Pinapatanidan kita kan Kasuratan: ‘Sa puso minahali an mga kaisipan, mga paggadan, mga pagsambay, mga pakikisaro, mga paghabon, mga pagsaksing putik, mga pagraway.’ (Mat. 15:19) Puwede kitang ipahamak kan satong piguratibong puso asin puwede kaiyan na ipangatanusan an paggawi na kontra sa kabutan nin Diyos. Asin tibaad marealisar sana niyato an nangyari pagkatapos tang gumawi nin bakong madunong. Ano an makakatabang sa sato na maaraman an intensiyon kan satong puso bago pa kita makagibo nin sala?

Basahon an Bibliya aroaldaw asin hurop-hurupon an sinasabi kaiyan.

“An tataramon nin Diyos buhay asin mapuwersa asin mas matarom kisa sa arin man na espada na may duwang tarom asin minalagbas sagkod sa pagbulag kan kalag asin espiritu,” an isinurat ni apostol Pablo. An mensahe nin Diyos na yaon sa Bibliya “nakakabatid kan mga kaisipan asin intensiyon kan puso.” (Heb. 4:12, NW) An pagsiyasat kan satong sadiri sa liwanag kan sinasabi kan Kasuratan mapuwersang tabang nanggad tanganing maaraman an intensiyon kan puso. Mahalagang marhay nanggad na basahon niyato an Tataramon nin Diyos aroaldaw asin hurop-hurupon an sinasabi kaiyan, sa siring ikinakalaog ta sa satong isip an mga kaisipan asin pagmansay ni Jehova!

An pag-ako sa konseho kan Kasuratan asin pag-aplikar kan mga prinsipyo sa Bibliya magkakaigwa nin epekto sa satong konsiyensiya—an panglaog na kakayahan na “nagpapatotoo.” (Roma 9:1) An boses kan satong  konsiyensiya makakapugol sa sato na ipangatanusan an salang gibo. Saro pa, may mga halimbawa sa Bibliya na puwedeng magserbing ‘patanid’ sa sato. (1 Cor. 10:11) An pakanuod sa mga iyan puwedeng mag-ulang sa sato sa paglakaw sa salang direksiyon. Ano an dapat gibuhon kan lambang saro sa sato?

Mamibi sa Diyos na tabangan kang maaraman an intensiyon kan saimong puso.

Si Jehova an “parasiyasat kan puso.” (1 Cron. 29:17, NW) Siya ‘urog pa kadakula ki kan satong puso, asin nakakaaram kan gabos na bagay.’ (1 Juan 3:20) Dai madadaya an Diyos. Kun dai kita mag-aalangan na ipamibi an satong mga kahaditan, namamatian, asin kamawutan, matatabangan kita ni Jehova na mabatid an intensiyon kan satong puso. Puwede ta pa nganing hagadon sa Diyos na magkaigwa kita nin ‘sarong puso na malinig.’ (Sal. 51:10) Kun siring, tanganing maaraman an inklinasyon kan satong puso, dai ta dapat baliwalaon an probisyon na pamibi.

Magin atentibo sa Kristiyanong mga pagtiripon.

An pagigin atentibo sa mga ipinepresentar sa Kristiyanong mga pagtiripon makakatabang sa sato na onestong ebalwaron an satong panglaog na pagkatawo—an puso niyato. Minsan ngani dai kita mag-ako nin bagong impormasyon sa kada pagtiripon, paagi sa pagigin presente mas nasasabutan ta an mga prinsipyo sa Bibliya saka an mahahalagang pagirumdom na nakakatabang sa sato sa pag-analisar kan intensiyon kan puso. Mahalaga man an mga komento kan mga tugang sa pagdalisay kan panglaog na pagkatawo niyato. (Tal. 27:17) Puwede kitang madanyaran kun isusuway ta an satong sadiri imbes na ikaugma an regular na pakikiasosyar sa Kristiyanong pagtiripon. Puwede iyan na sumagkod sa paghanap kan sato mismong makasadiring mga kamawutan. (Tal. 18:1) Kaya madunong na haputon an sadiri, ‘Ugali ko daw na mag-atender sa gabos na pagtiripon asin makinabang diyan?’—Heb. 10:24, 25.

Puwede kitang ilagalag kan madaya niyatong puso sa dakul na kabtang kan satong buhay. Siyasaton niyato an apat kaiyan: an pagmamaigot na magkamit nin materyal na mga bagay, an pag-inom nin arak, an pagpili nin kairiba-iba, asin an paglilibang.

An pagmamaigot na magkamit nin materyal na mga bagay.

Natural sana an pagmawot na paniguan an satong pisikal na mga pangangaipo. Minsan siring, nagtao si Jesus nin nagpapatanid na halimbawa manungod sa sobrang pagpapahalaga sa materyal na mga bagay. Sa saro sa mga ilustrasyon ni Jesus, dinadagka niya kita na isip-isipon an nangyari sa sarong mayaman na lalaki na pano na an mga bodega. Kun siring, mayo na siyang lugar na mabubugtakan kan saro pang magayon na ani. Plinano niyang gabaon iyan asin magtugdok nin mas darakulang bodega. Nangatanusan siya: ‘Diyan titipunon ko an gabos kong inani asin rugaring. Asin ako masabi sa sakong kalag, Kalag, dakul ka nang rugaring na naririmpos manungod sa dakul na taon; magpahingalo ka, magkakan, mag-inom, asin mag-ugma.’ Minsan siring, dai naisip kan mayaman na lalaking ini an sarong dai malilikayan na katotoohan: Puwede siyang magadan sa mismong bangging iyan.—Luc. 12:16-20.

Mantang nagkakaedad kita, tibaad mahadit kitang marhay manungod sa materyal na seguridad niyato kun kita gurang na, kaya tibaad ipangatanusan ta an pag-overtime sa trabaho imbes na mag-atender sa banggi nin pagtiripon o sa ano man na paagi magpuon na pabayaan an satong Kristiyanong mga  paninimbagan. Bako daw na dapat kitang magmaan sa siring na inklinasyon? O tibaad saro kitang hoben asin aram niyatong mayo nang mas marahay na karera kisa sa bilog na panahon na paglilingkod. Pero, dai pa man daw giraray kita nagpapayunir huli sa pangangatanusan na dapat nguna kitang magkaigwa nin pinansiyal na seguridad? Bako daw na dapat tang gibuhon ngunyan an pinakamakakaya niyato na magin mayaman sa Diyos? Mayong nakakaaram kun baga buhay pa kita sa aga.

An pag-inom nin arak.

‘Dai ka makisalak sa mga parainom nin arak,’ an sabi sa Talinhaga 23:20. Kun an saro may makusog na pagmawot sa mga inumon na de alkohol, tibaad ipangatanusan niya an regular na pag-inom. Tibaad sabihon niya na nag-iinom siya tanganing magrelaks, bakong maburat. Kun kaipuhan ta an inumon na de alkohol tanganing magrelaks, tibaad panahon na tanganing onestong ebalwaron an inklinasyon kan satong puso.

An pagpili nin kairiba-iba.

Siyempre, dai malilikayan an pakikiasosyar sa mga bakong kapagtubod sa eskuwelahan, sa trabaho, asin sa ministeryo. Pero, ibang urulay na an pakikiiba-iba sa sainda o an dayupot na pakikiamigo pa ngani sa sainda. Ipinapangatanusan daw niyato an siring na pakikiiba-iba sa pagsabing dakul man sindang marahay na ugali? “Dai kamo madayaan,” an patanid kan Bibliya. ‘An mga maraot na pag-iriba nakakaraot kan mga marahay na ugali.’ (1 Cor. 15:33) Kun paanong an dikit na polusyon puwedeng makakontaminar sa malinig na tubig, an pakikiamigo sa mga mayo nin diyosnon na debosyon puwedeng makakontaminar sa satong espirituwalidad asin gumiya sa sato na akuon an kinabanon na mga punto de vista, pagbado, pagtaram asin paggawi.

An paglilibang.

Huli sa modernong teknolohiya madali na sanang makua an gabos na klase nin libangan, asin an kadaklan kaiyan kuwestiyonable o dai angay sa sarong Kristiyano. ‘An gabos na karumputan dai nanggad iyan minsan manabihan diyan sa saindo,’ an isinurat ni Pablo. (Efe. 5:3) Paano kun naaakit an satong puso sa paghiling o pagdangog sa sarong bagay na maati? Tibaad ipangatanusan ta na kaipuhan man kan gabos an dikit na pagrelaks o paglibang, asin personal na bagay na an pagpili kaiyan. Pero isapuso niyato an hatol ni Pablo asin dai pagtugutan na mahiling kan satong mata asin madangog kan satong talinga an ano man na kaatian.

Kun nabiktima na kita kan inklinasyon kan satong mapandayang puso asin natuod nang ipangatanusan an salang gibo, puwede kitang gumibo nin mga pagbabago. (Efe. 4:22-24) Estudyare an duwang halimbawa sa presenteng panahon.

Kinaipuhan ni Miguel * na itanos an kaisipan niya manungod sa materyal na mga bagay. Sabi niya: “Kaming mag-agom patin an aki ming lalaki hali sa sarong nasyon kun sain an pagkaigwa kan pinakabago saka pinakamarahay na teknolohiya asin kaginhawahan ibinibilang na mahalagang marhay. May panahon na nagpokus ako sa pagkaigwa kan gabos na makukua ko sa kinaban, na iniisip na magigibo ko ini na dai nagigin materyalistiko. Dai nahaloy, narealisar ko na an pag-abot sa materyal na mga bagay garo tinampong mayong katapusan. Ipinamibi ko ki Jehova an manungod sa sakong pagmansay asin intensiyon kan sakong puso. Sinabi ko sa saiya na gusto ming lubos na maglingkod sa saiya bilang pamilya. Nagdesisyon kami na pasimplehon an samong buhay asin magbalyo sa lugar na mas dakula an pangangaipo. Dai nahaloy, nakapagpayunir na kami. Narealisar mi man na dai mi kaipuhan an dakul na materyal na bagay tanganing magkaigwa nin nakakakontento asin maugmang buhay.”

Ipinapahiling sa eksperyensiya ni Lee kun paano nakatabang sa saiya an onestong pagsiyasat sa sadiri na bayaan an maraot na kairiba. “Huli sa trabaho ko,” an sabi ni Lee, “regular akong nakikiasosyar sa mga suplayer na hali sa ibang nasyon. Aram ko na magkakaigwa nin sobrang irinuman sa mga miting na idto, pero ugmahon ako pag nag-aatender diyan. Dakul na beses nang haros maburat ako, pero nagbabasol ako pagkatapos kaiyan. Kinaipuhan kong onestong ebalwaron an sakong puso. Nakatabang sa sako an hatol kan Tataramon nin Diyos asin an mga suhestiyon kan mga elder na marealisar na an talagang hinahanap ko iyo an pakikiasosyar sa mga dai namumuot ki Jehova. Ngunyan, sagkod sa mapupuwede nakikipagtransaksiyon na sana ako paagi sa telepono saka linilimitaran ko an pakikiasosyar sa mga suplayer.”

Kaipuhan tang magin onesto sa satong sadiri asin aramon an intensiyon kan satong puso. Mantang ginigibo iyan, maninigo niyatong hagadon an tabang ni Jehova paagi sa pamibi, na ginigirumdom na ‘siya nakakamidbid kan mga hilom nin puso.’ (Sal. 44:21) Itinao man nin Diyos an saiyang Tataramon, na magseserbing salming niyato. (Sant. 1:22-25) Mahalaga man an mga pagirumdom asin hatol na nakukua niyato sa satong Kristiyanong mga publikasyon asin pagtiripon! Paagi sa siring na mga probisyon, maiingatan niyato an satong puso asin danay kitang makakalakaw sa dalan nin katanusan.