Nagigirumdoman Mo daw?

Maingat mo daw na binasa an dai pa sana nahahaloy na mga isyu kan An Torrengbantayan asin The Watchtower? Hilinga kun masisimbag mo an minasunod na mga hapot:

An buhok daw ni Samson an nagtao sa saiya nin kosog?

Bakong buhok mismo ni Samson an nagtao sa saiya nin kosog. An saiyang buhok nagsisimbolo sa espesyal na relasyon nia sa Dios bilang Nazareo. Naapektaran an relasyon na iyan kan ipaputol ni Delaila an buhok ni Samson.—4/15, pahina 9.

Kun ikokomparar sa satong literal na puso, anong tolong bagay an puedeng magtao nin marahay na epekto sa piguratibong puso niato?

(1) Kakanon. Kun paanong kaipuhan kan satong literal na puso an masustansiang kakanon, kaipuhan man niato an supisyente asin nakakarahay na espirituwal na kakanon. (2) Ehersisyo. An kaigotan sa ministeryo makakatabang na mapagdanay na nasa marahay na kamugtakan an espirituwal na puso niato. (3) Kapalibotan. Mababawasan niato an tension paagi sa pakikiasosyar sa mga kapagtubod, na nagmamakolog sa sato.—4/15, pahina 16.

Paano ikakabalik nin mag-agom an tiwala ninda sa lambang saro kun magkasala nin pagsambay an saro sa sainda?

Dapat sindang (1) magin onesto sa lambang saro; (2) magtinabangan; (3) magbago nin ugale; asin (4) magin realistiko kun noarin puedeng lingawan an paghinanakit, na pinagmamaigotan na mapakarahay an naraot na relasyon.—5/1-E, pahina 12-15.

Kun nagpapahayag sa lobong, taano ta dai maninigong iaplikar kan ispiker an Salmo 116:15 sa nagadan?

An teksto nagsasabi: ‘Mahalaga nanggad sa mga mata ni Jehova an kagadanan nin saiyang mga banal.’ Nangangahulogan ini na para sa Dios dakulaon na bagay an kagadanan kan gabos na maimbod sa saiya kaya dai sia matogot na mangyari iyan. Dai nia totogotan na an maimbod na mga lingkod nia, bilang grupo, biyong mapara sa daga.—5/15, pahina 22.

Sairisay an mga colporteur?

Bago 1931, “colporteur” an terminong ginagamit sa inaapod ngonyan na payunir.—5/15, pahina 31.

Ano an nagkapirang bagay na nagpapahiling na an Biblia bakong ordinaryo sanang libro na isinurat nin mga tawo?

An Biblia igwa nin dakol na hulang naotob. Nakarekord dian an eksaktong kasaysayan, bakong eroestorya sana. Kaoyon iyan sa tamang siensia, asin magkaoroyon an mga libro kaiyan. Praktikal iyan ngonyan.—6/1-E, pahina 4-8.

Sa ano nanonongod an ‘gabos na kahadean na ini’ na nasambitan sa Daniel 2:44?

An pinanonongdan kaiyan iyo an mga kahadean, o gobyerno, na ilinaladawan kan manlaenlaen na kabtang kan metal na imahen na ipinaliwanag ni Daniel.—6/15, pahina 17.

Kasuarin an Anglo-Amerika nagin an ikapitong pambilog na kinaban na kapangyarihan na ihinula sa Biblia?

An magkaalyansang pambilog na kinaban na kapangyarihan na ini nagin an ikapitong pambilog na kinaban na kapangyarihan kan an Britania asin Estados Unidos maghirong magkaibanan sa pambihirang paagi durante kan Giera Mundial I.—6/15, pahina 19.

Paano nin Dios pinapatawad asin linilingawan an mga kasalan kan mga nagsosolsol?

Ini an sinasabi ni Jehova sa mga inooyonan nia: ‘Dai ko na gigirumdomon an saindang mga kasalan.’ (Jer. 31:34) Puede siang magpatawad nin mga kasalan basado sa pantubos. Kun ginigibo iyan nin Dios, linilingawan nia an mga kasalan na iyan sa paaging dai na nia gigirumdomon tanganing padusahan giraray an nagkasala.—7/1, pahina 18.

Taano ta puede niatong paniwalaan an mga milagrong nakasurat sa Biblia?

Sa parate, ginigibo iyan nin hayagan, bakong pasekreto. Simple sana iyan, na dai naggamit nin espesyal na mga props. Ginibo iyan tanganing pamurawayon an Dios, bakong an mga tawo. Dakol na laen-laen na milagro an ginibo kaidto, asin dai kinuestion kan mga nagkokontra kaidto na nangyari iyan. Mga dahelan ini na maniwala kita na totoo an mga milagrong nakasurat sa Biblia.—8/1-E, pahina 7-8.