NAKAKAUGMANG mahiling na pinapasimple nin nagdadakul na mga hoben na Saksi an pamumuhay ninda tanganing mapahiwas an saindang Kristiyanong ministeryo. (Mat. 6:22) Anong mga pagbabago an ginigibo ninda? Anong mga kaulangan an napapaatubang sa sainda? Tanganing maaraman, midbidon ta an nagkapira na naglilingkod ngunyan sa Mejico.

Si Dustin asin Jassa, na taga Estados Unidos, ikinasal kan Enero 2007. Dai nahaloy, nakamtan ninda an haloy na nindang pangarap—an magkaigwa nin sadiring barotong de layag asin mag-istar diyan sa bilog na taon. Nakaduong an saindang baroto harani sa Astoria, Oregon, E.U.A., sarong magayon na banwaan na napapalibutan nin makahoy na mga bulod asin mga bukid na natatakupan nin niyebe, na harani sana sa Kadagatan nin Pasipiko. “Dawa sain ka maghiling,” an sabi ni Dustin, “mapapahanga ka sa kagayunan kan mga tanawon!” An pagmati kan mag-agom namumuhay sinda nin simple asin nagsasarig ki Jehova. ‘Tutal,’ an iniisip ninda, ‘nakaistar kami sa 7.9 metros na baroto, nagtatrabaho nin part-time, nag-aatender sa kongregasyon na iba an lengguwahe, asin kun minsan nag-o-auxiliary payunir.’ Pero paghaloy-haloy, narealisar ninda na dinadaya ninda an saindang sadiri. “Imbes na magsuportar sa kongregasyon, parati kaming sibot sa paghirahay kan samong baroto,” an sabi  ni Dustin. “Aram mi na kun gusto mi talagang inuton si Jehova sa samong buhay, kaipuhan ming gumibo nin pagbabago.”

Sinabi ni Jassa: “Bago nag-agom, nakaistar ako sa Mejico, kun sain nakaasosyar ako sa kongregasyon na Ingles an lengguwahe. Maugma ako sa paglilingkod duman, asin gustong-gusto kong magbalik.” Tanganing mapakusog an pagmawot na maglingkod sa ibang nasyon, si Dustin asin Jassa nagbabasa sa saindang pampamilyang pagsamba nin mga istorya dapit sa mga tugang na nagbalyo sa ibang nasyon kun sain an mga langtad puwede nang anihon. (Juan 4:35) “Gusto ming maeksperyensiyahan an arog kaiyan na kagayagayahan,” an sabi ni Dustin. Kan maaraman ninda sa mga katuod sa Mejico na nangangaipo nin tabang an sarong bagong mabilog na grupo duman, nakapagdesisyon sinda. Naghali sinda sa saindang trabaho, ipinabakal an saindang baroto, asin nagbalyo sa Mejico.

Nag-istar si Dustin asin Jassa sa banwaan nin Tecoman—harani pa man giraray sa Kadagatan nin Pasipiko pero mga 4,345  kilometros sa timog nin Astoria. “Imbes na malipot na duros asin mabukid na tanawon, grabe an init saka maski sain, anas puon nin lemon an mahihiling,” an sabi ni Dustin. Kan inot, dai sinda makahanap nin trabaho. Huling kulang sa kuwarta, maluto asin beans an kinakakan ninda duwang beses sa sarong aldaw, sagkod na mag-agi an mga semana. “Pero kan mismong garo baga dai mi na kaya an kakanon na iyan,” an sabi ni Jassa, “tinatawan na kami kan mga tinutukduan mi sa Bibliya nin mga mangga, batag, tapayas asin, siyempre pa, mga supot na pano nin lemon!” An mag-agom nakahanap man giraray nin trabaho sa sarong online na language school na nakabase sa Taiwan. Sa ngunyan, napapaniguan kan ginaganar ninda diyan an pang-aroaldaw nindang pangangaipo.

Ano an pagmati ni Dustin asin Jassa sa bago nindang pamumuhay? “An pagbalyong ini an pinakamarahay na nangyari samo,” an sabi ninda. “An relasyon mi ki Jehova asin sa kada saro nagin mas makusog kisa sa iniisip mi kaidto na puwedeng mangyari. Aroaldaw kadakul ming ginigibo na magkaibanan—pagluwas sa langtad, pag-uulay kun paano matatabangan an mga tinutukduan mi sa Bibliya, pag-andam sa mga pagtiripon. Saro pa, mayo na an mga dati ming ikinakahadit.” Sinabi pa ninda: “Aram mi na ngunyan an dai mi lubos mauruintindihan kaidto—an pagigin totoo kan panuga sa Salmo 34:8, ‘Namitan nindo asin hilinga ta marahayon si Jehova.’”

Labing 2,900 na tugang—may agom asin daing agom, na an dakul labing 20 asin labing 30 anyos—an nagbalyo tanganing maglingkod sa mga lugar sa Mejico na nangangaipo pa nin dakul na parahulit kan Kahadian. Taano ta nagboluntaryo an gabos na Saksing ini para sa  dipisil na gibuhon na iyan? Kan ihapot ini sa nagkapira sa sainda, nagtao sinda nin tulong panginot na dahilan. Ano iyan?

Tanganing ipahiling an pagkamuot ki Jehova asin sa kapwa. Si Leticia nabawtismuhan sa edad na 18. Sinabi niya: “Kan nagdusay ako ki Jehova, aram kong nangangahulugan ini na paglilingkudan ko siya nin bilog na puso asin kalag. Kaya tanganing ipahiling an sakong bilog na pusong pagkamuot ki Jehova, gusto kong urog na gamiton an sakong panahon asin kusog sa paglilingkod saiya.” (Mar. 12:30) Si Hermilo, na nagin agom ni Leticia, labi pa sanang 20 anyos kan magbalyo para maglingkod kun sain kaipuhan an mas dakul na parahulit kan Kahadian. Sinabi niya: “Narealisar ko na an pinakamarahay na paagi tanganing ipahiling an pagkamuot sa kapwa iyo an pagtabang sa mga tawo na mapaniguan an saindang espirituwal na pangangaipo.” (Mar. 12:31) Kaya naghali siya sa mayaman na siyudad nin Monterrey kun sain nagtatrabaho siya sa sarong bangko asin komportable an pamumuhay, asin nagbalyo sa sadit na banwaan.

Tanganing maeksperyensiyahan an tunay asin nagdadanay na kagayagayahan. Dai nahaloy pakapabawtismo ni Leticia, inibanan niya an sarong eksperyensiyadong payunir sa sarong harayong banwaan, kun sain naghulit sinda nin sarong bulan. Nagigirumduman ni Leticia: “Dai ako makapaniwala. Ugmahon ako ta naghihimating marhay an mga tawo sa mensahe kan Kahadian. Sa katapusan kan bulan, sabi ko sa sadiri ko, ‘Iyo ini an gusto kong gibuhon sa sakong buhay!’” Para ki Essly, sarong daing agom na sister na labi pa sanang 20 anyos ngunyan, an kagayagayahan na nahihiling niya sa iba iyo man an nakaengganyar sa saiya sa arog kaining paglilingkod. Kan nasa high school pa siya, nakabisto niya an nagkapirang maigot na Saksi na naglilingkod kun sain mas dakula an pangangaipo. Sinabi niya, “Nahihiling ko na maugma an mga tugang na idto, kaya minawot ko an buhay na arog kan sainda.” Dakul na sister an nagdesisyon nin arog ki Essly. Sa katunayan, sa Mejico labing 680 daing agom na sister an naglilingkod kun sain mas dakula an pangangaipo. Marahayon nanggad sindang halimbawa para sa mga hoben sagkod may edad na!

Tanganing magin makahulugan asin nakakakontento an buhay. Pakatapos nin high school, inalukan si Essly nin scholarship sa sarong unibersidad. Pigkumbinsir siya kan mga kaedad niya na akuon iyan asin mamuhay nin “normal”—magin titulado, magkaigwa nin karera, magkakotse, asin magbiyahe sa iba-ibang lugar. Pero, dai niya sinda sinunod. Sinabi ni Essly: “Iyan an pinagmaigutan na makamtan kan nagkapira sa mga katuod kong Kristiyano, asin narisa ko na bako nang espirituwal na mga pasuhan an panginot sa sainda. Nahiling ko man na miyentras na urog sindang napapalabot sa mga bagay-bagay kan kinaban, nadidisganar sana sinda huli sa mga problemang napapaatubang sainda. Gusto kong gamiton an sakong pagkahoben tanganing lubos na paglingkudan si Jehova.”

 Nagkua si Essly nin bokasyonal na kurso na nakatabang sa saiya na makahanap nin trabaho tanganing masuportaran an sadiri mantang nagpapayunir, dangan nagbalyo siya sa sarong lugar na nangangaipo nang marhay nin mga parahayag kan Kahadian. Dawa dipisil, pinag-adalan pa ngani niya an mga lengguwahe kan mga katutubong Otomi asin Tlapaneco. Ngunyan, sa paggirumdom sa tulong taon na paghuhulit sa hararayong lugar, sinabi niya: “An paglilingkod kun sain mas dakula an pangangaipo nagtao nin pagkakontento asin tunay na kahulugan sa buhay ko. Urog sa gabos, nagin mas dayupot an relasyon ko ki Jehova.” Uyon diyan an mag-agom na taga Estados Unidos na si Phillip asin Racquel, na labi pa sanang 30 anyos. “Marikason na nagbabago an kinaban kaya pagmati kan dakul daing kasiguruhan an buhay ninda. Pero an paglilingkod kun sain dakulon pa an nagdadangog sa mensahe kan Bibliya nagtatao nin tunay na kahulugan sa samong buhay. Nakakakontento nanggad iyan!”

Siyempre, igwa nin mga kadipisilan sa paglilingkod sa lugar na mas nangangaipo nin mga parahayag kan Kahadian. Saro na diyan an pagsuportar sa sadiri sa pinansiyal. Tanganing magibo iyan, kaipuhan na andam kang makibagay sa lokal na mga kamugtakan. Si Veronica, na sarong eksperyensiyadong payunir, nagpaliwanag: “Sa sarong lugar kun sain naglingkod ako, nagluluto ako asin nagtitinda nin mga kakanon na simple sana asin barato. Sa saro pang lugar, nagpapabakal ako nin mga bado asin nagtutusar nin buhok. Sa ngunyan, naglilinig ako nin harong asin nagkokondukta man nin klase para sa bagong mga magurang, na tinutukduan sinda kun paano makikomunikar sa aki ninda.”

Puwedeng magin dipisilon an makibagay sa ibang kultura asin mga kostumbre kun yaon ka sa harayong lugar kaiba an mga katutubo. Iyan an nangyari ki Phillip asin Racquel kan maglingkod sinda sa sarong lugar na Nahuatl an lengguwahe. “Dakulaon an pagkakaiba sa kultura,” an sabi ni Phillip. Ano an nakatabang sa sainda na makibagay? “Nagkonsentrar kami sa positibong mga bagay na naoobserbaran mi sa mga Nahuatl—an saindang kadayuputan sa pamilya, sinseridad sa pagtratar sa kada saro, asin pagigin matinao.” Sinabi man ni Racquel: “Dakulon kaming nanudan sa pag-istar duman asin sa paglilingkod kaiba kan mga tugang sa lugar na idto nin mga katutubo.”

Kun gusto mong maglingkod sa harayong lugar na nangangaipo nin tabang, ano an puwede mong gibuhon ngunyan tanganing iandam an saimong sadiri? Ini an sabi kan mga tugang na may eksperyensiya na sa arog kaining paglilingkod: Bago ka magbalyo, pasimplehon na an saimong buhay asin makanuod na magin kontento. (Fil. 4:11, 12) Ano pa an puwede mong gibuhon? Sinabi ni Leticia: “Linikayan ko an mga trabaho na maoobligar akong maghaloy sa sarong lugar. An gusto ko, makahali ano man na oras—pag kaipuhan asin sain man kaipuhan.” Sinabi ni Hermilo: “Nakanuod akong magluto, maglaba, asin magplantsa.” Sinabi ni Veronica: “Kan yaon pa ako sa harong kaiba kan mga magurang ko asin mga tugang, nagtatabang ako sa paglinig asin nakanuod magluto nin barato pero masustansiyang kakanon. Nakanuod man akong magtipon.”

Para ki Levi asin Amelia, na taga Estados Unidos asin walong taon nang mag-agom, nakatabang sa sainda an espesipikong mga pamibi tanganing magin andam na maglingkod sa Mejico. Sinabi ni Levi: “Kinuwenta mi kun gurano an kakaipuhanon mi tanganing makapaglingkod sa ibang nasyon sa laog nin sarong taon, dangan namibi kami ki Jehova na tabangan kaming matipon an eksaktong kantidad na iyan.” Sa laog nin pirang bulan, natipon ninda an kantidad na ipinamibi ninda asin tulos-tulos na nagbalyo. Sinabi ni Levi: “Sinimbag ni Jehova an espesipikong pamibi mi, kaya ngunyan kami na man an kaipuhan humiro.” Ini man an sabi ni Amelia: “Paghuna mi sarong taon sana kami, pero pitong taon na kami digdi, asin mayo sa isip mi an maghali! Sa pag-istar digdi, naeksperyensiyahan mi mismo an tabang ni Jehova. Aroaldaw ming nahihiling an pruweba kan saiyang karahayan.”

Para sa mag-agom na Adam asin Jennifer, na taga Estados Unidos asin naglilingkod sa Mejico sa langtad na Ingles an lengguwahe, mahalagang marhay man an pamibi. Ini an suhestiyon ninda: “Dai paghalaton an pinakamarahay na kamugtakan. Ipamibi an dapit sa pagmawot mo na maglingkod sa ibang nasyon, dangan humiro kauyon kaiyan. Pasimplehon an saimong buhay, magsurat sa sangang opisina sa nasyon kun sain mo gustong maglingkod, asin pakatapos nin maingat na pagplano, bumalyo ka na!” * Kun gigibuhon mo iyan, sarong buhay na maugma asin mayaman sa espirituwal an naghahalat sa saimo.