An Pagkooperar Nakakatabang sa Espirituwal na Pag-oswag

AN ESPIRITU nin pagkooperar kaipuhan kan mga nagmamawot na magkaigwa nin pamilya na espirituwal an kaisipan. Kan lalangon ni Jehova an enot na mag-agom, idinoon nia an pangangaipo na magkooperar. Kinaipuhan ni Eva na magtrabaho kaiba ni Adan bilang “komplemento” kaini. (Gen. 2:18) An pag-agoman maninigo na magin pagtinabangan, na dian an lalaki asin babae sinusuportaran an kada saro. (Ecl. 4:9-12) An pagkooperar kaipuhan man tanganing maotob an papel na itinao ni Jehova sa mga magurang asin aki.

Pampamilyang Pagsamba

Si Barry asin Heidi may limang aki. Narisa ninda na an pagtatarabangan tanganing magkaigwa nin pampamilyang pag-adal sa Biblia nakakatabang sa sainda na umoswag. Ipinaliwanag ni Barry: “Para sa pampamilyang pag-adal, sa panapanahon tinatawan ko nin halipot na mga asignasyon an mga aki. Pinapaandam ko sinda nin mga komento na basado sa mga artikulo sa Awake! Igwa man kami nin mga pagpraktis para sa paglilingkod sa langtad tanganing an lambang aki may andam na ipapakipag-olay.” Sinabi pa ni Heidi: “Gabos kami may listahan nin espirituwal na mga pasohan na gusto niamong maabot, asin sa panapanahon rinerepaso mi ini durante kan pampamilyang pag-adal tanganing maaraman mi kun anong pag-oswag na an nagibo mi.” Narisa man kan mag-agom na ini na an pagkaigwa nin espesipikong mga banggi na mayong telebisyon nagtatao sa bilog na pamilya nin oportunidad na magbasa.

Mga Pagtiripon kan Kongregasyon

Si Mike asin Denise nagpadakula nin apat na aki. Paano nakinabang an saindang pamilya sa pagtatarabangan? Si Mike nagsabi: “Kun minsan, dawa nagplano na kaming marhay nahuhuri pa man giraray kami, alagad narisa mi na an pagkooperar nakatabang sa samo na makaabot sa pagtiripon nin tama sa oras.” Si Denise nagpaliwanag: “Kan nagdadakula an mga aki, an lambang saro igwa nin mga gigibohon. Si Kim, an samong aking babae, nagtatabang sa pagluto asin pagpreparar kan lamesa.” Nagigirumdoman kan saindang aki na si Michael: “Kun Martes nin banggi igwa kami nin pagtiripon kan kongregasyon sa samong harong. Kaya naglilinig kami sa sala, naggagamit nin vacuum cleaner sa salog, asin inaandam mi an mga tukawan.” Si Matthew, na saro pa nindang aki, nagsabi man: “Sinesegurado ni Tatay na amay siang nakakapuli hale sa trabaho sa mga banggi na may pagtiripon tanganing mapangenotan nia kami sa pag-andam para sa pagtiripon.” Ano an mga resulta?

Bawi an Gabos na Paghihingoa

Si Mike nagsabi: “Kan 1987, kami ni Denise nagpoon na magpayunir. Kan panahon na iyan, tolo sa samong mga aki an kaibanan mi pa sa harong. An duwa sa sainda nagpayunir man, asin an iba nagtrabaho sa mga proyekto nin pagtogdok sa Bethel. An dugang pang nagpapagayagaya sa samo bilang pamilya iyo na natabangan niamo an 40 indibiduwal na magdusay asin magpabautismo. Nagkapribilehio man kami na magtrabaho bilang sarong pamilya sa mga proyekto nin pagtogdok, dawa sa ibang nasyon.”

Tunay nanggad, bawi an gabos na paghihingoa sa pagkooperar bilang sarong pamilya. Makakahanap daw kamo nin iba pang paagi na makakakooperar kamo sa lambang saro sa saindong pamilya? Makakaseguro kamo na an pagkaigwa nin espiritu nin pagkooperar makakatabang sa saindong pamilya na umoswag pa sa espirituwal.

[Ritrato sa pahina 28]

An mga pagpraktis nakakatabang tanganing umoswag sa ministeryo sa langtad