An mga Matanos Mag-oomaw sa Dios Sagkod Lamang
An mga Matanos Mag-oomaw sa Dios Sagkod Lamang
“An matanos gigirumdomon . . . An saiyang katanosan nagdadanay sagkod lamang.” —SAL. 112:6, 9.
1. (a) Ano an magigin maogmang ngapit kan gabos na matanos sa pagmansay nin Dios? (b) Anong hapot an minalataw?
MAKANGANGALAS nanggad an magigin ngapit kan gabos na tawo na matanos sa pagmansay nin Dios! Maoogma sindang marhay sagkod lamang na orog na makanood manongod sa pambihirang mga kualidad ni Jehova. An saindang puso magsosopay nin pag-omaw mantang sinda orog pang nakakanood manongod sa mga linalang nin Dios. Mahalagang marhay an “katanosan” sa pagkamit nin siring na mamuraway na ngapit, na idinodoon sa Salmo 112. Alagad paanong an makasalan na mga tawo puedeng magin matanos sa pagmansay kan banal asin matanos na Dios, si Jehova? Gurano man an pagmamaigot niato na gibohon an tama, kita nakakagibo nin mga sala, asin kun beses iyan magabat.—Roma 3:23; Sant. 3:2.
2. Anong duwang milagro an ginibo ni Jehova huli sa pagkamoot?
2 Sa mamomoton na paagi, nagtao si Jehova nin sangkap na solusyon. Paano nia iyan ginibo? Enot, paagi sa milagrosong pagbalyo kan buhay kan saiyang namomotan na langitnon na Aki pasiring sa matris nin sarong birhen tanganing sia mamundag bilang sangkap na tawo. (Luc. 1:30-35) Dangan, pagkatapos na gadanon si Jesus kan mga kaiwal nia, naggibo si Jehova nin saro pang pambihirang milagro. Si Jesus binuhay liwat nin Dios bilang mamuraway na espiritung linalang.—1 Ped. 3:18.
3. Taano ta an Dios naogmang balosan nin langitnon na buhay an Aki nia?
3 Binalosan ni Jehova si Jesus nin sarong bagay na mayo sa Aki nia bago sia nagin tawo—an dai malalaglag na buhay sa langit. (Heb. 7:15-17, 28) Naogma si Jehova na gibohon ini huling napagdanay ni Jesus an sangkap na integridad durante nin grabeng mga pagbalo. Paagi kaiyan, itinao ni Jesus sa Ama nia an pinakamarahay, iyo, an lubos na simbag sa kaputikan ni Satanas na an mga tawo naglilingkod sa Dios huli sa paslong mga motibo asin bakong huli sa nagdadanay na pagkamoot.—Tal. 27:11.
4. (a) Pakabalik ni Jesus sa langit, ano an ginibo nia para sa sato, asin ano an nagin reaksion ni Jehova? (b) Ano an saboot mo manongod sa ginibo ni Jehova asin ni Jesus para sa saimo?
4 Sa langit, orog pa an ginibo ni Jesus. Sia ‘uminatubang sa Dios para sa sato’ na dara an halaga kan “sadiri niang dugo.” May kabootan na inako kan satong mamomoton na langitnon na Ama an mahalagang marhay na dolot ni Jesus bilang “sarong pampagian nin boot na atang para sa satong mga kasalan.” Kun siring, mantang kita igwa nin ‘nalinigan na konsensia,’ puede kitang gumibo nin “sagradong paglilingkod sa nabubuhay na Dios.” Ini dahelan nanggad tanganing kita umoyon sa enot na mga tataramon kan Salmo 112 na, “Omawon nindo si Jah”!—Heb. 9:12-14, 24; 1 Juan 2:2.
5. (a) Ano an dapat niatong gibohon tanganing mapagdanay an matanos na kamugtakan sa atubangan nin Dios? (b) Paano an pagkaareglar kan Salmo 111 asin Salmo 112?
5 Tanganing mapagdanay niato an matanos na kamugtakan sa atubangan nin Dios, dapat na padagos kitang magtubod sa pinabolos na dugo ni Jesus. Dai niato maninigong palihison an aldaw na dai niato pinapasalamatan si Jehova huling sia namomoot na gayo sa sato. (Juan 3:16) Kaipuhan man niatong padagos na pag-adalan an Tataramon nin Dios asin gibohon an satong pinakamakakaya na mamuhay kaoyon kan mensahe kaiyan. An Salmo 112 igwa nin marahayon na sadol para sa gabos na gustong mapagdanay an malinig na konsensia sa atubangan nin Dios. An salmong ini konektado sa Salmo 111. An duwang ini parehong nagpopoon paagi sa kagsing na “Omawon nindo si Jah!” o “Aleluya!” asin sinusundan nin 22 na linya, na an lambang linya pinoponan paagi sa saro sa 22 na letra kan alpabetong Hebreo. *
Sarong Basehan Para sa Kaogmahan
6. Paano binebendisyonan an matatakton sa Dios na “tawo” na ilinaladawan sa Salmo 112?
6 “Maogma an tawo na may pagkatakot ki Jehova, na sa saiyang mga togon naoogma sia nin labi-labi. Magigin makapangyarihan sa daga an saiyang aki. Kun dapit sa kapag-arakian kan mga matanos, iyan bebendisyonan.” (Sal. 112:1, 2) Mangnohon na an enot na sinambit kan salmista sarong indibiduwal na “tawo” dangan nagin plural na “mga matanos” sa huring kabtang kan bersikulo 2. Ipinaparisa kaini na an Salmo 112 puedeng nanonongod sa sarong grupo na binibilog nin dakol na indibiduwal. Sa pagsuportar sa puntong ini, pinasabngan si apostol Pablo na iaplikar an Salmo 112:9 may koneksion sa mga Kristiano kan enot na siglo. (Basahon an 2 Corinto 9:8, 9.) Marahay nanggad na ilinaladawan kan salmong ini kun paano puedeng magin maogma an mga parasunod ni Cristo sa daga ngonyan!
7. Taano ta an mga lingkod nin Dios kaipuhan na magkaigwa nin nakakarahay na pagkatakot sa saiya, asin ano an maninigong magin saboot nindo manongod sa mga togon nin Dios?
7 Siring kan ipinaparisa sa Salmo 112:1, an tunay na mga Kristianong ini nakakaeksperyensia nin dakulang kaogmahan mantang sinda naglalakaw “na may pagkatakot ki Jehova.” An nakakarahay na pagkatakot na ini na mapaanggot sia nakakatabang sa sainda na labanan an espiritu kan kinaban ni Satanas. Sinda ‘naoogma nin labi-labi’ sa pag-adal sa Tataramon nin Dios asin sa pagkuyog sa mga togon nia. Kaiba dian an pagboot na ihulit sa bilog na daga an maogmang bareta kan Kahadean. Nagmamaigot sindang gumibo nin mga disipulo sa mga tawo kan gabos na nasyon mantang pinapatanidan ninda an mga maraot dapit sa pag-abot kan aldaw nin paghokom nin Dios.—Ezeq. 3:17, 18; Mat. 28:19, 20.
8. (a) Paano binabalosan an debotong banwaan nin Dios ngonyan huli sa saindang kaigotan? (b) Ano an magigin mga bendisyon sa ngapit kan mga may daganon na paglaom?
8 Huling kinukuyog kan mga lingkod nin Dios an siring na mga pagboot, labing pitong milyon na an bilang ninda sa daga ngonyan. Siisay an makakapahimutik na an banwaan nia nagin “makapangyarihan sa daga”? (Juan 10:16; Kap. 7:9, 14) Asin “bebendisyonan” pa nanggad sinda mantang inootob nin Dios an katuyohan nia! Bilang sarong grupo, an mga may daganon na paglaom iingatan na ligtas sa nagdadangadang na “dakulang kahorasaan” tanganing sinda an bumilog sa “sarong bagong daga” na dian “magdadanay an katanosan.” Pag-abot nin panahon, an mga makakaligtas sa Armagedon orog pa nganing “bebendisyonan.” Sinda magigin andam na maogmang akoon an minilyon na bubuhayon liwat. Nakakapukaw nanggad sa boot na oportunidad iyan! Sa kahurihurihi, an mga ‘naoogma nin labi-labi’ sa mga togon nin Dios magigin sangkap na mga tawo asin magkakaigwa “kan mamuraway na katalingkasan kan mga aki nin Dios” sagkod lamang.—2 Ped. 3:13; Roma 8:21.
Madonong na Paggamit nin Kayamanan
9, 10. Paano ginagamit kan tunay na mga Kristiano an espirituwal na kayamanan ninda, asin paano magdadanay sagkod lamang an saindang katanosan?
9 “Mahahalagang bagay asin kayamanan an yaon sa saiyang harong; asin an saiyang katanosan nagdadanay sagkod lamang. Sia nagsisilyab sa kadikloman bilang liwanag sa mga matanos. Sia may kabootan asin maheherakon saka matanos.” (Sal. 112:3, 4) Kan mga panahon kan Biblia, may mga lingkod an Dios na bantog huli sa materyal na kayamanan ninda. Asin sa ibang paagi, an mga inooyonan nin Dios talagang nagigin mayaman, dawa kun iyan bakong sa materyal. An totoo, an kadaklan sa mga nagpapakumbaba mismo sa atubangan nin Dios tibaad dukha asin hinahamak, na totoo man kan panahon ni Jesus. (Luc. 4:18; 7:22; Juan 7:49) Alagad baga man an saro mayaman o dukha sa materyal, posible na magin mayaman sa espirituwal.—Mat. 6:20; 1 Tim. 6:18, 19; basahon an Santiago 2:5.
10 Dai sinasadiri kan linahidan na mga Kristiano, saka kan kairiba ninda, an espirituwal na kayamanan ninda. Imbes, sinda “nagsisilyab” sa madiklom na kinaban ni Satanas “bilang liwanag sa mga matanos.” Ginigibo ninda iyan paagi sa pagtabang sa iba na makinabang sa espirituwal na kayamanan nin kadonongan asin kaaraman dapit sa Dios. Pinagmamaigotan nin mga nagtutumang na papondohon an paghuhulit kan Kahadean, alagad sinda dai nagigin mapanggana. Imbes, an mga bunga kan matanos na gibohon na ini ‘magdadanay sagkod lamang.’ Paagi sa pagdadanay na matanos kan mga lingkod nin Dios kun binabalo, sinda makakasierto nin permanenteng buhay, na “nagdadanay sagkod lamang.”
11, 12. Ano an nagkapirang paagi na ginagamit kan banwaan nin Dios an saindang materyal na mga bagay?
11 An banwaan nin Dios, an linahidan na grupong oripon sagkod an mga minabilog sa “dakulang kadaklan,” nagin buka an palad mapadapit sa materyal na mga bagay. An Salmo 112:9 nagsasabi: “Dakol an saiyang iwinawaras; nagtatao sia sa mga dukha.” An tunay na mga Kristiano ngonyan sa parate nagtatabang sa materyal na paagi sa mga kapwa Kristiano asin dawa sa mga bakong kapagtubod na nangangaipo. Ginagamit man ninda an materyal na mga bagay tanganing suportaran an mga kampanya sa pagtao nin ayuda sa mga panahon nin mga kalamidad. Siring kan sinabi ni Jesus, an paggibo kaiyan magigin gikanan man nin kaogmahan.—Basahon an Gibo 20:35; 2 Corinto 9:7.
12 Dugang pa, isip-isipa an ginagastos tanganing ipublikar an magasin na ini sa 172 na tataramon, na an dakol kaiyan tataramon nin mga tawo na medyo dukha. Isip-isipa man an katunayan na an magasin na ini ipinupublikar sa laen-laen na tataramon paagi sa senyas para sa mga bungog, saka sa Braille para sa mga buta.
May Kabootan Asin Matanos
13. Sairisay an nagtao kan pinakamarahay na mga halimbawa nin may kabootan na pagtao, asin paano niato maaarog an halimbawa ninda?
13 “Marahay an tawo na may kabootan asin nagpapasubli.” (Sal. 112:5) Daing duda na naoobserbaran nindo na bako pirmeng may kabootan an mga tawong nagtatabang sa iba. May mga nagtatao na magabat sa boot o tanganing magpasikat. Dai nakakaogma na mag-ako nin tabang sa saro na naghahamak sa saindo o nagpapamate na kamo nakakaistorbo o pagabat. Sa kabaliktaran, nakakarepresko nanggad na mag-ako nin tabang sa saro na may kabootan. Si Jehova an pinakamarahay na halimbawa nin Paratao na may kabootan asin kaogmahan. (1 Tim. 1:11; Sant. 1:5, 17) Sangkap na ipinabanaag ni Jesu-Cristo an may kabootan na halimbawa kan Ama nia. (Mar. 1:40-42) Huli kaini, tanganing magin matanos sa pagmansay nin Dios, kita nagtatao na may kabootan asin kaogmahan, nangorogna sa paglilingkod sa langtad kun tinatabangan niato sa espirituwal na paagi an mga tawo.
14. Ano an nagkapirang paagi na puede niatong ‘suportaran nin hustisya an satong mga gibo-gibo’?
14 “Sinusuportaran nia nin hustisya an saiyang mga gibo-gibo.” (Sal. 112:5) Siring kan ihinula, inaasikaso kan grupong maimbod na mayordomo an mga rogaring kan Kagurangnan kaoyon kan hustisya ni Jehova. (Basahon an Lucas 12:42-44.) Ini maheheling sa sono sa Kasuratan na paggiya na itinatao sa kamagurangan, na kun beses kaipuhan na magkapot nin mga kaso sa kongregasyon dapit sa grabeng kasalan. An makatanosan na paagi nin pag-asikaso sa mga bagay-bagay risang-risa man sa basado sa Biblia na paggiya na itinatao kan grupong oripon dapit sa kun paano maninigong asikasohon an mga gibohon sa gabos na kongregasyon, erokan nin mga misyonero, asin erokan na Bethel. An hustisya kahagadan bako sanang sa kamagurangan kundi sa gabos man na iba pang Kristiano sa pagtratar ninda sa lambang saro asin sa mga daing pagtubod, kaiba an mga bagay dapit sa negosyo.—Basahon an Miqueas 6:8, 11.
Mga Bendisyon Para sa mga Matanos
15, 16. (a) Ano an epekto sa mga matanos kan maraot na mga bareta sa kinaban? (b) Ano an determinadong padagos na gibohon kan mga lingkod nin Dios?
15 “Huli ta sia nungkang matatanyog. An matanos gigirumdomon sagkod sa panahon na daing talaan. Dai sia matatakot dawa sa maraot na bareta. An saiyang puso marigon, pinasarig ki Jehova. An saiyang puso dai natatanyog; dai sia matatakot, sagkod na pagmasdan nia an saiyang mga kaiwal.” (Sal. 112:6-8) Nungka pa kaidtong nangyari sa kasaysayan na nagkaigwa nin kadakol na maraot na bareta, kaiba an mga bagay na arog kan mga guerra, terorismo, mga helang na bago asin pabalikbalik, krimen, kadukhaan, patin nakakaraot na polusyon. An mga matanos sa pagmansay nin Dios dai makakalikay sa mga epekto kan maraot na mga baretang ini, alagad dai sinda nadadaog nin takot huli kaini. Imbes, an puso ninda “marigon” asin “dai natatanyog” mantang may kompiansa nindang linalaoman an ngapit, na nakakaaram na harani na an matanos na bagong kinaban nin Dios. Kun umabot an kasakitan, mas kaya nindang tagalan an situwasyon na iyan huling sinda nagsasarig ki Jehova para sa suporta. Nungka niang itinotogot na an saiyang matanos na mga lingkod ‘matanyog’—sia nagtatao nin tabang asin kosog tanganing makatagal.—Fil. 4:13.
16 Kaipuhan man na tagalan kan matanos na mga lingkod nin Dios an pagkaongis asin mga kaputikan na pinapalakop kan mga nagtutumang, alagad ini dai nakakapapondo sa paghuhulit kan tunay na mga Kristiano asin padagos iyan na dai makakapapondo sa sainda. Imbes, an mga lingkod nin Dios padagos na marigon asin dai natatanyog sa gibohon na itinao ni Jehova sa sainda—an paghuhulit kan maogmang bareta kan Kahadean asin paggibo nin mga disipulo sa gabos na naghihimate. Mayong duda na an mga matanos makakaeksperyensia nin nag-oorog na pagtumang mantang mas nagrarani an katapusan. An siring na pagkaongis masagkod sa pambilog na kinaban na pagsalakay ni Satanas na Diablo sa saiyang papel bilang Gog nin Magog. Dangan, sa katapustapusi, ‘pagmamasdan ta an satong mga kaiwal’ mantang sinda nadadaog sa makasusupog na paagi. Magigin pambihirang eksperyensia nanggad na maheling an lubos na pagpakangbanal sa ngaran ni Jehova!—Ezeq. 38:18, 22, 23.
‘Ilinalangkaw na May Kamurawayan’
17. Paano an matanos “ilalangkaw na may kamurawayan”?
17 Magigin nakakagayagaya nanggad na may pagkasararong omawon si Jehova, na mayong pagtumang hale sa Diablo asin sa kinaban nia! An siring na kagayagayahan sagkod lamang na makakamtan kan gabos na nagpapadanay nin matanos na kamugtakan sa atubangan nin Dios. Sinda dai maduko huli sa pagkasupog asin pagkadaog, huling si Jehova nanunuga man na an “sungay” kan saiyang matanos “ilalangkaw na may kamurawayan.” (Sal. 112:9) An matanos na lingkod ni Jehova maggagayagaya sa kapangganahan kun maheling na ninda an pagkadaog kan gabos na kaiwal kan soberaniya ni Jehova.
18. Paano maootob an pantapos na mga tataramon kan Salmo 112?
18 “An maraot mismo maheheling iyan asin siertong mauuyam. Pararagoton nia an saiya mismong mga ngipon asin talagang matutunaw. An pagmawot kan mga maraot mawawara.” (Sal. 112:10) Dai na mahahaloy, an gabos na padagos na nagtutumang sa banwaan nin Dios “matutunaw” huli sa saindang pagkauri asin pagkaongis. An pagmawot ninda na maheling na napondo an gibohon niato mawawara na kaiba ninda durante kan nagdadangadang na “dakulang kahorasaan.”—Mat. 24:21.
19. Sa ano kita makakasarig?
19 Makakabilang daw kamo sa mga maogmang makakaligtas sa dakulang kapangganahan na iyan? O kun mangyaring kamo magtorog huli sa kagadanan dahel sa helang o kagurangan bago an katapusan kan kinaban ni Satanas, makakabilang daw kamo sa “mga matanos” na bubuhayon liwat? (Gibo 24:15) An simbag puedeng magin iyo kun kamo padagos na nagtutubod sa atang na pantubos ni Jesus asin nag-aarog ki Jehova, na ginigibo man kan mga irinerepresentar kan matanos na “tawo” na ilinaladawan sa Salmo 112. (Basahon an Efeso 5:1, 2.) Seseguradohon ni Jehova na an ‘paggirumdom’ sa siring na mga tawo nungkang malilingawan, ni babaliwalaon an matanos na mga gibo ninda. Sinda gigirumdomon asin mamomotan ni Jehova sagkod pa man.—Sal. 112:3, 6, 9.
[Nota sa Ibaba]
^ par. 5 An pagigin magkakonektar kan duwang salmong ini maheheling sa pagkaareglar saka sa laog kaiyan. An mga kualidad nin Dios na inomaw sa Salmo 111 inaarog kan matatakton sa Dios na “tawo” na sinambit sa Salmo 112, na maheheling paagi sa pagkomparar kan Salmo 111:3, 4 asin Salmo 112:3, 4.
Mga Hapot Para sa Paghorophorop
• Ano an nagkapirang dahelan niato tanganing magkagsing nin “Aleluya”?
• Anong pangyayari sa presenteng panahon an nagpapaogmang marhay sa tunay na mga Kristiano?
• Anong klaseng paratao an namomotan ni Jehova?
[Mga Hapot Para sa Pag-adal]
[Ritrato sa pahina 25]
Tanganing mapagdanay an matanos na kamugtakan sa atubangan nin Dios, dapat kitang magtubod sa pinabolos na dugo ni Jesus
[Mga Ritrato sa pahina 26]
An mga kontribusyon na gikan sa boot na itinatao nakakatabang sa pagtao nin ayuda asin sa pagpalakop nin mga babasahon sa Biblia