Taano ta Dapat na Likayan an Pagigin Sobrang Marhay?

SI Jehova an personipikasyon nin pagkatimbang. “Sangkap an saiyang gibo,” asin an saiyang hustisya nungkang maringis, huling iyan pirmeng may kaibang pagkaherak. (Deuteronomio 32:4) An saiyang pagkamoot nungkang dai nin prinsipyo, huling sia naghihiro kaoyon kan saiyang sangkap na mga ley. (Salmo 89:14; 103:13, 14) An satong enot na mga magurang linalang na timbang sa gabos na bagay. Mayo sinda nin tendensia sa ano man na pagigin sobrang marhay. Minsan siring, an paglaog nin kasalan nagbunga nin “kakundian”—pagkabakong sangkap—na nagresulta sa pagkawara kan pagkatimbang na iyan.—Deuteronomio 32:5.

Sa pag-ilustrar: Nakasakay na daw kamo sa sarong kotse o bisikleta na an rueda may dakulang butog? Daing duwa-duwa na nagin maantal saka peligroso an biahe huli sa depektong ini. An siring na rueda kaipuhan na pakarhayon bago grumabe an kamugtakan kaiyan o kumupos iyan. Kaagid kaiyan, an satong bakong sangkap na mga personalidad may tendensia sa iregularidad. Kun totogotan niatong magdakula an “mga butog” na iyan, an satong biahe sa buhay puedeng magin maantal na marhay, peligroso pa ngani.

Kun beses an satong marahay na mga kualidad, an satong mga kakosogan, puedeng sumagkod sa pagigin sobrang marhay. Halimbawa, minsan ngani hinahagad kan Ley ni Moises sa mga Israelita na magsulot nin mga gubing na may mga kabingkabing, an mga Fariseo kan panahon ni Jesus, huling gustong magin lataw sa kadaklan, ‘pinadakula an mga kabingkabing kan saindang mga gubing’ nin sobrang marhay. An motibo ninda iyo na paluwason na mas banal sinda kisa sa kapwa ninda.—Mateo 23:5; Bilang 15:38-40.

Ngonyan an nagkapirang tawo naghihingoang makakua nin atension minsan sa ano man na paaging posible, dawa ngani sa paaging nakakapakubhan sa iba. Tibaad ini sa katunayan sarong desesperadong agrangay: “Mangnohon nindo ako! Ako saro man na indibiduwal!” Alagad an pagigin sobrang marhay sa paggubing, aktitud, asin aksion dai makakapanigo sa tunay na mga pangangaipo nin sarong Kristiano.

Sarong Timbang na Aktitud sa Trabaho

Siisay man kita asin saen man kita nag-eerok, an kapakipakinabang na trabaho sarong bagay na makakatabang na magin makahulogan an satong buhay. Kita linalang tanganing makanompong nin satispaksion sa siring na trabaho. (Genesis 2:15) Huli kaiyan, kinokondenar kan Biblia an kahugakan. Si apostol Pablo direktang nagsabi: “Kun an siisay man habong magtrabaho, dai man sia pagpakakanon.” (2 Tesalonica 3:10) Tunay nanggad, an paghinugak sa trabaho puedeng magbunga nin bako sanang kadukhaan asin pagkadiskontento kundi siring man kan pagdesaprobar nin Dios.

An dakol minagawe nin sobrang marhay sa kabaliktaran na paagi, na nagigin bangkag sa trabaho, na boluntad na nagpapaoripon sa saindang trabaho. Minahale sa harong nin amay na aga asin minapuli nin banggihon na, sinda nangangatanosan na an saindang trabaho para sa pinakaikakarahay kan saindang pamilya. Pero, an saindang pamilya tibaad sa katunayan mga biktima kan siring na debosyon sa trabaho. An sarong misis na an agom parateng nag-oobertaim nin dakol na oras sa saiyang trabaho nagsasabi: “Maoogma akong iribay an gabos na bagay sa luhosong harong na ini sa oportunidad na makaibanan mi digdi kan samong mga aki an sakong agom.” An mga piniling magtrabaho nin sobra maninigong seryosong pakaisipon an personal na eksperyensia ni Hadeng Salomon: “Hineling ko an gabos na ginibo ko na hinaman kan sakong mga kamot asin an  kahigosan na pinaghigosan kong magibo, asin, uya! an gabos daing kamanungdanan asin paglapag sa doros.”—Eclesiastes 2:11.

Iyo, kun dapit sa trabaho, dapat niatong likayan an arin man sa pagigin sobrang marhay. Puede kitang magin mahigos na mga trabahador, mantang ginigirumdom na an pagigin oripon nin trabaho hahalean kita nin kaogmahan asin tibaad nin labi pa dian.—Eclesiastes 4:5, 6.

Likayan an Sobrang Marhay na Pagmansay sa Kawilihan

Naghula an Biblia manongod sa satong panahon: “An mga tawo magigin . . . mamomoton sa kasingawan imbes na mga mamomoton sa Dios.” (2 Timoteo 3:2, 4) An pag-aaabot sa mga kasingawan nagin saro sa pinakaepektibong mga instrumento ni Satanas tanganing akiton an mga tawo parayo sa Dios. Naglalakop an pagpangana sa dibersion asin pag-aling-aling, na arog baga sa mga isport na peligroso o nagpapalangkaw nin “adrenalina.” An listahan kan siring na mga aktibidad padagos na naglalaba, asin an kabilangan nin mga nakikikabtang dian nagdadakol. Taano ta nagigin popular iyan? An dakol na tawo, na daing pagkakontento sa saindang pangaroaldaw na buhay, naghahanap nin paorog nang paorog na pampagana nin boot. Alagad tanganing mapagdanay an siring na gana nin boot kaipuhan an nag-oorog na peligro. Linilikayan kan mga Kristianong makinuyog sa konsensia an peligrosong mga isport huli sa paggalang sa balaog na buhay asin sa Kagtao kaiyan.—Salmo 36:9.

Kan lalangon nin Dios an enot na tawong mag-agom, saen nia sinda ibinugtak? Sa hardin nin Eden, na nangangahulogan “Kawilihan,” o “Dakulang Kaogmahan.” (Genesis 2:8, nota sa ibaba) Malinaw na kabtang kan katuyohan ni Jehova para sa mga tawo an sarong kawiliwili asin nakakaogmang marhay na pamumuhay.

Si Jesus nagwalat sa sato nin sangkap na halimbawa nin sarong timbang na pagmansay sa kawilihan. Sia lubos na dusay sa paghaman kan kabotan ni Jehova, asin dai sia noarin man uminontok sa pamumuhay na kaoyon kan mga ley asin prinsipyo nin Dios. Nagtao sia nin panahon para sa mga nangangaipo, dawa kan sia pagal na. (Mateo 14:13, 14) Iyo, inako ni Jesus an mga imbitasyon sa pagkakan asin nagtaong lugar sa saiyang buhay para sa pahingalo asin pagparepresko. Siempre, aram nia na kinikritikar sia kan nagkapirang kaiwal huli sa paggibo nia kaini. Sinda nagsabi manongod sa saiya: “Uya! Sarong tawong onason asin parainom nin arak.” (Lucas 7:34; 10:38; 11:37) Alagad si Jesus dai naniniwala na ipinupuera kan tunay na debosyon an gabos na kawilihan sa buhay.

Malinaw nanggad, kita madonong kun lilikayan niato an ano man na pagigin sobrang marhay mapadapit sa dibersion. An paggibong pangenot sa buhay an dibersion asin pag-aling-aling dai noarin man makakatao nin tunay na kaogmahan. Iyan puedeng magresulta sa pagpabaya niato sa mas mahalagang mga bagay, kaiba an satong relasyon sa Dios. Pero, dai niato maninigong deharan an satong sadiri kan gabos na kawilihan ni magin mapagkritikar sa iba na naoogma sa buhay sa timbang na paagi.—Eclesiastes 2:24; 3:1-4.

Paghanap nin Kaogmahan sa Timbang na Pamumuhay

Si disipulo Santiago nagsurat: “Kita gabos nasasala nin dakol na beses.” (Santiago 3:2) Tibaad nanonompongan niatong totoo ini sa sato mantang naghihingoa kitang likayan an pagigin sobrang marhay. Ano an makakatabang sa sato na magin timbang? Bueno, maninigo niatong rekonoseron an satong sadiring mga kakosogan asin kaluyahan. An siring na pagigin makatanosan bakong pasil. Tibaad napapasobra na kitang marhay na dai niato naririsa. Kun siring, kita madonong kun kita magdadanay na dayupot sa ibang maygurang na Kristiano asin mahinanyog sa timbang na sadol. (Galacia 6:1) Puede niatong hapoton an sarong pinagtitiwalaan na katood o sarong may kabatidan na magurang sa kongregasyon para sa bagay na iyan. Kaiba an Kasuratan mismo, an siring na hatol na basado sa Biblia puedeng magserbing “salming” para sa sato tanganing helingon kun ano talaga an itsura niato sa atubangan ni Jehova.—Santiago 1:22-25.

Nakakaogma ta dai niato kaipuhan na akoon na sana an buhay na may dai malilikayan na pagigin sobrang marhay. Paagi sa determinadong paghihingoa asin bendisyon ni Jehova, puede kitang magin timbang asin kun siring magin maogmang mga indibiduwal. Sa siring, an satong relasyon sa satong Kristianong mga tugang na lalaki asin babae puedeng umoswag, asin puede ngani kitang magin mas marahay na mga halimbawa para sa mga hinuhulitan niato. Orog sa gabos, maaarog niato nin mas maingat an satong timbang asin mamomoton na Dios, si Jehova.—Efeso 5:1.

[Picture Credit Line sa pahina 28]

©Greg Epperson/age fotostock