nakimaherak si Abraham ki Jehova nin lima pang beses, na padikitdikit na iniinaan an bilang sagkod na nagin sampulo. Sa kada pakimaherak nia, an Dios nagsabi na dai nia lalaglagon an mga siudad kun arog kaiyan kadakol an matanos na tawo duman.

Nakikidiskutiran daw si Abraham sa Dios? Dai nanggad! Pagpaheling kutana iyan nin grabeng pagkaarogante. An tono kan pagtaram ni Abraham nagpaheling nin angay na may pagsambang paggalang asin kapakumbabaan. Inapod nia an sadiri nia na “kabokabo asin abo” sana. Apat na beses siang magalang na nagsabi nin “tabi.” (Bersikulo 27, 30-32) Dugang pa, ipinapaheling kan mga tataramon ni Abraham an saiyang kompiansa sa pagigin makatanosan ni Jehova. An ideya na lalaglagon nin Dios an mga matanos kaiba kan mga maraot ‘dai nia lamang pinaghona,’ an sabi ni Abraham​—bako sanang sarong beses kundi duwang beses. Sinabi kan maimbod na patriarka an saiyang pananarig na “magibo kan tama an Hokom sa bilog na daga.”​—Bersikulo 25.

Tama daw si Abraham sa mga sinabi nia? Tama asin sala. Sala sia sa pag-isip na igwa nin kisiera sampulong matanos na tawo sa Sodoma asin Gomorra. Alagad tama nanggad sia sa pagsabi na dai noarin man “paparaon [nin Dios] an matanos kadamay kan maraot.” Sa huri, kan linaglag nin Dios an maraot na mga siudad na iyan, nakaligtas an matanos na si Lot asin an duwa niang aking babae sa tabang nin mga anghel.​—2 Pedro 2:7-9.

Ano an itinotokdo sa sato manongod ki Jehova kan salaysay na ini? Paagi sa pagsabi ki Abraham kan intension Nia na imbestigaran an mga siudad, garo man sana inaagda sia ni Jehova na makipag-olay sa Saiya. Dangan mapasensia siang naghinanyog mantang ipinapahayag kan katood niang si Abraham an mga kahaditan sa saiyang puso. (Isaias 41:8) Magayon nanggad na itinotokdo kaini sa sato na si Jehova sarong mapakumbabang Dios, na nagtatao nin dignidad asin onra sa saiyang mga lingkod digdi sa daga! Malinaw nanggad, yaon sa sato an gabos na dahelan na lubos na magtiwala ki Jehova, an Hokom na pirmeng ginigibo an tama.

[Nota sa Ibaba]

[Ritrato sa pahina 24]

Nakimaherak si Abraham ki Jehova mapadapit sa Sodoma asin Gomorra