Estorya nin Buhay

Nagbunga an Samong Paghanap nin Nagdadanay na Kayamanan

Isinaysay ni Dorothea Smith asin Dora Ward

Anong klaseng kayamanan an hinahanap mi? Kami duwang daragita kaidto na odok na nagmamawot na makikabtang sa kaotoban kan pagboot ni Jesus: ‘Paduman kamo asin gumibo kamo nin mga disipulo sa mga tawo kan gabos na nasyon.’ (Mateo 28:19) Ipapaliwanag mi kun paano nagbunga nin nagdadanay na kayamanan an paghanap na ini.

DOROTHEA: Kan 1915, dai nahaloy pagkapoon kan Guerra Mundial I, namundag ako bilang ikatolong aki sa pamilya mi. Nag-istar kami harani sa Howell, Michigan, sa Estados Unidos. An sakong ama bakong relihioso, alagad an sakong ina matatakton sa Dios. Nagmaigot an sakong ina na tokdoan kaming sunodon an Sampulong Togon, alagad nahadit sia na an sakong mga tugang na si Willis asin Viola saka ako bakong miembro nin arin man na iglesia.

Kan 12 anyos ako, nagdesisyon si Nanay na maninigo akong mabunyagan bilang miembro kan Iglesia Presbiteriano. Malinaw ko pang nagigirumdoman an aldaw kan pagbunyag sa sako. Duwang omboy, na an lambang saro kapot kan ina kaiyan, an nabunyagan kasabay ko. Napasupog ako nin grabe na mabunyagan kaiba nin mga omboy. Winisikan kan ministro nin pira sanang toro nin tubig an sakong payo asin naghinghing nin nagkapirang tataramon na dai ko nasabotan. Talagang mayo akong gayong aram manongod sa pagbunyag siring kan duwang omboy na idto!

Sarong aldaw kan 1932, may kotseng naglaog sa samong driveway, asin binukasan kan sakong ina an pinto. Nakatindog duman an duwang hoben na lalaki na nag-aalok nin relihiosong mga libro. Nagpamidbid an saro sa sainda bilang Albert Schroeder. Ipinaheling nia ki Nanay an nagkapirang  babasahon na ipinublikar kan Mga Saksi ni Jehova. Kinua kan sakong ina an mga libro. Nakatabang an mga publikasyon na idto sa saiya na akoon an katotoohan gikan sa Tataramon nin Dios.

Nagpoon an Paghanap nin Kayamanan

Pag-abot nin panahon, nagbalyo ako sa Detroit tanganing mag-istar kaiba kan sakong tugang na babae. Duman ko namidbid an sarong may edad nang babae na nagdalaw sa sakong tugang tanganing tokdoan sia sa Biblia. An mga pag-orolay na idto nagpagirumdom sa sako nin sarong semanal na programa sa radyo na hinihinanyog ko kaidto mantang nasa harong kaiba an sakong ina. An programang iyan kompuesto nin 15 minutos na pahayag manongod sa sarong tema sa Biblia na ipinahayag ni J. F. Rutherford, na nangenot sa Mga Saksi ni Jehova kan panahon na iyan. Kan 1937 nagpoon kaming makiasosyar sa enot na kongregasyon kan mga Saksi ni Jehova sa Detroit. Nabautismohan ako kan suminunod na taon.

Sa kapinonan kan dekada nin 1940, ipinaisi na poponan kan Mga Saksi ni Jehova an sarong paadalan na inaapod na Gilead sa South Lansing, Nueva York, tanganing sanayon an mga tugang na magin misyonero. Kan maaraman ko na iimbitaran na maglingkod sa ibang nasyon an nagkapirang naggradwar sa paadalan na iyan, sinabi ko sa sakong sadiri, ‘Gusto kong mag-adal sa Gilead!’ Ginibo kong pasohan an pag-adal sa Gilead. Pribilehio nanggad na hanapon sa ibang mga nasyon an “kayamanan”—an boot sabihon, an mga tawong nagmamawot na magin disipulo ni Cristo Jesus!—Haggeo 2:6, 7.

Luway-Luway na Inaabot an Sakong Pasohan

Kan Abril 1942, nagpondo ako sa sakong trabaho asin nagpoon na maglingkod bilang payunir, o bilog na panahon na ebanghelisador, sa Findlay, Ohio, kaiba an grupo nin limang Saksi. Mayo nin kongregasyon na may programa nin regular na mga pagtiripon, alagad nagpaparinigonan kami nin boot paagi sa pagbasa bilang grupo nin mga artikulo na hale sa satong Kristianong mga publikasyon. Durante kan sakong enot na bulan nin pagpapayunir, nakapasakamot ako nin 95 libro sa interesadong mga tawo! Pakalihis nin mga saro may kabangang taon, iinasignar akong maglingkod bilang espesyal payunir sa Chambersburg, Pennsylvania. Duman nakiiba ako sa grupo nin lima pang payunir, kaiba si Dora Ward, sarong tugang na Kristiana gikan sa Iowa. Nagin kapartner ko si Dora sa pagpapayunir. Nabautismohan kami sa iyo man sanang taon, asin pareho mi mawot na mag-adal sa Paadalan nin Gilead asin maglingkod sa ibang nasyon bilang misyonero.

Sa kapinonan kan 1944, nag-abot an mahalagang aldaw! Pareho kami nakaresibi nin imbitasyon na mag-adal sa ikaapat na klase nin Gilead. Nagpalista kami kan Agosto kan taon na iyan.  Alagad bago ako magpadagos sa pag-estorya, togotan nindo si Dora na isaysay sa saindo kun paano ko sia nagin haloy na kaibaiba sa paghanap nin kayamanan.

Gustong-Gusto Nang Magpoon sa Bilog na Panahon na Paghuhulit

DORA: An sakong ina nagngangayongayo kaidto na logod masabotan nia an Tataramon nin Dios. Sarong Domingo, kaiba ko sia kan madangog mi sa radyo an pahayag ni J. F. Rutherford. Kan matapos an pahayag, nagkagsing si Nanay, “Ini an katotoohan!” Dai nahaloy pakatapos kaiyan, pinag-adalan mi an mga publikasyon kan Mga Saksi ni Jehova. Kan 1935, kan ako 12 anyos, nag-atender ako nin pahayag kan saro sa Mga Saksi ni Jehova manongod sa bautismo, asin namatean ko an odok sa pusong kamawotan na idusay an sakong buhay ki Jehova. Pakalihis nin tolong taon, nabautismohan ako. An sakong pagdusay asin bautismo nakatabang sa sako na marigon na papagdanayon na malinaw sa sakong isip an mga pasohan ko durante kan natatadang mga taon na nag-eeskuela ako. Gustong-gusto ko nang makatapos sa pag-eskuela tanganing makapoon na akong maglingkod bilang payunir.

Kan panahon na iyan an grupo nin mga Saksi na inaasosyaran mi nagtitiripon bilang kongregasyon sa Fort Dodge, Iowa. Dakol na paghihingoa an kaipuhan tanganing makaatender sa Kristianong mga pagtiripon. Kaidto, an pinag-aadalan na mga artikulo sa Torrengbantayan mayo nin kaibang mga hapot na pag-oolayan sa kongregasyon. Pinapaandam kami nin mga hapot na itatao sa tugang na namamayo sa Pag-adal sa Torrengbantayan. Kun Lunes na banggi, kaming mag-ina nag-aandam nin hapot para sa kada parapo, asin itinatao mi ini sa namamayo tanganing makapili sia nin mga ihahapot.

Sa panapanahon, nagsosongko sa samong kongregasyon an nagbibiaheng paraataman. An saro sa mga tugang na idto, si John Booth, an nagtabang sa sako na magpoon sa ministeryong pagharongharong kan ako 12 anyos. Sa edad na 17, hinapot ko sia kun paano sisimbagan an aplikasyon para sa pagpapayunir, asin tinabangan nia ako. Dai ko inisip kaidto na magkakahelingan kami paghaloyhaloy asin bilog na buhay ko siang magigin katood!

Bilang payunir, parate kong nakakaibanan si Tugang na Dorothy Aronson, sarong bilog na panahon na ebanghelisador na mas matua sa sako nin 15 taon. Kapartner ko sia sa pagpayunir bago sia inimbitaran na mag-adal sa enot na klase nin Gilead kan 1943. Pagkatapos kaiyan, nagpadagos akong maglingkod nin solo bilang payunir.

Dai Kami Napaontok nin Pagtumang

An dekada nin 1940 depisil na mga taon para sa samo huli sa nasyonalismo na pinukaw kan Guerra Mundial II. Kun naghuhulit kami sa harong-harong kaidto, parate kaming dinadaklag nin bugok na mga sogok, hinog na mga kamatis, asin kun beses mga gapo pa ngani! Uminabot an mas  magabat na pagbalo kan ipresentar mi an mga magasin na Torrengbantayan asin Consolation (ngonyan Awake!) sa kanto kan tinampo. Dinolok kami nin pulis, na sinutsutan nin relihiosong mga paratumang, asin nanhuma na dadakopon kami kun maheling giraray kaming naghuhulit nin hayagan.

Siempre, dai kami nag-ontok sa paghuhulit, asin dinara kami sa presinto tanganing usisaon. Pakabutas sa samo, nagbuelta kami sa parehong kanto kan tinampo asin nag-alok nin parehong mga magasin. Sa sadol nin mga tugang na may katongdan, ginamit mi an Isaias 61:1, 2 tanganing idepensa an samong paninindogan. Sarong beses kan dinolok ako nin sarong hoben na pulis, ninenerbios na sinambit ko sa saiya an mga teksto. Makangangalas, bigla siang tuminalikod asin huminale! Namatean ko na pinoprotehiran kami kan mga anghel.

Sarong Dai Malilingawan na Aldaw

Kan 1941, magayagaya akong nakaatender sa limang aldaw na kombension kan mga Saksi ni Jehova sa St. Louis, Missouri. Durante kan kombension na iyan, pinakiolayan ni Tugang na Rutherford an gabos na aki na an edad nasa pag-oltanan nin 5 asin 18 na magtiripon sa pangenot na kabtang kan istadyum. Rinibong aki an nagtiripon. Tinaratara kami ni Tugang na Rutherford paagi sa pagpaypay kan saiyang panyo. Nagpaypay man kami gabos bilang simbag. Pagkatapos na magpahayag nin sarong oras, sia nagsabi: “An mga aki na nag-oyon na gibohon an kabotan nin Dios asin nanindogan sa kampi kan saiyang teokratikong gobyerno paagi ki Cristo Jesus asin huli kaini nag-oyon na kumuyog sa Dios asin sa saiyang Hade, tumindog tabi kamo.” An 15,000 na aki durungan na nagtirindog—saro ako sa sainda! Nagsabi pa an ispiker: “An gabos sa saindo na magibo kan makakaya nindo tanganing sabihon sa iba an manongod sa Kahadean nin Dios asin sa mga bendisyon na kaiba dian, magsabi tabi nin Iyo.” Nagsabi kami nin Iyo, asin sinundan iyan nin naghuhugong na pag-upak.

Dangan ilinuwas an librong Children, * asin sarong halabang pila nin mga hoben an nagduman sa may plataporma, kun saen tinawan ni Tugang na Rutherford an lambang saro sa samo nin kopya kan bagong libro. Nakakaogma nanggad iyan! Ngonyan, dakol sa mga nakaresibi nin libro sa okasyon na iyan an maigot pa man giraray na naglilingkod ki Jehova sa bilog na kinaban, na nagpapahayag manongod sa Kahadean nin Dios asin sa saiyang katanosan.—Salmo 148:12, 13.

Pagkatapos magpayunir sa laog nin tolong taon, kanigoan an sakong kaogmahan kan maresibi ko an asignasyon bilang espesyal payunir sa Chambersburg! Duman namidbid ko si Dorothea, asin dai nahaloy pirme na kaming magkaibanan. Pano kami nin entusiasmo nin pagkahoben asin kabagsikan. Gustong-gusto ming pahiwason an kabtang mi sa paghuhulit. Magkaibanan ming pinonan an paghanap nin kayamanan na luminawig sa bilog ming buhay.—Salmo 110:3.

Pakapoon nin pira sanang bulan sa paglilingkod bilang espesyal payunir, namidbid mi an sarong naggradwar sa enot na klase nin Gilead, si Albert Mann. Pahale na sia tanganing magpasiring sa ibang nasyon kun saen sia idinestino. Pinarigon nia an boot mi na akoon an ano man na asignasyon sa ibang nasyon na tibaad maresibi mi.

Magkaibanan sa Paadalan

DORA ASIN DOROTHEA: Imahinara an kagayagayahan mi kan magpoon kami sa pagsasanay bilang misyonero! Kan enot na aldaw sa paadalan, si Albert Schroeder, an tugang na nagpasakamot kan librong Studies in the Scriptures sa ina ni Dorothea 12 taon an nakaagi, an nagrehistro sa samo. Yaon man duman si John Booth. Sia na an lingkod kaidto sa Kingdom Farm, kun saen yaon an paadalan. Paghaloyhaloy, sindang duwa naglingkod bilang miembro kan Namamahalang Grupo kan Mga Saksi ni Jehova.

Sa Paadalan nin Gilead, pinag-adalan mi an mas hararom na mga katotoohan kan Biblia. Marahayon na pagtotokdo iyan. Igwa nin 104 estudyante sa klase mi, kaiba an enot na dayohan na estudyante gikan sa Mejico. Pinagmamaigotan niang paoswagon an saiyang Ingles mantang pinagmamaigotan ming makanood nin Kastila. Ogmahon kaming marhay kan aldaw na idistribwir ni Tugang na Nathan H. Knorr sa samo na mga estudyante an mga asignasyon sa ibang nasyon! An kadaklan idinestino sa Amerika Sentral asin Amerika del Sur; Chile an asignasyon mi.

 Paghanap nin Kayamanan sa Chile

Tanganing makaduman kami sa Chile, kaipuhan na magkaigwa kami nin visa, na nangaipo nin harohalawig na panahon. Huli kaini, pakagradwar kan Enero 1945, naglingkod kami nin saro may kabangang taon bilang payunir sa Washington, D.C. Kan maresibi mi na an samong visa, nagin kaiba kami sa sarong grupo nin siyam na misyonero na nagbiahe pasiring sa Chile. An pito hale sa mas naenot na mga klase nin Gilead.

Sinabat kami nin nagkapirang Kristianong tugang kan dumatong kami sa Santiago, na iyo an kabisera. An saro sa sainda iyo si Albert Mann, an naggradwar sa Gilead na nagparigon sa samo pira pa sanang taon an nakaagi. Nagpa-Chile sia sarong taon bago kaidto, kaiba si Joseph Ferrari na hale sa ikaduwang klase nin Gilead. Mayo pang 100 an parahayag sa bilog na Chile kan mag-abot kami. Gustong-gusto ming maghanap asin makanompong nin dakol pang kayamanan—mga tawong sadiosan an puso—sa samong bagong asignasyon.

Iinasignar kaming maglingkod sa erokan nin mga misyonero sa Santiago. An mamuhay kaiba nin dakulang pamilya nin mga misyonero bagong eksperyensia para sa samo. Apuera sa pag-abot sa kahagadan na bilang nin oras sa paghuhulit, an gabos na misyonero inasignaran na magluto nin sarong beses kada semana para sa pamilya. Nakaeksperyensia kami nin nakakasupog na mga pangyayari. Sarong beses, nagluto kami nin mainit na mga biskuit para sa pamahaw kan samong gutom nang pamilya, alagad kan iluwas mi sa horno an mga biskuit, may mabataon kaming naparong. Nagamit mi an baking soda imbes na baking powder! May nagbugtak nin baking soda sa daing laog na lata nin baking powder.

Pero, mas nakakasupog an mga nagin sala mi mantang nag-aadal nin Kastila. Haros magpondo sa pag-adal an sarong dakulang pamilya na inaadalan mi sa Biblia huli ta dai ninda maintindihan an sinasabi mi. Alagad paagi sa pagbasa kan mga teksto sa sadiri nindang mga Biblia, nakanood man giraray sinda kan katotoohan, asin lima sa sainda an nagin Saksi. Sa mga taon na idto, mayo nin kurso sa pag-adal nin lenguahe para sa bagong mga misyonero. Pinonan mi tolos-tolos an paghuhulit asin nagmaigot na makanood kan lenguahe sa mga tawo na hinuhulitan mi.

Nagsagibo kami nin dakol na pag-adal sa Biblia, asin marikas an paghimate kan nagkapira sa samong mga inaadalan sa Biblia. An iba nangaipo nin dakol na pasensia. Naghinanyog si Teresa Tello, sarong hoben na babae, sa mensahe kan katotoohan asin nagsabi, “Magbuelta tabi kamo asin estoryahi pa ako.” Nagbuelta kami nin 12 beses alagad dai mi sia nanompongan. Nag-agi an tolong taon. Dangan nag-atender kami sa sarong asamblea na ginibo sa sarong teatro sa Santiago. Kan pahale na kami sa asamblea kan Domingo, may nag-apod, “Senyorita Dora, Senyorita Dora!” Suminalingoy kami, asin naheling mi si Teresa. Dinadalaw nia an saiyang tugang na babae sa ibong kan tinampo asin nagpasiring sia sa teatro tanganing maheling kun ano an nangyayari duman. Nakakagayagaya nanggad na maheling giraray sia! Iinareglo mi an pag-adal sa Biblia, asin dai nahaloy pakatapos kaiyan sia nabautismohan. Paghaloyhaloy sia nagin espesyal payunir. Ngonyan, pakalihis nin mga 45 taon, si Teresa nasa espesyal na bilog na panahon na paglilingkod pa man giraray.—Eclesiastes 11:1.

 Pakadiskobre nin Kayamanan sa “Baybay”

Kan 1959 idinestino kami sa Punta Arenas—na nangangahulogan “Lugar nin Baybay”—sa pinakatimog na poro kan 4,300 kilometros na baybayon nin Chile. Pambihirang teritoryo an Punta Arenas. Durante kan tig-init, halawig an mga oras na aldaw—an liwanag nin aldaw nagpapadagos sagkod alas 11:30 nin banggi. Dakol na aldaw an nagamit mi sa ministeryo, alagad may mga olang, huli ta dara nin tig-init an makosogon na doros nin Antartika. Dangan pag-abot nin tiglipot, halipot an mga oras na aldaw.

Sa ibong nin mga kadepisilan na ini, igwa nin nakakaakit sa Punta Arenas. Durante kan tig-init, pirmeng igwa nin naghihibog na panganoron sa parteng solnopan kan langit. Kun minsan, biglang minaoran nin makosog dangan minadoros. Dangan nagkakaigwa nin magayon na hablon-dawani mantang an saldang minataros sa mga panganoron. Kun beses yaon an mga hablon-dawaning ini sa laog nin nagkapirang oras, na minalataw asin nawawara mantang minataros an saldang sa mga panganoron.—Job 37:14.

Kaidto, pira sana an parahayag sa Punta Arenas. Kaipuhan na kaming mga tugang na babae an mamayo sa mga pagtiripon sa sadit na kongregasyon duman. Binendisyonan ni Jehova an mga paghihingoa mi. Pakalihis nin 37 taon, nagbuelta kami sa lugar na ini tanganing dumalaw. Ano an nanompongan mi? Anom na nag-ooswag na kongregasyon asin tolong magayon na Kingdom Hall. Nakakagayagaya nanggad na itinogot ni Jehova na makadiskobre kami nin espirituwal na kayamanan sa mga baybay na iyan sa timog!—Zacarias 4:10.

Dugang Pang Kayamanan sa “Halakbang na Baybayon”

Pagkatapos na maglingkod nin tolo may kabangang taon sa Punta Arenas, iinasignar kami na maglingkod sa duongan na siudad nin Valparaiso. An siudad kompuesto nin 41 bulod na nakapalibot sa baybayon na dian natatanaw an Kadagatan nin Pasipiko. Nagkonsentrar kami kan samong paghuhulit sa saro sa mga bulod na ini, an Playa Ancha, na nangangahulogan “Halakbang na Baybayon.” Durante kan 16 na taon na pag-istar mi duman, naheling mi an pag-oswag sa espirituwal kan sarong grupo nin hoben na mga Kristianong tugang na lalaki sagkod sa punto na sinda ngonyan naglilingkod na bilang nagbibiaheng mga paraataman asin Kristianong kamagurangan sa mga kongregasyon sa bilog na Chile.

An sunod ming asignasyon sa pagmimisyonero iyo an Viña del Mar. Naglingkod kami duman nin tolo may kabangang taon sagkod na naraot an erokan nin mga misyonero huli sa linog. Nagbuelta kami sa Santiago, kun saen kami nagpoon na maglingkod bilang misyonero kaidtong 40 taon na an nakaagi. Nagbago na an mga kamugtakan. Nakapatogdok na nin bagong mga pasilidad kan sangang opisina, asin an dating edipisyo nagin nang erokan kan gabos na misyonerong yaon pa sa nasyon. Paghaloyhaloy, an erokan na iyan pinonan nang gamiton bilang lugar para sa Paadalan sa Ministeryal na Pagsasanay. Kan panahon na iyan, pinatunayan giraray sa samo an mamomoton na kabootan ni Jehova. Lima sa samo na mga misyonero na halangkaw na an edad an inimbitaran na mag-erok sa Bethel. Durante kan panahon na naglingkod kami sa Chile, nagkaigwa kami nin 15 laen-laen na asignasyon. Naheling mi an pag-oswag kan gibohon poon sa mayo pang 100 na parahayag sagkod sa mga 70,000! Nakakagayagaya nanggad na maghanap nin kayamanan sa Chile sa laog nin 57 taon!

Ikinakaogma ming marhay na itinogot ni Jehova na makanompong kami nin kadakol na tawo—talagang kayamanan—na padagos na ginagamit ni Jehova sa saiyang organisasyon. Durante kan labing 60 taon na magkaibanan kaming naglilingkod ki Jehova, bilog na puso kaming minaoyon sa saboot na ipinahayag ni Hadeng David, na nagsurat: “Kanigoan kaabunda kan saimong karahayan, na saimong iningatan para sa mga natatakot sa saimo!”—Salmo 31:19.

[Nota sa Ibaba]

[Mga Ritrato sa pahina 9]

Si Dorothea kan 2002 asin kan sia naghuhulit kan 1943

[Ritrato sa pahina 10]

Naghuhulit sa tinampo sa Fort Dodge, Iowa, kan 1942

[Ritrato sa pahina 10]

Si Dora, 2002

[Ritrato sa pahina 12]

Si Dorothea asin Dora sa luwas kan enot nindang erokan nin mga misyonero sa Chile, 1946