1. Arog kan mga apostol, ano an gustong-gusto niyatong maaraman?

MATATAPOS na kaidto an ministeryo ni Jesus sa daga, asin gustong-gustong maaraman kan saiyang mga disipulo kun ano an naghahalat sa sainda sa maabot na mga panahon. Kaya kan pirang aldaw na sana bago an saiyang kagadanan, hinapot siya kan apat sa saiyang mga apostol: “Nuarin mangyayari an mga bagay na ini, asin ano an magigin tanda kan saimong presensiya asin kan pagtatapos kan sistema nin mga bagay?” (Mat. 24:3, NW; Mar. 13:3) Si Jesus nagsimbag paagi sa sarong detalyadong hula, na nakasurat sa Mateo kapitulo 24 asin 25. Sa hulang iyan, dakul na mahalagang pangyayari an sinambit ni Jesus. An mga sinabi niya igwa nin hararom na kahulugan sa sato huling kita interesado man na marhay na maaraman kun ano an mangyayari sa ngapit.

2. (a) Sa nag-aging dakul na taon, sa anong bagay kita naghinguwang magkaigwa nin mas malinaw na pakasabot? (b) Ano an tulong hapot na pag-uulayan ta?

² An hula ni Jesus manungod sa huring mga aldaw dakul na taon nang may pamimibing pinag-aadalan kan nanginginot na mga linahidan ni Jehova. Naghihinguwa sindang magkaigwa nin mas malinaw na pakasabot kun nuarin mauutob an mga sinabi ni Jesus. Tanganing ipahiling kun paano lininaw an satong pakasabot, pag-ulayan ta an tulong hapot na “nuarin?” Nuarin mapuon an ‘dakulang kahurasaan’? Nuarin mahukom si Jesus sa ‘mga karnero’ asin ‘mga kanding’? Nuarin si Jesus ‘madigdi,’ madatong o mabalik?—Mat. 24:21; 25:31-33.

3. Ano an satong pakasabot kaidto manungod sa kun nuarin mangyayari an dakulang kahurasaan?

³ Sa laog nin dakul na taon, iniisip ta na an dakulang kahurasaan nagpuon kan 1914 kan puminutok an Giyera Mundiyal I asin na ‘an mga aldaw na iyan pinahalipot’ ni Jehova kan 1918 kan matapos an giyera tanganing an mga natatadang linahidan magkaigwa nin oportunidad na ihulit an maugmang bareta sa gabos na nasyon. (Mat. 24:21, 22) Pag natapos na an gibuhon na paghuhulit, an imperyo ni Satanas lalaglagon. Kaya,  iniisip ta kaidto na an dakulang kahurasaan may tulong kabtang: Igwa iyan nin kapinunan (1914-1918), iyan temporaryong mapupundo (puon 1918), asin matatapos iyan sa Armagedon.

4. Anong pakasabot an nagin dahilan kaya nagin mas malinaw sa sato an hula ni Jesus manungod sa huring mga aldaw?

⁴ Pero, paagi sa urog na pagsiyasat sa hula ni Jesus, nasabutan niyato na an sarong kabtang kan hulang iyan manungod sa huring mga aldaw igwa nin duwang kautuban. (Mat. 24:4-22) Nagkaigwa iyan nin inot na kautuban sa Judea kan inot na siglo C.E., asin magkakaigwa iyan nin pambilog na kinaban na kautuban sa satong panahon. An pakasabot na iyan nagtao nin nagkapirang paglilinaw. *

5. (a) Anong dipisil na panahon an nagpuon kan 1914? (b) Anong peryodo nin panahon kan inot na siglo C.E. an katumbas kan panahon na iyan nin mga kasakitan?

⁵ Nasabutan ta man na an inot na kabtang kan dakulang kahurasaan dai nagpuon kan 1914. Taano? Huling ihinahayag kan hula sa Bibliya na an dakulang kahurasaan dai mapuon sa giyera nin mga nasyon kundi sa pagsalakay sa palsong relihiyon. Kaya, an mga pangyayari na nagpuon kan 1914 iyo an ‘kapinunan nin mga kasakitan,’ bako an kapinunan kan dakulang kahurasaan. (Mat. 24:8) An ‘mga kasakitan’ na ini katumbas kan nangyari sa Jerusalem asin Judea puon kan 33 C.E. sagkod 66 C.E.

6. Ano an magigin senyal kan pagpuon kan dakulang kahurasaan?

⁶ Ano an magigin senyal kan pagpuon kan dakulang kahurasaan? Ihinula ni Jesus: “Kun mahiling na nindo an makababalding bagay na nagpapangyari nin kagabaan, siring sa itinaram paagi ki Daniel na propeta, na nagtitindog sa sarong banal na lugar, (an nagbabasa gumamit nin pakamansay,) kun siring an mga nasa Judea magpuon nang dumulag pasiring sa kabukidan.” (Mat. 24:15, 16, NW) Sa inot na kautuban, an ‘pagtindog sa sarong banal na lugar’ nangyari kan 66 C.E. kan an Jerusalem asin an templo kaiyan (sarong lugar na banal para sa mga Judio) salakayon kan hukbo nin Roma (“an makababalding bagay”). Sa mas dakulang kautuban, an ‘pagtindog’ mangyayari pag an Kakristiyanuhan (na banal para sa  naghihingakong mga Kristiyano) asin an iba pang kabtang kan Dakulang Babilonya salakayon na kan Naciones Unidas (“an makababalding bagay” sa modernong panahon). An pagsalakay na iyan ilinaladawan man sa Kapahayagan 17:16-18. An pangyayaring iyan iyo an magigin kapinunan kan dakulang kahurasaan.

7. (a) Paano masasabi na may ‘laman na nakaligtas’ kan inot na siglo? (b) Ano an aasahan tang mangyayari sa maabot na panahon?

⁷ Ihinula man ni Jesus na ‘an mga aldaw na iyan papahaliputon.’ Sa inot na kautuban, ini nangyari kan 66 C.E. kan “pinahalipot” kan hukbo nin Roma an pagsalakay. Dangan, an linahidan na mga Kristiyano sa Jerusalem asin Judea nagdurulag, na nagtao sa sainda nin oportunidad na an saindang ‘laman [o, buhay] makaligtas.’ (Basahon an Mateo 24:21, 22; Mal. 3:17) Kaya ano an aasahan tang mangyayari durante kan maabot na dakulang kahurasaan? ‘Papahaliputon’ ni Jehova an pagsalakay kan Naciones Unidas sa palsong relihiyon, na dai tinutugutan na malaglag an tunay na relihiyon kaiba kan palso. Huli kaini, an banwaan nin Diyos siguradong maliligtas.

8. (a) Ano an mga mangyayari pakatapos kan inot na kabtang kan dakulang kahurasaan? (b) Nuarin minalataw na mag-aako kan saiyang langitnon na balos an ultimong miyembro kan 144,000? (Hilingon an nota.)

 ⁸ Ano an mangyayari pakatapos kan inot na kabtang kan dakulang kahurasaan? Ipinaparisa kan sinabi ni Jesus na magkakaigwa nin peryodo nin panahon na masagkod sa pagpuon kan Armagedon. Ano an mga mangyayari sa pag-ultanan na iyan kan inot na kabtang kan dakulang kahurasaan asin kan Armagedon? An simbag yaon sa Ezequiel 38:14-16 asin Mateo 24:29-31. (Basahon.) * Pagkatapos kaiyan, masasaksihan ta an kulminasyon kan dakulang kahurasaan, an Armagedon, na katumbas kan kalaglagan kan Jerusalem kan 70 C.E. (Mal. 4:1) Mantang an ralaban nin Armagedon an kulminasyon kaiyan, an maabot na dakulang kahurasaan magigin pambihira—sarong pangyayari ‘na dai pang kaagid magpuon sa kapinunan kan kinaban.’ (Mat. 24:21) Pakatapos kaiyan, mapuon na an Milenyal na Pamamahala ni Cristo.

9. Ano an epekto sa mga lingkod ni Jehova kan hula ni Jesus manungod sa dakulang kahurasaan?

⁹ Nakakapakusog sa sato an hulang ini manungod  sa dakulang kahurasaan. Taano? Huling sinisigurado kaiyan sa sato na ano man na kasakitan an agihan ta, an mga lingkod ni Jehova, bilang sarong grupo, makakaligtas sa dakulang kahurasaan. (Kap. 7:9, 14) Urog sa gabos, naggagaya-gaya kita huling sa Armagedon, ibibindikar ni Jehova an saiyang soberaniya asin papakangbanalon niya an saiyang ngaran.—Sal. 83:18; Ezeq. 38:23.

10. Ano an satong pakasabot kaidto manungod sa kun nuarin mangyayari an paghukom sa mga karnero asin mga kanding?

¹⁰ Pag-ulayan ta ngunyan kun nuarin mangyayari an saro pang kabtang kan hula ni Jesus—an parabola dapit sa paghukom sa mga karnero asin mga kanding. (Mat. 25:31-46) Kaidto, iniisip niyato na an paghukom sa mga tawo kun baga sinda karnero o kanding mangyayari sa bilog na peryodo kan huring mga aldaw puon kan 1914. Iniisip ta na idtong mga dai nag-ako kan mensahe kan Kahadian asin nagadan bago magpuon an dakulang kahurasaan magagadan bilang mga kanding—na mayo kan paglaom na mabuhay liwat.

11. Taano ta an paghukom sa mga tawo kun baga sinda karnero o kanding dai puwedeng mangyari na nagpuon kan 1914?

¹¹ Kan kabangaan kan dekada nin 1990, siniyasat giraray kan An Torrengbantayan an Mateo 25:31, na nagsasabi: ‘Kun an Aki nin tawo pumadigdi sa saiyang kamurawayan, asin an gabos na anghel kairiba niya, dangan siya matukaw sa trono nin saiyang kamurawayan.’ Sinambit kaiyan na si Jesus nagin Hadi kan Kahadian nin Diyos kan 1914, pero dai siya ‘nagtukaw sa trono nin saiyang kamurawayan’ bilang Hukom kan ‘gabos na nasyon.’ (Mat. 25:32; ikumparar an Daniel 7:13.) Pero sa parabola manungod sa mga karnero asin kanding, si Jesus ilinaladawan sa panginot bilang Hukom. (Basahon an Mateo 25:31-34, 41, 46.) Huling si Jesus dai pa naghihiro bilang Hukom kan gabos na nasyon kan 1914, dai puwedeng mangyari na nagpuon kan taon na iyan an saiyang paghukom sa mga tawo kun baga sinda karnero o kanding. * Kun siring, nuarin mapuon an paghukom ni Jesus?

12. (a) Nuarin si Jesus mahiro bilang Hukom kan gabos na nasyon sa inot na pagkakataon? (b) Anong mga pangyayari an sinambit sa Mateo 24:30, 31 asin Mateo 25:31-33, 46?

 ¹² Ihinahayag kan hula ni Jesus manungod sa huring mga aldaw na sa kainot-inuting pagkakataon siya mahiro na bilang Hukom kan gabos na nasyon pagkatapos kan paglaglag sa palsong relihiyon. Arog kan nasambitan sa  parapo 8, an pira sa mga mangyayari sa panahon na iyan mababasa sa Mateo 24:30, 31. Kun sisiyasaton mo an mga bersikulong iyan, maririsa mo na an mga pangyayaring ihinula diyan ni Jesus kaagid kan mga sinambit niya sa parabola manungod sa mga karnero asin mga kanding. Halimbawa, an Aki nin tawo madatong na may kamurawayan kaiba an mga anghel; an gabos na tribo asin nasyon titiripunon; idtong mga huhukuman bilang karnero ‘matingag kan saindang mga payo’ huling an naghahalat sa sainda “buhay na dai nin katapusan.” * An mga huhukuman bilang kanding ‘magmumurundo’ sa pakaaram na an naghahalat sa sainda “silot [o pagkapuho] na daing katapusan.”—Mat. 25:31-33, 46.

13. (a) Nuarin huhukuman ni Jesus an mga tawo kun baga sinda karnero o kanding? (b) Ano an epekto kan pakasabot na ini kun mapadapit sa pagmansay niyato sa satong ministeryo?

¹³ Kaya, ngunyan, ano an puwede tang magin kongklusyon? Pagdatong ni Jesus sa panahon kan dakulang kahurasaan, huhukuman niya an mga tawo kan gabos na nasyon kun baga sinda karnero o kanding. Dangan, sa Armagedon, an kulminasyon kan dakulang kahurasaan, an mga arog-kanding pupuhuon sagkod lamang. Ano an epekto kan pakasabot na iyan kun mapadapit sa pagmansay niyato sa satong ministeryo? Tinatabangan kita kaiyan na mahiling kun gurano kahalaga an satong gibuhon na paghuhulit. Sagkod na dai pa nagpupuon an dakulang kahurasaan, may panahon pa an mga tawo na baguhon an saindang kaisipan asin maglakaw sa hayakpit na dalan na “pasiring sa buhay.” (Mat. 7:13, 14) Totoo, puwedeng mahiling ngunyan na may mga tawong arog-karnero  o arog-kanding. Minsan siring, maninigo tang girumdumon na an pinal na paghukom kun sairisay an mga karnero asin sairisay an mga kanding mangyayari sa dakulang kahurasaan. Kaya, igwa kita nin marahay na dahilan na padagos na ialok sa pinakadakul na tawo na mapupuwede an oportunidad na dangugon asin akuon an mensahe kan Kahadian.

14, 15. Sa anong apat na teksto sinambit an manungod sa pagdatong ni Cristo sa ngapit bilang Hukom?

¹⁴ Base sa nasabutan niyato sa urog na pagsiyasat sa hula ni Jesus, kaipuhan daw na liwaton an satong pakasabot manungod sa kun nuarin mauutob an iba pang mahahalagang pangyayari? Itinatao mismo kan hula an simbag. Hilingon ta kun paano.

¹⁵ Sa kabtang kan hula ni Jesus na yaon sa Mateo 24:29–25:46, an panginot niyang tinawan nin atensiyon iyo an mangyayari sa huring mga aldaw na ini asin sa maabot na dakulang kahurasaan. Diyan, walong beses na sinambit ni Jesus an mapadapit sa saiyang ‘pagpadigdi,’ pagdatong o pagbalik, sa panahon kan dakulang kahurasaan. * Sinabi niya: ‘Mahihiling ninda an Aki nin tawo na mapadigdi sa mga panganuron nin langit.’ ‘Dai nindo naiisihan kun sa anong aldaw madigdi an saindong Kagurangnan.’ ‘Sa oras na dai nindo pinaghuna, an Aki nin tawo madigdi.’ Asin sa saiyang parabola manungod sa mga karnero asin mga kanding, sinabi ni Jesus: ‘An Aki nin tawo madigdi sa saiyang kamurawayan.’ (Mat. 24:30, 42, 44; 25:31) An kada saro sa apat na pagkasambit na ini nanunungod sa pagdatong ni Cristo sa ngapit bilang Hukom. Sain sa hula ni Jesus mahihiling an apat pang pagkasambit?

16. Sa ano pang mga teksto sinambit an mapadapit sa pagdatong ni Jesus?

¹⁶ Mapadapit sa maimbod asin mapagmansay na uripon, si Jesus nagsabi: ‘Paladan idtong uripon na kun dumatong an saiyang kagurangnan madatngan siya na naggigibo nin siring.’ Sa parabola dapit sa mga daraga, sinabi ni Jesus: ‘Mantang nagduduruman sinda sa pagbakal, nagdatong an nobyo.’ Sa parabola dapit sa mga talento, si Jesus nagsabi: ‘Pakalihis nin haloy na panahon, an kagurangnan kaidtong mga uripon nagdatong.’ Sa parabola man sanang iyan, an kagurangnan nagsabi: ‘Sa pagbalik ko aakuon ko an sakong pirak kaiba an patubo.’ (Mat. 24:46; 25:10, 19, 27) Sa anong panahon nanunungod an apat na pagkasambit na ini mapadapit sa pagdatong ni Jesus?

17. Ano an sinasabi ta kaidto manungod sa pagdatong na sinambit sa Mateo 24:46?

 ¹⁷ Kaidto, sinasabi ta sa satong mga publikasyon na an sinambit na huring apat na teksto nanunungod sa pagdatong o pagbalik ni Jesus kan 1918. Bilang halimbawa, estudyari an sinabi ni Jesus manungod sa ‘maimbod asin [mapagmansay] na uripon.’ (Basahon an Mateo 24:45-47.) An pakasabot ta kaidto iyo na an ‘pagdatong’ na sinambit sa bersikulo 46 nanunungod sa panahon na si Jesus uminabot tanganing siyasaton an espirituwal na kamugtakan kan mga linahidan kan 1918 asin na an pagnombra sa uripon tanganing mamahala sa gabos na rugaring kan Kagurangnan nangyari kan 1919. (Mal. 3:1) Pero, base sa nasabutan niyato sa urog na pagsiyasat sa hula ni Jesus, kaipuhan na liwaton an satong pakasabot manungod sa kun nuarin mauutob an pirang detalye sa hula ni Jesus. Taano?

18. Base sa pagsiyasat sa hula ni Jesus sa kabilugan, ano an kongklusyon niyato manungod sa pagdatong ni Jesus?

¹⁸ Sa mga bersikulo bago an Mateo 24:46, an tataramon na “mapadigdi,” o “madigdi,” nanunungod pirmi sa panahon na si Jesus madatong tanganing magpahayag nin paghukom asin isagibo iyan sa panahon kan dakulang kahurasaan. (Mat. 24:30, 42, 44) Saro pa, arog kan pinag-ulayan ta sa  parapo 12, an ‘pagpadigdi’ na sinambit sa Mateo 25:31 nanunungod sa iyo man sanang panahon nin paghukom sa ngapit. Kaya rasonable sanang magkongklusyon na an pagdatong ni Jesus tanganing nombrahan an maimbod na uripon na mamahala sa gabos niyang rugaring, na sinambit sa Mateo 24:46, 47, nanunungod man sa saiyang pagdatong sa ngapit, sa panahon kan dakulang kahurasaan. * Iyo, paagi sa pagsiyasat sa hula ni Jesus sa kabilugan, nagin malinaw na an kada saro sa walong pagkasambit na ini sa saiyang pagdatong nanunungod sa maabot na paghukom sa panahon kan dakulang kahurasaan.

19. Anong mga pagliliwat sa satong pakasabot an pinag-ulayan ta, asin anong mga hapot an sisimbagon sa sunod na mga artikulo?

¹⁹ Bilang pagrepaso, ano an nanudan niyato? Sa kapinunan kan artikulong ini, tulong hapot na “nuarin?” an pinalataw niyato. Inot, pinag-ulayan niyato na an dakulang kahurasaan dai nagpuon kan 1914 kundi mapuon pag sinalakay na kan Naciones Unidas an Dakulang Babilonya. Dangan, pinag-ulayan niyato kun taano ta an paghukom ni Jesus sa mga karnero asin mga kanding dai nagpuon kan 1914 kundi mangyayari sa dakulang kahurasaan. Ultimo, siniyasat niyato kun taano ta an pagdatong ni Jesus tanganing nombrahan an maimbod na uripon na mamahala sa gabos niyang rugaring dai nangyari kan 1919 kundi mangyayari sa dakulang kahurasaan. Kaya, ngunyan, an tulong hapot na “nuarin?” pararehong nanunungod sa saro sanang peryodo nin panahon sa ngapit—an dakulang kahurasaan. Ano pa an epekto kan pagliliwat na ini kun mapadapit sa satong pakasabot sa ilustrasyon manungod sa maimbod na uripon? Asin ano an epekto kaiyan sa satong pakasabot sa iba pang mga parabola, o ilustrasyon, ni Jesus na nauutob sa panahon na ini kan katapusan? An mahalagang mga hapot na ini pag-uulayan sa sunod na mga artikulo.