Mga Hapot Hale sa mga Parabasa

Paano niato sasaboton an impormasyon asin mga numero na nasa taonan na report sa paglilingkod?

Kada taon, inaantisipar niato an report sa paglilingkod na ipinupublikar sa Yearbook. Nakakaogmang maaraman kun ano an nagibo kan banwaan ni Jehova bilang grupo sa pambilog na kinaban na paghuhulit asin pagtotokdo kan Kahadean. Alagad tanganing makinabang nin lubos sa report, kaipuhan na tama an pakasabot niato sa mga impormasyon saka kaipuhan na rasonable an pagmansay niato sa mga numero na yaon dian. Estudyare an pirang halimbawa.

Service year. Ini poon sa Setyembre nin sarong taon sagkod sa Agosto nin masunod na taon. An Yearbook igwa kan report para sa sinundan na taon nin paglilingkod. Sa siring, an 2011 Yearbook igwa kan report para sa 2010 na taon nin paglilingkod, na poon kan Setyembre 1, 2009 sagkod Agosto 31, 2010.

Peak publishers and average publishers. Kaiba sa “publishers” an bautisadong mga Saksi ni Jehova saka an mga dai pa bautisado na nagin kualipikado bilang parahulit kan Kahadean. An “peak publishers” iyo an pinakahalangkaw na bilang nin nagreport sa arin man na bulan kan taon nin paglilingkod asin puedeng kaiba an nahuring mga report na dai ikinaiba sa report kan sinundan na bulan. Huli kaini, an sarong parahayag puedeng ibilang na duwa. Minsan siring, dai kaibanan sa pinakahalangkaw na bilang an mga parahayag na nakikabtang sa ministeryo alagad dai nakareport sa tamang panahon. Idinodoon kaini na importante na an kada parahayag magreport tolos kada bulan. An “average publishers” iyo an promedyong bilang kan mga parahayag na nagreport kan oras ninda sa ministeryo kada bulan.

Total hours. Segun sa 2011 Yearbook, labing 1.6 bilyones na oras an ginamit kan Mga Saksi ni Jehova sa ministeryo sa langtad. Minsan siring, an total na bilang na iyan dai nagrerepresentar sa gabos na oras na ginamit niato sa pagsamba, huling dai dian kaiba an oras na regular tang ginagamit sa mga aktibidad na arog baga nin pagpastor, pag-atender sa mga pagtiripon, asin personal na pag-adal sa Biblia saka paghorophorop.

Money spent. Durante kan 2010 na taon nin paglilingkod, labing $155 milyones an ginastos kan Mga Saksi ni Jehova para sa mga espesyal payunir, misyonero, asin nagbibiaheng paraataman sa mga destino ninda sa paglilingkod sa langtad. Minsan siring, dai dian kaiba an gastos sa pag-imprenta niato kan mga publikasyon na basado sa Biblia, ni an ginastos para sa labing 20,000 na boluntaryo sa Bethel na nasa mga sangang opisina sa bilog na kinaban.

Memorial partakers. Ini an bilang nin mga bautisado na nagkakan asin nag-inom kan mga emblema sa Memorial sa bilog na kinaban. An total na bilang daw na ini nagrerepresentar sa bilang nin mga linahidan na yaon pa sa daga? Dai man. Dakol na bagay an puedeng magin dahelan na an nagkapira maghona na sinda may langitnon na pag-apod, arog baga nin dating mga paniniwala sa relihion o pagkaigwa pa ngani nin diperensia sa isip o emosyon. Huli kaini, mayo nin paagi na maaraman niato an eksaktong bilang kan mga linahidan na yaon pa sa daga; ni kaipuhan man niatong aramon iyan. An Namamahalang Grupo mayo nin lista kan mga ngaran kan nagkakakan asin nag-iinom kan mga emblema sa Memorial. *

An aram niato iyo na an nagkapira sa linahidan na “magña oripon nin satong Dios” yaon pa sa daga kun butasan na an mapanglaglag na mga doros kan dakulang kahorasaan. (Kap. 7:1-3) Sagkod na iyan dai pa nangyayari, an mga linahidan an mangengenot sa gibohon na dokumentadong marhay sa satong taonan na report sa paglilingkod—an pinakamahiwas na paghuhulit asin pagtotokdo sa kasaysayan nin tawo.

[Nota sa Ibaba]