Nanodan Ko an Kahulogan nin Buhay

Isinaysay ni Gaspar Martinez

Sa nagkapirang paagi, simple sana an estorya kan buhay ko bilang sarong pobre asin probinsianong aking lalaki na nagin marahay an buhay sa siudad. Alagad maheheling nindo na an kayamanan na natipon ko bako talaga an inasahan ko.

NAGDAKULA ako sa sarong probinsia na tagiltil an daga durante kan dekada nin 1930 sa rehion nin Rioja na nasa amihanan na España. Kan dies anyos na ako, kinaipuhan kong magpondo sa pag-eskuela, alagad kan panahon na iyan tatao na akong magbasa asin magsurat. Kaiba kan sakong anom na tugang na lalaki asin babae, ginamit ko an sakong mga aldaw sa mga oma sa pag-ataman nin mga karnero o pagkultibar kan samong saradit na lote.

Huli sa kadukhaan naghingoa kaming magkaigwa nin dakol na materyal na bagay. Naara kami sa mga mas lamang sa samo sa materyal. Pero, sarong beses sinabi kan obispo na an baryo mi “an pinakarelihiosong baryo sa saiyang diosesis.” Dai nia naisip kaidto na, pag-abot nin panahon, dakol an mabaya sa Katolisismo.

Paghanap sa Sarong Bagay na Orog Karahay

Pinakasalan ko si Mercedes, na taga duman man sa baryong iyan. Dai nahaloy, nagkaigwa kami nin aking lalaki na dapat asikasohon. Kan 1957, nagbalyo kami sa kaharaning siudad nin Logroño, asin pag-abot nin panahon nagbalyo man an bilog na kapamilya ko. Dai nahaloy, narealisar ko na huling mayo ako nin espesyal na pagsasanay bilang trabahador, dikit sana an posibilidad na makahanap ako nin trabaho na igo an sueldo. Inisip-isip ko kun saen ako makakakua nin paggiya. Pinonan kong magsiyasat sa lokal na libreriya, minsan ngani dai ko talaga aram kun ano an hahanapon ko.

Kan huri, nabaretaan ko an manongod sa sarong programa sa radio na nag-aalok nin pag-adal sa Biblia paagi sa surat. Tolos-tolos pagkatapos ko kan pag-adal na iyan, kinontak ako nin nagkapirang Ebanghelikong Protestante. Pagkatapos nin duwang beses na pagdalaw sa saindang lugar nin pagsamba, naheling ko an pagdinaraogan nin prominenteng mga miembro kan grupo. Dai na ako nagbalik, na nagkokongklusyon na parareho man sana an gabos na relihion.

An mga Kiskis Nahulog Gikan sa Sakong mga Mata

Kan 1964, sarong hoben na an ngaran Eugenio an nagdalaw sa samong harong. Sia saro sa Mga Saksi ni Jehova, sarong relihion na dai ko pa noarin man nadangog kaidto. Alagad gustong-gusto kong makipag-olay manongod sa Biblia. An paghona ko dakol na an kaaraman ko sa Kasuratan. Sinimbag ko sia na ginagamit an nagkapira sa mga teksto sa Biblia na nanodan ko sa sakong pag-adal paagi sa surat. Minsan ngani pinagmaigotan kong idepensa an nagkapirang doktrina kan Protestante, sa sakong puso dai talaga ako naniwala dian.

Pagkatapos nin duwang halawig na pag-oolay, inadmitir ko na ginamit ni Eugenio an Tataramon  nin Dios na siring sa eksperto. Nagngalas ako kun paano nia hinahanap an mga teksto asin kun paano sia nangangatanosan dapit sa aplikasyon kaiyan, minsan ngani sia mas daing gayo nin inadalan kisa sa sako. Ipinaheling sa sako ni Eugenio gikan sa Biblia na nabubuhay na kita sa huring mga aldaw asin sa dai na mahahaloy gigibohon kan Kahadean nin Dios na paraiso an daga. Napukaw an interes ko.—Sal. 37:11, 29; Isa. 9:6, 7; Mat. 6:9, 10.

Tolos akong nag-ako nin pag-adal sa Biblia. Haros gabos na nanodan ko bago, asin nagkaigwa iyan nin hararom na epekto sa sakong puso. Sarong bagong oportunidad an nabuksan para sa sako, na nagtao sa sako nin kapakipakinabang na buhay. Natapos na an sakong paghanap. Ngonyan an paghihingoa ko na mapaoswag an sakong kamugtakan sa sosyedad malinaw na bakong mahalaga, asin an sakong pagmamaigot na makakua nin supisyenteng trabaho bako nang gayong importante. Pati an helang asin kagadanan mismo mawawara na.—Isa. 33:24; 35:5, 6; Kap. 21:4.

Tolos-tolos kong sinabi sa sakong mga paryente an nanonodan ko, na entusiastikong ipinapaliwanag sa sainda na an Dios may panuga na gigibohon na paraiso an daga na dian puedeng mabuhay sagkod lamang an maimbod na mga tawo.

Inako kan Sakong Pamilya an Katotoohan sa Biblia

Dai nahaloy, mga dose sa samo an nagdesisyon na magtiripon kada Domingong hapon sa harong kan sakong amaon tanganing pag-olayan an mga panuga na nasa Biblia. Naggagamit kami nin duwa o tolong oras kada semana sa pag-orolay na ini. Kan maheling ni Eugenio na arog kaiyan kadakol an sakong mga paryente na interesado sa Biblia, iinareglar nia na tawan nin personal na atension an lambang pamilya.

Igwa pa ako nin ibang paryente sa Durango, sarong sadit na banwaan na mga 120 kilometros an rayo, na mayo nin nag-iistar na Saksi. Kaya pakalihis nin tolong bulan, duwang aldaw akong nagbakasyon tanganing dalawon sinda asin ipaliwanag an dapit sa sakong bago pa sanang makuang pagtubod. Kan panahon na iyan, mga sampulo sa samo an nagtitiripon kada banggi, asin nakikipag-olay ako sa sainda sagkod na mag-aagahon na. Sinda gabos naogmang marhay na maghinanyog. Kan matapos na an halipot kong pagdalaw, winalatan ko sinda nin nagkapirang Biblia asin literatura sa Biblia. Pagkatapos kaiyan, padagos an komunikasyon niamo.

Pag-abot kan mga Saksi sa Durango—na duman mayo pa nin siisay man na naghulit kaidto—nanompongan ninda an 18 katawo na entusiastikong naghahalat para sa pag-adal sa Biblia. Ikinaogma kan mga Saksi na mag-areglo nin sarong pag-adal sa Biblia sa kada pamilya.

Sagkod sa panahon na iyan, habo pa ni Mercedes na mag-adal, bakong huli ta nagduduwaduwa siang akoon an mga katokdoan sa Biblia kundi huli sa pagkatakot sa tawo. Kan panahon na iyan, ipinagbabawal sa España an gibohon kan Mga Saksi ni Jehova, kaya naisip nia na papahaleon kan mga autoridad an samong duwang aki sa eskuelahan asin kami gabos isisikwal kan sosyedad. Alagad kan maheling nia na an bilog na pamilya nag-aako kan katotoohan sa Biblia, gusto na man niang mag-adal.

Sa laog nin duwang taon, 40 miembro kan sakong pamilya an nagin Saksi asin nabautismohan bilang simbolo kan saindang pagdusay na maglingkod sa Dios. Iyo, an sakong pamilya nagkaigwa man nin pasohan asin katuyohan sa buhay na arog sa sako. An pagmate ko nagkamit ako nin sarong bagay na talagang kapakipakinabang. Binendisyonan kami nin abundang espirituwal na kayamanan.

An Buhay Nagin Mas Nakakakontento Mantang Naggugurang Ako

Sa suminunod na 20 taon, nagkonsentrar ako sa pagpadakula sa samong duwang aki asin pagtabang sa lokal na kongregasyon. Pagbalyo mi ni Mercedes sa Logroño, mga 20 pa sana an Saksi sa siudad na iyan na mga 100,000 an nag-iistar. Dai nahaloy, nagkaigwa ako nin dakol na paninimbagan sa kongregasyon.

Dangan, kan 56 anyos na ako, biglang isinera kan samong kompanya an pabrika na pinagtatrabahohan ko, kaya nawaran ako nin trabaho. Haloy ko nang minamawot na maglaog sa bilog na panahon na ministeryo, kaya inaprobetsaran ko an bagong kamugtakan na ini tanganing magpayunir. Kadikit sana an pension ko, asin bakong pasil na pagkaigoon iyan. Tinabangan ako ni Mercedes paagi sa pagkaigwa nin trabaho na paglinig. Nasuportaran mi an samong pamilya asin nungka kaming nagkulang kan kinakaipuhan na mga bagay. Payunir pa man  giraray ako, asin sa panapanahon nag-o-auxiliary payunir si Mercedes, na ikinakaogmang marhay an paghuhulit.

Pirang taon sana an nakaagi, regular na nagwawalat si Mercedes nin mga magasin sa sarong hoben na babae na an ngaran Merche na nag-adal sa Biblia kan sia aki pa. Binabasa ni Merche na may interes an satong literatura, asin narisa ni Mercedes na sa puso ni Merche may pagpapahalaga pa man giraray sia sa katotoohan sa Biblia. Sa katapustapusi, si Merche nag-ako nin pag-adal sa Biblia asin nag-oswag na marhay. Alagad an saiyang agom na si Vicente makosog mag-inom nin inomon na de alkohol asin mayo nin regular na trabaho. Huli kaiyan, dai nia nasusuportaran sa pinansial si Merche; nameligro an saindang pag-agoman huli sa sobrang pag-inom nia.

Isinuherir ki Merche kan sakong agom na kaolayon ako ni Vicente, asin sa katapustapusi kinaolay nia ako. Pagkatapos nin nagkapirang pagdalaw, nag-ako sia nin pag-adal sa Biblia. Nagpoon nang magbago si Vicente, na dai na nag-iinom sa laog nin nagkapirang aldaw sa sarong peryodo nin panahon. Dangan an dai nia pag-inom naglawig nin sarong semana o labi pa. Pag-abot nin panahon, nagpondo na talaga sia sa pag-inom. Risang-risa an pagrahay kan itsura nia, asin nagkasararo an saiyang pamilya. An bilog niang pamilya, kaiba an saiyang agom asin aking babae, nagtatao nin marahayon na suporta sa sadit na kongregasyon sa Canary Islands, na duman sinda nag-iistar ngonyan.

Paggirumdom sa Makahulogan na Buhay

Minsan ngani gadan na ngonyan an nagkapira sa sakong mga paryente na nakanood kan mga katokdoan sa Biblia dakol na taon na an nakaagi, an samong ekstendidong pamilya padagos na nagdadakol, asin kami abundang binebendisyonan nin Dios. (Tal. 10:22) Nakakakontento nanggad na maheling na haros gabos na nagpoon na mag-adal sa Biblia kaidtong 40 taon na an nakaagi—kaiba an saindang mga aki asin makoapo—padagos na maimbod na naglilingkod ki Jehova!

Dakolon na ngonyan an mga paryente ko na Saksi, asin dakol sa sainda an naglilingkod bilang mga magurang sa kongregasyon, ministeryal na lingkod, asin payunir. An matua kong aking lalaki asin an saiyang agom naglilingkod sa sangang opisina kan Mga Saksi ni Jehova sa Madrid, España. Kan ako magin Saksi, mga 3,000 kami kaidto sa España. Ngonyan kami labi nang 100,000. Lubos kong ikinakaogma an bilog na panahon na ministeryo, asin nagpapasalamat akong marhay sa Dios huli sa marahayon na buhay na paglilingkod sa saiya. Minsan ngani daing gayo ako nakapag-adal, nakakapaglingkod ako sa panapanahon bilang kasalihid na paraataman sa sirkito.

Pira sanang taon an nakaagi, nadiskobre ko na haros mayo na nin tawo sa baryo na duman ako nagdakula. Pag-abot nin panahon, huli sa kadukhaan napiritan an gabos na nag-iistar duman na bayaan an saindang mga oma asin harong tanganing maghanap nin mas marahay na buhay. Nakakaogma ta dakolon sa mga emigranteng iyan—kaiba na ako—an nakanompong nin espirituwal na kayamanan. Nanodan niamo na talagang may kahulogan an buhay asin na an paglilingkod ki Jehova nagtatao kan pinakadakulang kagayagayahan na maiisip.

[Ritrato sa pahina 32]

Haros bilog na pamilya ni Tugang na Martinez na nasa katotoohan