AN IRIBANG pagkakan sa lamesa ni Jehova saro nanggad na maugmang okasyon. Pag an banwaan nin Diyos nagtitiripon para sa sarong espirituwal na handaan, nakakadagdag pa sa kaugmahan an iribang pagkakan nin literal na kakanon.

Kan Setyembre 1919, nagkaigwa nin walong-aldaw na kumbensiyon sa Cedar Point, Ohio, U.S.A. an mga Estudyante sa Bibliya. Mga hotel an magigin dagusan asin mapakakan sa mga delegado, pero mas dakul nin pirang ribo kisa sa inaasahan ninda an nag-abot. Huli sa kadakulan kan kaipuhan pagserbihan, sabay-sabay na suminuko an mga waiter asin waitress. Huling dai na aram an gigibuhon, an manager sa cafeteria kan hotel naghapot kun igwa nin hoben na mga delegado na puwedeng makatabang, asin dakul an nagboluntaryo. Saro sa sainda si Sadie Green. “First time ko idto na mag-waitress,” an sabi niya, “pero nakakaugma.”

Kan suminunod na mga taon, nagkaigwa na nin cafeteria sa mga kumbensiyon na nagbukas nin oportunidad sa dakul na boluntaryo na maugmang maglingkod sa saindang mga tugang. An pagtrabahong iyan kaiba kan mga kapagtubod nakatabang man sa mga hoben na magkaigwa nin mga pasuhan sa espirituwal. Naglingkod sa cafeteria si Gladys Bolton sa sarong kumbensiyon kan 1937. “May mga nabisto akong hali sa ibang mga lugar,” an istorya niya, “naaraman ko kun paano ninda kinaya an mga problema ninda. Kaidto ko inot na ginustong magpayunir.”

Si Beulah Covey na sarong delegado sa kumbensiyon, nagsabi: “Dedikado an mga boluntaryo kaya nagin areglado an gabos.” Pero may mga nagin problema man. Kan 1969, pag-abot ni Angelo Manera sa Dodger Stadium sa Los Angeles, California, saka sana niya naaraman na siya an magigin cafeteria servant. An sabi niya, “Nabigla talaga akong maray!” Kaiba sa preparasyon para sa kumbensiyon na iyan an pagkali nin 400 metros na paglalatagan kan linya nin gas pasiring sa kusina!

Sa Sierra Leone kan 1982, bago magtugdok nin cafeteria gamit an mga materyales na igwa sinda, kinaipuhan na hawanan nguna kan mahihigos na mga boluntaryo an lugar na pagtutugdukan. Sa Frankfurt, Germany, kan 1951, nag-arkila an maabilidad na mga tugang nin steam locomotive tanganing painiton paagi kan sangaw kaiyan an 40 darakulang lutuan. Nakakapagserbi  an mga boluntaryo nin 30,000 na pagkakan kada oras. Tanganing mabawasan an trabaho kan 576 na boluntaryo sa departamento nin paghugas, nagdara nin kanya-kanyang kubyertos an mga delegado. Sa Yangon, Myanmar, dikit na sili sana an ilinalaag kan mga paraluto sa mga pagkakan kan mga delegado na taga ibang nasyon.

Nagin bendisyon para ki Annie Poggensee an pagpila nin halawig sa cafeteria dawa mainit an saldang sa sarong kumbensiyon sa Estados Unidos kan 1950. Sinabi niya: “Nawili ako kadadangog sa nakakaugmang pag-uulay nin duwang sister na kakabiyahe pa sana sa barko haling Europa.” Inistorya ninda sa kada saro kun paano sinda tinabangan ni Jehova na makaatender. “Mayo na gayod nin iba pa duman na mas maugma pa kisa sa duwang idto,” an sabi ni Annie. “Mayo sana sa sainda an oras na hinalat ninda sa pila saka an init kan saldang.”

Sa dakul na darakulang kumbensiyon, naggigibo nin darakulang tolda para sa cafeteria na igwa nin mga haralangkaw na lamesa. Nakatindog asin dai naghahaloy an makarakan diyan para makakakan man tulos an iba. Ano pa man an epektibong paagi tanganing makapangudto an rinibong nag-atender? Sarong bakong Saksi an nagsabi: “Kakaiba an relihiyon na iyan. Nakatindog sinda kun magkakan.”

Nagngalas an mga awtoridad sa militar asin gobyerno sa pagigin epektibo asin organisado kan satong mga cafeteria. Pagkatapos na inspeksiyunon nin sarong nasa United States Army an satong cafeteria sa Yankee Stadium sa New York City, dinagka niya si Major Faulkner kan British War Department na inspeksiyunon man iyan. Kaya, kaiba an saiyang agom, nagduman ini sa “Triumphant Kingdom” Assembly kan 1955 sa Twickenham, England. Uyon sa saiya, nahiling niyang pagkamuot an nagpapadalagan sa cafeteria.

Sa laog nin dakul na dekada, may pagkamuot na nagseserbi an mga boluntaryo nin masustansiya asin baratong mga pagkakan para sa mga nag-atender sa kumbensiyon. Pero parating kaipuhan kan dakul na boluntaryo nin halawig na oras para sa dakulaon na trabahong ini, kaya dai sinda nakikinabang sa nagkapira o sa gabos na programa pa ngani. Sa huring mga taon kan dekada nin 1970, pinasimple an mga areglo sa kakanon sa kumbensiyon sa dakul na lugar. Dangan puon kan 1995, hinagad sa mga delegado na magbalon nin kanya-kanyang kakanon sa mga kumbensiyon. Huli kaini, an mga dating nagboboluntaryo sa cafeteria makikinabang na sa espirituwal na programa asin pakikiasosyar sa mga kapwa Kristiyano. *

Pinapahalagahan nanggad ni Jehova an mga nagmamaigot na maglingkod sa mga kapagtubod ninda! Tibaad hinahanap-hanap pa kan iba an nakakaugmang mga aldaw na naglilingkod sinda sa cafeteria. Pero sarong bagay an sigurado: Pagkamuot pa man giraray an panginot na sangkap sa satong mga kumbensiyon.—Juan 13:34, 35.