Kan inot na siglo C.E., sinabi ni Pablo sa mga elder sa kongregasyon sa Efeso: “Tawan nindo nin atensiyon an saindong sadiri asin an bilog na aripumpon, na sa tahaw kaiyan kamo ninombrahan kan banal na espiritu bilang mga paraataman, na pasturan an kongregasyon nin Diyos, na saiyang binakal paagi sa dugo kan saiyang sadiring Aki.” (Gibo 20:28, NW) Ano an papel kan banal na espiritu sa pagnombra nin mga elder asin ministeryal na lingkod ngunyan?

Inot, pinahiro kan banal na espiritu an mga kagsurat kan Bibliya na isurat an mga kuwalipikasyon para sa mga elder asin ministeryal na lingkod. An 16 na kahagadan para sa mga elder yaon sa 1 Timoteo 3:1-7. An iba pang kuwalipikasyon nasa Tito 1:5-9 asin Santiago 3:17, 18. Sinabi man sa 1 Timoteo 3:8-10, 12, 13 an mga kuwalipikasyon para sa mga ministeryal na lingkod. Ikaduwa, espesipikong ipinapamibi kan mga nagrerekomendar asin nagnonombra na giyahan sinda kan espiritu ni Jehova mantang ineebalwar ninda kun baga naaabot kan brother sa rasonableng paagi an mga kuwalipikasyon na itinatao kan Kasuratan. Ikatulo, kaipuhan na ipahiling kan irinerekomendar na brother an bunga kan banal na espiritu nin Diyos sa saiyang buhay. (Gal. 5:22, 23) Kaya kalabot an banal na espiritu sa gabos na aspekto kan proseso nin pagnombra.

Pero siisay talaga an nagnonombra sa sainda? Kaidto, ipinapadara sa sangang opisina an gabos na rekomendasyon para sa pagnombra nin mga elder asin ministeryal na lingkod. May mga brother diyan na ninombrahan kan Namamahalang Grupo na magrepaso kan mga rekomendasyon asin gumibo nin angay na pagnombra. Sunod, ipapaaram iyan kan sangang opisina sa grupo nin kamagurangan. Dangan, sasabihon kan mga elder sa bagong nombrahan na mga brother an pagnombra sa sainda saka hahaputon sinda kun gusto ninda asin kun talagang kuwalipikado sindang akuon an asignasyon. Ultimo, ipapaisi iyan sa kongregasyon.

Pero paano ginigibo an siring na pagnombra kan inot na siglo? Kun beses, may ninonombrahan an mga apostol para sa espesipikong mga asignasyon, arog kaidtong ninombrahan ninda an pitong lalaki tanganing asikasuhon an aroaldaw na pagdistribwir nin kakanon sa mga babaying balo. (Gui. 6:1-6) Pero posibleng dati nang mga elder an mga lalaking idto bago pa sinda tinawan nin dagdag na asignasyon.

Dawa ngani bakong detalyadong sinasabi kan Kasuratan kun paano ginigibo an kada pagnombra kaidto, may mga mababasa kita na matao sa sato nin ideya kun paano iyan ginigibo. Mababasa ta na kan papuli na si Pablo asin Bernabe hali sa inot nindang  pagbiyahe bilang mga misyonero, “nagnombra sinda nin kamagurangan para sa sainda sa lambang kongregasyon, na namimibi na may pag-ayuno, asin ipinagkatiwala ninda sinda ki Jehova, na sa saiya nagturubod sinda.” (Gibo 14:23, NW) Pakalihis nin pirang taon, nagsurat si Pablo sa kaiba-iba niya sa pagbiyahe na si Tito: ‘Iwinalat taka sa Creta tanganing husayon mo an mga bagay na nagkukulang, asin [magnombra] ka nin kamagurangan sa lambang banwaan, siring sa ipinagbuot ko saimo.’ (Tito 1:5) Kaagid kaiyan, minalataw na tinawan man kan siring na awtoridad si Timoteo na nakaibanan ni apostol Pablo sa dakul na pagbiyahe. (1 Tim. 5:22) Kaya malinaw nanggad na an mga pagnombrang ini ginibo kan nagbibiyaheng mga paraataman, bako kan mga apostol asin kamagurangan na lalaki sa Jerusalem.

Nasa isip an arugan na ini sa Bibliya, binago kan Namamahalang Grupo kan Mga Saksi ni Jehova an paagi nin pagnombra sa mga elder asin ministeryal na lingkod. Puon Setyembre 1, 2014, arog na kaini an paagi nin pagnombra: Maingat na rerepasuhon kan kada paraataman nin sirkito an mga rekomendasyon sa saiyang sirkito. Sa pagdalaw niya sa mga kongregasyon, hihinguwahon niyang mamidbid an mga irinerekomendar asin kun posible iibanan sinda sa ministeryo. Pagkatapos na ipakipag-ulay sa lokal na grupo nin kamagurangan an mga rekomendasyon, an paraataman nin sirkito an may paninimbagan na magnombra nin mga elder asin ministeryal na lingkod sa mga kongregasyon sa sirkito niya. An paaging ini mas harani sa areglo nin pagnombra kan inot na siglo.

Sairisay an kalabot sa prosesong ini? Arog kan dati, “an maimbod asin mapagmansay na uripon” an may panginot na paninimbagan na magpakakan sa mga lingkod sa harong. (Mat. 24:45-47, NW) Kaiba digdi an pagsiyasat sa Kasuratan, sa tabang kan banal na espiritu, tanganing magtao nin paggiya kun paano praktikal na iaaplikar an mga prinsipyo sa Bibliya na may koneksiyon sa pag-organisar kan pambilog na kinaban na kongregasyon. An maimbod na uripon man an nagnonombra sa gabos na paraataman nin sirkito asin mga miyembro kan Branch Committee. An kada sangang opisina nagtatao man nin praktikal na tabang sa pagpautob kan itinaong mga instruksiyon. An lambang grupo nin kamagurangan may magabat na paninimbagan na lubos na ebalwaron an maka-Kasuratan na mga kuwalipikasyon kan mga brother na irinerekomendar na nombrahan sa kongregasyon nin Diyos. An lambang paraataman nin sirkito may seryosong paninimbagan na maingat asin may pagpamibi na pag-adalan an mga rekomendasyon kan mga elder dangan nombrahan an makukuwalipikar na mga brother.

Kun nasasabutan ta kun paano ginigibo an mga pagnombra, mas lubos tang napapahalagahan an papel kan banal na espiritu sa prosesong ini. Huli kaiyan, mas magkakaigwa kita nin tiwala asin respeto sa mga ninombrahan sa Kristiyanong kongregasyon.—Heb. 13:7, 17.

Sinasabi kan Kapahayagan 11:3 an dapit sa duwang saksi na mahula sa laog nin 1,260 aldaw. Dangan sinabi kan pagkasaysay na ‘dadaugon sinda, patin gagadanon sinda’ kan mabangis na hayop. Pero pakalihis nin ‘tulong aldaw may kabanga,’ an duwang saksing ini bubuhayon liwat, na ikakangalas na marhay kan mga nagmamasid.—Kap. 11:7, 11.

Siisay an duwang saksing ini? Makakatabang sa sato an mga detalye kan pagkasaysay na maaraman kun siisay sinda. Inot, naaraman ta na sinda ‘iyo an duwang kahoy nin olibo asin an duwang kandelero.’ (Kap. 11:4) Ipinapagirumdom kaini sa sato an kandelero asin an duwang puon nin olibo na yaon sa hula ni Zacarias. An duwang olibong idto sinasabing naglaladawan sa ‘duwang lalaking linahidan,’ si Gobernador Zerubabel asin an Halangkaw na Saserdoteng si Josue, na ‘nagtitindog [kataid] kan Kagurangnan kan bilog na daga.’ (Zac. 4:1-3, 14) Ikaduwa, sinasabi man na an duwang saksing ini naggigibo nin mga tanda na kaagid kan ginibo ni Moises asin Elias.—Ikumparar an Kapahayagan 11:5, 6 sa Bilang 16:1-7, 28-35 asin 1 Hade 17:1; 18:41-45.

Ano an pagkakapareho kan mga pagkasaysay sa Kapahayagan asin Zacarias? Sa kada saro kaiyan, an pagkasaysay nanunungod sa mga linahidan nin Diyos na nanginot sa masakit na panahon nin pagbalo. Kaya, bilang kautuban kan Kapahayagan kapitulo 11, an linahidan na mga tugang na nanginot sa panahon na inestablisar an Kahadian nin Diyos sa langit kan 1914 naghulit na nakasulot nin “magaspang” o telang sako sa laog nin tulo may kabangang taon.

Pagkatapos nindang maghulit sulot an telang sako, an mga linahidan na ini simbolikong ginadan kan ibilanggo sinda nin halipot na peryodo nin panahon, sarong simbolikong tulo may kabangang aldaw. Sa paghiling kan mga kaiwal, napapundo o gadan na an gibuhon kan mga lingkod nin Diyos, kaya ikinaugmang marhay iyan kan mga kaiwal.—Kap. 11:8-10.

Pero, arog kan sinabi sa hula, sa katapusan kan tulo may kabangang aldaw, binuhay liwat an duwang saksi. Dai sana pinaluwas sa bilangguan an mga linahidan na ini kundi an mga nagdanay na maimbod nag-ako nin espesyal na pagnombra hali sa Diyos paagi sa saindang Kagurangnan, si Jesu-Cristo. Kan 1919, kaiba sinda sa mga ninombrahan na maglingkod bilang “maimbod asin mapagmansay na uripon” tanganing asikasuhon an espirituwal na mga pangangaipo kan mga lingkod nin Diyos sa huring mga aldaw.—Mat. 24:45-47, NW; Kap. 11:11, 12.

Interesante na ikinonektar kan Kapahayagan 11:1, 2 an mga pangyayaring ini sa panahon na susukulon, o sisiyasaton, an espirituwal na templo. Sinambit kan Malaquias kapitulo 3 an kaagid na pag-inspeksiyon sa espirituwal na templo, na sinundan nin panahon nin paglinig. (Mal. 3:1-4) Gurano kalawig an pag-inspeksiyon asin paglinig na ini? Nagpuon ini kan 1914 sagkod sa inot na kabtang kan 1919. Kaiba sa peryodong ini nin panahon an 1,260 aldaw (42 na bulan) asin an simbolikong tulo may kabangang aldaw na sinambit sa kapitulo 11 kan Kapahayagan.

Maugma nanggad kita na inareglo ni Jehova an espirituwal na pagdalisay na ini tanganing makalinig nin sarong espesyal na banwaan para sa marahay na mga gibo! (Tito 2:14) Pinapahalagahan ta man an halimbawa kan maimbod na mga linahidan na nanginot sa panahon na iyan nin pagsiyasat asin nagin an simbolikong duwang saksi. *