PIRANG taon na an nakaagi, si Rubia, na 30 anyos ngonyan, nagbiahe tanganing bisitahon si Sandra, sarong payunir na naglilingkod sa sadit na kongregasyon sa timog na parte kan Brazil. Kan pagbisitang ini, igwang nangyari na nakapahirong marhay ki Rubia na nakapabago sa buhay nia. Ano iyan? Aramon niato ki Rubia mismo.

“Iniba ako ni Sandra sa pagdalaw sa sarong babae na tinotokdoan nia sa Biblia. Mantang nag-aadal, biglang sinabi kan babae: ‘Sandra, sa pinagtatrabahohan ko, may tolong babae na gustong mag-adal kan Biblia pero an sabi ko kaipuhan nindang maghalat kan saindang turno. Aram kong pano na an iskedyul mo ngonyan na taon.’ Dai ako makatubod sa nadangog ko. Kaipuhan maghalat an mga tawong gustong mamidbid  si Jehova! Sa kongregasyon mi, nasasakitan akong makahanap nin dawa sarong totokdoan sa Biblia. Kan mismong oras na idto, sa harong kan tinotokdoan sa Biblia, nakamate ako nin makosog na pagmawot na tabangan an mga tawo sa sadit na banwaan na idto. Dai nahaloy, hale sa dakulang siudad, nagbalyo ako sa banwaan kun saen nagpapayunir si Sandra.”

Ano an sunod na nangyari ki Rubia? Sinabi nia: “Sa laog nin duwang bulan pakabalyo duman, igwa na ako nin 15 pag-adal sa Biblia. Dai nahaloy—magtubod man kamo o dai—arog ni Sandra, igwa na man nin naghahalat sako na tokdoan sa Biblia!”

Si Diego, na labi pa sanang 20 anyos, nagbisita sa nagkapirang payunir sa Prudentópolis, sarong sadit na banwaan sa timog na parte kan Brazil. Dakula an epekto sa saiya kan pagbisitang idto; sa katunayan, napahiro sia na siyasaton giraray an saiyang ministeryo. Nagpaliwanag sia: “Bako akong gayong seryoso sa kongregasyon mi; dikit sana an oras ko sa ministeryo kada bulan. Pero kan binisita ko su mga payunir dangan nadangog an mga eksperyensia ninda, dai ko mapugolan na dai ikomparar an saindang magayagayang disposisyon sa bakong seryosong saboot ko sa ministeryo. Kan mahiling ko kun gurano sinda kaogma asin kaganado, naisip ko na logod arog man kaiyan kamakahulogan an buhay ko.” Pagkatapos kan pagbisitang idto, nagpayunir na si Diego.

Arog ni Diego, ika daw sarong hoben na Saksi na nag-iiba sa paghuhulit asin nag-aatender sa mga pagtiripon pero kasabay kaiyan nakakamate na an ministeryo rutina na sana asin dai nakakaogma? Kun iyo, puede ka daw gumibo nin mga pagbabago sa buhay tanganing maeksperyensiahan an kagayagayahan sa paglilingkod kun saen mas nangangaipo nin mga parahayag kan Kahadean? Natural sana kun maisip mo na garo baga masakit bayaan an maginhawang estilo nin pamumuhay. Pero, dakol na hoben an nagdesisyon na iyan mismo an gibohon. Nagkaigwa sinda nin igong kusog nin boot na liwaton an personal nindang mga pasohan asin kamawotan tanganing orog na makapaglingkod ki Jehova. Bilang saro pang halimbawa, hilingon ta an eksperyensia ni Bruno.

Pirang taon na an nakaagi, si Bruno, na ngonyan 28 anyos, nag-adal sa sarong sikat na eskuelahan nin musika,  asin pasohan nia na magin konduktor nin orkestra. Sa katunayan, dakulaon an inoswag nia sa saiyang pag-adal kaya pirang beses siang inimbitaran na magin konduktor nin musikang pang-orkestra. May oportunidad siang magkaigwa nin mapangganang karera. “Pero,” an sabi ni Bruno, “namatean ko na may kulang sa buhay ko. Idinusay ko na an sadiri ko ki Jehova pero aram kong dai ko ginigibo an bilog kong makakaya para sa saiya, asin napurisaw ako kaiyan. Ipinamibi ko ki Jehova an mga nasa boot ko, saka nakipag-olay man ako sa eksperyensiadong mga tugang sa kongregasyon. Pakatapos nin seryosong paghorophorop, nagdesisyon ako na enoton an ministeryo, magpondo sa pag-adal sa eskuelahan nin musika, asin maglingkod sa sarong lugar na nangangaipo nanggad nin mga parahulit kan Kahadean. Ano an resulta kan desisyon nia?

Nagbalyo si Bruno sa banwaan nin Guapiara (na mga 7,000 an populasyon), mga 260 kilometros hale sa siudad nin São Paulo. Dakula ining pagbabago. Sinabi nia: “Nagbalyo ako sa sadit na harong na mayong repridyeretor, TV, o Internet. Pero, may nagkapirang bagay duman na dai pa ako nagkaigwa kasuarin man—tanoman nin gulay saka nin prutas!” Mantang naglilingkod sa sadit na kongregasyon duman, sarong beses kada semana inaandam ni Bruno an saiyang bag asin binubugtakan iyan nin pagkakan, inomon, asin mga literatura dangan minasakay sa saiyang motorsiklo tanganing maghulit sa hararayong baryo. Dakol duman an dai pa lamang nakadangog kan maogmang bareta. “Nagkaigwa ako nin sagkod sa 18 pag-adal sa Biblia,” an sabi nia. “Ogmahon nanggad ako na mahiling kun paano sinda guminibo nin mga pagbabago sa buhay ninda!” Sinabi pa nia: “Ngonyan, narealisar ko na nanompongan ko na kun ano an kulang kaidto sa buhay ko—an makamate nin hararom na satispaksion huli sa pag-enot kan intereses kan Kahadean. Nungka ko kutanang namatean ini kun ipinadagos ko an pag-abot sa materyalistikong mga pasohan.” Asin paano nia sinuportaran an saiyang sadiri sa pinansial sa Guapiara? Nakangirit siang nagsabi: “Nagtotokdo akong magtugtog nin gitara.” Maski paano, maestro pa man giraray sia.

Si Mariana, na mayo pang 30 anyos ngonyan, kapareho ni Bruno an situwasyon. Saro siang abogado, pero dawa halangkaw an ginaganar nia sa saiyang propesyon, dai sia nakakamate nin tunay na pagkakontento. Sinabi nia: “Pagmate ko garo ako ‘naglalapag sa doros.’”  (Ecl. 1:17, NW) Dinagka sia nin nagkapirang tugang na pag-isipan an pagpapayunir. Pakatapos na mag-isip-isip, si Mariana asin an saiyang mga amiga na si Bianca, Caroline, saka Juliana nagdesisyon na tumabang sa sarong kongregasyon sa Barra do Bugres, sarong harayong banwaan na harani na sa Bolivia asin rinibong kilometro an rayo sa harong ninda. Ano an sunod na nangyari?

Sinabi ni Mariana: “An plano ko, tolong bulan sana ako duman. Pero sa katapusan kan tolong bulan, igwa na ako nin 15 pag-adal sa Biblia! Siempre, sinda nangangaipo nanggad nin orog na tabang tanganing mag-oswag sa katotoohan. Huli kaiyan, mayo talaga ako nin kusog nin boot na sabihon sainda na mahale na ako. Dai talaga ako puedeng humale.” Asin iyan mismo an ginibo kan apat na sister. Nagresulta daw sa mas makahulogan na buhay an bagong karera ni Mariana? Sinabi nia: “Naoogma ako na ginagamit ako ni Jehova sa pagtabang sa mga tawo na bagohon an saindang buhay para sa ikakarahay. Sarong bendisyon para sa sako na aram kong ginagamit ko na an sakong panahon asin kusog sa sarong bagay na talagang kapakipakinabang.” Ipinahayag ni Caroline an saboot nindang apat: “Paghigda ko sa banggi, nakakamate ako nin hararom na satispaksion huling ginigibo ko an gabos kong makakaya para sa intereses kan Kahadean. Nakasentro an sakong buhay sa kun paano tatabangan an mga tinotokdoan ko sa Biblia. Marahayon na mahiling an pag-oswag ninda. Naeeksperyensiahan ko ngonyan na totoo an mga tataramon na ini: ‘Namitan nindo asin hilinga nindo ta marahayon si Jehova.’”—Sal. 34:8.

Siertong dakulaon an kaogmahan ni Jehova na mahiling an nagdadakol nanggad na bilang nin hoben na mga tugang sa bilog na kinaban na ‘gikan sa boot na nagpepresentar kan saindang sadiri’ na ihulit an maogmang bareta kan saiyang Kahadean sa hararayong lugar! (Sal. 110:3, NW; Tal. 27:11) Huli kaiyan, sinda gabos na gikan sa boot na naglilingkod nagkakamit kan abundang bendisyon ni Jehova.—Tal. 10:22.