Tampok na mga Kabtang sa Libro nin Malaquias
An Tataramon ni Jehova Buhay
Tampok na mga Kabtang sa Libro nin Malaquias
AN ITINOGDOK liwat na templo sa Jerusalem labing 70 taon nang natapos. Pero, sa paglihis nin panahon, nagparaluyang gayo an kamugtakan kan espirituwalidad kan mga Judio. Dawa an mga saserdote nagin maraot. Siisay an magpaparealisar sa sainda kan saindang tunay na kamugtakan asin magmamaigot na pakosogon giraray sinda sa espirituwal? Itinao ni Jehova an gibohon na iyan ki propeta Malaquias.
Isinurat ni Malaquias na may mapuersang estilo, an huring libro kan Hebreong Kasuratan igwa nin ipinasabong na hula nin Dios. An pagtao nin atension sa makahulang tataramon ni Malaquias makakatabang sa sato na mag-andam para sa “dakula asin makangingirhat na aldaw ni Jehova,” na sa aldaw na iyan matatapos an presenteng maraot na sistema nin mga bagay.—Malaquias 4:5.
“DAKOL AN PINASINGKOG” KAN MGA SASERDOTE
Ipinahayag ni Jehova an saiyang mga saboot sa Israel, na nagsasabi: “Namotan ko kamo.” Alagad hinamak kan mga saserdote an ngaran nin Dios. Paano? “Paagi sa pagdolot sa [saiyang] altar nin maating tinapay” asin paagi sa pagdolot nin “hayop na pilay o may helang” para sa pag-atang.—Malaquias 1:2, 6-8.
‘Dakol an pinasingkog kan mga saserdote sa ley.’ An mga tawo “nagtitrinaydoran.” May mga nag-agom nin mga babaeng taga ibang nasyon. Trinaydor nin iba an “agom na babae [kan saindang] pagkahoben.”—Malaquias 2:8, 10, 11, 14-16.
Mga Hapot sa Kasuratan na Sinimbag:
2:2—Sa anong paagi ‘sinumpa ni Jehova an mga bendisyon’ kan sumbikalan na mga saserdote? Ginibo ini nin Dios sa paagi na an bendisyon na hinahagad kan siring na mga saserdote magigin sumpa.
2:3—Ano an boot sabihon nin ‘pagwarak nin odo’ sa mga lalawgon kan mga saserdote? Oyon sa Ley, an odo kan inatang na hayop maninigong darahon sa luwas kan kampo asin soloon. (Levitico 16:27) An pagwarak nin odo sa mga lalawgon kan mga saserdote nangahulogan na isinikwal ni Jehova an mga atang asin na an mga nag-atang kaiyan makababalde sa saiya.
2:13—Kiisay na mga luha an nakatahob sa altar ni Jehova? Ini an mga luha kan mga agom na babae na nagpasiring sa santuaryo kan templo asin biyong ipinahayag ki Jehova an nasa puso ninda. Ano an nagin dahelan kan siring na kamondoan ninda? Idiniborsio sinda kan saindang Judiong agom huli sa mga dahelan na bakong sono sa ley asin binayaan sinda, posibleng marhay na tanganing mag-agom nin mas hoben na mga babaeng taga ibang nasyon.
Mga Leksion Para sa Sato:
1:10. Dai naogma si Jehova sa mga dolot kan mahanab na mga saserdote, na naghahagad nin bayad dawa sa simpleng mga serbisyo siring kan pagpinto kan mga tata o pagpalaad kan kalayo sa altar. Importante nanggad na an satong mga gibo nin pagsamba, kaiba an ginigibo niato sa Kristianong ministeryo, minomotibar nin bakong maimot na pagkamoot sa Dios asin sa kapwa, na nungkang para sa pinansial na ganansia!—Mateo 22:37-39; 2 Corinto 11:7.
1:14; 2:17. Dai itinotogot ni Jehova an pagsaginsagin.
2:7-9. An mga tinawan nin pribilehio na magtokdo sa kongregasyon maninigong siertohon na an itinotokdo ninda kaoyon kan Tataramon nin Dios, an Banal na Kasuratan, asin kan basado sa Biblia na mga publikasyon kan “maimbod na mayordomo.”—Lucas 12:42; Santiago 3:11.
2:10, 11. Inaasahan ni Jehova na seseryosohon kan mga parasamba sa saiya an hatol na mag-agom “basta sa Kagurangnan.”—1 Corinto 7:39.
2:15, 16. An tunay na mga parasamba igwa nin halangkaw na paggalang sa tipan sa pag-agom, na ipinakipagtipan ninda sa agom na babae kan saindang pagkahoben.
‘AN TUNAY NA KAGURANGNAN MAABOT SA SAIYANG TEMPLO’
“Sa panale maabot sa Saiyang templo an tunay na Kagurangnan [si Jehova Dios]” kaiba “an mensahero kan tipan [si Jesu-Cristo].” An Dios “marani sa [saiyang banwaan] para sa paghokom” asin magigin maliksing saksi tumang sa gabos na paragibo nin maraot. Dugang pa, “sarong libro nin girumdoman” an isusurat para sa mga natatakot ki Jehova.—Malaquias 3:1, 3, 5, 16.
An aldaw na “naglalaad siring sa horno” maabot asin tutumtomon kaiyan an gabos na maraot. Bago umabot an aldaw na iyan, sarong propeta an isusugo tanganing ‘pabalikon an puso nin mga ama sa mga aking lalaki, asin an puso nin mga aking lalaki sa mga ama.’—Malaquias 4:1, 5, 6.
Mga Hapot sa Kasuratan na Sinimbag:
3:1-3—Kasuarin nag-abot sa templo “an tunay na Kagurangnan” asin “an mensahero kan tipan,” saka siisay an isinugo na maeenot sa sainda? Si Jehova nag-abot sa saiyang templo paagi sa sarong representante asin lininig iyan kan Nisan 10, 33 C.E. Iyan an pangyayari kan maglaog si Jesus sa templo asin paluwason an mga nagbabakal asin nagpapabakal. (Marcos 11:15) Nangyari ini tolo may kabangang taon pagkatapos na lahidan si Jesus bilang Designadong Hade. Sa kaparehong paagi, minalataw na tolo may kabangang taon pagkatapos na patukawon sia sa trono bilang Hade sa langit, inibanan ni Jesus si Jehova sa espirituwal na templo asin nanompongan an banwaan nin Dios na kaipuhan na linigon. Kan enot na siglo, isinugo si Juan na Bautisador tanganing andamon an mga Judio sa pag-abot ni Jesu-Cristo. Sa presenteng mga panahon, sarong mensahero an patienot na isinugo tanganing andamon an dalan para sa pag-abot ni Jehova sa saiyang espirituwal na templo. Kaidto pang dekada nin 1880, sarong grupo nin mga estudyante sa Biblia an nagpoon na makikabtang sa pagtotokdo sa sinserong mga indibiduwal nin dakol na pundamental na katotoohan sa Biblia.
3:10—An pagdara daw nin “gabos na ikasampulong kabtang,” o tinagba, nagrerepresentar sa pagtao niato ki Jehova kan gabos na yaon sa sato? Hinale an Ley ni Moises basado sa kagadanan ni Jesus, kaya bakong kahagadan an pagtao nin kuarta bilang tinagba. Pero, an tinagba may simbolikong kahulogan. (Efeso 2:15) Dai iyan nagrerepresentar sa pagtao niato kan gabos na yaon sa sato. Mantang an ikasampulong kabtang dinadara kada taon, sarong beses sana niatong dinadara ki Jehova an gabos na yaon sa sato—kun idinudusay niato sa saiya an satong sadiri asin sinisimbolisaran an satong pagdusay paagi sa pagpabautismo sa tubig. Poon sa panahon na iyan, sadiri na ni Jehova an gabos na yaon sa sato. Pero, tinotogotan nia kita na pumili nin sarong kabtang kan bagay na yaon sa sato—an simbolikong tinagba—tanganing gamiton sa paglilingkod sa saiya. Iyan an ano man na itinotogot kan satong mga kamugtakan asin an ano man na pinapahiro kan satong puso na gamiton niato. Kaiba sa mga dolot na dinadara niato ki Jehova an panahon, kosog, asin kayamanan na ginagamit sa paghuhulit kan Kahadean saka sa paggibo nin disipulo. Kaiba man dian an pag-atender sa Kristianong mga pagtiripon, pagdalaw sa mga may helang asin may edad nang mga kapagtubod, saka pagtao nin pinansial na tabang sa tunay na pagsamba.
4:3—Sa anong paagi na “babatayan [kan mga parasamba ki Jehova] an mga maraot”? Dai literal na “babatayan [kan banwaan nin Dios sa daga] an mga maraot,” an boot sabihon, dai sinda literal na makikikabtang sa saiyang paghokom sa mga maraot. Imbes, ipinaparisa kaini na piguratibong gigibohon iyan kan mga lingkod ni Jehova sa daga paagi sa bilog na pusong pakikikabtang sa selebrasyon sa kapangganahan na kasunod kan katapusan kan kinaban ni Satanas.—Salmo 145:20; Kapahayagan 20:1-3.
4:4—Taano ta maninigo niatong “girumdomon . . . an ley ni Moises”? Dai hinahagad sa mga Kristiano na sunodon an Ley na iyan, pero nagserbi iyan na “anino kan marahay na mga bagay na madatong.” (Hebreo 10:1) Huli kaini, an pagtao nin atension sa Ley ni Moises makakatabang sa sato na maheling kun paano naootob an mga bagay na nakasurat dian. (Lucas 24:44, 45) Dugang pa, an Ley igwa nin “tipikong mga representasyon kan mga bagay sa kalangitan.” Mahalagang marhay na pag-adalan iyan tanganing magkaigwa kita nin pakasabot sa Kristianong mga katokdoan asin gawe-gawe.—Hebreo 9:23.
4:5, 6—Siisay an irinerepresentar ni “Elias na propeta”? Ihinula na si “Elias” may gigibohon na pagbabalik sa dati, an pag-andam sa puso kan mga tawo. Kan enot na siglo C.E., ipinamidbid ni Jesu-Cristo si Juan na Bautisador bilang “Elias.” (Mateo 11:12-14; Marcos 9:11-13) Isinusugo an katimbang nia sa presenteng panahon “bago umabot an dakula asin makangingirhat na aldaw ni Jehova.” An Elias ngonyan daing iba kundi “an maimbod asin mapagmansay na oripon.” (Mateo 24:45) An grupong ini nin linahidan na mga Kristiano mahigos na nagtatabang sa mga tawo tangani na ikabalik an saindang relasyon sa Dios.
Mga Leksion Para sa Sato:
3:10. Kun dai niato itinatao ki Jehova an pinakamakakaya niato, ipinapanguri niato sa satong sadiri an saiyang bendisyon.
3:14, 15. Huli sa maraot na halimbawa kan mga saserdote, nagpoon an mga Judio na mansayon na bakong mahalaga an paglilingkod sa Dios. Maninigong magin arogan an mga igwa nin katongdan na may paninimbagan sa Kristianong kongregasyon.—1 Pedro 5:1-3.
3:16. Si Jehova may rekord kan mga natatakot sa saiya asin kan mga maimbod sa saiya. Ginigirumdom nia sinda asin iingatan sinda kun taposon na nia an maraot na kinaban ni Satanas. Kun siring, dai niato noarin man pagpaluyahon an satong determinasyon na papagdanayon an satong integridad sa Dios.—Job 27:5.
4:1. Sa aldaw nin paninimbag ki Jehova, pareho an kaaabtan kan “sanga” asin “gamot”—an saradit na aki maako kan kaparehong paghokom na aakoon kan saindang mga magurang. May paninimbagan nanggad an mga magurang sa saindang menor de edad na mga aki! An Kristianong mga ama asin ina dapat na magmaigot na kamtan an pag-oyon nin Dios asin mapagdanay an marahay na kamugtakan sa atubangan nia.—1 Corinto 7:14.
“Matakot Ka sa Tunay na Dios”
Siisay an makakaligtas sa “dakula asin makangingirhat na aldaw ni Jehova”? (Malaquias 4:5) “Sa saindo na mga natatakot sa sakuyang ngaran,” an sabi ni Jehova, “masirang nanggad an saldang nin katanosan, na may pagpaomay sa mga pakpak kaiyan; asin kamo maruluwas asin masikadsikad sa daga siring sa pinatabang mga ogbon na baka.”—Malaquias 4:2.
“An saldang nin katanosan,” si Jesu-Cristo, minasirang sa mga may hararom na paggalang asin pagkatakot sa ngaran nin Dios, saka an mga ini nag-aako kan pag-oyon ni Jehova. (Juan 8:12) Para sa sainda, igwa man nin “pagpaomay sa mga pakpak kaiyan”—espirituwal na pagpaomay ngonyan asin pisikal, mental, saka emosyonal na biyong pagpaomay sa bagong kinaban nin Dios. (Kapahayagan 22:1, 2) Huling naoogmang marhay, sinda minagawe na “siring sa pinatabang mga ogbon na baka.” Sa pagtanaw sa siring na mga bendisyon, himateon niato an konseho ni Hadeng Salomon: “Matakot ka sa tunay na Dios asin otobon mo an saiyang mga togon. Huli ta ini iyo an bilog na katongdan nin tawo.”—Eclesiastes 12:13.
[Ritrato sa pahina 26]
Si propeta Malaquias, sarong maigot asin dedikadong lingkod nin Dios
[Ritrato sa pahina 29]
An itinotokdo niato maninigong kaoyon kan Biblia
[Ritrato sa pahina 29]
Iginagalang kan mga lingkod ni Jehova an saindang tipan sa pag-agom