Kamo daw Nagkasala Tumang sa Banal na Espiritu?
Kamo daw Nagkasala Tumang sa Banal na Espiritu?
“May kasalan na ikakagadan.”—1 JUAN 5:16.
1, 2. Paano niato naaaraman na posibleng magkasala tumang sa banal na espiritu nin Dios?
“NAPUPURISAW akong marhay sa pagparaisip na nagkasala ako tumang sa banal na espiritu.” Iyan an isinurat nin sarong babae sa Alemania, maski ngani naglilingkod sia sa Dios. Talaga daw na an sarong Kristiano puedeng magkasala tumang sa banal na espiritu, o puersa aktiba nin Dios?
2 Iyo, posible na magkasala tumang sa banal na espiritu ni Jehova. “An gabos na klase nin kasalan asin paglanghad ipapatawad sa mga tawo,” an sabi ni Jesu-Cristo, “alagad an paglanghad tumang sa espiritu dai ipapatawad.” (Mateo 12:31) Pinapatanidan kita: “Kun maggibo kita nin tuyong pagkakasala pakatapos na maako niato an tamang kaaraman sa katotoohan, mayo na nin natatadang atang para sa mga kasalan, kundi yaon an siertong makatatakot na paghalat sa paghokom.” (Hebreo 10:26, 27) Asin si apostol Juan nagsurat: “May kasalan na ikakagadan.” (1 Juan 5:16) Alagad madepende daw sa saro na nagkasala nin magabat an pagdeterminar kun baga nakagibo sia nin “kasalan na ikakagadan”?
An Pagsolsol Nagbubunga nin Kapatawadan
3. Ano an posibleng marhay na totoo kun namomondo kitang gayo sa kasalan na nagibo niato?
3 Si Jehova an ultimong Hokom sa mga paragibo nin maraot. Sa katunayan, kita gabos kaipuhan na manimbag sa saiya, asin pirme niang ginigibo kun ano an tama. (Genesis 18:25; Roma 14:12) Si Jehova an nagdedeterminar kun baga kita nakagibo nin kasalan na daing kapatawadan, asin puede niang haleon sa sato an saiyang espiritu. (Salmo 51:11) Minsan siring, kun namomondo kitang gayo sa kasalan na nagibo niato, posibleng marhay na talagang nagsosolsol kita. Pero, ano an tunay na pagsolsol?
4. (a) Ano an kahulogan nin pagsolsol? (b) Ano an nakakarangang marhay manongod sa Salmo 103:10-14?
4 An pagsolsol nangangahulogan na binabago niato an satong aktitud sa maraot na nagibo na niato o intension pa sana niatong gibohon. Nangangahulogan iyan na kita namomondo o nagbabasol asin minatalikod sa makasalan na dalan. Kun kita nagkasala nin magabat alagad naggibo na kan kinakaipuhan na mga lakdang na magpapaheling na talagang nagsosolsol kita, mararanga kita kan mga tataramon kan salmista: “Dai [ni Jehova] ginibo sa sato an sono sa satong mga kasalan; dai man nia itinao sa sato an maninigo sa sato sono sa satong mga sala. Huli ta kun paanong an kalangitan mas halangkaw kisa sa daga, an saiyang mamomoton na kabootan dakulaon para sa mga natatakot sa saiya. Kun gurano kaharayo kan subangan sa solnopan, siring man kaiyan kaharayo sa sato na saiyang ibinugtak an satong mga kalapasan. Kun paanong an ama nagpapaheling nin pagkaherak sa saiyang mga aki, si Jehova nagpapaheling man nin pagkaherak sa mga natatakot sa saiya. Huli ta sia mismo nakakaaram na gayo kan pagkaporma sa sato, na ginigirumdom na kita kabokabo.”—Salmo 103:10-14.
5, 6. Itao an pinakasustansia kan 1 Juan 3:19-22, asin ipaliwanag an kahulogan kan mga tataramon kan apostol.
5 Nakakaranga man an mga tataramon ni apostol Juan: “Paagi kaini makakaaram kita na kita nasa katotoohan, asin tatawan niato nin kasiertohan an satong puso sa atubangan nia kun mapadapit sa kun sa ano man kita kondenaron kan satong puso, huli ta an Dios orog kadakula kisa satong puso asin nakakaaram kan gabos na bagay. Mga namomotan, kun dai kita kondenaron kan satong puso, igwa kita nin katalingkasan sa pagtaram sa Dios; asin ano man an satong hagadon inaako niato gikan sa saiya, huli ta kinukuyog niato an saiyang mga togon asin ginigibo niato an mga bagay na nakakaogma sa saiyang mga mata.”—1 Juan 3:19-22.
6 ‘Naaaraman niato na kita nasa katotoohan’ huli kan katunayan na nagpapaheling kita nin sa magturugang na pagkamoot asin dai natutuod sa paggibo nin kasalan. (Salmo 119:11) Kun sa paghona niato kondenado kita huli sa sarong dahelan, maninigo niatong girumdomon na “an Dios orog kadakula kisa satong puso asin nakakaaram kan gabos na bagay.” Nagpapaheling sa sato si Jehova nin pagkaherak huling aram nia an satong “bakong ipokritong kapadangatan na sa magturugang,” an satong pakikipaglaban sa kasalan, asin an satong mga paghihingoa na gibohon an saiyang kabotan. (1 Pedro 1:22) ‘Dai kita kokondenaron’ kan satong puso kun kita nagtitiwala ki Jehova, nagpapaheling nin sa magturugang na pagkamoot, asin dai nakaginibo nin tuyong kasalan. Magkakaigwa kita nin “katalingkasan sa pagtaram sa Dios” paagi sa pamibi, asin sisimbagon nia kita huling sinusunod niato an saiyang mga togon.
Nagkasala Sinda Tumang sa Espiritu
7. Ano an nagdedeterminar kun baga an sarong kasalan mapapatawad o dai?
7 Anong mga kasalan an daing kapatawadan? Tanganing masimbag an hapot na ini, pag-olayan niato an nagkapirang halimbawa sa Biblia. Makakaranga nanggad ini sa sato kun kita nagsosolsol alagad grabe pa man giraray an pagkapurisaw niato huli sa satong magabat na mga kasalan. Masasabotan niato na iyan depende bako sanang sa klase nin kasalan na nagibo nin saro; imbes, an nagdedeterminar kun baga an sarong kasalan mapapatawad o dai iyo an motibo, kamugtakan kan puso, asin kun sagkod saen an pagigin tinuyo kaiyan.
8. Paano nagkasala tumang sa banal na espiritu an nagkapirang Judiong namomoon sa relihion kan enot na siglo?
8 Nagkasala tumang sa banal na espiritu an enot na siglong Judiong mga namomoon sa relihion na maraot an intension na nagtumang ki Jesu-Cristo. Naheling ninda na nagpupunsionar ki Jesus an espiritu nin Dios mantang naggigibo sia nin mga milagro na nagtataong onra ki Jehova. Pero, an mga kaiwal na ini ni Cristo iinatribwir an kapangyarihan na ini ki Satanas na Diablo. Oyon ki Jesus, an mga naglanghad tumang sa banal na espiritu nin Dios sa siring na paagi naggibo nin kasalan na dai mapapatawad sa presenteng “sistema nin mga bagay ni sa madatong.”—Mateo 12:22-32.
9. Ano an paglanghad, asin ano an sinabi ni Jesus manongod kaiyan?
9 An paglanghad pagtaram na mapagbalobagi, mapanraot, o mapanlibak. Mantang an Dios an Gikanan kan banal na espiritu, an pagsabi nin mga bagay tumang sa saiyang espiritu kapareho man sana nin pagtaram tumang ki Jehova. An daing pagsolsol na pagtaram nin siring kaiyan daing kapatawadan. An pangyayari na nagin dahelan na sabihon ni Jesus an manongod sa siring na kasalan nagpapaheling na si Jesus nagtataram manongod sa mga tuyong nagtutumang sa pagpunsionar kan banal na espiritu nin Dios. Naheling kan mga Fariseo na nagpupunsionar ki Jesus an banal na espiritu ni Jehova alagad iinatribwir ninda sa Diablo an kapangyarihan na ini. Kaya nagkasala sinda nin paglanghad tumang sa espiritu. Huli kaini, si Jesus nagpahayag: “An siisay man na naglalanghad tumang sa banal na espiritu daing kapatawadan sagkod lamang, kundi nagkakasala nin kasalan na daing katapusan.”—Marcos 3:20-29.
10. Taano ta inapod ni Jesus si Judas na “aki nin kalaglagan”?
10 Estudyare man an nangyari ki Judas Iscariote. Sinunod nia an madayang dalan, na naghahabon sa kahon nin kuarta na ipinagkatiwala sa saiya. (Juan 12:5, 6) Sa huri, si Judas nagduman sa Judiong mga namomoon asin inareglo na pasaloiban si Jesus sa kantidad na 30 pidasong pirak. Iyo, nakonsensia si Judas pagkatapos kan pagpasaloib, alagad nungka siang nagsolsol kan saiyang tuyong kasalan. Bilang resulta, si Judas bakong maninigo sa pagkabuhay liwat. Huli kaiyan, inapod sia ni Jesus na “aki nin kalaglagan.”—Juan 17:12; Mateo 26:14-16.
Dai Sinda Nagkasala Tumang sa Espiritu
11-13. Paano nagkasala si Hadeng David may koneksion ki Bat-seba, asin anong karangahan an puedeng makua sa kun paano sinda trinatar nin Dios?
11 Kun minsan, an mga Kristiano na nagtuga kan saindang magabat na kasalan asin nag-ako nin espirituwal na tabang sa kamagurangan sa kongregasyon napupurisaw pa man giraray huli sa nakaaging mga paglapas ninda sa ley nin Dios. (Santiago 5:14) Kun kita personalmenteng napupurisaw sa paaging ini, posibleng marhay na makikinabang kita sa pag-estudyar sa sinasabi kan Kasuratan manongod sa mga pinatawad na an kasalan.
12 Si Hadeng David nagkasala nin magabat may koneksion ki Bat-seba, an agom ni Urias. Huling naheling nia sa saiyang pagdungaw hale sa kaharaning bubongan an nagkakarigos na magayon na babaeng ini, ipinaapod ini ni David sa saiyang palasyo saka nakidorog sa saiya. Kan maaraman sa huri na bados ini, nagpakana si David na an agom ni Bat-seba, si Urias, dumorog sa saiyang agom tanganing matahoban an pagsambay. Kan dai magin mapanggana an pakanang iyan, inareglo kan hade na magadan si Urias sa ralaban. Pakatapos kaiyan, nagin agom ni David si Bat-seba asin nagkaaki sa saiya alagad an aki nagadan.—2 Samuel 11:1-27.
13 Inasikaso ni Jehova an mga bagay-bagay may koneksion ki David asin Bat-seba. Pinatawad nin Dios si David, na minalataw na kinokonsiderar an mga bagay na siring baga kan saiyang pagsolsol asin kan pakikipagtipan sa saiya para sa Kahadean. (2 Samuel 7:11-16; 12:7-14) Minalataw na si Bat-seba nagsolsol, huling nagkapribilehio sia na magin ina ni Hadeng Salomon asin magin apoon ni Jesu-Cristo. (Mateo 1:1, 6, 16) Kun kita nagkasala, marahay na girumdomon na tinatawan ni Jehova nin atension an satong may pagsolsol na aktitud.
14. Paano iiniilustrar sa kamugtakan ni Hadeng Manases kun sagkod saen an pagpatawad nin Dios?
14 Iiniilustrar man sa kamugtakan ni Hadeng Manases kan Juda kun sagkod saen an pagpatawad ni Jehova. Naggibo sia nin maraot sa pagheling ni Jehova. Si Manases naggibo nin mga altar para ki Baal, nagsamba sa “gabos na hukbo kan kalangitan,” asin nagtogdok pa ngani nin mga altar para sa falsong mga dios sa duwang patyo kan templo. Pinaagi nia an saiyang mga aking lalaki sa kalayo, pinakosog nia an espiritistikong mga gibo, asin pinangyari nia na an mga nag-eerok sa Juda asin Jerusalem “gumibo nin mas maraot kisa mga nasyon na pinara ni Jehova sa atubangan kan mga aki ni Israel.” Dai dinangog an mga patanid na itinao kan mga propeta nin Dios. Sa kahurihurihi, si Manases dinarang bihag kan hade nin Asiria. Mantang bihag, nagsolsol si Manases asin padagos na mapakumbabang namibi sa Dios, na iyo an nagpatawad sa saiya asin nagbalik sa saiya sa pagkahade sa Jerusalem, na duman pinalakop nia an tunay na pagsamba.—2 Cronica 33:2-17.
15. Anong pangyayari sa buhay ni apostol Pedro an nagpapaheling na si Jehova “bulaos” na nagpapatawad?
15 Pakalihis nin dakol na siglo, si apostol Pedro nagkasala nin magabat paagi sa pagpainda ki Jesus. (Marcos 14:30, 66-72) Minsan siring, “bulaos” na pinatawad ni Jehova si Pedro. (Isaias 55:7) Taano? Huli ta tunay na nagsolsol si Pedro. (Lucas 22:62) Igwa nin malinaw na ebidensia kan pagpatawad nin Dios pakalihis nin 50 aldaw, kan magkapribilehio si Pedro na magtao nin mapusong patotoo manongod ki Jesus kan aldaw nin Pentecostes. (Gibo 2:14-36) Bako daw na magigin mapagpatawad man an Dios sa mga tunay na nagsosolsol na mga Kristiano ngonyan? “Kun mga sala an saimong binabantayan, O Jah, O Jehova, siisay an makakatindog?” an awit kan salmista, “huli ta yaon sa saimo an tunay na pagpatawad.”—Salmo 130:3, 4.
Paghale kan Pagkatakot Manongod sa Pagkakasala Tumang sa Banal na Espiritu
16. Sa anong mga kamugtakan nagpapatawad an Dios?
16 An mga halimbawa na nasambitan sa enotan posibleng makatabang sa sato na mahale an satong kahaditan manongod sa pagkakasala tumang sa banal na espiritu. Ipinapaheling kan mga halimbawang ini na si Jehova talagang nagpapatawad sa nagsosolsol na mga parakasala. An pinakamahalaga iyo an odok na pamibi sa Dios. Kun kita nagkasala, puede kitang makimaherak para sa kapatawadan basado sa atang na pantubos ni Jesus, pagkaherak ni Jehova, minana niatong pagkabakong sangkap, asin sa satong rekord nin maimbod na paglilingkod. Huling naaaraman niato an manongod sa dai na kutana maninigong kabootan ni Jehova, puede kitang maghagad nin kapatawadan, na may kompiansa na itatao iyan.—Efeso 1:7.
17. Ano an maninigong gibohon kun kita nagkasala asin nangangaipo nin espirituwal na tabang?
17 Paano kun kita nagkasala alagad dai na kayang mamibi huli ta naraot na kan satong kasalan an satong relasyon ki Jehova? Mapadapit digdi, si disipulo Santiago nagsurat: “Apodon [kan siring na tawo] an kamagurangan na lalaki kan kongregasyon, asin sinda mamibi para sa saiya, na linalahidan sia nin lana sa ngaran ni Jehova. Asin an pamibi na may pagtubod magpapaomay sa may kamatean, asin babangonon sia ni Jehova. Siring man, kun sia nakaginibo nin mga kasalan, iyan ipapatawad sa saiya.”—Santiago 5:14, 15.
18. Taano an kasalan nin sarong tawo ta dai man nangangahulogan na dai nang kapatawadan dawa kun sia hinale sa kongregasyon?
18 Dawa kun kan nakaagi an nagkasala habong magsolsol asin sia hinale sa kongregasyon, dai man nangangahulogan na an saiyang kasalan dai nang kapatawadan. May koneksion sa sarong linahidan sa Corinto na natiwalag huli ta nakaginibo nin maraot, si Pablo nagsurat: “An pagsagweng ini na itinao kan kadaklan igo na para sa siring na tawo, kaya, sa kabaliktaran ngonyan, maninigo sia nindong maboot na patawadon asin rangahon, tanganing an siring na tawo dai madaog kan saiyang pagigin labi-labi kamamondo.” (2 Corinto 2:6-8; 1 Corinto 5:1-5) Minsan siring, tanganing ikabalik an relasyon ki Jehova, kaipuhan na akoon kan mga nagkasala an basado sa Biblia na espirituwal na tabang kan Krisitianong kamagurangan asin magpaheling nin ebidensia nin tunay na pagsolsol. Dapat na “magpaheling [sinda] nin mga bunga na angay sa pagsolsol.”—Lucas 3:8.
19. Ano an makakatabang sa sato na magdanay na “makosog sa pagtubod”?
19 Ano an tibaad magin dahelan nin pakamate na nagkasala kita tumang sa banal na espiritu? Tibaad an dahelan iyo an sobrang pagparaisip o an maluyang kamugtakan sa pisikal. Sa siring na kamugtakan, puedeng makatabang an pamibi asin dugang na pahingalo. Nangorognang dai niato maninigong togotan si Satanas na panluyahon an satong boot, na huli kaiyan dai na kita maglingkod sa Dios. Mantang dai naoogma si Jehova sa kagadanan kan maraot, seguradong dai sia naoogma sa pagkawara kan siisay man sa mga lingkod nia. Kaya kun natatakot kita na tibaad nagkasala kita tumang sa banal na espiritu, maninigong padagos kitang magkakan sa Tataramon nin Dios, kaiba an nakakarangang mga kabtang na yaon sa Salmo. Kaipuhan na kita padagos na mag-atender sa mga pagtiripon kan kongregasyon asin makikabtang sa paghuhulit kan Kahadean. An paggibo kaiyan makakatabang sa sato na magin “makosog sa pagtubod” asin dai mahadit sa posibilidad na nakagibo kita nin daing kapatawadan na kasalan.—Tito 2:2.
20. Anong pangangatanosan an puedeng makatabang sa sarong tawo na maheling na dai sia nagkasala tumang sa banal na espiritu?
20 An siisay man na natatakot na nagkasala sinda tumang sa banal na espiritu puedeng hapoton an saindang sadiri: ‘Ako daw naglanghad tumang sa banal na espiritu? Mantang nagsolsol na ako sa sakong kasalan, binago ko na daw an sakong kaisipan manongod sa siring na pagsolsol? May pagtubod daw ako sa pagpapatawad nin Dios? Ako daw sarong apostata na nagsikwal sa espirituwal na liwanag?’ Posibleng marhay, marerealisar kan siring na mga indibiduwal na dai sinda naglanghad tumang sa banal na espiritu nin Dios, ni na nagin mga apostata sinda. Sinda nagsosolsol, asin igwa sinda nin nagdadanay na pagtubod sa pagpatawad ni Jehova. Kun siring, dai sinda nagkasala tumang sa banal na espiritu ni Jehova.
21. Anong mga hapot an tatawan nin atension sa sunod na artikulo?
21 Nakakaginhawa nanggad na masierto na dai kita nagkasala tumang sa banal na espiritu! Minsan siring, may koneksion sa temang ini an mga hapot na pag-oolayan sa sunod na artikulo. Halimbawa, puede niatong ihapot sa satong sadiri: ‘Ako daw talagang ginigiyahan kan banal na espiritu nin Dios? Naheheling daw sa sakong buhay an mga bunga kaiyan?’
Ano an Simbag Nindo?
• Taano ta makakapagsabi kita na posible na magkasala tumang sa banal na espiritu?
• Ano an boot sabihon nin pagsolsol?
• Sairisay an nagkasala tumang sa espiritu kan si Jesus nasa daga pa?
• Paano mahahale an kahaditan manongod sa pakagibo nin kasalan na daing kapatawadan?
[Mga Hapot Para sa Pag-adal]
[Ritrato sa pahina 17]
Nagkasala tumang sa banal na espiritu nin Dios an mga nagsabi na naggibo si Jesus nin mga milagro paagi sa kapangyarihan ni Satanas
[Ritrato sa pahina 18]
Minsan ngani pinaindahan nia si Jesus, dai nakagibo si Pedro nin kasalan na daing kapatawadan