Ipinapaheling daw Nindo na si Jehova an Kahirasan Nindo?

“Hanapa gñona nindo [‘nin padagos,’ NW] an kahadean nin Dios asin an saiyang katanosan; asin [ining] gabos na bagay idadagdag na sana saindo.”—MAT. 6:33.

1, 2. (a) Sairisay an irinerepresentar kan “Israel nin Dios” na sinambit sa Galacia 6:16? (b) Sa Mateo 19:28, sairisay an irinerepresentar kan 12 o “kagduang tribu ni Israel”?

KUN nababasa nindo sa Biblia an ngaran na Israel, ano an naiisip nindo? Naiisip daw nindo an aki ni Isaac na si Jacob, na tinawan nin bagong ngaran na Israel? O an mga naggikan sa saiya, an suanoy na nasyon nin Israel? Kumusta man an espirituwal na Israel? Kun an Israel sinasambit sa piguratibong paagi, sa parate aplikado iyan sa “Israel nin Dios,” an 144,000, na linahidan nin banal na espiritu tanganing magin mga hade asin saserdote sa langit. (Gal. 6:16; Kap. 7:4; 21:12) Alagad, estudyare an espesyal na pagsambit sa 12 tribo nin Israel na mababasa sa Mateo 19:28.

² Sinabi ni Jesus: “Sa pagbago kan gabos, kun an Aki nin tauo tumukao na sa trono nin saiyang kamurawayan, kamo man maturukao sa kagduang trono, na maghohokom kan kagduang tribu ni Israel.” Sa bersikulong ini, an 12 o “kagduang tribu ni Israel” nanonongod sa mga hohokoman kan linahidan na mga disipulo ni Jesus asin tatawan nin buhay na daing sagkod sa Paraiso. Makikinabang sinda sa paglilingkod kan 144,000 bilang mga saserdote.

3, 4. Anong marahay na halimbawa an itinatao kan maimbod na mga linahidan?

³ Arog kan mga saserdote asin Levita kaidto, para sa mga linahidan ngonyan, sarong pribilehio an paglilingkod ninda. (Bil. 18:20) An mga linahidan dai nag-aasa na tatawan nin teritoryo o  lugar digdi sa daga bilang rogaring. Imbes, naglalaom sinda na magin hade asin saserdote sa langit kaiba ni Jesu-Cristo. Ipagpapadagos ninda an paglilingkod ki Jehova sa asignasyon na iyan, arog kan ipinaparisa kan mababasa niato sa Kapahayagan 4:10, 11 mapadapit sa kamugtakan kan mga linahidan sa langit.—Ezeq. 44:28.

⁴ Mantang an mga linahidan nasa daga, pinapatunayan kan pamumuhay ninda na si Jehova an kahirasan ninda. An pinakamahalaga sa sainda iyo an pribilehio na paglingkodan an Dios. Sinda nagtutubod sa atang na pantubos ni Cristo asin padagos na nagsusunod sa saiya, sa siring ‘naseseguro ninda an pag-apod asin pagpili sa sainda.’ (2 Ped. 1:10) Magkakalaen an mga kamugtakan asin kakayahan ninda bilang indibiduwal. Pero, dai ninda ginigibong sarahotan an ano man na limitasyon tanganing kadikit sana an magibo sa paglilingkod sa Dios. Sa kabaliktaran, para sa sainda prioridad an paglilingkod sa Dios, na ginigibo an bilog na makakaya ninda. Asin nagtatao sinda nin marahay na halimbawa para sa mga may paglaom na mabuhay sa paraiso.

5. Paano si Jehova puedeng magin kahirasan nin gabos na Kristiano, asin taano ta tibaad magin masakit iyan?

⁵ Baga man sa langit o sa daga an satong paglaom, dapat tang ‘paindahan an satuya man sana, asin magpasan kan satong cruz [“hariging pasakitan,” NW], patin magsunod ki Cristo.’ (Mat. 16:24) Minilyon na naglalaom na mabuhay sa Paraiso an nagsasamba sa Dios asin nagsusunod ki Cristo sa paaging iyan. Dai sinda kontento na maggibo nin dikit sanang paglilingkod kun aram ninda na orog pa an kaya ninda. Dakol an napahiro na pasimplehon an buhay ninda asin nagpayunir. Nakakapagpayunir an iba nin pirang bulan kada taon. Pero an iba pa nagmamaigot sa ministeryo dawa ngani dai nakakapagpayunir. Sinda siring sa may debosyon na si Maria, na nagbubo ki Jesus nin pahamot. Si Jesus nagsabi: “Guinibohan nia ako nin marahay na guibo. . . . Sia nagguibo kan saiyang makakayanan.” (Mar. 14:6-8) Tibaad bakong pasil gibohon an bilog tang makakaya, huling nabubuhay kita sa kinaban na kontrolado ni Satanas. Pero, kita maigot na naghihingoa asin nagtitiwala ki Jehova. Estudyare an apat na paagi na magigibo niato iyan.

Paghanap Nguna sa Kahadean nin Dios

6. (a) Paano ipinapaheling nin mga tawo sa pangkagabsan na an kahirasan ninda nasa buhay sanang ini? (b) Taano ta mas marahay na magin kapareho ni David an pagmansay niato?

⁶ Tinokdoan ni Jesus an mga parasunod nia na hanapon nguna an Kahadean asin an katanosan nin Dios. An mga tawo sa kinaban may tendensiang hanapon nguna an personal na intereses na siring sa “magña tauo na taga kinaban, na an saindang kabtang [“kahirasan,” NW] uya sa buhay na ini.” (Basahon an Salmo 17:1, 13-15.) Huling an dakol mayong pagpahalaga sa Kaglalang sa sainda, inuubos ninda an saindang panahon sa pagpapamilya, saka pagkaigwa nin komportableng pamumuhay asin pamana. An kahirasan ninda nasa buhay sanang ini. Sa ibong na lado, interesado si David sa pagkaigwa nin “marahay na dagñog” sa atubangan ni Jehova, na kan huri irinekomendar kan aki nia na dapat gibohon nin gabos. (Par. 7:1) Arog man ni Asaf, aram ni David na mas marahay nanggad si Jehova bilang Katood nia kisa enoton sa saiyang buhay an sadiring intereses. Ipinaggayagaya nia an paglakaw sa kaibanan nin Dios. Sa panahon niato, ineenot nin dakol na Kristiano an espirituwal na mga aktibidad kisa sa sekular na trabaho.

7. Anong bendisyon an nakamtan nin sarong tugang huli sa pag-enot sa Kahadean?

⁷ Isip-isipa si Jean-Claude na taga Republika nin Aprika Sentral. Sia magurang sa kongregasyon na may agom asin tolong aki. Sa nasyon na iyan, masakit makakua nin trabaho, asin gigibohon nin kadaklan an haros gabos na paagi tanganing magdanay sa trabaho. Sarong aldaw, sinabihan kan production manager si Jean-Claude na sa banggi na magtrabaho—poon alas 6:30, pitong aldaw kada semana. Ipinaliwanag ni Jean-Claude na apuera sa pagsustento sa pamilya nia, kaipuhan niang asikasohon an espirituwal na kapakanan ninda. Sinabi man nia na may paninimbagan siang tabangan an kongregasyon. An simbag kan manedyer? “Kun mapalad ka huling nagkatrabaho ka, dapat na lingawan mo an gabos na iba pang bagay, pati na an saimong agom, mga aki, asin mga problema. Dapat na ikonsentrar  mo an saimong buhay sa trabaho—dian sana asin mayo nang iba. Pumili ka: relihion o trabaho.” Kun kamo, ano an gigibohon nindo? Bueno, aram ni Jean-Claude na kun mawawaran sia nin trabaho, aatamanon sia nin Dios. Dakol pa an magigibo nia sa paglilingkod sa Dios, asin matabang si Jehova sa pag-asikaso kan materyal na mga pangangaipo kan pamilya nia. Kaya, nag-atender sia sa suminunod na pagtiripon sa laog kan semana. Pagkatapos kaiyan, nag-andam na sia pasiring sa trabaho, na dai ngani segurado kun baga may trabaho pa sia. Kan oras man sanang idto, may nag-apod sa saiya sa telepono. An manedyer sinisante sa trabaho, alagad an satong tugang may trabaho pa man giraray.

8, 9. Sa anong paagi maaarog niato an mga saserdote asin Levita bilang pagpaheling na si Jehova an kahirasan niato?

⁸ An nagkapira na nasa situwasyon na garo baga namemeligrong mawaran nin trabaho tibaad mag-isip, ‘Paano ko maootob an paninimbagan na sustentohan an sakong pamilya?’ (1 Tim. 5:8) Baga man napaatubang na kamo sa kaagid na kadepisilan o dai pa, posibleng marhay na nakakasierto kamo, base sa eksperyensia, na nungka kamong madedesganar kun an Dios an kahirasan nindo asin pinakamamahal nindo an pribilehio na paglingkodan sia. Kan sabihan ni Jesus an mga disipulo na padagos na hanapon nguna an kahadean, sinierto nia sa sainda: “[Ining] gabos na bagay”—arog kan kakanon, inomon, o gubing—“idadagdag na sana saindo.”—Mat. 6:33.

⁹ Isip-isipa an mga Levita, na dai tinawan nin dagang pamana. Huling an dalisay na pagsamba an pangenot sa sainda, dapat sindang magsarig na susustentohan sinda ni Jehova, na nagsabi sa sainda: “Ako an [saindong] kahirasan.” (Bil. 18:20, NW) Minsan ngani dai kita naglilingkod sa literal na templo arog kan mga saserdote asin Levita, puede tang arogon an saindang kaisipan, na may pagsarig na susustentohan kita ni Jehova. An satong pagtitiwala sa kapangyarihan nin Dios na magsustento paorog nang paorog na nagigin mahalaga mantang kita mas nagrarani sa katapusan kan huring mga aldaw.—Kap. 13:17.

Paghanap Nguna sa Katanosan nin Dios

10, 11. Paano nagtiwala ki Jehova an nagkapira may koneksion sa saindang trabaho? Magtao nin halimbawa.

¹⁰ Dinagka man ni Jesus an mga disipulo na padagos na ‘hanapon nguna an katanosan nin Dios.’ (Mat. 6:33) Nangangahulogan ini na an pamantayan ni Jehova sa kun ano an tama asin sala an susunodon niato imbes na an pamantayan nin tawo. (Basahon an Isaias 55:8, 9.) Natatandaan gayod nindo na kan nakaaging panahon, may mga nagtatanom nin tabako o nagpapabakal nin mga produkto kaiyan, nagsasanay sa iba sa pakikigiera, o naggigibo asin nagpapabakal nin mga armas para sa giera. Pakaaram kan katotoohan, nagdesisyon an kadaklan na salidahan an trabaho ninda tanganing makualipikar para sa bautismo.—Isa. 2:4; 2 Cor. 7:1; Gal. 5:14.

¹¹ An sarong halimbawa iyo si Andrew. Kan si Jehova mamidbid nia asin kan saiyang agom, nagdesisyon sindang maglingkod sa saiya. Gustohon ni Andrew an trabaho nia pero binayaan nia iyan. Taano? Huli ta sia nagtatrabaho sa sarong organisasyon na bakong neutral asin determinado siang enoton an katanosan nin Dios. Kan si Andrew maghale sa trabahong iyan, duwa an aki nia, mayo sia nin ginaganar, asin an kuarta nia igo na sana para sa pirang bulan. Sa punto de vista nin tawo, sia garo baga mayo nin ‘mana.’ Nagtiwala sia sa Dios asin naghanap nin trabaho. Sa paggirumdom nia sa nakaagi, napatunayan nia asin kan saiyang pamilya na bakong halipot an kamot ni Jehova. (Isa. 59:1) Huli sa pagpapadanay nindang mag-agom nin simpleng buhay, nagkapribilehio pa ngani sindang maglingkod nin bilog na panahon. “May mga panahon na nahahadit kami dapit sa pinansial, istaran, salud, pati paggurang,” an sabi nia. “Alagad si Jehova pirmeng yaon tanganing tabangan kami. . . . Mayong duda nanggad na  masasabi niamo na an paglilingkod ki Jehova iyo talaga an pinakanoble asin pinakanakakakontentong gibohon nin tawo.” *—Par. 12:13.

12. Anong kualidad an kaipuhan sa pag-enot niato kan mga pamantayan nin Dios? Magsambit nin lokal na mga halimbawa.

¹² Si Jesus nagsabi sa mga disipulo: “Kun igua kamo nin pagtubod na siring sa sarong pisog nin mostaza, masasabihan nindo ining bukid, Maghale ka digdi pasiring duman; asin iyan mahale; asin dai nin anoman na dai nindo maguiguibo.” (Mat. 17:20) Mahihimo daw nindong enoton an mga pamantayan nin Dios kun maresulta iyan sa mga kadepisilan? Kun dai kamo nakakasierto kun baga magigibo nindo iyan, makipag-olay sa mga kakongregasyon nindo. Mayong duda na magiginhawahan kamo sa espirituwal pakadangog nindo kan mga eksperyensia ninda.

Pagpahalaga sa Espirituwal na mga Probisyon ni Jehova

13. Kun nagmamaigot kita sa paglilingkod ki Jehova, ano an maaasahan niato kun dapit sa espirituwal na mga probisyon?

¹³ Kun pinapahalagahan nindo an pribilehiong paglingkodan si Jehova, makakasierto kamo na itatao nia an mga pangangaipo nindo sa pisikal asin espirituwal, kun paanong sinustentohan nia an mga Levita. Isip-isipa si David. Dawa ngani sia nasa sarong kueba, nakakasierto sia na susustentohan sia nin Dios. Makakasarig man kita ki Jehova dawa kun sa heling niato mayo nang makakatabang sa sato. Tandaan na kan magduman si Asaf sa kahangahangang “santuario nin Dios,” nasabotan nia kun ano an nakakapapurisaw sa saiya. (Sal. 73:17) Kaagid kaiyan, kaipuhan tang magdolok sa Dios bilang Gikanan kan satong espirituwal na kakanon. Sa siring, ipinapaheling niato an pagpahalaga sa satong pribilehio na paglingkodan an Dios ano man an satong kamugtakan. Bilang resulta, ipinapaheling niato na si Jehova an kahirasan niato.

14, 15. Ano an maninigong magin reaksion niato kun may itinataong orog na liwanag dapit sa nagkapirang teksto, asin taano?

¹⁴ Ano an reaksion nindo kun si Jehova, na Gikanan nin espirituwal na kaliwanagan, nagpapasirang nin liwanag dapit sa “magña hararom na bagay nin Dios” na nasa Biblia? (1 Cor. 2:10-13) Marahayon na halimbawa an reaksion ni Pedro sa sinabi ni Jesus sa mga parasunod Nia: “Kun dai kamo magkarakan kan laman kan Aki nin tauo, asin magirinom kan saiyang dugo, dai kamo nin buhay sa saindo.” Huling literal an pakasabot dian kan dakol na disipulo, sinda nagsabi: “Mapawot [“labi-labi kanakakakubhan,” NW] an tataramon na ini; siisay an makakadagñog kaiyan?” Sinda “nagbaraya saiya.” Alagad sinabi ni Pedro: “Kagurangnan, sa kiisay kami paduduman? Ika an igua kan magña tataramon nin buhay na dai nin katapusan.”—Juan 6:53, 60, 66, 68.

¹⁵ Dai lubos na nasabotan ni Pedro an sinabi ni Jesus dapit sa pagkakan kan Saiyang laman asin pag-inom kan Saiyang dugo. Alagad an apostol nagsarig sa Dios para sa espirituwal na kaliwanagan. Kun nagigin mas maliwanag an espirituwal na katotoohan dapit sa sarong bagay, pinagmamaigotan daw nindong saboton an pundamental na mga dahelan sono sa Kasuratan kun taano ta ginibo an pagliliwat? (Tal. 4:18) An mga taga Berea kan enot na siglo nag-ako kan tataramon na “igwa nin dakulaon na pagmawot nin isip, na maingat na sinisiyasat an Kasuratan aroaldaw.” (Gibo 17:11, NW) Paagi sa pag-arog sa sainda, mas mararom an pagpahalaga nindo sa pribilehio na paglingkodan si Jehova asin na sia an magin kahirasan nindo.

Pag-agom Dian Sana sa Kagurangnan

16. Paano an Dios magigin kahirasan niato kun dapit sa pagboot na nasa 1 Corinto 7:39?

¹⁶ An saro pang paagi na kaipuhan girumdomon nin mga Kristiano an mga katuyohan nin Dios iyo an pag-aplikar kan instruksion kan Biblia na mag-agom ‘dian sana sa Kagurangnan.’ (1 Cor. 7:39) Dakol an nagdesisyon na magdanay na daing agom imbes na baliwalaon an hatol na ini nin Dios. Sinda maboot na aatamanon nin Dios. Ano an ginibo ni David kan sia mamondo asin garo baga mayo nin siisay man na makakatabang sa saiya? “Sa atubang [nin Dios] papauarakon ko an sakuyang paghagad,” an sabi nia. “Sa atubang nia ipagbabareta ko an sakuyang kasakitan. Kun an sakuyang espiritu nagmomondo sa [irarom] nin boot ko.” (Sal. 142:1-3) Tibaad arog  man kaiyan an namatean ni propeta Jeremias, na dakol na dekadang maimbod na naglingkod sa Dios bilang mayong agom. Tibaad gusto nindong estudyaran an halimbawa nia sa kapitulo 8 kan librong An Tataramon nin Dios Para sa Sato Paagi ki Jeremias.

17. Ano an ginigibo nin sarong sister na daing agom kun sia namomondo paminsanminsan?

¹⁷ “Nungka akong nagdesisyon na magdanay na daing agom,” an sabi nin sarong sister na taga Estados Unidos. “Gusto ko man na mag-agom kun mamidbid ko na an tamang lalaki. Hiningoa kan sakong bakong kapagtubod na ina na kombensiron ako na magpakasal sa minsan siisay na sana na mag-ilusyon sa sako. Hinapot ko sia kun baga gusto niang sia an manimbag kun bakong marahay an magin resulta kan pag-agom ko. Dai naghaloy, naheling nia na ako may marahay na trabaho, naaasikaso an sadiri, asin maogma. Nagpondo na sia sa pamimirit sa sako.” Kun beses, medyo namomondo an sister na ini. “Sa mga panahon na iyan,” an sabi nia, “pinagmamaigotan kong magsarig ki Jehova. Nungka nia akong pinapabayaan.” Ano an nakakatabang sa saiya na magtiwala ki Jehova? “An pamibi nakakatabang sa sako na mamatean na an Dios tunay asin na nungka akong nagsosolo. An Kaharohalangkawe naghihinanyog, kaya taano ta dai ko mamamatean na ako may dignidad asin magayagaya?” Huling may pagsarig na “orog pang mapalad [‘maogma,’ NW] an nagtatao ki sa nagaako,” sia nagsabi: “Pinagmamaigotan kong itao an sakong panahon asin kosog tanganing tabangan an iba, na dai nag-aasa nin ano man bilang balos. Kun iniisip ko, ‘Ano an puede kong gibohon tanganing matabangan an tawong ini?’ nakakamate ako nin panglaog na kagayagayahan.” (Gui. 20:35) Iyo, si Jehova an kahirasan nia, asin ipinaggagayagaya nia an saiyang pribilehio na paglingkodan sia.

18. Sa anong paagi puede kamong magin kahirasan ni Jehova?

¹⁸ Ano man an kamugtakan nindo, ikakapaheling nindo na an Dios an kahirasan nindo. Mantang ginigibo nindo iyan, mapapabilang kamo sa maogmang banwaan nia. (2 Cor. 6:16, 17) Huli kaiyan, kamo puedeng magin kahirasan ni Jehova, arog kan iba kan nakaaging panahon. (Basahon an Deuteronomio 32:9, 10.) Kun paanong an Israel nagin an kahirasan nin Dios sa tahaw kan mga nasyon, kamo puede niang midbidon bilang sadiri nia asin mamomoton na atamanon.—Sal. 17:8.

[Nota sa Ibaba]

Ano an Isisimbag Nindo?

Paano nindo ikakapaheling na si Jehova an kahirasan nindo

• paagi sa paghanap nguna sa Kahadean nin Dios asin sa saiyang katanosan?

• paagi sa pagpaheling nin pagpahalaga sa espirituwal na kakanon?

• paagi sa pagsunod sa pagboot nin Dios na mag-agom dian sana sa Kagurangnan?

[Mga Hapot Para sa Pag-adal]

[Blurb sa pahina 13]

Si Jehova an nagigin kahirasan niato kun an paglilingkod sa saiya an pangenot sa sato

[Ritrato sa pahina 15]

Nakakaparigon sa boot an halimbawa ni Jeremias