“Madia Magin Parasunod Taka”

“Kun an siisay man boot na sumunod sa sako, paindahan nia an saiyang sadiri asin magpasan kan saiyang hariging pasakitan aroaldaw asin . . . sumunod sa sako.”​—LUC. 9:23.

1, 2. (a) Anong maboot na imbitasyon an itinao ni Jesus? (b) Paano kamo naghimate sa imbitasyon ni Jesus?

SA PAGTATAPOS kan ministeryo ni Jesus, sia nagpapatotoo kaidto sa Perea, sarong rehion sa ibong kan Jordan, sa may amihanan-sirangan kan Judea. Dinolok sia nin sarong hoben na lalaki na naghapot sa saiya kun ano an dapat niang gibohon tanganing magmana nin buhay na daing katapusan. Pagkatapos masierto ni Jesus na an lalaki maimbod na nagkukuyog sa Ley ni Moises, nagtao sia nin pambihirang imbitasyon. Sia nagsabi: “Lakaw, ipabakal mo an mga bagay na nasa saimo asin itao mo sa mga dukha, asin magkakaigwa ka nin kayamanan sa langit, asin madia magin parasunod taka.” (Mar. 10:21) Isip-isipa na sana​—sarong imbitasyon na sumunod ki Jesus, an bugtong na Aki kan Kaharohalangkaweng Dios!

² Sinayumahan kan lalaking iyan an imbitasyon, alagad inako iyan kan iba. Bago kaidto, sinabihan ni Jesus si Felipe: “Magin parasunod taka.” (Juan 1:43) Inako iyan ni Felipe asin kan huri sia nagin apostol. Sinabi man ni Jesus an imbitasyon ki Mateo, asin inako man nia iyan. (Mat. 9:9; 10:2-4) Sa katunayan, itinatao ni Jesus an parehong imbitasyon sa gabos na namomoot sa katanosan kan sia magsabi: “Kun an siisay man boot na sumunod sa sako, paindahan nia an saiyang sadiri asin magpasan kan saiyang hariging pasakitan aroaldaw asin padagos na sumunod sa sako.” (Luc. 9:23) Huli kaini, an siisay man puedeng magin parasunod ni Jesus kun talagang boot nia. Igwa daw kamo kan pagmawot na iyan? Inako na kan kadaklan sa sato an maboot na imbitasyon na iyan ni Jesus, asin sa ministeryo sa langtad, ipinapaabot niato sa iba an imbitasyon na iyan.

3. Paano niato malilikayan na ianod parayo sa pagsunod ki Jesus?

³ Pero, makamomondo na dai nagpapadagos an nagkapirang nagpaheling nin interes sa katotoohan sa Biblia. Imbes, sinda nagluluya asin sa kahurihurihi ‘iinaanod’ parayo sa pagsunod ki Jesus. (Heb. 2:1) Paano niato malilikayan na masilo sa paaging iyan? Makakatabang kun ihahapot niato sa satong sadiri: ‘Ano talaga an dahelan ta ginusto kong sumunod ki Jesus? Ano an kahulogan kan pagsunod sa saiya?’ An paggirumdom kan simbag sa duwang hapot na iyan matabang sa sato na pakosogon an satong desisyon na magdanay sa marahay na dalan na pinili niato. Matabang man iyan sa sato na dagkahon an iba na sumunod ki Jesus.

Taano ta Dapat Sumunod ki Jesus?

4, 5. Taano ta kualipikado si Jesus na mamoon?

⁴ Si propeta Jeremias nagsabi: “Aram kong marhay, O Jehova, na bakong kapot kan daganon na tawo an saiyang dalan. Bakong kapot nin tawong naglalakaw dawa an paggiya sa saiyang lakad.” (Jer. 10:23) Pinatunayan kan kasaysayan an pagigin totoo kan sinabi ni Jeremias. Orog pang nagigin risang-risa na an bakong sangkap na mga tawo dai mapangganang mapamamahalaan an sadiri ninda. Inako niato an imbitasyon na sumunod ki Jesus huling naaraman niato na kualipikado sia na magin satong Poon sa paagi na dai magigibo nin siisay man na tawo. Isip-isipon an nagkapira sa mga kualipikasyon ni Jesus.

⁵ Enot, si Jehova mismo an nagpili ki Jesus bilang Mesiyas na Poon. Siisay pa an mas nakakaaram kisa sa satong Kaglalang kun siisay an nonombrahan bilang Poon niato? Ikaduwa, igwa si Jesus nin mga kualidad na puede niatong hangaan asin arogon. (Basahon an Isaias 11:2, 3.) Sia sarong sangkap na halimbawa. (1 Ped. 2:21) Ikatolo, si Jesus lubos na nagmamalasakit sa mga nagsusunod sa saiya, siring kan ipinaheling nia kan itao nia an saiyang buhay para sa sainda. (Basahon an Juan 10:14, 15.) Asin ipinapaheling nia na sia may pagmakolog na pastor mantang ginigiyahan nia kita sa buhay na nagtatao nin kaogmahan ngonyan asin maresulta sa mamuraway na daing sagkod na ngapit. (Juan 10:10, 11; Kap. 7:16, 17) Huli kaini asin sa iba pang mga dahelan, naggibo kita nin madonong na desisyon kan ginusto niatong sumunod sa saiya. Pero, ano an kalabot sa siring na dalan?

6. Ano an kalabot sa pagsunod ki Jesus?

 ⁶ Bilang mga parasunod ni Cristo, labi pa an kaipuhan kisa sa pag-apod sana sa satong sadiri na Kristiano. Mga duwang bilyon katawo an naghihingako ngonyan na sinda mga Kristiano, alagad an gawe-gawe ninda naghahayag na sinda “mga paragibo nin katampalasanan.” (Basahon an Mateo 7:21-23.) Kun an mga indibiduwal nagpapaheling nin interes sa imbitasyon na sumunod ki Jesus, ipinapaliwanag niato sa sainda na iinooyon kan tunay na mga Kristiano an bilog na pamumuhay ninda sa mga katokdoan asin halimbawa nia​—asin ginigibo ninda iyan sa saindang aroaldaw na buhay. Tanganing iilustrar kun ano an boot sabihon kaini, isip-isipon an nagkapira sa mga bagay na aram niato manongod ki Jesus.

Arogon an Halimbawa nin Kadonongan ni Jesus

7, 8. (a) Ano an kadonongan, asin taano ta dakulaon an kadonongan ni Jesus? (b) Paano ipinaheling ni Jesus an kadonongan, asin paano niato sia maaarog?

⁷ Ipinaheling ni Jesus an dakol na marahayon na kualidad, alagad makonsentrar kita sa apat: an saiyang kadonongan, kapakumbabaan, kaigotan, asin pagkamoot. Enot, isip-isipon an saiyang kadonongan​—an kakayahan nia na iaplikar sa praktikal na paagi an kaaraman asin pakasabot. Si apostol Pablo nagsurat: “Maingat na natatago [ki Jesus] an gabos na kayamanan nin kadonongan asin nin kaaraman.” (Col. 2:3) Saen kinua ni Jesus an siring na kadonongan? Sia mismo nagsabi: “Siring sa pagkatokdo sa sako kan Ama itinataram ko an mga bagay na ini.” (Juan 8:28) An kadonongan nia hale ki Jehova, kaya dai kita nagngangalas sa pagigin tama kan paghusgar ni Jesus.

⁸ Halimbawa, naggamit si Jesus nin marahay na paghusgar sa pagpili kan pamumuhay nia. Nagdesisyon sia na papagdanayon na simple an buhay nia, na nagkokonsentrar sa saro sanang bagay: an paggibo kan kabotan nin Dios. May kadonongan na idinusay nia an saiyang panahon asin kosog sa pagpaoswag kan intereses kan Kahadean. Sinusunod niato an halimbawa ni Jesus paagi sa pagmamaigot na papagdanayon an ‘simpleng mata’ asin sa siring linilikayan na pagabatan an satong sadiri nin dai kaipuhan na mga bagay na nakakaubos kan kosog asin atension niato. (Mat. 6:22) Dakol na Kristiano an naggibo nin mga paagi na pasimplehon an saindang estilo nin pamumuhay tanganing ikadusay ninda an mas dakol na panahon sa ministeryo. An nagkapira nahimong magpayunir. Kun saro kamo sa naggibo kaiyan, marahayon nanggad iyan. An ‘paghanap nguna sa kahadean’ nagtatao nin dakulang kaogmahan asin satispaksion.​—Mat. 6:33.

Magin Mapakumbaba Arog ni Jesus

9, 10. Paano ipinaheling ni Jesus an kapakumbabaan nia?

⁹ An ikaduwang aspekto kan personalidad ni Jesus na pag-oolayan niato iyo an kapakumbabaan nia. Kun tinatawan nin autoridad an bakong sangkap na mga tawo, sa parate sinda nagigin mapalangkaw. Laen nanggad iyan ki Jesus! Sa ibong kan importanteng marhay na katongdan ni Jesus sa pagkaotob kan katuyohan ni Jehova, sia dai lamang nagkaigwa nin dawa kadikit na kaabhawan. Asin napaparigon an boot niato na arogon sia sa bagay na iyan. Si apostol Pablo nagsurat: “Papagdanayon dian sa saindo an kaisipan na ini na yaon man ki Cristo Jesus, na, minsan ngani sia kabaing nin Dios, dai nag-isip na mang-agaw, an boot sabihon, na sia makapantay sa Dios. Dai, kundi sia nagpakadai sa sadiri asin nagpakang-oripon patin nagin kaagid nin mga tawo.” (Fil. 2:5-7) Ano an kalabot dian?

¹⁰ Nagkaigwa si Jesus kan mamuraway na pribilehio na mag-erok sa langit kaiba kan saiyang Ama, alagad sia gikan sa boot na “nagpakadai sa sadiri.” An buhay nia ibinalyo sa matris nin sarong Judiong daraga, na dian sia matalubo nin siyam na bulan sagkod na sia mamundag bilang daing maginibong omboy  sa pamilya nin sarong hamak na karpintero. Sa harong ni Jose, si Jesus luway-luway na nagdakula bilang sarong omboy, sadit na aki, dangan tinedyer. Sia daing kasalan. Pero, sa bilog na pagkahoben nia, nagdanay siang mapagpasakop sa mga magurang na bakong sangkap asin nagkakasala. (Luc. 2:51, 52) Pambihira nanggad na kapakumbabaan!

11. Sa anong mga paagi maaarog niato an kapakumbabaan ni Jesus?

¹¹ Inaarog niato an kapakumbabaan ni Jesus kun gikan sa boot niatong inaako an mga asignasyon na tibaad garo baga hamak. Bilang halimbawa, isip-isipa an asignasyon na maghulit kan maogmang bareta. An siring na gibohon tibaad garo baga hamak, nangorogna kun an reaksion nin mga tawo may pagkaindiperente, pag-olog-olog, o pagkaongis. Minsan siring, paagi sa padagos na paghuhulit, natatabangan niato an iba na maghimate sa imbitasyon ni Jesus na sumunod sa saiya. Sa siring, nagtatabang kita na magligtas nin buhay. (Basahon an 2 Timoteo 4:1-5.) An saro pang halimbawa iyo an pagmantenir kan satong Kingdom Hall. Puedeng kaiba dian an pag-apon nin basura, paglinig kan salog, asin paglinig kan kasilyas​—na gabos hamak na trabaho! Pero, aram niato na an pagmantenir kan satong Kingdom Hall—​an sentro nin dalisay na pagsamba sa lugar niato​—kabtang kan satong sagradong paglilingkod. Paagi sa gikan sa boot na paghaman kan mga trabaho na garo baga hamak, kita nagpapaheling nin kapakumbabaan asin sa siring nagsusunod sa mga lakad ni Cristo.

Arog ni Jesus, Magin Maigot

12, 13. (a) Paano ipinaheling ni Jesus an kaigotan, asin ano an nagmotibar sa saiya? (b) Ano an mamotibar sa sato na magin maigot sa ministeryo?

¹² Isip-isipa an kaigotan ni Jesus sa ministeryo. Dakol an ginibo ni Jesus kaidto kan sia yaon sa daga. Kan sia aki pa, posibleng marhay na nagtrabaho sia bilang karpintero kaiba kan saiyang kag-ampon na ama, si Jose. Durante kan ministeryo ni Jesus, sia naggibo nin mga milagro, kaiba an pagpaomay sa mga may helang asin pagbuhay nin mga gadan. Alagad an pangenot na gibohon nia iyo an paghuhulit kan maogmang bareta asin pagtotokdo sa mga andam na maghinanyog. (Mat. 4:23) Bilang mga parasunod nia, igwa kita nin kaparehong gibohon. Paano niato masusunod an halimbawa nia? An sarong paagi iyo an pagpatalubo niato nin mga motibo na arog kan ki Jesus.

¹³ Orog sa gabos, pagkamoot sa Dios an nagmotibar ki Jesus na maghulit asin magtokdo. Alagad namotan man ni Jesus an mga katotoohan na itinokdo nia. Para sa saiya, an mga katotoohan na iyan mga kayamanan na daing kaagid sa halaga, asin gustong-gusto niang isabi iyan sa iba. Arog man kaiyan an saboot niato bilang mga paratokdo, o “mga paratokdo sa publiko.” Isip-isipa na sana nanggad an nagkapira sa mahalagang marhay na mga katotoohan na nanodan niato sa Tataramon nin Dios! Aram niato an isyu nin unibersal na soberaniya asin kun paano iyan reresolberan. Nasasabotan niatong marhay kun ano an  itinotokdo kan Kasuratan manongod sa kamugtakan kan mga gadan asin sa mga bendisyon na maabot sa bagong kinaban nin Dios. Baga man nanodan niato an siring na mga katotoohan kasuarin pa sana o haloy na, dai noarin man nawawara an halaga kaiyan. Daan o bago man, an siring na mga katotoohan tunay nanggad na mga kayamanan na daing kaagid sa halaga. (Basahon an Mateo 13:52.) Paagi sa paghuhulit na may odok sa pusong entusiasmo, ipinapaaram niato sa iba na namomotan niato an itinotokdo sa sato ni Jehova.

14. Paano niato maaarog an paagi nin pagtotokdo ni Jesus?

¹⁴ Mangnohon man kun paano nagtokdo si Jesus. Pirme niang itinotokdo sa Kasuratan an mga nagdadangog sa saiya. Parate niang pinoponan an sarong importanteng punto paagi sa pagsabing: “Nasusurat.” (Mat. 4:4; 21:13) Sa nakasurat na mga tataramon nia, sia direktang nagkotar o indirektang nagsambit sa labing kabanga kan mga libro sa Hebreong Kasuratan. Arog ni Jesus, kita lubos na nagsasarig sa Biblia sa ministeryo niato asin naghihingoang itampok an Kasuratan kun posible. Sa paaging iyan, tinatabangan niato an mga tama an kamugtakan nin puso na maheling mismo ninda na an satong itinotokdo mga kaisipan nin Dios, bakong kaisipan niato. Ikinakaogmang marhay nanggad niato kun may minaoyon na magbasa sa Biblia asin makipag-olay manongod sa kahalagahan saka kahulogan kan Tataramon nin Dios! Asin kun inaako ninda an imbitasyon na sumunod ki Jesus, labi-labi an kagayagayahan niato.

An Pagsunod ki Jesus Nangangahulogan na Mamotan an Iba

15. Ano an marahayon na kualidad ni Jesus, asin paano puedeng magkaigwa nin epekto sa sato an paghorophorop dian?

¹⁵ An ultimong aspekto kan personalidad ni Jesus na pag-oolayan niato iyo an pinakanakakaogma​—an pagkamoot nia sa mga kapwa tawo. Si apostol Pablo nagsurat: “Itinutulod kami kan pagkamoot na yaon sa Cristo.” (2 Cor. 5:14) Kun hinohorophorop niato an pagkamoot ni Jesus sa katawohan sa pangkagabsan asin sa sato bilang mga indibiduwal, naoogma an puso niato saka napapahiro kita na sumunod sa halimbawa nia.

16, 17. Sa anong mga paagi ipinaheling ni Jesus an pagkamoot nia sa iba?

¹⁶ Paano si Jesus nagpaheling nin pagkamoot sa iba? An pagigin andam nia na itao an saiyang kalag para sa katawohan iyo an kadarudakulaing kapahayagan kan pagkamoot nia. (Juan 15:13) Minsan siring, durante kan ministeryo ni Jesus, ipinaheling man nia an pagkamoot sa iba pang mga paagi. Halimbawa, igwa sia nin pakikidamay sa mga nagsasakit. Kan maheling nia si Maria asin an kairiba kaini na nagtatangis huli sa pagkagadan ni Lazaro, sia napahirong marhay kan kamondoan ninda. Minsan ngani madali na nia kaidtong buhayon liwat si Lazaro, napahirong marhay si Jesus kaya “nagluha” sia.​—Juan 11:32-35.

¹⁷ Sa kapinonan kan ministeryo ni Jesus, duminolok ki Jesus an sarong may lepra asin nagsabi: “Kun boot mo sana, mapapalinig mo ako.” Ano an nagin reaksion ni Jesus? An rekord nagsasabi: “Sia napahiro nin pagkaherak.” Dangan, ginibo nia an sarong bagay na pambihira. “Inunat nia an saiyang  takyag asin dinutaan sia, asin sinabi sa saiya: ‘Boot ko. Luminig ka.’ Asin an lepra tolos na nahale sa saiya, asin sia nagin malinig.” Sa Ley ni Moises, an mga may lepra maati, asin siertong mapapaomayan ni Jesus an tawong iyan na dai nia dinudutaan. Pero, kan pinaomayan ni Jesus an may lepra, ipinamate nia sa saiya an duta nin ibang tawo, na tibaad iyan an kaenot-enote sa laog nin dakol na taon. Kanigoan kamamomoton na pagpaheling nin pagmalasakit!​—Mar. 1:40-42.

18. Paano niato ikakapaheling an “pakikipagkapwa”?

¹⁸ Bilang mga parasunod ni Cristo, pinagbobotan kita na patunayan an pagkamoot niato paagi sa pagpaheling nin “pakikipagkapwa.” (1 Ped. 3:8) Tibaad bakong pasil na masabotan an mga saboot nin kapagtubod na igwa nin pabalikbalik na helang o grabeng depresyon​—nangorogna kun nungka pa niato mismong naeksperyensiahan an siring kaiyan. Pero, nakidamay si Jesus sa mga may helang dawa ngani sia mismo dai noarin man nagkahelang. Paano niato mapapatalubo an kaagid na pakikidamay? Paagi sa mapasensiang paghinanyog sa mga may helang kun nagsasabi sinda sa sato kan nasa boot ninda. Puede man niatong ihapot sa satong sadiri, ‘Kun ako an nasa kamugtakan ninda, ano daw an magigin saboot ko?’ Kun papataluboon niato an pagigin mapagrisa sa mga saboot nin iba, mas ‘makakapagtaram kita na may pagranga sa mga kalag na nagmomondo nin makuri.’ (1 Tes. 5:14) Sa siring, sinusunod niato si Jesus.

19. Sa anong mga paagi nagkakaigwa nin epekto sa sato an halimbawa ni Jesus?

¹⁹ Interesante nanggad na pag-adalan an mga sinabi asin ginibo ni Jesu-Cristo! Mantang mas dakol kitang nanonodan manongod sa saiya, mas gusto man niatong magin arog sa saiya​—asin mas gusto niatong magtabang sa iba na iyan man an gibohon. Kun siring, ikaogmang marhay nanggad niato an pagsunod sa Mesiyanikong Hade​—ngonyan asin sagkod lamang!

Ikakapaliwanag daw Nindo?

• Paano niato ikakapaheling an kadonongan, arog kan ginibo ni Jesus?

• Sa anong mga paagi niato ikakapaheling an kapakumbabaan?

• Paano niato mapapatalubo an kaigotan sa ministeryo?

• Sa anong mga paagi niato maaarog si Jesus sa pagpaheling nin pagkamoot sa iba?

[Mga Hapot Para sa Pag-adal]

[Kahon/​Ritrato sa pahina 5]

SARONG PUBLIKASYON NA NAGTATABANG SA SATO NA AROGON SI CRISTO

Durante kan 2007 programa kan pandistritong kombension, ilinuwas an sarong 192-pahinang libro na may titulong “Madia Magin Parasunod Taka.” An librong ini dinisenyo tanganing tabangan an mga Kristiano na magkonsentrar ki Jesus, nangorogna sa saiyang mga kualidad asin gibo. Pagkatapos kan enot na duwang kapitulo, an enot na kabtang nagtatao nin sumaryo kan marahayon na mga kualidad ni Jesus​—an saiyang kapakumbabaan, kosog nin boot, kadonongan, pagigin makinuyog, asin pakatagal.

Kasunod kaini an mga seksion manongod sa mga aktibidad ni Jesus bilang paratokdo asin parahulit kan maogmang bareta saka manongod sa nagkapira sa mga paagi na ipinaheling an dakulang pagkamoot nia. Sa bilog na libro, iprinesentar an impormasyon tanganing tabangan an sarong Kristiano na arogon si Jesus.

May kompiansa kita na an librong ini mapahiro sa sato gabos na siyasaton an satong sadiri asin maghapot: ‘Talaga daw na nagsusunod ako ki Jesus? Paano ko sia orog na maaarog?’ Matatabangan man kaiyan an “gabos na may tamang inklinasyon sa buhay na daing katapusan” na magin mga parasunod ni Cristo.​—Gibo 13:48.

[Ritrato sa pahina 4]

Nagtogot si Jesus na magdigdi sa daga asin mamundag bilang sarong tawong omboy. Anong kualidad an kinaipuhan sa paggibo kaiyan?

[Ritrato sa pahina 6]

Ano an mamotibar sa sato na magin maigot sa ministeryo?