1, 2. (a) Anong mga ilustrasyon an ipinakipag-ulay ni Jesus sa saiyang dayupot na mga kaiba-iba? (Hilingon an ritrato sa itaas.) (b) Ano an kaipuhan tang maaraman sa ilustrasyon dapit sa mga karnero asin mga kanding?

KINAKAULAY ni Jesus si Pedro, Andres, Santiago, asin Juan na dayupot na mga kaiba-iba niya. Katatapos pa sana nindang madangog an saiyang mga ilustrasyon dapit sa maimbod asin mapagmansay na uripon, sampulong daraga, asin mga talento. Tinapos ni Jesus an pakikipag-ulay niya sa sainda paagi sa saro pang parabula. Sinambit niya an sarong panahon na ‘an Aki nin tawo’ mahukom sa ‘gabos na nasyon.’ Siguradong nagin interesado an saiyang mga disipulo sa ilustrasyon na ini! Sa ilustrasyon na ini, nagpokus si Jesus sa duwang grupo, an grupo nin mga karnero asin grupo nin mga kanding. Asin idinuon niya an sarong importanteng ikatulong grupo na inapod niyang ‘mga tugang kan Hadi.’—Basahon an Mateo 25:31-46.

² Haloy nang interesado an banwaan ni Jehova sa ilustrasyon na ini asin tama sana iyan huling sinasabi ni Jesus sa ilustrasyon an dapit sa kaaabtan kan mga tawo. Ihinayag niya kun taano ta may mga magkakamit nin buhay na daing katapusan mantang an iba pupuhuon  sagkod lamang. An satong buhay nakadepende sa satong pakasabot sa mga katotoohan na ihinayag ni Jesus asin paghiro kauyon diyan. Huling buhay an nakataya, dapat tang ihapot: Paano ni Jehova luway-luway na lininaw an pakasabot niyato dapit sa ilustrasyon na ini? Taano ta masasabi niyato na idinuduon kan ilustrasyon an kahalagahan kan paghuhulit? Siisay an isinugo na maghulit? Asin taano ta ngunyan na an panahon na magin maimbod sa ‘Hadi’ asin sa mga inaapod niyang ‘mga tugang ko’?

3, 4. (a) Anong panginot na mga bagay an dapat tang maaraman tanganing masabutan an ilustrasyon dapit sa mga karnero asin mga kanding? (b) Kan 1881, paano ipinaliwanag kan Zion’s Watch Tower an ilustrasyon na ini?

³ Tanganing masabutan nin tama an ilustrasyon dapit sa mga karnero asin mga kanding, kaipuhan na maaraman ta an tulong panginot na bagay sa istorya: kun sairisay an mga binanggit diyan, an panahon na mangyayari an paghukom, asin an basehan tanganing ibilang an saro na karnero o kanding.

⁴ Kan 1881, sinabi kan Zion’s Watch Tower na ‘an Aki nin tawo,’ na inaapod man na ‘an Hadi,’ iyo si Jesus. An pakasabot kan inot na Mga Estudyante sa Bibliya sa mga tataramon sa King James Version na “sakuyang mga tugang” iyo na nanunungod ini sa mga mamamahala kaiba ni Cristo saka sa bilog na katawuhan kun magin mga perpekto na ini digdi sa daga. Iniisip ninda na an pagsuway-suway o pagbulag-bulag kan mga karnero sa mga kanding mangyayari durante kan Sangribong Taon na Paghadi ni Cristo. Asin naniniwala sinda na an mga tawo ikaklasipikar na mga karnero kun namumuhay sinda kauyon kan ley nin Diyos dapit sa pagkamuot.

5. Kan mga dekada nin 1920, paano nabago an satong pakasabot?

⁵ Sa inot na mga taon kan dekada nin 1920, tinabangan ni Jehova an saiyang banwaan na baguhon an pakasabot sa ilustrasyon na ini. Kinumpirmar kan An Torrengbantayan na Oktubre 15, 1923, na ‘an Aki nin tawo’ iyo si Jesus. Pero, nagtao iyan nin marahay na mga argumento suno sa Kasuratan kun siisay an mga tugang ni Cristo. Sinabi kaiyan na sinda iyo sana idtong makakaibanan ni Jesus na mamamahala sa langit. Sinabi man kaiyan na an mga karnero iyo an mga may paglaom na mabuhay sa daga sa irarom kan pamamahala kan Kahadian ni Cristo. Pero nuarin an panahon na pagsusuwayon an mga karnero sa mga kanding? Sinabi kan artikulo na an mga tugang ni Cristo mamamahala kaiba niya sa langit durante kan Milenyal na Paghadi, kaya dai sinda puwedeng matabangan o mapabayaan kan daganon na grupo. Kaya, an pagsuway-suway kan mga karnero sa mga kanding mangyayari bago magpuon an Milenyal na Paghadi. Kun mapadapit sa basehan tanganing ibilang an sarong tawo na karnero, sinabi kan artikulo na huhukuman an mga tawo bilang mga karnero kun minimidbid ninda si Jesus bilang saindang Kagurangnan asin naglalaom sinda na an Kahadian an matao nin mas marahay na mga kamugtakan.

6. Kan dekada nin 1990, paano urog pang lininaw an satong pakasabot?

⁶ Huli sa bagong pakasabot na iyan, inisip kan banwaan ni Jehova na hinuhukuman na an mga indibidwal bilang mga karnero o kanding sa bilog na pagtatapos kan sistema nin mga bagay, depende sa reaksiyon ninda sa mensahe kan Kahadian. Pero sa kabangaan kan dekada nin 1990, lininaw an satong pakasabot. Sinabi sa duwang artikulo kan Oktubre 15, 1995 isyu kan An Torrengbantayan an pagkakaagid kan mga tataramon ni Jesus sa Mateo 24:29-31 (basahon) asin sa Mateo 25:31, 32. (Basahon.) * Ano an nagin kongklusyon? Ini an sinabi kan inot na artikulo: “An paghukom sa mga karnero asin kanding sa  ngapit pa.” Nuarin iyan eksaktong mangyayari? “Iyan mangyayari pagkatapos na pumutok an ‘kahurasaan’ na nasambitan sa Mateo 24:29, 30 asin ‘dumatong na sa saiyang kamurawayan’ an Aki nin tawo. . . . Dangan, mantang nasa katapusan na an bilog na maraot na palakaw, si Jesus matukaw sa hukuman asin maghuhukom.”

7. Ano an malinaw ta nang nasasabutan ngunyan?

⁷ Ngunyan, malinaw ta nang nasasabutan an ilustrasyon dapit sa mga karnero asin mga kanding. Mapadapit sa kun siisay an mga binanggit diyan, si Jesus iyo an ‘Aki nin tawo,’ an Hadi. Idtong mga inaapod na ‘mga tugang ko’ iyo an mga lalaki asin babayi na linahidan nin espiritu, na mamamahala kaiba ni Cristo sa langit. (Roma 8:16, 17) An ‘mga karnero’ asin ‘mga kanding’ nagrerepresentar sa mga indibidwal hali sa gabos na nasyon. Dai sinda linahidan kan banal na espiritu. Pero, nuarin an panahon na mangyayari an paghukom? An paghukom na ini mangyayari sa pagtatapos kan dakulang kahurasaan na haranihon na. Asin ano an basehan tanganing hukuman an saro bilang karnero o kanding? Iyan basado sa kun paano ninda trinatar an linahidan nin espiritung mga tugang ni Cristo na natatada pa sa daga. Huling haranihon na an katapusan kan sistemang ini, nagpapasalamat nanggad kita na luway-luway na linilinaw sa sato ni Jehova an ilustrasyon na ini asin an konektadong mga ilustrasyon kaini na nasa Mateo kapitulo 24 asin 25!

8, 9. Taano ta sinabing “matanos” an mga karnero?

⁸ Sa ilustrasyon dapit sa mga karnero asin mga kanding, dai direktang sinabi ni Jesus an paghuhulit. Kaya, taano ta masasabing idinuduon kaini an kahalagahan nin paghuhulit?

⁹ Inot, mangnuhon na nagtutukdo si Jesus paagi sa sarong ilustrasyon. Malinaw na an sinasabi niya bakong pagsuway-suway kan literal na mga karnero sa literal na mga kanding. Kaagid kaiyan, dai man niya sinasabi na an kada indibidwal na huhukuman bilang karnero dapat literal na pakakanon, baduan, atamanon, o dalawon an saro sa saiyang mga tugang sa bilangguan. Imbes, ilinaladawan niya an kabuutan na ipinapahiling kan piguratibong mga karnero sa saiyang mga tugang. Sinabi niyang “matanos” an mga karnero huling minimidbid ninda na igwa si Cristo nin sarong grupo nin linahidan na mga tugang na yaon pa sa daga, asin na maimbod na sinusuportaran kan mga karnero an mga linahidan sa delikadong huring mga aldaw na ini.—Mat. 10:40-42; 25:40, 46; 2 Tim. 3:1-5.

10. Paano maipapahiling kan mga karnero an kabuutan sa mga tugang ni Cristo?

¹⁰ Ikaduwa, pag-isipan an konteksto kan mga sinabi ni Jesus. Ipinapakipag-ulay niya an tanda kan saiyang presensiya asin an pagtatapos kan sistema nin mga bagay. (Mat. 24:3) Sa kapinunan kan saiyang pakikipag-ulay, sinabi ni Jesus an dapit sa sarong pambihirang kabtang kan tanda—‘ihuhulit sa bilog na iniirukan na daga’ an maugmang bareta kan Kahadian. (Mat. 24:14) Asin bago niya ipinakipag-ulay an dapit sa mga karnero asin mga kanding, isinaysay niya an ilustrasyon dapit sa mga talento. Arog kan ipinaliwanag sa nainot na artikulo, itinao ni Jesus an ilustrasyon na ini tanganing iduon sa saiyang linahidan na mga disipulo, an saiyang mga “tugang,” na kaipuhan nindang magin maigot sa paghuhulit. Pero, dakulaon na gibuhon an mapapaatubang sa dikit na linahidan na natatada pa sa daga sa panahon kan presensiya ni Jesus—an paghuhulit sa ‘gabos na nasyon’ bago mag-abot an katapusan. An ilustrasyon dapit sa mga karnero asin mga kanding nagpapahiling na may matabang sa mga linahidan. Kaya, an saro sa panginot na mga paagi na maipapahiling kan mga huhukuman bilang mga karnero an kabuutan sa mga tugang ni Cristo iyo an pagsuportar sa sainda sa paghuhulit. Pero, ano an kalabot sa pagtao kan suportang iyan? Materyal asin emosyonal na suporta sana daw, o urog pa an kaipuhan?

11. Anong hapot an puwedeng lumataw, asin taano?

¹¹ Ngunyan, an kadaklan sa walong milyon na disipulo ni Jesus bakong mga linahidan nin espiritu. Dai sinda nag-ako kan mga talento na itinao ni Jesus sa saiyang linahidan na mga uripon. (Mat. 25:14-18) Kaya puwedeng lumataw an hapot na, ‘An sugo daw na maghulit talagang aplikado man sa mga dai linahidan kan banal na espiritu?’ Pag-isipan an pira sana sa mga dahilan kun taano ta iyo an simbag sa hapot na iyan.

12. Ano an manunudan ta sa mga sinabi ni Jesus na nasa Mateo 28:19, 20?

¹² Ipinagbuot ni Jesus sa gabos na disipulo niya na maghulit. Pagkatapos na buhayon liwat si Jesus, sinabihan niya an saiyang mga parasunod na gumibo nin mga disipulo, na tinutukduan an mga ini na utubon “an gabos na bagay” na ipinagbuot niya. Kaiba sa mga pagbuot na iyan an sugo na maghulit. (Basahon an Mateo 28:19, 20.) Kaya, dapat na maghulit an gabos na disipulo ni Cristo, baga man an paglaom ninda mamahala sa langit o mabuhay digdi sa daga.—Gui. 10:42.

13. Ano an ipinaparisa kan bisyon na nahiling ni Juan, asin taano?

¹³ Ipinaparisa kan libro nin Kapahayagan na an paghuhulit parehong gigibuhon kan mga linahidan asin kan iba pa. Tinawan ni Jesus si apostol Juan nin bisyon na diyan ‘an nobya’—an 144,000 na linahidan na mga tawo na mamamahala kaiba ni Cristo sa langit—dinadagka an mga tawo na ‘uminom kan tubig nin buhay na daing bayad.’ (Kap. 14:1, 3; 22:17) An simbolikong tubig na iyan nagrerepresentar sa mga probisyon ni Jehova tanganing iligtas an katawuhan sa kasalan asin kagadanan basado sa atang na pantubos ni Cristo. (Mat. 20:28; Juan 3:16; 1 Juan 4:9, 10) An pantubos an pinakasentro kan mensahe na ihinuhulit ta, asin an mga linahidan an nanginginot sa pagtabang sa mga tawo na makanuod asin makinabang diyan. (1 Cor. 1:23) Pero sa bisyon, nahiling ni Juan an iba pa, na dai kabilang sa grupong  nobya. Sinabihan man sinda na magsabing, ‘Madya!’ Nagsunod sinda asin dinagka an iba na uminom kan tubig nin buhay. An ikaduwang grupong ini iyo an mga may paglaom na mabuhay digdi sa daga. Kaya, malinaw na ipinapahiling kan bisyon na ini na an gabos na nag-ako kan pagdagka na ‘madya’ igwa nin paninimbagan na maghulit sa iba.

14. Ano an kalabot sa pagsunod sa ‘katugunan ni Cristo’?

¹⁴ An gabos na sakop kan ‘katugunan ni Cristo’ dapat na maghulit. (Gal. 6:2) Si Jehova mayo nin dobleng pamantayan. Halimbawa, sinabihan niya an mga Israelita: ‘Saro sanang tugon an pagkukuyugon kan taga digdi asin bakong taga digdi na nakikihimanwa sa saindo.’ (Ex. 12:49; Lev. 24:22) Dai sakop kan Katugunan ni Moises an mga Kristiyano. Pero gabos kita sakop kan ‘katugunan ni Cristo,’ linahidan man kita o dai. Kaiba sa katugunan na iyan an gabos na itinukdo ni Jesus. An panginot sa mga katukduan ni Jesus iyo na dapat magpahiling nin pagkamuot an saiyang mga parasunod. (Juan 13:35; Sant. 2:8) Asin an saro sa panginot na mga paagi na ipinapahiling ta an pagkamuot sa Diyos, ki Cristo, asin sa satong kapwa iyo an paghuhulit kan maugmang bareta kan Kahadian.—Juan 15:10; Gui. 1:8.

15. Taano ta masasabing an pagbuot ni Jesus aplikado sa gabos na parasunod niya?

¹⁵ An sinabi ni Jesus sa sarong sadit na grupo puwedeng aplikado sa mas dakulang grupo. Halimbawa, nakipagtipan si Jesus para sa sarong Kahadian sa 11 disipulo sana, pero an tipan na iyan talagang aplikado sa bilog na 144,000. (Luc. 22:29, 30; Kap. 5:10; 7:4-8) Kaagid kaiyan, medyo dikit sana sa saiyang mga parasunod an isinugo ni Jesus na maghulit—an mga pinahilingan niya kan siya binuhay liwat. (Gui. 10:40-42; 1 Cor. 15:6) Pero aram kan gabos na maimbod na disipulo niya kan inot na siglo na aplikado sa sainda an pagbuot na iyan, dawa dai ninda personal na nakaulay si Jesus. (Gui. 8:4; 1 Ped. 1:8) Siring man ngunyan, dai personal na nakaulay ni Jesus an siisay man sa walong milyon na aktibong parahulit kan Kahadian. Pero aram ninda gabos an obligasyon ninda na magtubod ki Cristo asin ipahayag an pagtubod na iyan paagi sa gibuhon na pagpapatotoo.—Sant. 2:18.

16-18. Paano masusuportaran kan mga puwedeng mapabilang sa mga karnero an mga tugang ni Cristo, asin taano ta dapat na gibuhon na ninda iyan ngunyan?

¹⁶ Nakikipaglaban si Satanas sa mga natatadang linahidan nin espiritung mga tugang ni Cristo digdi sa daga, asin lalo pa niyang papakusugon an saiyang pagsalakay mantang paubos na an natatadang ‘kadikit na sanang panahon’ niya. (Kap. 12:9, 12, 17) Dawa ngani kaipuhan na magtagal nin grabeng pagbalo an mga linahidan, pinanginginutan ninda an pinakamahiwas na kampanya nin paghuhulit sa kasaysayan. Mayong duda na kaiba ninda si Jesus, na ginigiyahan an mga paghihinguwa ninda.—Mat. 28:20.

¹⁷ Para sa nagdadakul na puwedeng mapabilang sa mga karnero, sarong pribilehiyo na suportaran an mga tugang ni Cristo bako sana sa paghuhulit kundi sa iba pang praktikal na mga paagi. Halimbawa, nagtatao sinda nin mga donasyon asin nagtatabang sa pagtugdok nin mga Kingdom Hall, Assembly Hall, asin mga pasilidad kan sangang opisina, saka may kaimbudan nindang sinusunod an mga ninombrahan kan “maimbod asin mapagmansay na uripon” na manginot.—Mat. 24:45-47, NW; Heb. 13:17.

¹⁸ Dai mahahaloy, bubutasan na kan mga anghel an mapanglaglag na mga duros kan dakulang kahurasaan. Mangyayari ini kun an gabos na tugang ni Cristo na natatada pa sa daga mag-ako na kan pangultimong pagtatak sa sainda. (Kap. 7:1-3) Bago magpuon an Armagedon, dadarahon sa langit an mga linahidan. (Mat. 13:41-43) Kaya, para sa mga naglalaom na mahukuman bilang mga karnero, ngunyan na an panahon na maimbod na suportaran an mga tugang ni Cristo.