Mga Hapot Hale sa mga Parabasa

Tama daw para sa saro sa Mga Saksi ni Jehova na mag-atender sa kasal nin bakong Saksing paryente o kamidbid?

An mga kasal magayagayang okasyon, asin natural sana na an sarong Kristiano gustong makikabtang sa kagayagayahan na iyan. Siempre, an mga menor de edad na inimbitaran maninigong magkuyog sa saindang mga magurang o sa legal na nag-aataman sa sainda, na iyo an may deretso na gumibo nin pinal na desisyon sa bagay na iyan. (Efeso 6:1-3) Alagad paano kun an sarong agom na lalaki na bakong Saksi ni Jehova makiolay sa saiyang Kristianang agom na ibanan sia sa sarong kasal sa simbahan? An konsensia kan Kristianang iyan tibaad magtogot sa saiya na umiba bilang saro sanang paramasid na determinado na dai makikabtang sa ano man na relihiosong mga gibo na konektado sa okasyon.

Kun siring, sa pundamental, personal na desisyon kun baga maatender sa sarong kasal o dai. Minsan siring, maninigong girumdomon nin lambang Kristiano na igwa sia nin paninimbagan ki Jehova asin kaipuhan niang isip-isipon an nagkapira sa mga prinsipyo sa Kasuratan kun nagdedesisyon manongod sa pag-atender sa kasal nin bakong Saksi.

Maninigo na an pangenot na nasa isip nin sarong Kristiano iyo an pagmawot na magkaigwa kan pag-oyon nin Dios. Si Jesus nagsabi: “An Dios Espiritu, asin idtong nagsasamba sa saiya dapat na magsamba sa espiritu asin katotoohan.” (Juan 4:24) Sa siring, an Mga Saksi ni Jehova dai nakikikabtang sa mga aktibidad nin ibang relihion, siring kan mga pamibi, ritual, o seremonya na kontra sa katotoohan sa Biblia.—2 Corinto 6:14-17.

Minimidbid nin sarong Kristiano na an saiyang desisyon makakaapektar man sa iba. Kun magdesisyon kamo na umatender, makokolgan daw an boot kan saindong mga paryente kun kamo dai lubos na makikikabtang sa kaorogmahan sa kasal? Dapat man na isipon an posibleng epekto sa mga kapagtubod. (Roma 14:13) Dawa kun iniisip nindo o kan ibang miembro kan saindong pamilya na mayong magigin problema kun maatender kamo sa kasal nin bakong Saksi, an saindo daw na espirituwal na mga tugang maaapektaran nin grabe? Makakakolog daw iyan sa konsensia nin nagkapira?

An mga seremonya sa kasal nin bakong Saksing mga paryente puedeng magtao nin masakit na mga kamugtakan. Paano kun pinakiolayan kamo na magin abay sa kasal? O paano kun an saindong agom bakong Saksi asin gustong makikabtang sa gabos na aktibidad? Kun an kasal sarong seremonyang sibil na an makasal sarong huwes o opisyal nin gobyerno, an pag-atender dian tibaad garo man sana pag-atender sa sarong legal na prosedimiento.

Minsan siring, puedeng maglataw an dugang pang mga problema sa seremonya sa kasal na ginigibo sa sarong relihiosong edipisyo o nin sarong klerigo. Tanganing masunod an saindong konsensia na sinanay sa Biblia asin malikayan na ikompromiso an saindong marigon na pagtubod o gumibo nin ano man na makakapasupog sa ikinakasal saka sa mga paryente kaini, puede kamong magdesisyon na dai mag-atender. (Talinhaga 22:3) Ikakalikay nindo an saindong pamilya asin an saindong sadiri sa grabeng tension paagi sa patienot na pagpaliwanag kan saindong marigon na pagtubod na basado sa Biblia, na sinasabi kun sagkod saen kamo andam na makikabtang o tibaad nagsusuherir nin alternatibo.

Pagkatapos na turotimbangon an gabos na nakakakontribwir na bagay, an nagkapirang Kristiano tibaad magdesisyon na bakong sala na mag-atender sa kasal nin bakong Saksi bilang toninong na paramasid. Alagad kun aram nin sarong Kristiano na kun maatender sia tibaad ikakompromiso nia an diosnon na mga prinsipyo, puedeng makapagkongklusyon sia na mas dakula an peligro kisa sa posibleng mga pakinabang sa pag-atender. Kun magdesisyon sia na dai mag-atender sa kasal alagad magduman sa resepsion bilang inimbitaran na bisita, dapat siang magin determinado na “gibohon an gabos na bagay sa ikakamuraway nin Dios.” (1 Corinto 10:31) Sa paggibo kan siring na mga desisyon, “an lambang saro magpapasan kan saiyang sadiring pasan” nin paninimbagan. (Galacia 6:5) Kun siring, ano man an magin desisyon nindo, girumdomon na mahalagang marhay an pagpapadanay nin marahay na konsensia sa atubangan ni Jehova Dios.