Lubos na Makikabtang sa Dakulang Espirituwal na Pag-ani

‘Magin dakol an ginigibo sa gibohon kan Kagurangnan.’—1 COR. 15:58.

1. Anong imbitasyon an ipinaabot ni Jesus sa saiyang mga disipulo?

MANTANG nagbabaklay si Jesus sa rehion nin Samaria sa paghinanapos kan 30 C.E., nagpahingalo nguna sia sa sarong bubon harani sa banwaan nin Sicar. Duman sinabi nia sa saiyang mga disipulo: “Tingagan an saindong mga mata asin helinga an kaomahan, ta iyan maputi na tanganing anihon.” (Juan 4:35) An pinanonongdan ni Jesus, bakong literal na pag-ani, kundi espirituwal na pagtipon sa mga tama an kamugtakan nin puso na magigin mga parasunod nia. An saiyang mga sinabi garo man sana pangapodan na humiro. Kadakol kan dapat gibohon asin kadikit sana an panahon tanganing magibo iyan!

2, 3. (a) Ano an nagpaparisa na nabubuhay na kita sa panahon nin pag-ani? (b) Ano an totokaron kan artikulong ini?

² An mga sinabi ni Jesus manongod sa pag-ani may espesyal na kahulogan para sa satong panahon. Nabubuhay kita sa panahon na an pambilog na kinaban na oma nin katawohan “maputi na tanganing anihon.” Taon-taon, minilyon an nag-aako kan imbitasyon na kumua kan mga katotoohan na nagtatao nin buhay, asin rinibong bagong disipulo an nababautismohan. Igwa kita kan pribilehio na makikabtang sa pinakadakulang pag-ani kasuarin man, na pinamamahalaan kan Kagurangnan kan anihon, si Jehova Dios. ‘Dakol daw an ginigibo’ nindo sa pag-aaning ini?—1 Cor. 15:58.

³ Durante kan tolo may kabangang taon na ministeryo ni Jesus sa daga, sinanay nia an saiyang mga disipulo sa papel ninda bilang mga paraani. Totokaron kan artikulong ini an tolo sa dakol na mahalagang leksion na itinokdo ni Jesus sa saiyang mga disipulo. An kada leksion nagtatampok nin kualidad na may dakulang halaga sa sato mantang pinagmamaigotan niatong gibohon an satong pinakamakakaya sa pagtipon sa mga disipulo sa presenteng panahon. Pag-olayan niato nin saro-saro an mga kualidad na ini.

Mahalagang Marhay an Kapakumbabaan

4. Paano iinilustrar ni Jesus an halaga nin kapakumbabaan?

⁴ Iladawan sa isip an eksena: Nagdiriskutiran pa sana an mga disipulo kun siisay sa sainda an pinakanakakalabi. Posibleng marhay na heling-heling pa sa lalawgon ninda an raot nin boot asin kawaran nin tiwala sa lambang saro. Kaya, sarong aki an inapod asin pinatindog ni Jesus sa tahaw ninda. Mantang nakasentro an atension sa aki, sia nagsabi: “An siisay man na magpakumbaba [o, “an siisay man na ginigibong sadit an saiyang sadiri,” Byington] arog kan saday na aking ini iyo an pinakadakula sa kahadean kan kalangitan.” (Basahon an Mateo 18:1-4.) Imbes na mag-isip arog kan sa kinaban, na minamansay an sarong tawo basado sa kapangyarihan, kayamanan, asin posisyon nia, kinaipuhan kan mga disipulo na maintindihan na an saindang pagigin dakula nakadepende sa ‘paggibo ninda sa saindang sadiri na sadit’ sa pagheling nin iba. Bebendisyonan asin gagamiton sinda ni Jehova solamente kun nagpapaheling sinda nin tunay na kapakumbabaan.

5, 6. Taano ta dapat kamong magin mapakumbaba tanganing lubos na makapakikabtang sa pag-aani? Iilustrar.

⁵ Sagkod sa panahon na ini, an dakol sa kinaban idinudusay an saindang buhay sa pagmamaigot na magkaigwa nin kapangyarihan, kayamanan, asin posisyon. Bilang resulta, kadikit sana o mayo na sindang panahon para sa espirituwal na intereses. (Mat. 13:22) Sa kabaliktaran, ikinakaogma kan  banwaan ni Jehova na ‘gibohon na sadit an saindang sadiri’ sa pagheling nin iba tanganing kamtan an bendisyon asin pag-oyon kan Kagurangnan kan anihon.—Mat. 6:24; 2 Cor. 11:7; Fil. 3:8.

⁶ Estudyare an halimbawa ni Francisco, na magurang sa kongregasyon sa Timog Amerika. Kan sia hoben pa, nagpondo sia sa pag-eskuela sa unibersidad tanganing magpayunir. “Pag-abot nin panahon, kan ako nakatrato nang pakasal,” an sabi nia, “makakakua kutana ako nin trabaho na puedeng magtao nin mas maginhawang buhay sa agom ko asin sa sako. Pero, nagdesisyon kaming pasimplehon an samong buhay asin magkaibanan na magpadagos sa bilog na panahon na paglilingkod. Kan huri, nagkaigwa kami nin mga aki, asin nagin mas depisil an buhay mi. Alagad tinabangan kami ni Jehova na magdanay sa samong desisyon.” Si Francisco nagkongklusyon: “Sa laog nin labing 30 taon, nagin pribilehio ko na maglingkod bilang magurang sa kongregasyon, apuera pa sa dakol na iba pang espesyal na asignasyon. Nungka niamong pinagbasolan an pamumuhay nin simple.”

7. Paano mo prinobaran na iaplikar an hatol sa Roma 12:16?

⁷ Kun hahaboan mo an “haralangkaw na bagay” kan kinaban na ini asin ‘magpapagiya ka sa harababang bagay,’ makakaasa ka man na magkakamit ka nin dakol pang bendisyon asin pribilehio sa pag-aani.—Roma 12:16; Mat. 4:19, 20; Luc. 18:28-30.

May Marahay na mga Resulta an Kaigotan

8, 9. (a) Sumaryohon an ilustrasyon ni Jesus dapit sa mga talento. (b) Kiisay nangorognang nakakaparigon an ilustrasyon na ini?

⁸ An saro pang kualidad na kaipuhan niato tanganing lubos na makapakikabtang sa pag-aani iyo an kaigotan. Iinilustrar ini ni Jesus sa parabola dapit sa mga talento. * An ilustrasyon na iyan manongod sa sarong lalaki na, bago magduman sa ibang daga, ipinagkatiwala an saiyang mga pagsasadiri sa tolong oripon. Limang talento an itinao sa enot na oripon, duwa sa ikaduwang oripon, asin saro sa ikatolong oripon. Pagkahale kan saindang kagurangnan, an enot na duwang oripon naghiro na may kaigotan asin tolos na “ipinagnegosyo” an saindang mga talento. Sa kabaliktaran, an ikatolong oripon “hugakon.” Itinalbong nia sa daga an saiyang talento. Pakabalik kan lalaki, ipinaniwala nia sa enot na duwang oripon an “dakol na bagay” bilang balos sa sainda. Kinua nia an talento na itinao nia sa ikatolong oripon asin pinalayas an oripon na iyan sa saiyang harong.—Mat. 25:14-30.

⁹ Daing duda na minamawot nindong maarog an maigot na mga oripon sa parabola ni Jesus asin makikabtang sa paggibo nin mga disipulo sa pinakalubos na magigibo nindo. Alagad paano kun nalilimitaran nanggad nin mga kamugtakan an nagigibo nindo ngonyan? Tibaad huli sa masakit na kamugtakan sa ekonomiya, napipiritan kamong  magtrabaho nin halawig tanganing sustentohan an saindong pamilya. O tibaad may edad na kamo asin maluya na an saindong salud. Kun arog kaiyan an kamugtakan nindo, an parabola dapit sa mga talento igwa nin nakakaparigon na mensahe sa saindo.

10. Paano nagpaheling nin pagkarasonable an kagurangnan sa parabola dapit sa mga talento, asin taano ta nakakaparigon ini sa boot mo?

¹⁰ Mangnohon na aram kan kagurangnan sa parabola na manlaenlaen an potensial kan kada saro sa saiyang mga oripon. Ipinarisa nia ini kan an mga talento itao nia sa “lambang saro segun sa saiyang kakayahan.” (Mat. 25:15) Arog kan inaasahan, mas dakol an ibinunga kan enot kisa sa ikaduwang oripon. Minsan siring, parehong minidbid kan kagurangnan an maigot na paghihingoa kan duwang oripon na ini paagi sa pag-apod sa mga oripon na ini na “marahay asin maimbod” asin pagtao sa sainda nin parehong balos. (Mat. 25:21, 23) Kaagid kaiyan, aram kan Kagurangnan kan anihon, si Jehova Dios, na an saindong mga kamugtakan nakakaapektar sa magigibo nindo sa paglilingkod sa saiya. Mimidbidon nia an saindong bilog na kalag na paghihingoa na paglingkodan sia asin babalosan nia kamo oyon dian.—Mar. 14:3-9; basahon an Lucas 21:1-4.

11. Iilustrar kun paano an kaigotan sa masakit na mga kamugtakan puedeng magresulta sa kadakol na bendisyon.

¹¹ Ipinapaheling kan halimbawa ni Selmira, sarong Kristiana na nag-iistar sa Brazil, na an pagigin maigot sa paglilingkod sa Dios dai nakadepende sa marahay na mga kamugtakan sa buhay. Beinteng taon na an nakaagi, an agom ni Selmira nabadil sa sarong harabonan, na huli kaiyan kaipuhan niang padakulaon nin solo an tolo nindang aki. Kaiba sa saiyang pagigin katabang sa harong an pagtrabaho nin dakol na oras asin mapagal na pagbiahe saka pakikisusoan sa pampublikong mga lunadan. Sa ibong kan mga kasakitan na ini, ikinaareglo nia an mga bagay-bagay tanganing makapagregular payunir. Kan huri, an duwa sa tolo niang aki nagpayunir man. “Sa nag-aging mga taon, labing 20 katawo an inadalan ko sa Biblia asin nagin miembro sinda kan sakong ‘pamilya,’” an sabi nia. “Sagkod ngonyan, namomotan asin katood ninda ako. Iyan sarong kayamanan na dai mababakal nin kuarta.” Siertong binalosan kan Kagurangnan kan anihon an maigot na paghihingoa ni Selmira!

12. Paano kita makakapaheling nin kaigotan sa paghuhulit?

¹² Kun an presenteng mga kamugtakan sa buhay nakakalimitar sa panahon nindo para sa ministeryo, puede pa man giraray nindong pagmaigotan na dagdagan an saindong kabtang sa pag-aani paagi sa paghingoang magin mas mabunga an saindong ministeryo. Kun maingat nindong iinaaplikar an praktikal na mga suhestion na itinatao sa semanal na Pagtiripon sa Paglilingkod, mapapaoswag nindo an saindong abilidad sa paghuhulit saka mapoprobaran an bagong mga oportunidad sa pagpapatotoo. (2 Tim. 2:15) Siring man, kun posible, puede nindong iiskedyul sa ibang panahon o isakripisyo an bakong mahalagang mga aktibidad tanganing masuportaran nindo nin regular an mga areglo kan kongregasyon sa paglilingkod sa langtad.—Col. 4:5.

13. Ano an pangenot na kaipuhan sa pagpatalubo asin pagpadanay nin kaigotan?

¹³ Girumdomon na an kaigotan naggigikan sa mapag-apresyar na puso. (Sal. 40:8) An ikatolong oripon na nasambitan sa parabola ni Jesus takot sa saiyang kagurangnan, asin minansay nia ini na estrikto asin bakong makatanosan. Huli kaiyan, itinalbong kan lalaki an saiyang talento imbes na gamiton iyan tanganing padakolon an pagsasadiri kan kagurangnan nia. Tanganing malikayan an kaagid na kapabayaan, kaipuhan niatong magpatalubo asin magpadanay nin dayupot na relasyon sa Kagurangnan kan anihon, si Jehova. Magtagama nin panahon sa pag-adal asin paghorophorop sa saiyang nakakaakit na mga kualidad—an pagkamoot, pakatios, asin pagkaherak. Sa paaging iyan, gikan sa puso kamong mapapahiro na gibohon an saindong pinakamakakaya sa paglilingkod sa saiya.—Luc. 6:45; Fil. 1:9-11.

“Magpakabanal Kamo”

14. Anong mahalagang kahagadan an dapat na maabot kan mga gustong magin paraani?

¹⁴ Sa pagkotar sa Hebreong Kasuratan, sinambit ni apostol Pedro an malinaw na kabotan nin Dios para sa mga lingkod nia sa daga paagi sa pagsabing: “Kaoyon kan Banal na nag-apod sa saindo,  magin man kamong banal sa gabos nindong paggawe, huli ta nasusurat: ‘Magpakabanal kamo, huli ta ako banal.’” (1 Ped. 1:15, 16; Lev. 19:2; Deut. 18:13) Idinodoon kaini na an mga paraani kaipuhan na magin malinig sa moral asin espirituwal. Maaabot niato an mahalagang kahagadan na iyan paagi sa paggibo nin mga lakdang na mahugasan sa piguratibong paagi. Paano iyan magigibo? Paagi sa tabang kan katotoohan kan tataramon nin Dios.

15. Ano an kayang gibohon para sa sato kan katotoohan kan tataramon nin Dios?

¹⁵ An katotoohan kan tataramon nin Dios iinaagid sa tubig na nakakalinig. Halimbawa, isinurat ni apostol Pablo na an kongregasyon nin linahidan na mga Kristiano malinig sa pagheling nin Dios, siring sa mabining nobya para ki Cristo, na lininigan iyan “sa paghugas nin tubig paagi sa tataramon, tanganing . . . , iyan magin banal asin daing kanawayan.” (Efe. 5:25-27) Bago kaiyan, nasambitan man ni Jesus an dapit sa nakakalinig na kapangyarihan kan tataramon nin Dios, na ibinalangibog nia. Sa saiyang mga disipulo, si Jesus nagsabi: “Kamo malinig na huli kan tataramon na isinabi ko sa saindo.” (Juan 15:3) Huli kaini, an katotoohan kan tataramon nin Dios may kapangyarihan na maglinig sa moral asin espirituwal na paagi. Aakoon nin Dios an satong pagsamba solamente kun totogotan niato na linigon kita kan katotoohan nia.

16. Paano kita makakapagdanay na malinig sa espirituwal asin moral?

¹⁶ Sa siring, tanganing magin mga paraani sa anihon nin Dios, hinahale nguna niato sa satong buhay an gabos na gibohon na nakakaati sa moral asin espirituwal. Iyo, tanganing magdanay na kualipikado sa pribilehio nin pagigin paraani, dapat kitang magin arogan sa pagsuportar sa halangkaw na mga pamantayan ni Jehova sa moral asin espirituwal. (Basahon an 1 Pedro 1:14-16.) Kun paanong pirme niatong tinatawan nin atension an satong pisikal na kalinigan, dapat man kitang regular na magpasakop sa nakakalinig na impluwensia kan katotoohan kan tataramon nin Dios. Kalabot digdi an pagbasa sa Biblia asin pag-atender sa Kristianong mga pagtiripon. Nangangahulogan man iyan nin sinserong paghihingoa na iaplikar sa satong buhay an mga pagirumdom nin Dios. Makakatabang iyan sa sato na labanan an makasalan na mga tendensia niato asin an nakakaating mga impluwensia kan kinaban na ini. (Sal. 119:9; Sant. 1:21-25) Iyo, nakakaranga nanggad na maaraman na sa tabang kan katotoohan kan tataramon nin Dios, puede kitang ‘mahugasan’ dawa nakagibo kita nin magabat na kasalan!—1 Cor. 6:9-11.

17. Tanganing magdanay na malinig, anong hatol sa Biblia an dapat niatong himateon?

¹⁷ Inaako daw nindo sa saindong buhay an nakakalinig na impluwensia kan tataramon nin katotoohan nin Dios? Halimbawa, ano an reaksion nindo kun pinapatanidan kamo dapit sa mga peligro kan nakakaraot na aling-alingan kan kinaban na ini? (Sal. 101:3) Linilikayan daw nindo an dai kinakaipuhan na pakikiiba sa mga kaeskuela asin katrabaho na bako nindong kapagtubod? (1 Cor. 15:33) Sinsero daw nindong hinihingoa na mahale an personal na mga kaluyahan na puedeng makaati sa pagheling sa saindo ni Jehova? (Col. 3:5) Nagdadanay daw kamong siblag sa iriwal sa politika kan kinaban na ini asin sa pagigin nasyonalistiko na maheheling sa dakol na isport?—Sant. 4:4.

18. Paano an pagigin malinig sa moral asin espirituwal makakatabang sa sato na magin mabungang mga paraani?

¹⁸ An saindong maimbod na pagkuyog sa siring na mga bagay magkakaigwa nin marahayon na mga resulta. Ikinomparar ni Jesus an saiyang linahidan na mga disipulo sa mga sanga nin ubas, asin nagsabi sia: “An lambang sanga sa sako na dai nagbubunga hinahale [kan sakong Ama], asin an lambang nagbubunga linilinig nia, tanganing iyan magbunga nin orog.” (Juan 15:2) Mantang  kinukuyog nindo an naglilinig na tubig nin katotoohan sa Biblia, mas dakol pa ngani an magigin bunga nindo.

Mga Bendisyon Ngonyan Asin sa Ngapit

19. Paano binendisyonan an mga disipulo ni Jesus sa paghihingoa ninda bilang mga paraani?

¹⁹ Kan huri, an maimbod na mga disipulo na naghimate sa pagsasanay ni Jesus tinawan nin kapangyarihan kan banal na espiritu kan Pentecostes 33 C.E. tanganing magin mga saksi “sagkod sa kaporoporohi kan daga.” (Gibo 1:8) Padagos sindang naglingkod bilang mga miembro kan namamahalang grupo, mga misyonero, asin nagbibiaheng kamagurangan, saka nagkaigwa sinda nin mahalagang marhay na papel sa paghulit kan maogmang bareta “sa gabos na linalang sa sirong nin langit.” (Col. 1:23) Binendisyonan nanggad sinda, asin nagtao nanggad sinda nin kagayagayahan sa iba!

20. (a) Anong mga bendisyon an nakamtan mo huli sa lubos na pakikikabtang sa espirituwal na pag-ani? (b) Ano an determinado mong gibohon?

²⁰ Iyo, paagi sa pagpaheling nin kapakumbabaan, kaigotan, asin suporta sa halangkaw na mga pamantayan kan Tataramon nin Dios, padagos kitang magkakaigwa nin lubos asin makahulogan na kabtang sa dakulang espirituwal na pag-ani na nangyayari ngonyan. Minsan ngani dakol an nakakamate nin kakologan asin pangluluya nin boot huli sa pagkamateryalistiko asin sa pagkamahilig sa kaorogmahan kan kinaban na ini, naeeksperyensiahan niato an tunay na kagayagayahan asin pagkakontento. (Sal. 126:6) Orog sa gabos, an satong “pagpapagal bakong sayang sana may koneksion sa Kagurangnan.” (1 Cor. 15:58) Daing sagkod kitang tatawan nin balos kan Kagurangnan kan anihon, si Jehova Dios, huli sa ‘satong gibo asin sa pagkamoot na ipinaheling niato para sa saiyang ngaran.’—Heb. 6:10-12.

[Nota sa Ibaba]

Nagigirumdoman daw Nindo?

Mantang pinagmamaigotan nindo na lubos na makikabtang sa pag-aani . . .

• taano ta mahalagang marhay na magpaheling nin kapakumbabaan?

• paano nindo mapapatalubo asin mapagdadanay an kaigotan?

• taano ta mahalaga na magdanay na malinig sa moral asin espirituwal?

[Mga Hapot Para sa Pag-adal]

[Ritrato sa pahina 17]

An kapakumbabaan makakatabang sa sato na mamuhay nin simple na nakasentro sa Kahadean