Mga Hapot Hale sa mga Parabasa

Kasuarin si Satanas pinalayas sa langit?—Kap. 12:1-9.

Minsan ngani an libro kan Biblia na Kapahayagan mayong sinasabi manongod sa eksaktong panahon na papalayason sa langit si Satanas, sinasambit nanggad kaiyan an sunod-sunod na pangyayari na makakatabang sa sato na matantsar kun kasuarin sia pinalayas sa langit. An enot sa mga pangyayaring iyan iyo an pagkamundag kan Mesiyanikong Kahadean. Kasunod kaiyan, “puminutok an guerra sa langit,” na nagresulta sa pagkadaog ni Satanas asin sa katapustapusi, sa pagpalayas sa saiya sa langit.

Maliwanag na ipinaparisa kan Kasuratan na 1914 an taon na natapos “an itinalaan na mga panahon kan mga nasyon” asin naestablisar an Kahadean. * (Luc. 21:24) Gurano kadali na suminunod dian an pagputok kan guerra sa langit, na nagresulta sa pagpalayas ki Satanas?

“An dragon [si Satanas] padagos na nakatindog sa atubangan kan babae na madali nang mangaki,” an sabi kan Kapahayagan 12:4, “tangani na, kun mangaki na sia, mahamil kaiyan an saiyang aki.” Ipinapaheling kaini na gusto ni Satanas na haleon tolos an bagong mamundag na Kahadean, pagkamundag mismo kaiyan sagkod sa mapupuede. Minsan ngani an paghiro ni Jehova nakaolang na maotob ni Satanas an saiyang maraot na intension, determinado asin daing ontok si Satanas sa saiyang paghihingoa na raoton an bagong maestablisar na Kahadean. Kun siring, rasonableng sabihon na dai na nagsayang nin panahon “si Miguel asin an saiyang mga anghel” sa paghiro na haleon sa langit “an dragon asin an mga anghel kaiyan” tanganing mayong mangyaring maraot sa Kahadean. Ipinaparisa kaini na an pagkadaog ni Satanas asin an pagpalayas sa saiya nangyari dai nahaloy pagkamundag kan Kahadean kan 1914.

An saro pang bagay na dapat pag-isipan iyo an pagbuhay liwat sa linahidan na mga Kristiano, na—arog kan ipinaparisa kan mga ebidensia sa Kasuratan—nagpoon dai nahaloy pagkaestablisar kan Kahadean. * (Kap. 20:6) Huling mayo sa linahidan na mga tugang ni Cristo an nasambitan na kaiba ni Jesus sa pakikipaglaban sa dragon asin sa mga anghel kaiyan, an guerra sa langit saka an pagpalayas ki Satanas asin sa mga demonyo nia posibleng natapos na kan magpoon an pagbuhay liwat sa mga tugang ni Cristo.

Kaya, kun siring, dai ihinahayag kan Biblia an eksaktong panahon kan pagpalayas sa langit ki Satanas asin sa saiyang mga demonyo. Minsan siring, malinaw na nangyari ini dai nahaloy pakapatukawa ki Jesu-Cristo sa trono sa langit kan 1914.

[Mga Nota sa Ibaba]