An Tataramon ni Jehova Buhay

Tampok na mga Kabtang sa mga Surat ni Santiago Asin ni Pedro

HAROS 30 taon pakalihis kan Pentecostes nin 33 C.E., si disipulo Santiago​—sarong tugang sa ina ni Jesus—​nagsurat sa “doseng tribo” nin espirituwal na Israel. (Sant. 1:1) An obheto nia: sadolon sinda na magin makosog sa pagtubod asin magpaheling nin pakatagal kun napapaatubang sa mga pagbalo. Nagtao man sia nin hatol tanganing itanos an nakakapurisaw na mga kamugtakan na nangyari sa mga kongregasyon.

Bago sana pumoon an kampanya nin pagpersegir kan Romanong Emperador na si Nero kaidtong 64 C.E., ginibo ni apostol Pedro an enot niang surat para sa mga Kristiano, na dinadagka sinda na manindogan nin marigon sa pagtubod. Sa ikaduwa niang surat, na ginibo dai nahaloy pagkatapos kan enot, dinagka ni Pedro an saiyang mga kapagtubod na magtao nin atension sa tataramon nin Dios asin pinatanidan nia sinda manongod sa pagdatong kan aldaw ni Jehova. Tunay nanggad, makikinabang kita sa pagtao nin atension sa mga mensahe na yaon sa mga surat ni Santiago asin ni Pedro.​—Heb. 4:12.

AN DIOS NAGTATAO NIN KADONONGAN SA MGA ‘NAGHAHAGAD NA MAY PAGTUBOD’

(Sant. 1:1–5:20)

“Maogma an tawo na padagos na nagtatagal sa pagbalo,” an isinurat ni Santiago, “huli ta sa pagigin inooyonan aakoon nia an korona nin buhay.” Sa mga ‘padagos na naghahagad na may pagtubod,’ si Jehova nagtatao nin kadonongan na kaipuhan tanganing matagalan an mga pagbalo.​—Sant. 1:5-8, 12.

An pagtubod asin kadonongan kaipuhan man kan ‘nagigin mga paratokdo’ sa kongregasyon. Pagkatapos sabihon na an dila “sarong sadit na kabtang” na may kakayahan na ‘digtaan an bilog na hawak,’ nagpatanid si Santiago manongod sa kinabanon na mga tendensia na puedeng makaraot sa relasyon nin saro sa Dios. Sinabi nia man an mga lakdang na maninigong gibohon nin siisay man na may helang sa espirituwal tanganing maomayan.​—Sant. 3:1, 5, 6; 5:14, 15.

Mga Hapot sa Kasuratan na Sinimbag:

2:13​—Sa anong paagi na an “pagkaherak mapangganang naggagayagaya nin labi-labi tumang sa paghokom”? Kun manongod sa paninimbag niato sa Dios, kinokonsiderar nia an pagkaherak na satong ipinaheling sa iba asin pinapatawad nia kita basado sa pantubos na atang kan saiyang Aki. (Roma 14:12) Bako daw na sarong dahelan ini na gibohon niato na nangingibabaw na kualidad sa satong buhay an pagkaherak?

4:5​—Anong teksto an kinokotar ni Santiago digdi? Si Santiago dai nagkokotar nin ano man na espesipikong teksto. Minsan siring, an ipinasabong nin Dios na mga tataramon na ini posibleng basado sa pangkagabsan na ideya na yaon sa mga teksto na arog kan Genesis 6:5; 8:21; Talinhaga 21:10; asin Galacia 5:17.

5:20​—Kiisay na kalag an ililigtas kan tawong “nakakapabakle sa sarong parakasala gikan sa pagigin sala kan saiyang dalan”? An sarong Kristiano na nakakatabang sa sarong nagkasala na magbakle gikan sa makasalan na dalan iliniligtas an kalag kan nagsosolsol na tawong iyan hale sa espirituwal na kagadanan asin tibaad hale sa daing katapusan na pagkalaglag. An tawo na nagtatabang sa parakasala sa paaging ini ‘makakatahob man sa dakol na kasalan kan tawong iyan.’

Mga Leksion Para sa Sato:

1:14, 15. An kasalan nagpopoon sa salang pagmawot. Kun siring, maninigo na dai niato pataluboon an salang mga pagmawot paagi sa pagparaisip kaiyan. Imbes, kaipuhan niato na “padagos na horophoropon” an nakakapakosog na mga bagay asin panoon an satong isip saka puso kaiyan.​—Fil. 4:8.

2:8, 9. An ‘pagpaheling nin paboritismo’ kakontra “kan sa hadeng ley” na pagkamoot. Huli kaini, an tunay na mga Kristiano dai nagpapaheling nin paboritismo.

 2:14-26. Kita “ilinigtas paagi sa pagtubod,” “bakong huli sa mga gibo” kan Ley ni Moises o sa mga ginigibo bilang Kristiano. An satong pagtubod maninigo na bakong basta paghingako na may pagtubod kita. (Efe. 2:8, 9; Juan 3:16) Iyan maninigo na magpahiro sa sato sa diosnon na gibo.

3:13-17. “An kadonongan hale sa itaas” seguradong nakakalabi sa “daganon, makahayop, sa demonyo” na kadonongan! Maninigo na ‘padagos niatong sungkaton an diosnon na kadonongan na siring baga sa natatagong kayamanan.’​—Tal. 2:1-5.

3:18, mga nota sa ibaba. An banhi kan maogmang bareta kan Kahadean ‘isasabwag na may katoninongan kan mga nakikipagkatoninongan.’ Mahalaga na kita magin mga parapatoninong asin bakong arogante, makiiwalon, o mahilig sa kariribokan.

‘MARIGON NA MANINDOGAN SA PAGTUBOD’

(1 Ped. 1:1–5:14)

Ipinagirumdom ni Pedro sa saiyang mga kapagtubod an dapit sa saindang “buhay na paglaom” manongod sa sarong mana sa langit. “Kamo ‘rasang pinili, sa hadeng grupo nin mga saserdote, banal na nasyon,’” an sabi ni Pedro sa sainda. Pagkatapos na magtao nin espesipikong hatol dapit sa pagpasakop, sinadol nia an gabos na magin “parareho an isip, na nagpapaheling nin pakikipagkapwa, na may kapadangatan na sa magturugang, mapagmalasakit sa mapagpadangat na paagi, mapakumbaba sa isip.”​—1 Ped. 1:3, 4; 2:9; 3:8.

Huling “harani na an katapusan kan [Judiong sistema nin mga] bagay,” si Pedro naghatol sa mga tugang na ‘magin toltol an isip asin magin puka sa pagpamibi.’ Sinabihan nia sinda: “Magmata kamo, magpuka kamo. . . . Manindogan kamo tumang [ki Satanas], na marigon sa pagtubod.”​—1 Ped. 4:7; 5:8, 9.

Mga Hapot sa Kasuratan na Sinimbag:

3:20-22​—Paano kita iliniligtas kan bautismo? An bautismo sarong kahagadan sa mga naghihingoa na kamtan an kaligtasan. Minsan siring, dai kita iliniligtas kan bautismo mismo. An totoo, nakakamtan an kaligtasan “paagi sa pagkabuhay liwat ni Jesu-Cristo.” An kandidato sa bautismo dapat na nagtutubod na an kaligtasan posible sana huli ta si Jesus nagadan bilang atang, binuhay liwat, asin “nasa toong kamot nin Dios,” na may autoridad sa mga buhay asin gadan. An bautismo na nakabasar sa siring na pagtubod katimbang kan ‘pagkaligtas kan walong kalag sa tubig.’

4:6​—Sairisay an “mga gadan” na ‘pinahayagan kan maogmang bareta’? An mga ini iyo an mga ‘gadan kaidto sa saindang mga kalapasan asin mga kasalan,’ o an mga gadan sa espirituwal bago ninda naaraman an maogmang bareta. (Efe. 2:1) Pero, pagkatapos nindang magtubod sa maogmang bareta, nagpoon na sindang “mabuhay” sa espirituwal.

Mga Leksion Para sa Sato:

1:7. Tanganing an satong pagtubod magkaigwa nin pambihirang halaga, dapat na iyan probado, o nabalo, na kualidad. An siring na makosog na pagtubod ‘pinapagdadanay nanggad na buhay an kalag.’ (Heb. 10:39) Dai kita dapat na magsibog sa mga pagbalo sa satong pagtubod.

1:10-12. Minawot nin mga anghel na maaraman asin masabotan an hararom na espirituwal na mga katotoohan na isinurat nin mga propeta nin Dios kan suanoy na mga panahon mapadapit sa kongregasyon nin linahidan na mga Kristiano. Minsan siring, an mga bagay na ini nagin maliwanag sana kan ponan ni Jehova na tawan nin atension an kongregasyon. (Efe. 3:10) Bako daw na maninigo niatong arogon an halimbawa kan mga anghel asin hingoahon na siyasaton an “harararom na bagay nin Dios”?​—1 Cor. 2:10.

2:21. Bilang pag-arog sa satong Arogan, si Jesu-Cristo, maninigo kitang magin andam na magsakit dawa sagkod sa kagadanan tanganing suportaran an soberaniya ni Jehova.

5:6, 7. Kun itinatao niato ki Jehova an satong mga kahaditan, tinatabangan nia kita na padagos na gibohon na pangenot sa satong buhay an tunay na pagsamba imbes na magin labi-labi an paghadit manongod sa puedeng mangyari sa masunod na aldaw.​—Mat. 6:33, 34.

“AN ALDAW NI JEHOVA MADATONG”

(2 Ped. 1:1–3:18)

“An hula dai kasuarin man dinara paagi sa kabotan kan tawo,” an isinurat ni Pedro, “kundi an mga tawo nagtaram hale sa Dios mantang sinda pinapahiro kan banal na espiritu.” An pagtao nin atension sa makahulang tataramon makakaprotehir sa sato sa  “falsong mga paratokdo” asin sa iba pang nakakaraot na mga indibiduwal.​—2 Ped. 1:21; 2:1-3.

“Sa huring mga aldaw an mga paraolog-olog madatong na may pag-olog-olog,” an patanid ni Pedro. Alagad “an aldaw ni Jehova madatong siring sa parahabon.” Tinapos ni Pedro an saiyang surat na may marahay na sadol sa mga ‘naghahalat sa presensia kan aldaw na iyan asin nagpapadanay kaiyan na harani sa isip.’​—2 Ped. 3:3, 10-12.

Mga Hapot sa Kasuratan na Sinimbag:

1:19​—Siisay an “bitoon sa aga,” kasuarin sia suminirang, asin paano niato naaaraman na ini nangyari na? An “bitoon sa aga” iyo si Jesu-Cristo na igwang kapangyarihan sa Kahadean. (Kap. 22:16) Kan 1914, si Jesus suminirang sa atubangan nin gabos na linalang bilang an Mesiyanikong Hade, na ibinabareta an kapinonan nin sarong bagong aldaw. An transpigurasyon nagtao nin patanaw na bisyon kan kamurawayan ni Jesus asin kan saiyang kapangyarihan sa Kahadean, na idinodoon an pagigin masasarigan kan makahulang tataramon nin Dios. An pagtao nin atension sa tataramon na iyan nagtatao nin liwanag sa satong puso, asin sa siring pinapaaram sa sato na an Bitoon sa Aga suminirang na.

2:4​—Ano an “Tartaro,” asin kasuarin iinapon dian an rebeldeng mga anghel? An Tartaro sarong arog-bilanggoan na kamugtakan na an ilinalaag iyo an espiritung mga linalang sana​—bakong mga tawo. Iyan an pagigin nasa grabeng kadikloman nin isip kun mapadapit sa maliwanag na mga katuyohan nin Dios. An mga nasa Tartaro mayo nin paglaom para sa ngapit. Iinapon nin Dios sa Tartaro an rebeldeng mga anghel kan panahon ni Noe, asin magdadanay sinda sa ibinabang kamugtakan na iyan sagkod na laglagon sinda.

3:17​—Ano an boot sabihon ni Pedro kan “patienot na kaaraman”? An pinanonongdan ni Pedro iyo an patienot na kaaraman, o pakaaram antes pa kan mga mangyayari sa ngapit, na itinao sa saiya asin sa iba pang kagsurat sa Biblia paagi sa pagpasabong. Huling may limitasyon an kaaraman na ini, an pagkaigwa kaiyan dai nagin dahelan na maaraman kan enot na mga Kristiano an gabos na detalye manongod sa mga mangyayari sa ngapit. Naaraman sana ninda an mayor na mga detalye dapit sa kun ano an puedeng laoman.

Mga Leksion Para sa Sato:

1:2, 5-7. Apuera sa pagtabang sa sato na mag-oswag sa “tamang kaaraman dapit sa Dios asin ki Jesus,” an satong maigot na paghihingoa na mapatalubo an mga kualidad na arog kan pagtubod, pakatagal, asin diosnon na debosyon ‘magpapangyari sa sato na dai magin inaktibo o daing bunga’ mapadapit sa kaaraman na iyan.​—2 Ped. 1:8, nota sa ibaba.

1:12-15. Tanganing magdanay na “marigon nang establisado sa katotoohan,” kaipuhan niato an dayaday na mga pagirumdom, arog kan mga inaako niato paagi sa satong mga pagtiripon kan kongregasyon, personal na pag-adal, asin pagbasa sa Biblia.

2:2. Maninigo kitang mag-ingat na an satong paggawe dai nagtatao nin katuyawan ki Jehova asin sa saiyang organisasyon.​—Roma 2:24.

2:4-9. Huli sa mga ginibo nia kan nakaagi, makakasierto kita na “si Jehova tataong magligtas sa mga tawong may diosnon na debosyon hale sa pagbalo, alagad tataong magtagama kan mga tawong bakong matanos para sa aldaw nin paghokom tanganing gadanon.”

2:10-13. Minsan ngani an “mga mamuraway,” an boot sabihon, an Kristianong kamagurangan, kun beses may depekto asin tibaad napapasala, dai kita dapat magtaram na may panlilibak sa sainda.​—Heb. 13:7, 17.

3:2-4, 12. An maingat na pagtao nin atension sa ‘mga sinabi na itinaram kaidto kan banal na mga propeta asin sa togon kan Kagurangnan asin Paraligtas’ makakatabang sa sato na pirmeng isaisip an kaharanihan kan aldaw ni Jehova.

3:11-14. Bilang mga ‘naghahalat sa presensia kan aldaw ni Jehova asin nagpapadanay kaiyan na harani sa isip,’ kita dapat na (1) ‘magin banal sa paggawe,’ na pinapagdadanay an pisikal, mental, moral, asin espirituwal na kalinigan; (2) pano nin marahay na mga gibo na nagpapabanaag nin “diosnon na debosyon,” arog kan mga gibo na may koneksion sa paghuhulit kan Kahadean asin paggibo nin mga disipulo; (3) maghingoang mapagdanay na an satong paggawe asin personalidad “daing digta,” daing mantsa kan kinaban; (4) “dai nin kanawayan,” na ginigibo an gabos na bagay na igwa nin dalisay na motibo; asin (5) “nasa katoninongan”​—may pakikipagkatoninongan sa Dios, sa satong Kristianong mga tugang, saka sa satong mga kapwa tawo.